‘Ol Woman We Oli Stap Hadwok Tumas Blong Masta Blong Yumi’

“Mi talem halo long tufala woman ya, Trifaena mo Trifosa, we tufala i stap . . . hadwok tumas blong Masta blong yumi.”​—⁠ROM 16:12.

1. ?Olsem wanem minista wok blong Jisas long wol i karem blesing long ol woman?

MINISTA wok blong Jisas long wol, tru, hem i wan blesing long ol woman Jyu long taem blong hem. Wok we hem i statem bambae i save mekem ol woman long ol defren laen mo kala, oli harem gud. Bambae hem i givim hop mo gudnem long ol woman ya. Jisas i no folem ol kastom blong skul blong ol man Jyu, we oli “mekem tok ya blong God i nating nomo.” (Matyu 15:⁠6) Plante long ol kastom ya oli agensem ol raet we God i givim long ol woman.

Tingting Blong Jisas Long Ol Woman

2. ?From wanem yumi save talem se tingting blong Jisas long ol woman i defren long tingting blong ol narafala man long taem blong hem?

² !Tingting blong Jisas long ol woman i narakaen olgeta long tingting blong ol lida blong skul blong ol man Jyu! Wan buk (Encyclopaedia Judaica) i talem se ol lida blong skul blong ol man Jyu oli ting se ol woman oli “griri, oli haed blong lesin long toktok blong ol narafala, oli les, mo oli jelas.” Ol lida ya oli no glad taem man i storeyan wetem woman. Mo “sipos man we i skul gud i toktok wetem woman long pablik ples, hemia i samting blong sem.” (Jerusalem in the Time of Jesus, we Joachim Jeremias i raetem; skelem wetem Jon 4:27.) Yumi save talem plante samting moa blong soemaot we ol lida blong skul blong ol man Jyu oli ting nogud long ol woman. Be ol samting we yumi jes tokbaot oli naf blong soemaot se tingting blong Jisas long ol woman hem i defren olgeta long tingting blong ol narafala man long taem blong hem.

3. ?Wanem sam samting we oli kamaot long minista wok blong Jisas we oli soemaot se hem i rere blong tijim ol woman long ol dip trutok long saed blong speret?

³ Jisas i givim nambawan eksampel olsem wanem ol man oli save fren wetem ol woman, be long fasin we i klin. Hem i toktok wetem olgeta. Mo hem i tijim olgeta long ol dip trutok long saed blong speret tu. Taem Jisas i talemaot long klia ples se hem i Mesaea, hem i talem samting ya long wan woman nomo fastaem. Mo woman ya i wan woman Sameria. (Jon 4:​7, 25, 26) Antap moa, store blong Mata mo Meri i soemaot klia se tingting blong Jisas i defren long tingting blong ol lida blong skul blong ol man Jyu. Jisas i no agri long tingting ya se woman i no gat raet blong livim wok blong kuk long kijin blong smoltaem blong kasem moa save long saed blong speret. Long taem ya, Meri i putum ol samting long saed blong speret long fas ples. Taswe Jisas i talem se hem i “jusumaot stret samting ya finis.” (Luk 10:​38-42) Be sam manis biaen, brata blong tufala i ded. Nao long taem ya, i no Meri we i soemaot moa se hem i wantem tumas blong luk Masta blong hem. Mata nomo i mekem samting ya !Tede yumi harem gud yet taem yumi ridim storeyan blong Jisas wetem Mata long ol dip samting blong speret long saed blong laef bakegen! (Jon 11:​20-27) !Storeyan ya i wan bigfala blesing long Mata!

Ol Woman We Oli Givhan Long Jisas

4, 5. ?Wetem ol aposol blong hem, hu bakegen i biaen long Jisas long minista wok blong hem long Galili? ?Olsem wanem oli givhan long hem?

⁴ Taem Jisas i wokbaot blong mekem minista wok blong hem, hem i letem ol woman oli givhan long hem tu. Gospel blong Mak i talem se “olgeta ya [ol woman ya] oli biaen long Jisas long Galili, oli stap givhan long hem long ol samting.” (Mak 15:​40, 41) ?Hu ya ol woman ya? ?Mo olsem wanem oli givhan long Jisas? Yumi no save nem blong olgeta evriwan. Be Luk i talemaot nem blong sam long olgeta mo i eksplenem olsem wanem oli givhan long Jisas.

