Baebol i Talem Wanem
?Wanem Samting i Mekem Se Yumi Wan Gudfala Man No Wan Rabis Man?
OL BUK blong histri oli fulap long ol stori we oli tokbaot fasin blong no laekem narafala mo fasin blong mekem blad i ron. Be nating se ol trabol ya oli stap, plante taem ol man oli soemaot kaen fasin mo oli rere blong lego samting we olgeta nomo oli wantem blong givhan long narafala. ?From wanem i gat sam man we oli no gat sore nao oli kilim narafala man i ded, be i gat sam narafala man we oli lavem ol man? ?From wanem sam man oli mekem fasin olsem wael anamol?
Sin Mo Tingting We i Jajem Man
Baebol i talem stret se: ‘Stat taem ol man oli smol pikinini nomo, be tingting blong olgeta i stap finis long ol rabis fasin.’ (Jenesis 8:21) Yes, tingting blong ol pikinini i pulum olgeta blong mekem ol krangke samting. (Ol Proveb 22:15) Stat long taem we yumi bon, tingting blong yumi i stap pulum yumi blong mekem samting we i nogud. (Ol Sam 51:5) Blong mekem samting we i gud, yumi mas traehad, olsem we yumi pul agensem strong taed.
Nating se i olsem, God i wokem yumi wetem wan tingting we i save jajem yumi. Tingting ya we yumi evriwan i bon wetem, blong haremsave fasin we i gud mo fasin we i nogud, hem nao i pulum bighaf blong yumi blong mekem samting long wan fasin we ol man oli glad long hem. Hemia nao from wanem ol man we oli no kasem ol tijing long saed blong gudfala fasin, oli save mekem i gud yet long ol man. (Rom 2:14, 15) Be, olsem we yumi tokbaot antap, i isi nomo blong yumi mekem ol nogud samting. Hemia nao from wanem oltaem yumi traehad blong mekem ol gudfala fasin blong winim ol rabis fasin. ?Wanem wan narafala samting we maet i save gat paoa long yumi, taem yumi stap traehad blong mekem ol gudfala fasin blong winim ol rabis fasin?
Wol We i Doti
Lised i save jenisim kala blong hem folem ol samting we oli stap raonabaot long hem. Sem mak, olgeta we oli joen wetem ol rabis man, bambae oli tekem ol fasin blong rabis man. Baebol i givim woning se: “Nating sipos bighaf blong ol man oli mekem samting we i no stret, . . . be bambae yufala i no folem fasin blong olgeta.” (Eksodas 23:2) Sipos man i joen oltaem wetem olgeta we oli no giaman, oli mekem i stret, mo oli gat gudfala fasin, samting ya bambae i pulum hem blong mekem ol gudfala fasin.—Ol Proveb 13:20.
Be yumi no mas ting se, sipos yumi no joen wetem olgeta we oli mekem rabis fasin, bambae rabis fasin i no save gat paoa long yumi. From we yumi no stret gud olgeta, tingting blong wantem mekem samting we i nogud, i rere nomo blong winim yumi taem i gat janis. (Jenesis 4:7) Antap long samting ya, yumi harem ol rabis fasin oltaem long radio mo yumi ridim long niuspepa. Long rod ya tu, ol rabis fasin ya oli save kam insaed long hom blong yumi. Plante taem, ol video gem, ol program long televisin mo sinema oli leftemap raf fasin mo fasin blong givimbak. Mo taem yumi lukluk mo ridim ol nius blong wol, mo nius we i kamaot long ples blong yumi, oltaem ol nius ya oli spolem tingting blong yumi, from oli tokbaot fasin safa mo wari we ol man oli gat.
?Wanem samting i mekem se wol ya i doti olsem? Baebol i givim ansa se: “Olgeta man blong wol ya oli stap long paoa blong Setan.” (1 Jon 5:19) Baebol i talem se “rabis man ya” Setan, hem i man blong giaman mo man blong kilim man i ded. (Jon 8:44) Hem i yusum ol samting blong wol ya blong hem, blong mekem ol rabis fasin oli kam bigwan moa.
Ol samting ya oli save gat paoa long tingting, fasin, mo aksen blong yumi. Be maet sam man oli talem se oli no gat fol from rabis fasin we oli mekem. ?Samting ya i tru? Tingbaot: Wan stia i save stiarem wan trak no wan sip i go long ples we hem i wantem go long hem. Long sem fasin, tingting blong man nao i bos long bodi blong hem.
Gudfala Man No Rabis Man —Yu Wan Yu Mas Jusum
Evri samting we man i mekem, sipos i gud no i nogud, hemia from we tingting blong hem nao i pulum hem blong mekem olsem. Taem man i gat wan tingting we i gud mo i klin, hem i save karem gudfala frut long laef blong hem. Be sipos hem i letem rabis fasin ya blong tingbaot hem wan nomo i gru long tingting blong hem, plante rabis frut oli save kamaot from. (Luk 6:43-45; Jemes 1:14, 15) Taswe yumi save talem se, man i save jusum blong kam wan gudfala man no wan rabis man.
Yumi glad we Baebol i soemaot se yumi save lanem blong gat ol gudfala fasin. (Aesea 1:16, 17) Yumi mas letem lav nao i pulum yumi blong mekem samting we i gud, from we “man we i lavem ol man, hem i mekem olgeta samting we Loa blong God i talem.” (Rom 13:10) Taem yumi lavem ol man, bambae yumi no save mekem rabis fasin long enikaen man.
Hemia nao samting we Ray blong Pennsylvania long Yunaeted Stet blong Amerika, i kasem save long hem. Taem hem i yangfala nomo, hem i lanem blong faet, nao kwiktaem nomo ol man oli stat singaot hem se Man Blong Faet. Mo tu, hem i save kros kwik. Be taem hem i stat blong folem ol stamba rul blong Baebol long laef blong hem, sloslo fasin blong hem i jenis. Be samting ya i no isi long hem. Samtaem, hem i harem olsem Pol, man ya blong raetem Baebol, we i se: “Taem mi wantem mekem ol samting we i gud, be oltaem mi stap jusumaot ol samting nomo we i nogud olgeta.” (Rom 7:21) Blong plante yia, Ray i stap traehad blong lego ol rabis fasin. Mo naoia, hem i naf blong holemstrong ‘stret fasin blong winim rabis fasin.’—Rom 12:21.
?From wanem i gud we yumi traehad blong “folem fasin blong gudfala man”? (Ol Proveb 2:20-22) From we gudfala fasin bambae i winim rabis fasin. Baebol i talem se: “Ol man nogud, Hae God bambae i ronemaot olgeta. Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:9-11) God bambae i karemaot olgeta rabis fasin evriwan. !Hemia nao gudfala fiuja we i stap long fored blong olgeta we oli wok strong blong mekem gudfala fasin!
?YU YU BIN TINGBAOT?
● ?Hu i gat fol from ol fasin we yumi mekem?—Jemes 1:14.
● ?Yumi naf blong jenisim ol rabis fasin blong yumi?—Aesea 1:16, 17.
● ?Rabis fasin bambae i finis samtaem?—Ol Sam 37:9, 10; Ol Proveb 2:20-22.
[Tok blong pija long pej 27]
Man i save jusum blong stap olsem wan gudfala man no wan rabis man