Winim Wan Bigfala Trabol Bitim Mak
JAMES GIARRANO I TALEM STORI YA
Taem man mo woman i kam bubu, hemia i givim bigfala glad. Mi wetem woman blong mi Vicki, mitufala i bin wantem tumas blong luk faswan smol bubu blong mitufala. Gel blong mitufala Theresa, wetem man blong hem Jonathan, oli mas gat wan pikinini long stat blong manis Oktoba 2000. Mifala i no save nating se bambae mifala i kasem wan trabol we i bigwan bitim mak.
LONG Sarede, Septemba 23, mi wetem woman blong mi, mo boe blong mitufala wetem woman blong hem, mifala i go spel. Mifala i gat plan blong joen wetem sam narafala famle blong mifala mo spel wan wik long Outer Banks long Not Carolina. Theresa mo Jonathan tufala i talem se bambae tufala i no spel wetem mifala from we klosap Theresa i mas bonem pikinini, mo trip i longfala olsem 11 aoa long trak i stat long ples blong mifala long Ohio.
Mifala i wantem seftem spel blong mifala i go be Theresa i no wantem. Hem i talem se hem i oraet nomo. Mo dokta blong hem tu i talem se ating bambae hem i jes karem pikinini afta tu wik nomo.
Long Wenesde, Septemba 27, 2000, weta i gud tumas. Hemia nao from wanem famle blong mifala i jusum ples ya blong spel evri yia. Mifala i no tingbaot nating se long dei ya, bambae wan trabol i kamaot we i jenisim laef blong mifala fulwan.
“!Mifala i No Save Faenem Theresa!”
Long naet ya, stret brata blong mi long Ohio i toktok i kam long telefon. Voes blong hem i olsem we i fraet mo i seksek. Hem i tekem longtaem blong talem se: “!Mifala i no save faenem Theresa!” Oli singaot polis finis, from we i luk olsem se bisnes ya i narakaen. Taem Jonathan i kambak long haos long aftenun, hem i luk we doa blong haos i no lok. Ti we Theresa i stap dring long moning i stap yet long tebol, mo paos blong hem i stap. Sus we hem i werem oltaem from we leg blong hem i solap, oli stap klosap long doa. Ol samting ya i narakaen.
Long haf pas naen long moning, Jonathan i bin toktok i go long woman blong hem long telefon. Theresa i talem long hem se wan woman i bin kam long haos, mo hem i wantem kambak blong lukluk trak blong tufala we tufala i stap salem. Theresa i talem se bambae hem i goaot blong smoltaem blong pem sam samting. Jonathan i telefon i go long haos long dina, be i no gat ansa. Hem i traem bakegen mo bakegen long aftenun, be i no gat ansa. Taem hem i kasem haos long kwota pas fo long aftenun, hem i luk we trak i no stap. Hem i telefon i go long hospital from we hem i ting se maet Theresa i harem se bambae hem i karem pikinini. Be hem i no stap long hospital. Hem i toktok i go long sam famle long telefon, be i no gat wan long olgeta we oli bin luk Theresa. Hem i wari bitim mak, ale hem i singaot polis. Long 6 klok long sava, polis i faenem trak blong tufala i no longwe long haos blong olgeta. Be oli no faenem Theresa.
Mifala long Not Carolina mifala i sek long nius ya. Mi wetem woman blong mi, mo boe blong mitufala wetem woman blong hem, mifala i fulumap ol bokis blong mifala bakegen mo mifala i aot blong gobak long ples blong mifala. Rod i longfala mo mifala i stap wari tumas. Mifala i ron fulnaet ale mifala i kasem Ohio long nekis moning.
Oli Faenemaot Wanem i Hapen
Long semtaem, Jonathan mo sam famle, sam gudfala fren, mo sam narafala, oli joen wetem polis blong traem faenem Theresa. Olgeta oli wok fulnaet. Oli gohed blong faef dei, mo mifala i stap wari moa evri dei. Long Mande Oktoba 2, oli faenemaot wanem i hapen. Polis i bin faenemaot hu i toktok i kam long Theresa long telefon long Wenesde moning. Wan woman we haos blong hem i no longwe long haos blong Theresa i bin toktok i kam long wan telefon we man i save wokbaot wetem.
