Ol Man Blong Ridim Wekap! Oli Talem

Wota Magasin ya “Wota—?Bambae i Gat Naf?” (Jenuware-Maj, 2002) i gat plante gudfala save long hem. Be mi makem wan poen we yufala i talem se, “blong wokem wan tan aean, oli nidim 280 tan wota.” Ating hemia wan mastik. Mi mi wok long saed blong wota, mo mi save se long sam faktri blong wokem aean long India, mifala i lusum 20 kasem 23 tan wota nomo.

N.K.K., India

Ansa blong “Wekap!”: Namba ya we mifala i givim i stap tokbaot hamas wota oli yusum blong wokem aean, be i no hamas wota i ‘lus.’ I luk olsem se bighaf blong ol wota we oli yusum blong wokem aean i no lus, from we oli klinim mo yusum bakegen wota ya. Mifala i sore tumas sipos man we i ridim stori ya i kasem rong mining.

Prea Tangkiu from stori ya “Ol Yangfala Oli Askem . . . ?Olsem Wanem Prea i Save Givhan Long Mi?” (Jenuware-Maj, 2002) Taem mi ridim stori ya long saed blong plante yangfala we oli prea blong kasem paoa blong winim ol trabol blong olgeta, samting ya i pulum mi blong toktok moa wetem Jeova.

D. B., Itali

Stori ya i givhan long mi blong luksave se mi mas kam klosap moa long God. Mi mi gat 16 yia, mo mi luk se laef i strong tumas. I gat plante samting blong pulum mi, mo ol fren tu oli pulum mi. Mi stap tingbaot sipos yufala i save sanem wan Baebol long mi.

M. A., Amerika

Ansa blong “Wekap!”: Ol Witnes blong Jeova oli go luk gel ya mo oli givim wan Baebol long hem.

Mi mi laekem ol tok blong yangfala Paul, we i talem se hem i askem Jeova blong putum pis long tingting blong hem. Oltaem mi askem long Jeova blong givhan long mi blong skelemgud evri haf blong laef blong mi mo ol disisen we mi mas mekem. Naoia bambae mi askem hem blong putum pis long tingting blong mi tu. Yumi save lanem plante samting long ol yangfala blong yumi. Mi mi gat 62 yia finis.

M.P., Ostrelia

Bigfala Trabol Bitim Mak Mi mi sek taem mi ridim stori ya “Winim Wan Bigfala Trabol Bitim Mak.” (Jenuware-Maj, 2002) Mi bin ting se ol samting olsemia oli hapen long ol sinema nomo. Taem mi finisim stori ya, wantaem nomo, mi prea long Jeova blong askem hem blong givhan long Jonathan, Oscar, mo tufala olfala bubu blong Oscar. Ol stori olsem oli wekemap yumi blong yumi mekem bes blong yumi long wok blong Jeova, from we “ol samting we yumi no tingbaot, i save kamaot long yumi enitaem nomo.” —Prija 9:11, NW.

E. P., Itali

Taem mi ridim stori ya blong ol nogud samting we oli kasem Theresa mo famle blong hem, samting ya i tajem gud hat blong mi. Mi wantem tumas we famle blong hem i save se mi mi no save wet blong putum han blong mi i goraon long Theresa long niufala wol we Jeova i promes blong mekem.

L. T., Itali

Blong sikis yia nao, mi mi no wantem tekem disisen blong baptaes. Hemia from we, mi mi no gat strong tingting blong jenisim sam fasin blong mi. Be stori ya blong Theresa i mekem mi mi tingting dip. Mi mi luksave se mi nidim tumas Jeova long laef blong mi, ale mi prea long hem wetem fulhat blong mi. Samting we i kamaot long famle ya i nogud tumas, be stori ya i leftemap tingting blong mi.

M. L., Jek Ripablik

Mi mi sapraes se samting nogud olsem i save kasem wan Witnes blong Jeova. Be stori ya i givhan long mi blong luksave se Jeova i no stap mekem merikel blong protektem yumi. Mi mi no save wetaem maet mi tu mi fesem wan bigfala trabol olsem, be taem mi ridim stori blong strong bilif blong famle blong Theresa, samting ya i givim paoa long mi blong stanap strong agensem ol hadtaem.

S. O., Japan