⁵ Luk i talem se: “Biaen long ol samting ya, Jisas i stap wokbaot, i stap pas raon long ol taon mo velej. Nao hem i stap prij, mo i stap talemaot gud nyus ya [blong Kingdom blong God, NW]. Mo long taem ya, ol twelef man blong hem oli biaen long hem. Mo i gat sam woman tu oli biaen long hem, we bifo oli gat sik, no oli gat devel i stap long olgeta, nao Jisas i bin mekem olgeta oli gud bakegen. Hemia nem blong ol woman ya. I gat Meri ya we oli kolem Meri woman Magdala, we Jisas i bin ronemaot seven devel long hem. Mo i gat Joana, woman blong Jusa, we hem i man blong lukaot long ol bisnes blong King Herod. Mo i gat Susana, mo plante narafala woman tu oli stap, mo ol woman ya oli stap yusum ol mane blong olgeta blong givhan long Jisas wetem ol man blong hem.” (Luk 8:​1-3) Jisas i glad we ol woman ya oli biaen long hem, mo oli stap yusum ol mane blong olgeta blong lukaot long ol nid blong hem mo ol aposol blong hem, long saed blong bodi.

6. (a) ?Hu i folem Jisas long laswan trep blong hem long Jerusalem? (b) ?Hu i sapotem Jisas gogo hem i ded? ?Olsem wanem sam long olgeta oli kasem blesing from? (c) ?Taem yumi tingbaot kastom blong skul blong ol man Jyu, olsem wanem store blong Jon 20:​11-18 i gud tumas?

⁶ Taem oli nilim Jisas long pos, “i gat plante woman long ples ya, oli stap stanap longwe lelebet, oli stap lukluk hem. Olgeta ya oli aot long Galili, oli biaen long Jisas, mo oli stap givhan long hem. Long olgeta ya, i gat Meri ya we i woman Magdala, mo Meri ya we i mama blong Jemes mo Josef.” (Matyu 27:​55, 56) Olsem nao, plante gudfala woman blong bilif oli sapotem Jisas long taem blong ded blong hem. Mo tu, yumi save tingbaot we taem Jisas i laef bakegen, sam woman oli luk hem fastaem long ol narafala man. (Matyu 28:​1-10) Samting ya i agensem kastom blong ol man Jyu bigwan. From we long loa blong skul blong ol man Jyu ol woman oli no naf blong wetnes long wan samting. Traem holem poen ya long tingting blong yu, nao ridim Jon 20:​11-18. Nao traem tingbaot strong filing blong Meri, woman Magdala, taem Masta blong hem we i laef bakegen long ded, i kamtru long hem, i singaot prapa nem blong hem, mo i yusum hem olsem wan wetnes blong talemaot long ol disaepol blong hem se hem i rili laef bakegen.

Ol Kristin Woman Blong Bilif, Afta Long Pentekos

7, 8. (a) ?Olsem wanem yumi save se sam woman tu oli kasem tabu speret long Pentekos? (b) ?Olsem wanem ol Kristin woman oli givhan blong mekem Kristin tijing i go moa?

⁷ Taem Jisas i go antap long heven finis, sam gudfala woman we oli fasgud long God oli stap wetem ol tru aposol blong Jisas long wan rum antap long wan haos long Jerusalem. (Ol Wok 1:​12-14) Mo i klia se i gat sam woman i stap long medel blong olgeta we oli kasem tabu speret long Pentekos. ?Olsem wanem yumi save samting ya? Taem Pita i storeyan long ol samting we oli kamaot long taem ya, hem i talem bakegen profet tok blong Joel 2:​28-30, we i tokbaot “ol gel” mo “ol haosgel” no “ol woman blong wok.” (Ol Wok 2:​1,​4, 14-18, NW) Ale i gat sam Kristin woman we tabu speret i makemaot olgeta oli stap long Kristin kongregesen taem hem i jes stat nomo.

