Long Yufala We i Ridim Magasin Ya
STAT wetem magasin blong Jenuware long yia ya, stael blong Wekap! bambae i jenis smol. Sam samting bambae oli defren lelebet, be bighaf bambae i stap sem mak.
Wekap! i wantem yet blong kasem mak ya we hem i holem blong plante yia finis. Olsem oli talem long pej 4, oli wokem magasin ya blong “givhan long evriwan long famle.” Wekap! i givim nius blong ol samting we oli stap hapen long wol, hem i tokbaot ol fasin blong ol man long ol defren ples long wol, i tokbaot ol nambawan samting we God i wokem raonabaot long yumi, i givim sam save long saed blong helt mo smol save long saed blong saens long man we i no save ol samting ya. Yes, Wekap! bambae i gohed blong givim save long ol man we oli ridim, mo bambae i mekem tingting blong olgeta i wekap long saed blong ol samting we i stap long wol raonabaot long yumi.
Long Wekap! blong Ogis 22, 1946, yumi save ridim tok ya se: “Haefala mak we magasin ya bambae i traehad blong kasem hemia blong fasgud long wanem we i tru.” Folem promes ya, oltaem nomo Wekap! i bin traem bes blong hem blong givim ol save we oli gat pruf long hem. Blong kasem mak ya, ol man we oli raetem ol wanwan stori insaed long magasin ya oli lukaot plante save mo oli jekemap evri save ya blong meksua se oli stretgud. Be magasin ya i “fasgud long wanem we i tru” long wan rod we i moa impoten.
Oltaem nomo Wekap! i bin pulum ol man i go long Baebol. Be stat wetem magasin blong Jenuware long yia ya, Wekap! bambae i pulum tingting blong man i go moa long Baebol i bitim bifo. (Jon 17:17) Mo tu, Wekap! bambae i gohed blong givim ol advaes blong Baebol we oli save halpem yumi blong harem gud long laef naoia mo mekem yumi naf blong winim ol problem. Olsem nao, bambae magasin ya i gohed blong karem ol haf ya “Ol Yangfala Oli Askem . . .” mo “Baebol i Talem Wanem” we oli stap givim gudfala advaes mo save blong Baebol. Mo olsem oltaem, Wekap! bambae i gohed blong pulum tingting blong ol man i go long promes we i stap long Baebol se i no longtaem bambae God i tekemaot ol rabis fasin blong wol mo bambae i wokem wan niufala wol we pis i stap long hem.—Revelesen 21:3, 4.
?Wanem samting moa we bambae i jenis? Stat long manis ya, long klosap 82 lanwis, Wekap! bambae i kamaot wan taem wan manis (bifo Wekap! i bin kamaot tu taem wan manis long plante lanwis).a Wan haf we i bin kamaot long Wekap! stat long 1946 finis, hemia we oli kolem “Sam Nius Blong Wol,” naoia bambae i kamaot long wan pej nomo i no moa tu pej. Ale long pej 31 bambae i gat wan niufala haf, hemia “?Bambae Yu Yu Ansa Olsem Wanem?” ?Wanem i stap long niufala haf ya, mo olsem wanem yu save yusum?
Tekem smoltaem blong lukluk pej 25 long magasin ya. I gat sam haf we oli stret long ol yangfala mo pikinini. Sam narafala haf bambae oli traem save blong ol man we maet oli lanem fulap samting finis long saed blong Baebol. Blong olgeta ya nao i gat haf ya se “?Samting ya i Hapen Wetaem?” Ol save we bambae oli kamaot long haf ya oli save halpem yu blong save ol yia we ol defdefren man long Baebol oli bin laef long hem, mo long wanem yia tu ol impoten samting oli bin hapen. Ansa blong ol kwestin we oli stap long haf ya “Long Magasin Ya” yu save faenem taem yu ridim ol wanwan stori insaed long magasin. Be ansa blong ol narafala kwestin bambae i stap long wan pej insaed long magasin, mo bambae oli putum long smol raeting nomo daon long pej. I gud yu traem lukaot save we i givim ansa blong ol kwestin ya bifo we yu ridim ansa we i stap, nao yu save serem samting we yu lanem wetem narafala. Maet yu laekem tu blong yusum niufala haf ya “?Bambae Yu Yu Ansa Olsem Wanem?” blong storebaot Baebol taem yu joen wanples wetem famle blong yu no wetem ol fren.
Samwe long 60 yia bifo, Wekap! i bin mekem promes ya: “Magasin ya bambae i traem tokbaot ol samting we i laenap wetem tingting blong ol man long evri ples long wol, i bitim tingting blong ol man long wan ples nomo. Toktok blong hem i stret long ol man we oli rili wantem save trutok, nomata oli blong wanem kantri. . . . Ol storian mo nius we oli stap long magasin ya . . . bambae i givim save, tijim mo pulum intres blong olkaen man, yangfala mo olfala sem mak.” Olgeta we oli ridim Wekap! raon long wol oli agri se magasin ya i bin holem promes ya we hem i bin mekem. Mifala i wantem mekem yufala i save se bambae hem i gohed yet blong holem promes ya.
Olgeta we oli wokem Wekap!
[Futnot]
a Long sam lanwis, olsem Bislama, Wekap! i stap kamaot fo taem nomo long wan yia. From samting ya, maet sam samting we yumi tokbaot long ples ya oli no kamaot long evri Wekap! long ol lanwis ya.
[Tok blong pija long pej 3]
Long 1919, nem blong magasin ya hemia “The Golden Age”, nem ya i jenis long 1937 i kam “Consolation,” mo i jenis bakegen long 1946 i kam “Awake!” (long Bislama “Wekap!”)
[Tok blong pija long pej 4]
Longtaem finis i kam, Wekap! i pulum tingting blong ol man i go long Baebol
[Credit Line]
Guns: U.S. National Archives photo; starving child: WHO photo by W. Cutting