Man i Kilim Woman—Wan Problem Long Fulwol

NOVEMBA 25, hemia dei we oli putum blong olgeta man long wol oli tingbaot olsem wanem blong winim trabol ya we man i kilim woman. Long yia 1999, Jenerol Asembli blong Yunaeted Neson i agri long dei ya, blong halpem ol man blong luksave raet blong ol woman mo ol samting we ol man oli mekem agensem olgeta. ?From wanem oli nidim wan dei olsem?

Long plante kantri, ol man oli luk ol woman olsem we oli daon moa long olgeta, oli no impoten. Ol tingting ya agensem woman oli stat longtaem finis i kam. I gat plante defren kaen fasin blong kilim woman, mo problem ya i stap gohed oltaem long evri ples blong wol, mo long ol rij kantri tu. Man ya we bifo hem i sekretari-jenerol blong Yunaeted Neson, nem blong hem Kofi Annan, i talem se: “Trabol ya we man i kilim woman i stap long evri ples blong wol, long olgeta grup blong man mo long ol defdefren kalja. Trabol ya i spolemgud ol woman, nomata se oli gat wanem kala blong skin, oli kamaot long wanem kantri, oli gat haenem no oli no gat, oli bon long wanem ples, mo ol narafala samting olsem.”

Wan woman, nem blong hem Radhika Coomaraswamy, we fastaem hem i wok blong wan haf blong Yunaeted Neson we i lukluk long raet blong ol man, hem i mekem wan spesel ripot long saed blong trabol ya we man i kilim woman. Hem i talem se long tingting blong plante woman, taem man i kilim olgeta, i “tabu blong tokbaot samting ya, i wan samting we oli mas haedem, mo wan samting blong sem we oli mas lan long hem nomo.” Long kantri ya Holan, wan grup we i lukluk long saed blong olgeta we narafala i mekem i nogud long olgeta, i talem se long wan kantri long Saot Amerika, taem oli kaontem 4 woman, be wan long olgeta (hemia 23 pesen blong olgeta woman long kantri ya) i kasem raf fasin long haos blong hem nomo. Samting ya i sem mak long Yurop. Kaonsel blong Yurop i talem se taem oli kaontem 4 woman be 1 long olgeta i kasem raf fasin long haos blong hem nomo. Hom Ofis blong gavman blong Briten tu i talem se long Inglan mo Wels, long wan yia, evri wik tu woman oli ded from raf fasin. Maet man we i stap wetem woman i kilim hem, no maet man we i bin stap wetem hem fastaem finis, i kilim hem. Wan niuspepa long India (India Today International) i talem se: “Oltaem ol woman long olgeta ples blong India oli fraet, from we long evri kona, evri rod, evri pablik ples, mo long enitaem long dei mo naet, oli save fesem problem ya we man i repem olgeta.” Wan grup we i lukluk long raet blong ol man (Amnesty International) i talem se trabol ya we man i kilim woman mo gel tede, “hem i problem we i bigwan moa mo i stap long plante moa ples i bitim ol narafala problem we oli agensem raet blong man.”

?Olsem wanem? ?Ol ripot ya oli soemaot tingting we God i gat long saed blong ol woman? Bambae yu luk ansa blong kwestin ya long nekis haf.