Baebol i Talem Wanem
?Ol Kristin Oli Save Ting Se God i Mas Protektem Olgeta?
Baebol i tokbaot olsem wanem God i protektem plante man we oli wosip long hem. King Deved i talem se: “Hae God. Plis yu tekemaot mi long han blong ol man nogud. Plis yu blokem ol man blong faet oli no kam long mi, mo yu lukaot gud long mi.” (Ol Sam 140:1) Tede, plante man blong God klosap oli ded no oli karem bigfala kil, taem raf fasin i kamaot, taem ol man blong brekem loa oli kilim olgeta, mo taem i gat hariken no graon i seksek bigwan. Samfala we oli laef tru long ol samting ya, oli ting se maet God i bin mekem wan merikel blong protektem olgeta, from we long sam narafala taem ol man blong God oli bin lusum laef blong olgeta, no oli kasem bigfala trabol.
?OLSEM wanem? ?Jeova God i save protektem samfala man be i letem sam narafala oli lus? ?Yumi save ting se Jeova i mas mekem wan merikel blong protektem yumi long taem blong raf fasin no wan disasta?
Ol Merikel Blong Protektem Man We Baebol i Tokbaot
Baebol i tokbaot plante merikel we God i mekem blong sevem ol man blong hem. (Aesea 38:1-8; Ol Wok 12:1-11; 16:25, 26) Mo Baebol i tokbaot sam man blong Jeova we hem i no sevem olgeta long taem blong bigfala trabol. (1 King 21:1-16; Ol Wok 12:1, 2; Hibrus 11:35-38) Ale, i klia se, Jeova i save jusum blong protektem wan man from wan spesel risen. Taswe, taem wan Kristin i no save faenem rod blong kamaot long traem we i kasem hem, hem i no mas ting se God i lego hem. Nogat. Yumi mas luksave se sam nogud samting bambae oli mas kasem ol gudfala man blong Jeova tu. ?From wanem i olsem?
?From Wanem Ol Nogud Samting Oli Kasem Ol Man Blong God Tu?
Wan risen, hemia from we yumi evriwan i kasem sin blong Adam mo Iv. Taswe, yumi save harem i soa, yumi safa, mo yumi ded. (Rom 5:12; 6:23) Narafala risen se, yumi stap long ol las dei. Baebol i talem se ol man long taem blong yumi, “bambae oli no man blong gat sore long man, mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem.” (2 Timoti 3:1-5) Ol man we oli fosem woman, stilim pikinini, kilim man i ded, mo mekem ol narafala raf fasin, oli stap kam plante moa. Samting ya i pruvum se tok ya blong Baebol i tru.
Ol raf man oli stap raonabaot long ol gudfala man blong God evri ples, long haos mo long wok tu. Sam long ol raf man ya oli wantem spolem ol man blong God nomo. Sipos i no hemia, be maet yumi stap long wan ples, nao yumi sek we wan samting i kamaot we i mekem denja long laef blong yumi. Mo tu, yumi luk se tok blong Solomon i tru, se “samting we yumi no tingbaot, i save kamaot long yumi enitaem nomo.”—Prija 9:11, NW.
Aposol Pol i talem tu se ol man bambae oli mekem trabol long ol Kristin from we oli wosip long God. Hem i se: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:12) Yumi luk se samting ya i kamaot long plante kantri long ol yia we oli jes pas.
Taswe, ol man we oli onagud long God oli no save ronwe long raf fasin, fasin blong brekem loa, ol disasta, no wan akseden we oli save ded from. Setan i bin talem se Jeova i stap putum wan fenis i goraon long ol man blong Hem, blong trabol i no kasem olgeta. (Job 1:9, 10) Tok ya i giaman. Be yumi save sua se Jeova i stap protektem ol man blong hem, nating sipos i no mekem wan merikel blong sevem olgeta.
?Olsem Wanem Jeova i Stap Protektem Ol Man Blong Hem Tede?
Tok blong Jeova i stap protektem ol man blong hem, from we hem i lidimgud olgeta. Man we i strong long bilif mo i gat plante save blong Baebol, hem i naf blong skelemgud ol samting, mo hem i gat stret tingting. Samting ya i save givhan long hem blong mekem ol waes disisen mo blong no mekem ol bigfala mastik. (Ol Sam 38:4; Ol Proveb 3:21; 22:3) Tingbaot advaes blong Baebol long saed blong fasin blong slip olbaot, griri fasin, fasin kros, mo raf fasin. Ol advaes ya i bin blokem plante Kristin blong oli no kasem bigfala trabol. Mo tu, from we yumi no stap fren wetem ol rabis man, yumi no joen wetem olgeta long ol ples we bigfala trabol i stap kasem olgeta. (Ol Sam 26:4, 5; Ol Proveb 4:14) Olgeta we oli folem ol rul blong Baebol, oli gat wan gudfala fasin blong laef, mo samting ya i save mekem se oli no kasem plante sik long bodi mo long tingting blong olgeta.
Yumi haremgud blong save se, sipos God i letem wan nogud samting i hapen long ol man blong hem, bambae hem i givhan long olgeta blong oli naf blong stanap strong. Aposol Pol i promes se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.” (1 Korin 10:13) Baebol i tokbaot ‘paoa ya we i bigwan tumas i blong God, i no blong yumi,’ mo i promes se paoa ya bambae i givhan long yumi blong stanap strong long taem blong bigfala trabol.—2 Korin 4:7.
God Bambae i Mekem Samting We Hem i Wantem
?Ol Kristin oli save ting se God i mas mekem wan merikel blong sevem olgeta long evri disasta? Baebol i no sapotem tingting ya.
Jeova God i save jus blong mekem wan samting blong sevem wan man blong hem sipos hem i wantem. Mo sipos wan man i bilif se God i bin sevem hem, yumi no mas daonem man ya. Be taem Jeova i jusum blong no mekem wan samting, yumi no mas ting se hem i no glad long yumi.
Yumi save bilif strong se, nomata wanem traem no trabol i kasem ol gudfala man blong Jeova, bambae hem i protektem olgeta. Maet hem i tekemaot traem ya, no maet hem i givim paoa long yumi blong stanap strong. Sipos yumi ded from, bambae hem i save mekem yumi laef bakegen long niufala wol, blong yumi kasem laef we i no save finis.—Ol Sam 37:10, 11, 29; Jon 5:28, 29.