Polis i askem plante kwestin long woman ya, oli no trastem hem nating. Long semfala naet ya polis i go luk woman ya bakegen. Be taem oli kam klosap long doa, oli harem we wan masket i faerap. Oli brekem lok long doa, nao oli faenem woman ya i ded. Hem i sutum hem wan bakegen. Oli sapraes blong faenem wan pikinini boe we i jes bon i stap slip long wan rum antap long haos ya. !Pikinini ya i no wekap, nating se i gat plante noes mo trabol!
Be oli no faenem Theresa. Blong plante aoa, polis i jekem evri samting long haos ya blong traem luk sipos hem i bin kam long ples ya. Eli long Tusde moning, oli jekem ples blong putum trak. Long ples ya oli faenem dedbodi blong Theresa long wan gref we i no dip tumas. Biaen, oli faenemaot se wan man i bin kilim hem, mo biaen i sutum hem long baksaed. Hem i ded wantaem nomo. Afta, man ya i katem bel blong hem blong tekemaot pikinini. Taem mifala i tingting bak long bisnes ya, wan samting we mifala i glad long hem, hemia se Theresa i ded wantaem, i no safa.
Polis i karem smol pikinini ya i go long hospital. Oli jekem hem mo oli faenem se hem i strong gud. Oli jekem blad blong hem blong pruvum se hem i smol bubu blong mitufala. Jonathan i putum nem long hem we hem mo Theresa i bin jusum—Oscar Gavin. Pikinini ya we i hevi olsem 4 kilo, i slip long hospital blong smoltaem. Long Tasde, Oktoba 5, papa blong hem i karem hem i go long haos. Mitufala i harem gud tumas long smol bubu ya blong mitufala. Be i no gat tok blong talem olsem wanem mitufala i harem nogud from we Theresa i no stap blong holem hem.
Tingting Blong Ol Man Raonabaot
Mi mo famle blong mi i krae taem mifala i luk olsem wanem ol man oli sapotem mifala. Plante man, mifala i no save olgeta nating. Long ol dei ya we mifala i no save faenem Theresa, plante handred man oli givhan blong lukaotem hem. Plante oli sakem mane. Sam stoa oli prentem plante taosen pepa we mifala i no pem, blong talemaot trabol ya mo askem ol man blong givhan blong faenem Theresa. Mo fulap man oli givim taem blong olgeta blong seremaot ol pepa ya gogo kasem ol ples plante kilometa longwe long haos blong Theresa.
Wan Kristin sista i stap wok blong wan loea long ples ya. Taem hem i harem nogud nius ya hem i wantem givhan. Mifala i glad, mo samting ya i kam wan bigfala blesing long mifala. Loea ya i givhan long mifala long saed blong ol stori we niuspepa i wantem raetem, mo wetem sam samting long saed blong loa. Mo tu, hem i talem long mifala, tu polis we tufala i gat gudhan blong faenemaot ol save long saed blong ol trabol olsem, nao tufala i givhan bigwan long mifala blong rere ol samting blong kot. Bigfala kea we oli soemaot long mifala i rili tajem hat blong mifala.
Afta we oli karem smol bubu blong mitufala i kam long haos, ol man oli givhan moa. Sam stoa oli givim kakae mo ol samting blong haos. Plante man oli givim klos long Oscar wetem ol napkin, tin melek, mo sam pleplei. Mifala i kasem moa samting i bitim wanem we Oscar i save yusum, ale mifala i givim sam long rum blong hospital we ol mama oli karem ol bebi. From we stori ya i kamaot long niuspepa mo televisin, mifala i kasem plante taosen leta mo kad, i no long ol man long ples blong mifala nomo, be long plante narafala ples long wol.
