“?Wanem i Hapen Long Pikinini Blong Mi?”

Scott mo Sandraa i sek taem gel blong tufala we i gat 15 yia, i kam insaed long haos. !Hea blong hem we fastaem i yala lelebet, naoia i red we i red! Storian we i kamaot biaen i mekem tingting blong tufala i fasfas moa.

“?From wanem yu pentem hea blong yu? ?Mitufala i talem se yu mekem olsem?”

“No, be yutufala i no blokem mi tu blong mekem olsem.”

“?From wanem yu no askem long mitufala fastaem?”

“!From mi save se bambae yutufala i talem ‘No’!”

SCOTT mo Sandra tufala i agri fulwan se yangtaem i wan trabol taem, i no blong ol yangfala nomo be blong ol papa mama tu. Tru ya, plante papa mama oli no rere from ol bigfala jenis we oli kamaot long pikinini blong olgeta taem i kasem yangtaem blong hem. Wan mama long Kanada, nem blong hem Barbara, i tingtingbak long ol pikinini blong hem, i se: “Wantaem nomo, gel blong mitufala i kam defren. Mi bin tingting se, ‘?Wanem i hapen long pikinini blong mi?’ !I olsem we pikinini blong mitufala i lus taem mitufala i slip, nao wan narafala pikinini i tekem ples blong hem!”

I no Barbara nomo we samting ya i hapen long hem. Ridim ol tok we sam papa mama long ol defren ples long wol oli talem long Wekap!

“Wantaem nomo, boe blong mi i kam olsem we i tinghae long hem wan, mo i no moa laekem we mitufala i givim advaes long hem.”—Lia, Inglan.

“Ol gel blong mitufala, oli kam olsem we oli sem, antap moa, oli sem from fes mo bodi blong olgeta.”—John, Gana.

“Boe blong mi i wantem tekem ol prapa desisen blong hem. Hem i no moa wantem se mi talem long hem wanem we hem i mas mekem.”—Celine, Brasil.

“Gel blong mitufala i no moa laekem we mitufala i putum han blong mitufala i goraon long hem mo kisim hem.”—Andrew, Kanada.

“Ol boe blong mitufala, oli kam olsem we oli wantem rao mo agensem mitufala. Oli no moa agri long ol desisen blong mitufala, oli tok agensem ol desisen ya mo oli raorao long mitufala.”—Steve, Ostrelia.

“Gel blong mi i haedem ol filing blong hem. I olsem we hem i lokem hem wan long wan smol wol blong hem, mo hem i kros sipos mi mi traem blong kam insaed long wol ya.”—Joanne, Meksiko.

“Ol pikinini blong mitufala, oli wantem haedem ol samting we oli mekem mo ol tingting blong olgeta, mo oli wantem stap olgeta wan nomo. Plante taem oli glad moa blong stap wetem ol fren blong olgeta bitim we oli stap wetem mitufala.”—Daniel, Filipin.

Sipos yu yu papa no mama blong wan yangfala, ating yu luk se sam long ol tok ya antap i sem mak long tok we yu yu stap talem. Sipos i olsem, yu mas save se i gat rod blong kasem save long “strenja” ya we i stap wetem yu, hemia gel no boe blong yu. Baebol nao i save givhan long yu. ?Olsem wanem Baebol i save givhan?

Kasem Save Mo Kam Waes

Wan proveb long Baebol i talem se: “Man we i stap kasem save, mo we i stap kam waes, hem bambae i save harem gud.” (Ol Proveb 3:13) Papa, mama, yu nidim tufala fasin ya tugeta taem pikinini blong yu i kam yangfala. Yu nidim blong kasem save, blong yu yu naf blong luksave from wanem yangfala blong yu i mekem samting we hem i mekem, mo blong yu save luksave ol filing mo tingting blong hem. Yu nidim tu blong kam waes, nao yu save gohed blong lidimgud yangfala blong yu blong i gruap gud mo i kam bigman long tingting blong hem.

Yu no mas ting se yangfala blong yu i no moa nidim yu from we fasin fren blong yutufala i jenis, nao hem i no moa klosap long yu olsem fastaem. Blong talem stret, ol yangfala oli nidim mo oli wantem tu, we papa mama blong olgeta i intres long olgeta mo halpem olgeta long yangtaem, we i olsem wan trabol taem long laef blong olgeta. ?Sipos yu traehad blong kasem save long yangfala blong yu mo kam waes, olsem wanem samting ya bambae i halpem yu blong lidim gud hem?

[Futnot]