⁸ Ol woman oli no lidim wok blong mekem Kristin tijing i go moa. Be oli givhan bigwan long wok ya. I luk olsem we Meri, mama blong Mak mo anti blong Banabas, i gat wan bigfala haos. Nao hem i letem kongregesen blong Jerusalem i yusum haos ya. (Ol Wok 12:12) Mo hem i mekem olsem long taem we ol man oli mekem bigfala trabol agens long ol Kristin. (Ol Wok 12:​1-5) Ol fo gel blong man ya blong talemaot gud nyus, Filip, oli kasem blesing blong mekem wok blong Kristin profet.​—⁠Ol Wok 21:​9; 1 Korin 12:​4, 10.

Tingting Blong Pol Long Ol Woman

9. ?Long faswan leta we hem i raetem long ol man Korin, Pol i givim wanem advaes long ol Kristin woman? ?Hem i pulum ol woman blong respektem wanem rul blong God?

⁹ Samfala oli stap talem se aposol Pol i no laekem nating ol woman mo i no trastem olgeta. I tru se Pol i talemaot klia we ol woman oli mas holem prapa ples blong olgeta insaed long Kristin kongregesen. I no wok blong olgeta blong tij long ol miting blong kongregesen. (1 Korin 14:​33-35) Sipos i no gat wan Kristin man i stap, no sipos tabu speret i pulum wan Kristin woman blong talemaot wan profet tok, hem i save tok long miting, be hem i mas kavremap hed blong hem. Hemia i olsem wan ‘saen’ blong soemaot we woman ya i respektem plan blong God se “hem i stap aninit long han blong man.”​—⁠1 Korin 11:​3-6, 10.

10. ?Samfala oli stap talemaot wanem poen agens long aposol Pol? ?Be wanem i pruvum se samting ya i no tru?

¹⁰ I klia se Pol i mas talem bakegen ol tiokratik rul ya long ol Kristin long taem bifo blong ‘oli mekem olgeta samting long fasin we i stret gud’ long ol miting blong kongregesen. (1 Korin 14:40) ?Be samting ya i min se Pol i agensem ol woman? No gat. ?Long laswan japta blong leta blong ol man Rom, hu i sanem bigfala halo long naen Kristin woman? !Hemia Pol ya! ?Hu i soemaot bigfala tangkyu long Fibi, Priska (Prisila) Trifaena, mo Trifosa, mo i talem se tufala woman ya “i stap . . . hadwok tumas blong Masta blong yumi”? !Hemia Pol bakegen! (Rom 16:​1-4, 6, 12, 13, 15) Mo bakegen tabu speret i pulum Pol blong talem se: “Yufala evriwan we i tekem baptaes finis blong joen long Kraes, yufala i tekem Kraes finis, olsem we yufala i putum klos long yufala. Yufala i no moa gat ol samting blong mekem yufala i seraot. I no moa gat we sam long yufala oli man Isrel, sam oli hiten man, sam oli slef, sam oli friman, sam oli man, sam oli woman, no gat. Yufala evriwan i joen long Jisas Kraes, nao from samting ya, yufala i kam wan nomo.” (Galesia 3:​27, 28) I klia se Pol i laekem ol Kristin sista blong hem mo i tinghae tumas long olgeta. Hem i tingting olsem long Lidia tu. Lidia i pulum ol brata oli kam long haos blong hem, taem trabol i kamaot long olgeta.​—⁠Ol Wok 16:​12-15, 40; Filipae 4:​2, 3.

Ol Woman Tede We Oli Wok Strong

11, 12. (a) ?Olsem wanem Sam 68:11 i stap kamtru tede? (b) ?Wanem samting i kamaot long laef blong plante sista blong yumi tede? ?From wanem oli nidim lav mo ol prea blong yumi?