Long Sande, Oktoba 8, mifala i mekem sevis blong berem Theresa. Long taem ya, mifala i luk moa olsem wanem ol man oli givhan long mifala. Mifala i save se plante man oli wantem kam, be namba i bitim samting we mifala i bin tingbaot. Mifala i yusum wan bigfala haos we i stap klosap long haeskul. Haos ya i fulapgud taem 1,400 man oli kam insaed. I gat ol famle, ol fren, sam polis, mea, mo plante narafala man olbaot. Ol man blong niuspepa mo televisin oli stap tu. Ol televisin stesen oli rikodem sevis ya, mo i kamaot long Internet tu. Antap long hemia, plante handred man oli stanap long vranda blong skul ya mo afsaed we oli haed long ambrela from ren mo kolkol. Oli lesin long sevis we i kamaot long ol laodspika afsaed. Sevis ya i givim wan bigfala witnes long saed blong bilif blong mifala we i stanap long Baebol.
Afta, plante handred man oli mekem laen mo wet wetem longfala tingting blong talem sore long mifala. Mifala i stap long ples ya blong klosap tri aoa, mifala i holem mo talem tangkiu long olgeta we oli kam. Afta long sevis ya, wan hotel i mekem kakae blong 300 famle, fren mo sam narafala we oli bin givhan blong faenem smol bubu blong mitufala.
Mifala i no save faenem tok blong talem tangkiu long ol man we oli givhan long mifala, we bighaf blong olgeta oli strenja nomo. Samting ya i mekem tingting blong mifala i strong moa blong joen fulwan long Kristin wok blong prij, from we mifala i luksave se i gat plante gudfala man we yumi mas kasem olgeta wetem gud nius blong Kingdom blong God.—Matiu 24:14.
Wanem We Kongregesen i Mekem
Long stat blong bisnes ya i go, ol Kristin brata mo sista blong mifala oli sapotem mifala fulwan. Olgeta we oli gohed olwe blong givhan long mifala, i no kongregesen blong ol Witnes blong Jeova we mifala i joen long hem nomo, be ol kongregesen raonabaot tu.
Bifo we mifala i kambak long Not Carolina, ol elda long kongregesen blong mifala oli mekem plan finis blong lukaotem Theresa. Plante brata mo sista blong mifala oli tekem spel long wok, blong givhan long mifala. Samfala oli talem long ol bos blong olgeta se oli rere blong lusum pei blong olgeta. Be sam bos oli pem olgeta nating se oli tekemaot sam taem long wok. Long ol dei we mifala i no save faenem Theresa, sam Kristin brata oli stap wetem Jonathan blong mekem se hem i no stap hem wan. Sam brata mo sista oli kam klinim mo stretem ol samting long haos blong mifala. Sam narafala oli givhan blong mekem rere kakae blong ol man we oli wok, mo samfala oli ansa long telefon.
Samwe sikis wik afta we Theresa i ded, woman blong mi mo Jonathan i fesem wan nogud wok. Tufala i mas tekemaot olting blong Theresa long haos. Jonathan i harem se hem i no moa save stap long haos ya we hem mo Theresa i bin stap long hem tugeta. Ale hem i mekem disisen blong salem haos ya. Tufala i harem nogud tumas blong lukluk olting blong Theresa. Evri samting i mekem tufala i tingbaot hem mo olsem wanem tufala i sore long hem. Be, long taem ya tu, ol Kristin brata mo sista oli givhan long mifala. Oli givhan blong fulumap olting blong hem long ol bokis, mo oli mekem sam wok blong fiksimap haos tu blong mekem i rere blong salem.
Samting we i moa impoten, ol Kristin brata mo sista oli givhan long mifala long saed blong bilif mo long saed blong filing. Oli kam luk mifala blong leftemap tingting blong mifala. Plante oli sanem kad mo leta we ol toktok insaed long olgeta i tajem hat blong mifala. Bigfala lav ya we oli soemaot i no gohed blong sam dei no sam wik nomo, be blong plante manis.
Sam Kristin brata mo sista oli talem se sipos mifala i nidim blong toktok wetem wan man, mifala i mas singaot olgeta. Plante taem mifala i mekem olsem. !I gud tumas we yumi save serem ol tingting mo filing blong yumi wetem ol fren we yumi lavem mo trastem! Tru ya, oli bin pruvum gud tok ya blong proveb long Baebol se: “Fren blong yu, oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.”—Ol Proveb 17:17; 18:24.
