Wan Niufala Video Blong Statem Baebol Stadi

Plante man oli stap go long Websaet ya jw.org, blong wajem wan sot video we nem blong hem, ?From Wanem Yu Mas Stadi Baebol? Video ya i blong pulum ol man we oli intres, blong oli wantem stadi Baebol fri nomo. Yu save luk video ya, taem yu klik long “Askem Baebol Stadi” long en blong fas pej. Sipos no yu save skanem QR (quick response) code we oli printim biaen long ol niufala traket. Hemia sam rod we yu save folem blong yusum gud video ya.

Taem yu gobak blong luk wan man, yu save askem long hem se: “?Yu yu glad sipos mi soem wan sot video long yu we i eksplenem, olsem wanem yu save kasem ansa blong ol kwestin we yu gat long Baebol?” Sipos hem i glad, yu soem video ya long mobaelfon no tablet blong yu, no long laptop blong hem.
Sipos yu tekem janis blong prij long ol pablik ples, mo yu yusum wan long ol niufala traket, i gud yu soem QR code ya long man. Mo yu leftemap tingting blong hem blong i skanem code ya long mobaelfon, no tablet blong hem. Long plante lanwis, code ya i lidim man i go stret long Websaet we video ya i stap long hem. Taswe, yu save skanem code ya long semtaem ya, blong soem video ya long hem.
I gud yu tokbaot video ya long ol man we oli wok wetem yu, ol fren long skul, ol famle, mo ol narafala. Yu save soem video ya tu long olgeta. No maet yu save sanem adres blong video ya long imel, mo yu talem long olgeta blong oli lukluk.

Taem yu yusum gud niufala video ya, yu save statem plante Baebol stadi, mo yu save givhan long olgeta we oli stret “blong kasem laef we i no save finis.”—Wok 13:48.