?I Gat Wan Man We i Wokem Samting Ya?

Skin Blong Sak

● Taem yumi luk wan sak, yumi ting se skin blong hem i glis gud. Be sipos yu gat janis blong ravem han blong yu long skin ya, stat long tel blong hem i kam kasem hed, bambae yu harem se i olsem sanpepa.a

Tingbaot: Samting we i mekem skin blong sak i olsem, hemia ol smosmol skel long hem, we evriwan long olgeta i gat ol smosmol laen long olgeta. Ol skel ya oli givhan long sak long tu fasin. Faswan se, oli mekem rod blong wota i pas long hem, nao i isi blong sak i gotru long solwota. Sekenwan se, taem sak i stap swim, ol skel oli stap benben, mekem se ol bebet oli no save fas long skin blong hem.

Ol man oli kopi skin blong sak long plante samting we oli wokem. Olsem nao, ol saentis oli wokem finis wan klos blong swim we i samting olsem skin blong sak. Hemia i mekem se man we i werem klos ya i save swim spid moa. Ol saentis oli ting se oli save yusum semkaen samting long ol trak mo bot, blong mekem se oli ron spid moa.

Ol man oli yusum pen we i gat meresin long hem blong pentem ol bot, hemia blong mekem se ol sel mo bebet oli no fas long bot. Be meresin ya i stap putum posen long solwota. Taswe naoia, ol man oli stap stadi long wan meresin we i kamaot long skin blong sak. Oli wantem traem wokem wan pen long hem we i no putum posen long solwota. Mo tu, oli stap traem blong yusum meresin ya we i kamaot long skin blong sak, blong wokem sam meresin mo tul we dokta i save yusum. Hemia i save blokem sam bebet we ol sikman oli save kasem long ol soa blong olgeta, taem oli stap slip long hospital.

?Wanem tingting blong yu? ?Olsem wanem long skin blong sak, we i mekem i isi nomo blong sak i gotru long solwota, mo i gat meresin long hem blong kilim bebet? ?Hem i kamaot olsem nomo, no i gat wan Man we i wokem samting ya?

[Futnot]

[Tok blong pija long pej 10]

Ol skel long skin blong sak we oli mekem pija blong hem i kam bigwan moa

[Foto Credit Lines blong pija long pej 10]

Scales: © Eye of Science/Photo Researchers, Inc.; shark: © Image Source/age fotostock