¹¹ Insaed long Kristin kongregesen tede, i gat plante Kristin woman we oli “stap . . . hadwok tumas blong Masta blong yumi.” Namba blong ol woman ya i soemaot se “ol woman we oli stap talemaot gud nyus oli olsem wan bigfala ami.” Olgeta oli bighaf blong kampani blong ol Wetnes we Jeova i stap yusum olgeta long taem blong en ya. (Ol Sam 68:​11, NW) Ol Kristin woman ya we oli hadwok tumas oli gat gudnem, from we oli traehad blong mekem prapa wok blong waef, mama, lukaot long haos, winim vatu, mo long semtaem, oli mekem Kristin minista wok blong olgeta.

¹² Plante long ol gudfala sista ya, hasban blong olgeta i no gat bilif. Oli mas winim traem ya 24 haoa evri dei. Sam long olgeta oli traehad plante yia finis blong mekem wok blong gudfala waef, mo long semtaem, obei long ol rul we ol trufala man blong Jeova oli mas folem. Hemia i no isi. Be olgeta oli stanap strong longtaem. Mo oltaem oli hop se gudfala Kristin fasin blong olgeta bambae i “pulum [ol hasban blong] olgeta blong oli bilif.” !Mo taem wan hasban i joen long Kristin wosip wetem famle blong hem, traem tingbaot bigfala glad long olgeta evriwan long famle! (1 Pita 3:​1, 2) Ol gudfala sista olsem oli nidim tumas lav mo ol prea blong olgeta memba blong kongregesen. Oli traehad blong ‘gat pis long laef blong olgeta, mo soemaot kwaet fasin.’ Samting ya “i gud tumas long fes blong God.” Mo fasin blong olgeta blong stanap strong mo holemtaet bilif blong olgeta i gud tumas long ae blong yumi.​—⁠1 Pita 3:​3-6.

13. ?From wanem yumi save talem se ol sista blong yumi we oli mekem wok blong paenia oli “stap . . . hadwok tumas blong Masta blong yumi”? ?Ol narafala long kongregesen oli mas tingbaot olgeta olsem wanem?

¹³ I tru tumas we ol paenia sista tu oli “stap . . . hadwok tumas blong Masta blong yumi.” Plante long olgeta oli mas lukaot long haos blong ol, hasban blong ol, mo ol pikinini tu. Antap long ol samting ya, oli mekem wok blong prij. Sam long olgeta oli mas wok haftaem blong pem ol samting we oli nidim long saed blong bodi. Blong mekem ol samting ya, oli ogenaesem gud laef blong olgeta, oli gat strong tingting blong gohed, longfala tingting, mo oli hadwok tumas. Ol Kristin woman ya oli mas harem se ol narafala we oli no save mekem wok blong paenia, oli laekem mo sapotem olgeta.

14. (a) ?Wanem wan gudfala eksampel blong Kristin woman we hem i fasgud long wok blong Jeova? (b) ?Hu ol narafala Kristin woman we yumi mas leftemap tingting blong olgeta? ?From wanem? Tokbaot sam eksampel long ples blong yufala, sipos i gat.

¹⁴ Sam Kristin woman oli fasgud long wok blong paenia plante yia finis. Long Kanada, Grace Lounsbury i stat long wok blong paenia long 1914. Long 1918 hem i mas stop long wok ya from wan sik. Be long 1924 hem i stat bakegen long wok blong fultaem paenia. !Mo hem i stap yet long lis blong ol paenia, nating we hem i gat 104 yia blong hem! Plante misinari sista we oli tren long Wajtaoa Baebol Skul blong Giled long ol yia we oli ron biaen long 1940, oli stap wok strong yet. Samfala oli stap mekem misinari wok yet, mo samfala oli wok long Betel haos long Bruklin no long ofis blong Watch Tower Sosaete long wan narafala kantri long wol. Olgeta Kristin woman ya, mo ol sista we oli stap wok long ol Betel haos tu, oli gudfala eksampel, we oli stap soemaot fasin blong livim sam samting we olgeta oli wantem. ?Yumi stap talem long olgeta se yumi tinghae long olgeta?

Ol Waef Blong Ol Elda We Oli Goraon Long Ol Kongregesen

15, 16. ?I stret we yumi leftemap tingting moa long wanem grup blong ol Kristin woman? ?From wanem?

