!Yu Save Win!
NAOIA i taem blong yu ‘mekem we tingting blong yu i stanap strong, gogo yu finisim’ wok blong yu. (1 Kronikel 28:10) ?Wanem ol laswan samting we yu save mekem blong yu gat moa janis blong winim fasin blong smok?
Putum wan stret dei. U.S. Department of Health and Human Services i talem se, taem yu mekem desisen blong lego smok, yu mas tekem aksen blong mekem samting ya bifo we tu wik i pas. Long rod ya, bambae tingting blong yu i stap strong. Makem dei ya we bambae yu lego smok long kalenda blong yu, talem long ol fren blong yu, mo yu no mas jenisim dei we yu putum finis, nating sipos i gat sam samting oli jenis long laef blong yu.
Raetemdaon long wan pepa, ol save blong halpem yu blong lego. Yu save raetemdaon eni samting we bambae i givhan long yu blong gat strong tingting oltaem. Maet yu raetem ol save olsem:
● Ol risen from wanem yu wantem lego smok
● Namba blong telefon blong ol man we yu save ring long olgeta taem yu harem se yu wantem smok bakegen
● Sam tingting we bambae oli halpem yu blong kasem mak blong yu. Maet yu save ademap sam vas blong Baebol olsem Galesia 5:22, 23
Tekem pepa ya wetem yu long evri ples we yu go long hem, mo ridim plante taem evri dei. Mo tu, nating sipos yu lego smok finis, yu mas ridim pepa ya bakegen taem yu harem se yu wantem smok.
Traehad blong lego ol samting we oli save pulum yu. Taem yu stap kam klosap long dei we yu makem blong lego smok, i gud yu lego ol fasin we oli save pulum yu blong smok. Olsem nao, sipos evritaem long moning, yu girap mo yu smok, traem seftem taem ya blong smok i go wan aoa moa. Sipos yu smok taem yu kakae no stret afta we yu kakae, i gud yu traehad blong no moa mekem olsem. I gud blong no go long ol ples we i gat ol man blong smok, oli stap long hem. Mo taem yu stap yu wan, i gud yu stap trenem yu long wan laod voes se: “No tangkiu. Mi lego smok finis.” Ol samting ya bambae oli rerem yu from dei we yu makem finis blong lego smok. Be i no hemia nomo. Oli save mekem yu yu tingbaot tu se i no longtaem, bambae yu no moa wan man blong smok.
Rerem sam samting i stap. Taem yu stap kam klosap long dei we yu makem, hivimap ol samting olsem: karot, juinggam, pinat, mo sam narafala samting olsem. Talem long ol fren mo famle blong yu, stret dei we yu makem finis, mo olsem wanem olgeta oli save givhan long yu. Jes bifo long dei ya, sakemaot ol smol plet we yu stap putum asis blong sigaret long hem, mo sakemaot laeta mo mases. Sakemaot ol narafala samting tu we oli save pulum yu, olsem ol sigaret we oli stap olbaot long haos blong yu, long trak blong yu, long ol poket blong traoses mo sot, no long ples blong wok blong yu. !I had blong askem long wan fren blong i givim wan sigaret no wan paket sigaret long yu, be i no had blong tekem wan sigaret we i stap long wan kabod long haos blong yu! Mo tu, yu mas gohed blong prea long God blong i halpem yu. I gud blong prea strong moa afta we yu tekem laswan sigaret blong yu.—Luk 11:13.
Plante plante man oli lego rabis giaman fren ya finis, hemia sigaret. Yu tu yu save mekem olsem. Bambae yu gat gudfala helt mo bambae yu harem se yu kam fri long samting we i holemtaet yu.
[Tok blong pija long pej 9]
Tekem pepa ya wetem yu long evri ples we yu go long hem, mo ridim plante taem evri dei