Ol Man Blong Ridim Wekap! Oli Talem

Weta Mi raetem leta ya blong talem tangkiu from Wekap! ya “?Wanem i Stap Hapen Long Weta?” (Jenuware-Maj, 2004) Mi sapraes taem mi ridim haf ya we i se, “Nating se ol disasta ya oli mekem bigfala trabol mo wari, oli save mekem wan gudfala samting tu.” Biaen mi agri long tok ya, taem mi ridim nekis haf we i se, “Oli save pulum ol man blong soem lav mo givgivhan long olgeta.” Evri dei, yumi kasem plante kaen trabol, i no ol disasta nomo. Bambae mi traem tingbaot oltaem se, nomata wanem samting i hapen, i gat wan gudfala samting i save kamaot long hem.

S. T., Japan

Halpem Narafala Long Taem Blong Disasta Mi ridim haf ya “Samting We Bigfala Ren i No Save Karemaot.” (Jenuware-Maj, 2004) Fasin blong ol Witnes blong Jeova long taem blong ol disasta ya, i mekem mi mi glad tumas blong stap long ogenaesesen ya. Tangkiu blong raetem ol stori olsem, we oli givhan long mifala blong soemaot ol fasin we bigfala ren i no save karemaot.

M. P., Itali

Mi bin pastru long plante disasta, taem bigfala wota i ron mo graon i seksek bigwan. Long 1989, mi stap prij long olgeta haos, nao graon i seksek bigwan. !Wan boe we i gat 14 yia i stap folem mi, ale hem i fraet mo i ronwe! Mi holem han blong hem mo mi prea wetem hem blong mekem fraet i godaon. Sam seken nomo i pas, nao ol rop blong lektrik oli stat folfoldaon raon long mitufala. !Ol man oli fraet bitim mak! Floa blong haos blong mi we i simen, hem tu i brok bigwan. Be long semfala aftenun ya, mifala i go prij bakegen, blong givhan long ol narafala man we oli harem nogud. !Yes, stori ya i mekem mi mi tingtingbak long taem ya!

B. S., Yunaeted Stet

Tangkiu blong wokem ol gudfala stori we oli leftemap tingting, olsem “Samting We Bigfala Ren i No Save Karemaot.” Taem mi ridim stori ya, wota i ron long ae blong mi. Tru ya, i no gat wan bigfala ren we i save karemaot lav blong yumi long ol Kristin brata sista blong yumi, mo lav ya we i pulum yumi blong tingbaot ol man raonabaot long yumi i bitim we yumi tingbaot yumi wan.

I. A., Japan

Sin We God i No Save Fogivim Mi no save faenem stret toktok blong talem tangkiu long Jeova from haf ya, “Baebol i Talem Wanem: ?I Gat Wan Sin We God i No Save Fogivim?” (Julae-Septemba, 2003) Longtaem finis i kam, mi mi stap lukaot save long kwestin ya. Mi bin traehad blong faenem mining blong Hibrus 10:26. Mi bin ting se hem i minim ol 144,000 nomo we bambae oli go long heven. Tangkiu tumas blong kliarem poen ya.

R. A. P., Gana

Ol Proveb Blong Afrika Mi sapraes oltaem long ol defdefren stori we oli stap long Wekap! Mi mi ridim buk ya long ol 40 yia we i pas, mo mi laekem tumas stori ya “Ol Proveb Blong Ol Man Akan​—Oli Soemaot Ol Rul We Oli Folem.” (Julae-Septemba, 2003) Hem i givhan long mi blong luksave se sipos yumi wantem joengud wetem ol narafala, yumi mas soem gudfala fasin long olgeta. Mi raetemdaon sam long ol proveb ya, mo mi stap ridim olgeta bakegen mo bakegen.

D. Z., Yunaeted Stet

Stori ya i mekem mi mi laf, i tijim mi, mo mi haremgud long hem bitim ol narafala stori we mi bin ridim long saed blong ol proveb. Mi mi glad tumas blong tingting long fasin blong ol man long kantri ya. Afta we mi ridim wan proveb, mi stop smol mo mi traem talem mining blong hem. !Be, olsem yu save finis, plante taem mi no talem stret mining!

J. K., Jemani