Help Blong Narafala
“Wan enemi i save kam we wan man nomo i no save winim, be tu man i save joen blong winim hem.”—Prija 4:12.
TAEM ol narafala oli halpem yumi, i isi moa blong winim wan enemi—nomata we enemi ya hem i hu no hem i wanem. Taswe sipos yu wantem winim fasin blong smok, i waes blong askem long famle mo ol fren blong oli givhan long yu—no yu save askem narafala we bambae i halpem gud yu mo i gat longfala tingting wetem yu tu.
I gud blong storian wetem olgeta we oli winim finis fasin blong smok, from we man olsem i kasem save long filing blong yu, mo i save halpem yu. Wan Kristin brata long Denmak, nem blong hem Torben, i talem se: “Sipos ol narafala oli no bin halpem mi, ating mi no save lego.” Abraham i stap long India, mo hem i raetem se: “Famle blong mi mo ol narafala Kristin oli mekem ol samting long mi we i soemaot se oli lavem mi tru, ale samting ya i halpem mi blong lego smok.” Be samtaem, i no naf yet we famle mo ol fren oli halpem yumi.
Man ya Bhagwandas i talem se: “Mi stap smok blong 27 yia, be biaen mi lego from we mi lanem ol tok blong Baebol long saed blong ol fasin we oli no klin. Fastaem mi traem daonem namba blong sigaret. Mi no moa joen wetem ol fren blong mi we oli smok. Mi joen long ol grup we oli givimaot advaes olsem wanem blong lego smok. Be i no gat wan samting nating we i jenis. Ale, wan naet, mi prea, mo mi talemaot olgeta filing blong mi long Jeova God, mo mi askem strong long hem blong i halpem mi blong lego smok. !Long taem ya nao, mi lego smok!”
Wan narafala samting se yu mas rere blong winim ol samting we bambae oli pulum yu blong wantem smok bakegen. ?Wanem ol samting ya? Nekis haf bambae i eksplenem.
[Bokis blong pija long pej 5]
?YU MAS YUSUM MERESIN?
Plante man oli yusum ol meresin blong halpem olgeta blong lego smok. Wan long ol meresin ya, hemia wan plasta we man i putum samples long bodi blong hem, nao hem i no moa harem se i wantem smok plante. Be bifo we yu yusum meresin, tingbaot ol kwestin ya:
?Wanem gudfala samting bambae i kamaot from? Plante meresin olsem oli save givhan long yu blong yu no harem nogud tumas long bodi mo tingting blong yu taem yu lego smok. Be sam man oli stap toktok plante yet long saed ya, from we oli no sua se bambae meresin ya i gohed longtaem blong givhan long man.
?Wanem ol denja? Sam meresin oli gat nogud saed blong olgeta tu, olsem oli mekem man i wantem traot, tingting blong hem i foldaon, mo hem i gat tingting blong kilim hem wan i ded. I gud blong tingbaot tu se ol meresin we oli tekem ples blong nikotin oli wan narafala drag nomo, we i save spolem helt blong man tu. Blong talem stret, man we i tekem ol meresin ya hem i fas yet long ol drag.
?Wanem narafala samting we yu save mekem? Wan ripot i talem se 88 pesen blong ol man we oli winim fasin blong smok, oli lego olsem nomo we oli no yusum wan narafala drag bakegen.