?I Mekem Wanem Long Famle?
I tru se i no bin isi long mi mo famle blong mi blong winim bigfala traem ya. Samting ya i jenisim laef blong mifala bigwan. Sam samtaem, mi harem mi kros from we Theresa i no moa stap. Mi tingbaot olgeta taem we hem i bin holem mi mo kisim mi.
Woman blong mi i laekem tumas Theresa. I no gat wan dei i pas we tufala i no bin toktok tugeta. Tufala i bin spenem fulap aoa blong toktok tugeta long saed blong pikinini we Theresa bambae i karem. Tufala i bin mekemrere wan rum blong pikinini ya.
Vicki i talemaot ol filing blong hem i se: “Mi mi tingbaot hem tumas. Mi sore we mitufala i no moa save prij tugeta. Mi sore we mitufala i no moa save go long stoa tugeta. Samting we i moa nogud, hemia taem mi luk pikinini blong hem be Theresa i no stap blong holem hem. Hemia i mekem hat blong mi i soa tumas. Mi mi save se hem i lavem tumas Oscar nating se hem i no bon yet. Hem i save se pikinini ya we i stap long bel blong hem i wan boe. Mi somap wan blangket blong pikinini ya, mo taem mi givim long Theresa hem i raetem wan smol kad i kam long mi:
‘Mama,
Tangkiu tumas long naesfala blangket blong pikinini. Mi tangkiu long yu from hadwok blong yu. Mo mi tangkiu bakegen long yu from ol tok we yu bin talem blong givhan long mi mo leftemap tingting blong mi long ol hadtaem we mi kasem long laef blong mi. Bambae mi tingbaot yu olwe mo tangkiu olwe from samting ya. Mi harem samfala oli talem se wan dei yumi gruap mo yumi luksave se beswan fren blong yumi hemia mama blong yumi. Mi mi talem tangkiu long Jeova evri dei se mi no tekem plante yia tumas blong luksave trutok ya. Bambae mi lavem yu olwe.’ ”
Mo tu, mitufala i harem nogud tumas blong luk olsem wanem man blong Theresa i safa. Taem Oscar i stap yet long hospital, Jonathan i mas mekem samting we i strong moa long hem i bitim ol narafala samting. From we hem i tekem disisen blong kam stap smoltaem wetem mitufala, hem i mas muvum olting blong pikinini i kam we hem mo Theresa i bin mekem rere long haos blong tufala. Hem i putum smol hos ya we oli wokem long wud i go long wan bokis, wetem bed blong pikinini, mo ol pleplei blong hem, ale i karem ol samting ya i kam long haos blong mitufala.
Samting We i Givhan Long Mifala Blong Winim Traem Ya
Taem wan we yumi lavem hem tumas i lus long nogud fasin olsem, i gat plante kwestin mo filing we oli mekem tingting blong yumi i fasfas. Mi mi wan Kristin elda, mo plante taem mi bin leftemap tingting blong sam narafala mo halpem olgeta blong kasem save long ol semfala kwestin mo filing. Be taem mi mi lusum Theresa, ol prapa filing blong mi oli mekem tingting blong mi i no moa klia.
Wan samting hemia: taem mifala i aot blong go spel blong wan wik, mi bin askem long Jeova blong lukaot long Theresa, from se klosap nao bambae hem i karem pikinini. Taem oli faenem se wan man i kilim hem i ded, mi talem stret se fastaem mi no kasem save from wanem Jeova i no ansa long prea blong mi. Mi save se Jeova i no promes blong mekem wan merikel blong lukaot long yumi wanwan. Be mi gohed blong prea se Jeova bambae i mekem bisnes ya i kam klia long mi. Naoia mi kasem save se Jeova i stap lukaot gud long ol man blong hem long saed blong bilif, hemia se, hem i stap givim ol samting we yumi nidim blong gohed blong fren wetem hem oltaem. I impoten moa we hem i lukaot gud long yumi olsem, from we samting ya bambae i givim laef blong olwe long yumi. Long fasin ya, Jeova i bin lukaot gud long Theresa. Hem i mekem wok blong God go kasem we hem i ded. Tingting blong mi i stap kwaet naoia from we mi save se laef blong hem long fiuja i stap long han blong Jeova we i gat bigfala lav.
