?Olsem Wanem Teknoloji I Save Afektem Frensip Blong Yu?
Ol mesej, imel, video kol, mo sosol media i mekem se tu man i save toktok tugeta nating se tufala i stap longwe long tufala.
Long taem olsem, tufala i yusumgud teknoloji. Be olgeta we oli yusum teknoloji nomo blong toktok wetem ol fren, oli gat ol problem olsem . . .
oli no kasemsave filing blong fren blong olgeta.
oli harem se oli stap olgeta wan mo oli nogat fren.
oli tingbaot olgeta nomo, bitim we oli tingbaot narafala.
SAMTING WE YU MAS SAVE
KASEMSAVE FILING
Blong kasemsave filing blong ol narafala, yumi mas tekem taem blong tingbaot filing blong olgeta. Be i had blong mekem olsem taem yumi bisi blong sanem ol teks mesej mo lukluk sosol media.
Sipos yu gat plante mesej, bambae yu harem se i hadwok blong ansa long mesej blong wan fren. Nao bambae yu ansa kwik long evri mesej, be maet yu no luksave se fren blong yu i nidim help.
BLONG TINGBAOT: Taem yu yusum teknoloji, ?olsem wanem yu save soem long ol fren blong yu se yu kea long olgeta?—1 PITA 3:8.
STAP YU WAN
Wan stadi i soemaot se plante man oli harem nogud moa afta we oli spenem taem long sosol media. Hemia from we taem oli lukluk pija blong ol samting we narafala i mekem, oli save “harem se oli no mekem wan gudfala samting nating long laef blong olgeta.”
Mo tu, taem man i luk ol naesfala foto we narafala i postem, hem i save skelem laef blong hem wetem ol narafala, nao i harem nogud. Hem i save harem se ol narafala oli gat gudtaem, be hem nogat.
BLONG TINGBAOT: Taem yu yusum intenet, ?olsem wanem yu save lukaot blong no skelem yu wan wetem ol narafala?—GALESIA 6:4.
TINGBAOT YU WAN
Wan tija i makem se sam studen blong hem oli tingbaot olgeta nomo, mo oli wantem gat ol fren jes blong kasem samting long olgeta. Hemia wan frensip we man i tingbaot hem wan nomo.a Wan man i save luk ol fren blong hem olsem wan fon we hem i save yusum enitaem mo i save ofem taem hem i no moa nidim.
BLONG TINGBAOT: ?Ol samting we yu postem oli soemaot se yu tingbaot yu wan nomo o yu wantem winim narafala?—GALESIA 5:26.
SAMTING WE YU SAVE MEKEM
?YU STAP YUSUM TEKNOLOJI OLSEM WANEM?
Taem yu yusumgud teknoloji, bambae i givhan long yu blong storian wetem ol fren blong yu mo kam klosap moa long olgeta.
ADVAES BLONG BAEBOL: “Man we i gat lav . . . hem i no tingbaot hem wan nomo.” —1 KORIN 13:4, 5
Jusum samting we yu wantem traem, o raetemdaon sam narafala tingting.
Traem toktok stret wetem man (i bitim we yu jes sanem mesej o imel)
No yusum fon (o ofem volium) taem yu stap storian wetem narafala
No spenem tumas taem blong lukluk ol samting long sosol media
Lesingud long man we i stap toktok
Kontaktem wan fren we i stap fesem hadtaem
a Hemia i kamaot long buk ya Reclaiming Conversation.