Gudfala Frut Taem Yangfala i No Fraet Blong Prij

PLANTE YANGFALA WITNES BLONG JEOVA OLI GIVIM gudfala eksampol long ol narafala taem oli no fraet blong tokbaot bilif blong olgeta. Tingbaot gel ya Stella, we hem i blong Salonika, Gris. Hem i talem se: “Long wan Kristin miting blong mifala, oli tokbaot olsem wanem mifala i save yusum ol video kaset blong halpem ol narafala blong save Jeova. Ale, mi tingbaot wan rod blong yusum video kaset ya, Jehovah’s Witnesses—The Organization Behind the Name. Long nekis dei, mi go luk hed tija long skul, mo mi askem long hem sipos mi save soem video kaset ya long skul. Hem i talem se, sipos ol narafala tija oli agri, hem i glad nomo. Mi mi sapraes long toktok ya blong hem.

“Biaen, long sem dei, hed tija ya i kam luk mi, i talem se mi save soem video kaset ya long nekis wik, be afta we skul i finis nomo. Mi mi harem nogud, from we mi ting se ol yangfala long klas bambae oli no glad blong tekem taem afta skul blong lukluk video kaset ya. Be nating, long nekis dei, mi singaot olgeta evriwan oli kam. Oli glad tumas, mo i no olgeta nomo we oli kam, be oli singaot plante yangfala long ol narafala klas tu. Sikis tija, wetem wan we i tijim ol bilif blong jos, oli kam blong lukluk kaset ya tu.

“Evriwan oli lesingud. Afta, hed tija i askem long mi blong tekem smoltaem blong ansa long ol kwestin blong olgeta. Plante studen oli laekem tumas haf blong kaset ya we i tokbaot ol man mo woman we oli wok long hedkwota blong ol Witnes blong Jeova, be oli no kasem pei from. Wan studen i talem se: ‘!Nating se oli no kasem pei, be oli wok wetem glad nomo!’

“Mi tokbaot ol buk blong mifala we oli stanap long Baebol. Mo tu, mi givimaot Kingdom Nius No. 36, ‘Niu Mileniam—?Wanem Fiuja Blong Yu?’ Hed tija i askem long mi blong givim sam moa kopi long hem, blong hem i save givimaot long ol tija we oli no kam blong lukluk kaset ya.

“Biaen, plante studen oli tokbaot kaset ya long ol fren blong olgeta. Mi mi glad we mi bin tekem janis ya blong givim witnes. Naoia, ol yangfala long klas, oli soemaot moa respek long mi. !Be samting we i moa impoten se, oli gat respek long God ya we mi mi wosip long hem!”