Halpem Ol Yangfala Blong Yu Blong Oli Gruap Gud—Kasem Save Long Olgeta

Tingbaot sipos yu go long narafala kantri be yu no save toktok lanwis blong kantri ya. Tru ya, bambae i hadwok blong toktok long ol man. Nating se i olsem, ating yu save faenem rod blong toktok smol long olgeta. Maet yu pem wan buk we i save givhan long yu blong lanem sam smol toktok long lanwis blong kantri ya. Maet narafala i save tanem lanwis ya i kam long lanwis blong yu, nao bambae yu save wanem we ol manples oli stap talem long yu, mo olgeta tu bambae oli kasem save long yu.

SAMTAEM ol papa mama oli filim olsem we oli stap long narafala kantri we oli no save lanwis blong hem, taem oli stap traehad blong halpem ol yangfala blong olgeta blong oli gruap gud. Plante taem fasin blong ol yangfala i olsem wan lanwis we i no lanwis blong yumi—i had blong kasem save long olgeta, be nating se i olsem, yumi save faenem rod blong kasem save long olgeta. Blong faenem rod, ol papa mama oli mas traem kasem save long ol samting we i stap hapen long laef blong ol yangfala long yangtaem blong olgeta, hemia taem ya we i save karem bigfala glad i kam long papa mama mo yangfala, be i save mekem tingting blong olgeta i fasfas tu.

Traem Luksave From Wanem Oli Mekem Samting

Taem wan yangfala i wantem kam fri moa long papa mama blong hem, i no min se hem i stap mekem stronghed. Baebol i talem se taem yangfala i kam bigman, bambae hem “i mas aot long papa mo mama blong hem.” (Jenesis 2:24) Blong mekem se ol yangfala oli rere from ol wok we oli mas mekem taem oli kamaot long papa mama blong olgeta, oli mas lanem blong tekem desisen long yangtaem blong olgeta.

Traem luk wanem i save mekem we ol yangfala oli gat ol fasin we ol papa mama oli tokbaot long laswan stori.

Lia blong Inglan, i talem wetem sore se: “Wantaem nomo boe blong mi i kam olsem we i tinghae long hem wan, mo i no moa laekem we mitufala i givim advaes long hem.”

Oltaem ol pikinini oli askem kwestin ya “?From wanem?” Ol yangfala oli sem mak. Be samting we i defren long saed blong ol yangfala, se oli no moa glad long ol sot, isi ansa we papa mama i bin givim long olgeta taem oli pikinini. ?From wanem fasin blong olgeta i jenis olsem? Aposol Pol i raetem se: “Taem we mi mi pikinini yet, . . . tingting blong mi i tingting blong pikinini nomo.” (1 Korin 13:11) Taem ol yangfala oli stat blong tingting gud mo skelem ol samting, ol papa mama oli mas eksplenem moa ol samting we oli talem long olgeta. Samting ya bambae i trenem tingting blong ol yangfala blong oli kam naf blong “luksave mo jusumaot wanem i stret mo wanem i no stret.”—Hibrus 5:14, NW.

John blong Gana i talem se: “Ol gel blong mitufala, oli kam olsem we oli sem, antap moa, oli sem from fes mo bodi blong olgeta.”

Taem ol pikinini oli kasem yangtaem blong olgeta, bodi blong olgeta i gru kwik. Samting ya i save hapen long stret taem blong hem, no bifo long stret taem, no afta long stret taem ya. Nating se i olsem wanem, be plante yangfala oli wari tumas se fes mo bodi blong olgeta i no naes. Sam gel oli glad taem bodi blong olgeta i jenis, sam oli fraet, mo sam oli gat tufala filing ya wantaem. Antap long hemia, maet ol lam oli stat kamkamaot long fes blong olgeta. Mo tu, long taem ya, ol gel oli stat blong putum krim mo pentem fes blong olgeta. Ol samting ya i mekem yumi luksave from wanem plante yangfala oli spenem moa taem blong lukluk fes blong olgeta long glas i bitim we oli ridim ol skul buk blong olgeta.

Daniel blong Filipin i talem se: “Ol pikinini blong mitufala, oli wantem haedem ol samting we oli mekem mo ol tingting blong olgeta, mo oli wantem stap olgeta wan nomo. Plante taem oli glad moa blong stap wetem ol fren blong olgeta bitim we oli stap wetem mitufala.”

Fasin blong haedem samting i save pulum trabol i kam long yangfala. (Efesas 5:12) Be sipos sam samtaem oli wantem stap olgeta wan, hemia i gud nomo. Jisas tu i ting se i gud blong “go long wan ples we i no gat man long hem.” (Matiu 14:13) Taem ol yangfala oli stap kam bigwan, sam samtaem olgeta tu oli nidim blong stap olgeta nomo, mo oli nidim we ol narafala man oli respektem samting ya. Taem oli spenem smoltaem olgeta nomo, oli save tingting gud mo skelem ol samting. Hemia wan fasin we oli mas lanem, from we bambae i halpem gud olgeta long ol yia we oli kam biaen.

Mo tu, taem oli stap kam bigwan, oli mas lanem blong fren wetem ol narafala. I tru, “ol fren blong olgeta we oli no stret, oli save spolem fasin blong olgeta.” (1 Korin 15:33) Be Baebol i talem tu se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Ol Proveb 17:17, NW) I impoten tumas we oli lanem blong fren wetem ol narafala mo mekem fasin fren ya i stap gud. Sipos oli lanem samting ya, bambae fasin ya i stap wetem olgeta gogo oli kam bigman.

Taem ol papa mama oli fesem ol problem olsem yumi tokbaot finis, oli mas traehad blong kasem save long ol yangfala blong olgeta. Olsem nao, bambae oli no ting se ol yangfala ya oli stap mekem stronghed. Be i no naf we ol papa mama oli kasem save nomo long ol yangfala blong olgeta. Oli nidim waes tu, nao oli save stretem ol trabol long fasin we i karem gudfala frut. ?Olsem wanem ol papa mama oli save mekem olsem?

[Tok blong makem poen long pej 5]

Taem ol yangfala oli kam naf blong tingting gud mo skelem samting, ol papa mama oli mas eksplenem moa ol rul blong famle