Sam vas blong Baebol oli bin leftemap tingting blong mi bigwan. Hemia sam long olgeta we oli bin givhan long mi:
“God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Longtaem finis i kam, mi mi bilif long promes blong Baebol se ol dedman bambae oli laef bakegen long paradaes long wol ya. Be naoia, promes ya i moa tru long tingting blong mi. Mi save se bambae mi holem Theresa bakegen, mo save ya i givim naf paoa long mi blong gotru ol wanwan dei.
“God ya [Jeova] i God blong man we i laef, hem i no God blong man we i ded. Mo hem i stap luk olgeta man se oli no ded, oli stap laef.” (Luk 20:37, 38) Taem yumi save se ol dedman we bambae oli girap bakegen, oli “stap laef” finis long tingting blong Jeova, samting ya i leftemap tingting blong yumi bigwan. Hem i luk gudfala gel blong mitufala, Theresa, olsem we hem i laef i stap.
Vicki i wantem talem sam vas blong Baebol we oli bin givim paoa long hem:
“ ‘God i no save giaman.’ (Hibrus 6:18; Taetas 1:2) From we Jeova i no save giaman, mi save se bambae hem i holem promes blong hem blong mekem ol dedman oli laef bakegen.
“ ‘I nogud yufala i sapraes long samting ya, from we i gat taem i stap kam we ol dedman bambae oli harem voes blong mi [Jisas], nao bambae oli aot long beregraon [“gref blong rimemba olgeta,” NW ].’ (Jon 5:28, 29) Tok ya “gref blong rimemba olgeta,” i soemaot se Jeova bambae i stap tingbaot Theresa gogo Pikinini blong Hem, Jisas Kraes bambae i mekem hem i laef bakegen. Mi save se i no gat wan ples we i moa sef, we Theresa i save stap long hem, i winim tingting blong Jeova we i stretgud olgeta.
“ ‘I gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.’ (Filipae 4:6, 7) Antap moa, mi prea se Jeova bambae i givim spirit blong hem long mi blong mi save gat paoa. Taem mi harem nogud tumas, mi talem long Jeova se, ‘Mi nidim moa tabu spirit blong yu,’ mo hem i givhan long mi blong gotru long dei ya. Sam samtaem mi no save faenem ol stret tok blong talem long hem, be hem i givim paoa long mi blong stanap strong.”
Yes, Jeova i rili bin givim paoa long mifala blong stanap strong long taem blong bigfala trabol ya bitim mak. I tru, mifala i krae yet from Theresa. Mifala i save se krae blong mifala i no save finis fulwan gogo mifala i save holem hem bakegen long niufala wol we Jeova bambae i mekem i kamtru. Go kasem taem ya, tingting blong mifala i strong bitim bifo, blong gohed blong holemstrong long Jeova. Jonathan i gat strong tingting blong tijim Oscar blong lavem Jeova mo mekem wok blong hem. Mi mo Vicki bambae i givhan long hem long evri rod we mitufala i naf blong mekem. Wetem fulhat blong mifala, mifala i wantem stap long niufala wol blong welkamem Theresa mo soemaot pikinini ya blong hem we hem i no gat janis blong holem yet.
[Tok blong pija long pej 23]
Gel blong mitufala, Theresa, we i stap lesin long hat blong bebi blong hem
[Tok blong pija long pej 25]
Long sevis blong berem Theresa, mifala i harem save olsem wanem ol narafala oli sapotem mifala
[Tok blong pija long pej 27]
Mi wetem woman blong mi Vicki, long mared blong Theresa
[Tok blong pija long pej 27]
Smol bubu blong mitufala, Oscar