¹⁵ I gat sam narafala Kristin woman we i stret blong yumi enkarajem olgeta mo leftemap tingting blong olgeta: Ol waef blong ol elda we oli goraon long ol kongregesen. Ol gudfala sista ya oli rere blong folem hasban blong ol, taem oli goraon long ol kongregesen, ol seket, blong leftemap ol brata blong olgeta long saed blong speret. Bighaf blong ol woman ya oli no gat haos blong ol. Evri wik oli slip long defren bed, mo sam bed oli nogud nomo. Be nating, olgeta oli glad blong stap wetem ol brata mo sista blong ol. Oli soemaot nambawan eksampel long ol sista blong olgeta long saed blong speret.

¹⁶ Ol Kristin woman ya oli mekem nambawan wok blong givhan long hasban blong olgeta. Oli mekem olsem ol gudfala woman we oli fasgud long God, we oli biaen long Jisas, “oli stap givhan long hem long ol samting.” (Mak 15:41) Wan sista olsem i no save spenem plante taem wetem hasban blong hem, tufala nomo. Oltaem hasban blong hem ‘i gat plante wok blong mekem long wok blong Masta.’ (1 Korin 15:​58, NW) Sam long ol sista ya oli olsem Rosa Szumiga long Franis, we hem i stat long wok blong fultaem paenia long 1948. Long ol 30 no 40 yia we oli pas, hem mo plante narafala sista tu oli stap pakem sutkes blong hasban blong ol, mo oli biaen long olgeta long wok blong ol. Oli rere blong livim plante samting we olgeta oli wantem, from Jeova mo from ol brata mo sista blong olgeta. Tru ya, i stret nomo we yumi prea from olgeta, mo soemaot lav mo tangkyu long olgeta.

Ol Waef Blong Ol Elda

17, 18. (a) ?Ol waef blong ol brata we oli holem wok insaed long kongregesen, oli mas gat wanem fasin? (b) ?Ol waef blong ol elda oli agri blong livim wanem samting from Jeova mo from ol brata blong olgeta? ?Mo olsem wanem sam narafala waef oli save givhan long ol hasban blong olgeta long saed ya?

¹⁷ Aposol Pol i tokbaot ol mak we ol brata oli mas kasem blong oli save holem wok blong elda mo man blong givhan insaed long kongregesen. Be hem i tokbaot ol woman tu, i se: “Woman tu blong man olsem i mas stret gud, i nogud we hem i woman blong mekem tumas toktok, mo i nogud we hem i dring grog tumas. Hem i mas woman we yumi save trastem hem oltaem.” (1 Timote 3:11) Tru ya, advaes ya i stret long ol Kristin woman. Be taem yumi ridim ol vas raonabaot long hem, i klia se ol waef blong ol brata we oli holem wok long kongregesen oli mas soemaot gudfala eksampel ya.

¹⁸ I gud tumas we plante taosen waef blong ol Kristin elda oli mekem olsem. Fasin mo klos blong olgeta oli stret gud. Oli tinghevi long ol Kristin fasin blong laef, oli skelemgud ol toktok blong olgeta, mo oli rili traehad blong mekem se ol narafala oli save trastem olgeta oltaem. Mo tu, oli rere blong livim sam samting we olgeta oli wantem. Oli agri we samtaem hasban blong ol i yusum taem we tufala i save spenem tugeta blong mekem sam wok long kongregesen. I stret nomo we yumi enkarajem mo soemaot lav we i kaen gud long ol trufala Kristin woman olsem. Ating plante moa brata oli save traehad blong kasem wok insaed long kongregesen sipos ol waef blong olgeta oli mekem tingting blong olgeta i stap daon, nao oli agri blong livim sam samting we olgeta oli wantem, blong givhan long ol narafala.

“Ol Olfala Woman” Blong Bilif

19. ?From wanem olgeta long kongregesen oli mas tinghae long ol gudfala “olfala woman” long kongregesen? ?Yumi mas soemaot wanem filing long olgeta?

