“?Bambae Yu Yu Ansa Olsem Wanem?”
1. ?Wanem samting we plante blong yumi i faenem i hadwok?
1 ?Olsem wanem? ?Yu yu laekem Tok blong God be yu luk se i hadwok blong tingbaot ol smosmol samting long saed blong ol stori blong Baebol? ?Yu luk se i had blong faenem vas blong Baebol we yu stap tingbaot? ?Yu yu wantem se ol pikinini blong yu oli kasem stret save long ol stori mo tijing blong Baebol? Pej ya “?Bambae Yu Yu Ansa Olsem Wanem?” we i kamaot evri manis long Wekap! (Franis/Inglis) long pej 31, i save givhan long ol yangfala mo ol olfala tu blong oli kasem moa save long Tok blong God.—Wok 17:11.
2. ?Olsem wanem yumi save yusum ol defdefren haf we oli stap long pej ya “?Bambae Yu Yu Ansa Olsem Wanem?”
2 ?Olsem wanem yu save yusumgud pej ya? Long Wekap! blong Jenuware 2006, oli givim advaes ya se: “Tekem smoltaem blong lukluk pej 25 (pej 31 Franis/Inglis) . . . I gat sam haf we oli stret long ol yangfala mo pikinini. Sam narafala haf bambae oli traem save blong ol man we maet oli lanem fulap samting finis long saed blong Baebol. Blong olgeta ya nao i gat haf ya se ‘?Samting ya i Hapen Wetaem?’ Ol save we bambae oli kamaot long haf ya oli save halpem yu blong save ol yia we ol defdefren man long Baebol oli bin laef long hem, mo long wanem yia tu ol impoten samting oli bin hapen. Ansa blong ol kwestin we oli stap long haf ya ‘Long Magasin Ya’ yu save faenem taem yu ridim ol wanwan stori insaed long magasin. Be ansa blong ol narafala kwestin bambae i stap long wan pej insaed long magasin, mo bambae oli putum long smol raeting nomo daon long pej. I gud yu traem lukaot save we i givim ansa blong ol kwestin ya bifo we yu ridim ansa we i stap, nao yu save serem samting we yu lanem wetem narafala. Maet yu laekem tu blong yusum niufala haf ya ‘?Bambae Yu Yu Ansa Olsem Wanem?’ blong storebaot Baebol taem yu joen wanples wetem famle blong yu no wetem ol fren.”
3. ?Pej ya i givhan olsem wanem long sam famle? ?Wanem haf nao we yu yu laekem moa?
3 Yes, plante famle oli laekem blong yusum haf ya long famle stadi. Wan mama i raetem se: “Mi mo man blong mi, mitufala i ting se i gud blong joenem haf ya ‘Pija We Ol Pikinini Oli Mas Faenem’ (Franis/Inglis) i go insaed long famle stadi blong mifala. Hemia i mekem smol gel blong mitufala, we i gat tri yia blong hem, i intres mo i laekem famle stadi. Mitufala i glad tumas blong luk hem taem i tekem Wekap! blong hem mo i openem i go long evri pej blong faenem pija we hem i stap lukaotem.” Wan papa long Brasil i talem se: “Mi mo boe blong mi we i gat seven yia blong hem, mitufala i laekem tumas pej ya blong Wekap! Pej ya i givhan long Moises blong i lesingud, i faenem ol vas blong Baebol, i kasem save long ol pija, mo i kasem save se ol stori blong Baebol oli hapen wetaem.” Ashley, we i gat eit yia blong hem, i raetem se: “Tangkiu from haf ya ‘?Bambae Yu Yu Ansa Olsem Wanem?’ we i stap long laswan pej blong Wekap! Haf ya i givhan long mi blong lanem plante samting long saed blong Baebol.”
4. ?Olsem wanem wan famle i save yusum pej ya long famle stadi?
4 I gud we samtaem yu yusum pej ya “?Bambae Yu Yu Ansa Olsem Wanem?” long famle stadi. Yu save yusum Index no Watchtower Library we i stap long CD-ROM blong faenem ansa blong ol kwestin we oli had moa. Sipos yu mekem olsem, bambae yu tijim ol pikinini blong yu blong oli save olsem wanem blong lukaotem save. Sipos yu gat ol pikinini we oli bigwan finis, i gud we sam dei bifo long famle stadi, yu askem long olgeta blong oli traem faenem ansa blong haf ya “?Mi Mi Hu?” no “?Samting Ya i Hapen Wetaem?” Oli save tokbaot save we oli faenem long taem blong stadi. Sipos ol papa mama oli yusumgud pej ya, hemia wan rod blong tijim ol pikinini blong olgeta long Tok blong God, blong givhan long olgeta blong oli save long “ol tok blong Baebol” taem oli smol nomo.—2 Tim. 3:15; Dut. 6:7.