¹⁹ Taem yumi lukluk gud long ol woman long Baebol, yumi luksave se sam woman blong bilif oli olfala. Be samting ya i no save blokem olgeta. Oli gohed nomo long wok blong Jeova. Samting ya i tru long Sera, Elisabet, mo Ana. Tede i gat plante Kristin woman we oli olfala finis, be oli soemaot nambawan eksampel long bilif mo fasin stanap strong. Mo tu, long waes fasin oli sapotem ol elda, from we oli givhan long ol yangfala sista. From bigfala ekspiryens blong olgeta, oli save givim waes advaes long ol yangfala woman, mo Baebol i givim raet long olgeta blong mekem olsemia. (Taetas 2:​3-5) Samtaem maet wan elda i mas stretem wan olfala sista. Long taem ya, elda i mas ‘tok gud long hem, olsem we sista ya i stret mama blong hem.’ Ol elda oli mas ‘onagud long ol wido.’ Mo sipos ol wido ya oli nidim help blong kasem ol samting long saed blong bodi, ol elda oli mas lukaot long samting ya. (1 Timote 5:​1-3, 5, 9, 10) Ol gudfala olfala sista blong yumi oli mas harem we olgeta long kongregesen oli wantem olgeta mo oli laekem olgeta.

Oli Rul Wetem Kraes

20. ?Wanem nambawan blesing we fulap Kristin woman oli bin kasem? ?From wanem ol narafala sipsip oli glad long samting ya?

²⁰ I klia nomo se “God i stap mekem i sem mak nomo long olgeta man”, nomata wanem kala blong olgeta, nomata sipos oli man no woman. (Rom 2:​10, 11; Galesia 3:28) Mo tu, samting ya i tru long fasin blong Jeova blong jusumaot olgeta we oli joen wetem Pikinini blong hem blong rul long Kingdom. (Jon 6:44) Ol memba blong bigfala kampani blong ol narafala sipsip oli save glad tumas we ol gudfala woman olsem mama blong Jisas, Meri, mo Meri we hem i woman Magdala, mo Prisila, mo Trifaena, mo Trifosa, mo plante narafala woman long Kristin kongregesen bifo, oli stap rul naoia long Kingdom. Yumi save se oli givhan bigwan long gavman ya from we oli kasem save long ol dip filing mo ekspiryens blong ol woman long wol. !Samting ya i soemaot bigfala waes, lav, mo fasin luksave blong Jeova!​—⁠Rom 11:​33-36.

21. ?Wanem tingting blong yumi tede long ol woman we oli “stap . . . hadwok tumas blong Masta blong yumi”?

²¹ Tede, yumi save holem sem tingting olsem aposol Pol. Taem hem i tokbaot ol woman we ‘oli hadwok finis long ol wok blong gud nyus blong Kraes, wetem hem,’ hem i gat lav mo fasin tangkyu. (Filipae 4:⁠3) Olgeta Wetnes blong Jeova, ol man mo ol woman tu, oli glad blong kasem blesing ya blong wok wanples wetem ‘bigfala ami blong ol woman we oli stap talemaot gud nyus.’ Yes, ol woman ya oli “stap . . . hadwok tumas blong Masta blong yumi.”​—⁠Ol Sam 68:​11; Rom 16:⁠12.

Ol Kwestin Blong Tingtingbak

◻ ?Olsem wanem Jisas i soemaot se hem i no agri long strong tingting blong ol lida blong skul blong ol man Jyu agens long ol woman?

◻ ?Olsem wanem ol gudfala woman we oli fasgud long God oli givhan long Jisas? ?Sam long olgeta oli kasem wanem gudfala blesing?

◻ ?Pol i givim wanem advaes long saed blong ol woman long ol miting blong kongregesen?

◻ ?Hu ol sista we yumi mas givim spesel lav long olgeta mo sapotem olgeta? ?From wanem?

◻ ?Tede yumi mas tingting olsem wanem long ol woman we oli “stap . . . hadwok tumas blong Masta blong yumi”?

[Tok Blong Pija Long Pej 18]

Sam woman oli givhan long Jisas mo ol aposol blong hem

[Tok Blong Pija Long Pej 20]

Ol waef blong ol elda we oli goraon mo blong ol narafala elda oli givhan bigwan long wok blong God, from we oli rere blong livim sam samting blong olgeta