ADVAES LONG FAMLE | TIJIM PIKININI
Ol Pikinini Mo Sosol Media—Pat 1: ?I Stret Blong Letem Pikinini Blong Mi i Yusum Sosol Media?
Ol man blong mekem risej oli faenemaot se 97 pesen blong ol tineja oli yusum sosol media. ?Pikinini blong yu tu i wantem yusum? Sipos yes, i gat sam samting we yu mas tingbaot.
Long atikol ya
?Pikinini blong yu i yusum gud taem blong hem?
Websaet ya HelpGuide i talem se: “Oli wokem ol sosol media websaet blong pulum tingting blong yu, mekem se yu stap longtaem long Intenet, mo yu stap jekem divaes blong yu oltaem blong luk sipos i gat ol apdet.”
“Samtaem mi gat plan blong lukluk sosol media blong smoltaem nomo, be mi sek se mi spenem plante aoa long hem. I had blong lego fon blong mi mo mekem wan narafala wok.”—Lynne we i gat 20 yia.
Askem se: ?Pikinini blong mi i naf blong bos long tingting blong hem, mo folem ol rul we mi putum long saed blong hamas taem we hem i save spenem long sosol media? ?Hem i naf blong mekem ol prapa rul blong hem mo folem olgeta?
Rul blong Baebol: “Yufala i mas lukaot gud [se] yufala i wokbaot, . . . olsem ol man we oli waes, yufala i yusum gud taem blong yufala.”—Efesas 5:15, 16.
Sipos yu letem pikinini blong yu i yusum sosol media be i no gat rul blong folem, hemia i olsem we yu letem hem i ron long hos, be i no lan fastaem
Tingting blong pikinini blong yu long saed blong ol fren
Tok ya “sosol media” i givim tingting se yu gat plante fren. Be plante taem oli no rili trufala fren.
“Plante yangfala oli gat rong tingting. Oli ting se ol man we oli laekem samting we oli postem o oli folem olgeta long sosol media, oli laekem olgeta, nating se oli no save ol man ya.”—Patricia we i gat 17 yia.
Askem se: ?Pikinini blong mi i naf blong luksave se i no impoten blong hem i popiula long sosol media? Taem hem i no yusum sosol media, ?hem i save mekem ol niufala fren?
Rul blong Baebol: “Wan tru fren i soemaot lav oltaem, mo hem i wan brata we i kamtru long yu long taem blong trabol.”—Ol Proveb 17:17.
?Bambae i mekem pikinini blong yu i harem nogud?
Ol man blong mekem risej oli faenemaot se olgeta we oli yusum sosol media bitim mak, oli harem se oli stap olgeta nomo, oli wari, mo tingting i foldaon.
“Taem yu luk ol foto blong ol fren blong yu we oli joen wanples be yu yu no stap, yu harem nogud.”—Serena we i gat 19 yia.
Askem se: ?Pikinini blong mi i naf blong blokem filing ya blong tingbaot hem wan, traem winim narafala, o harem nogud long ol samting we hem i luk long sosol media?
Rul blong Baebol: “I gud yumi no kam flas, mo yumi no traem blong winim narafala, mo yumi no jalus long yumi.”—Galesia 5:26.
?Pikinini blong yu i mekem wanem taem hem i stap long Intenet?
Sosol media i save pulum yangfala blong joen long ol fasin blong spolem narafala, sanem ol doti teks mesej, o lukluk ponografi. Maet pikinini blong yu i no wantem joen long ol fasin ya, be sosol media i save pulum tingting blong hem long rod ya.
“Mi makem se ol toktok long sosol media i save stat gud, be i jenis kwiktaem i kam nogud. I gat plante doti tok mo ol miusik we i tokbaot ol nogud fasin.”—Linda we i gat 23 yia.
Askem se: ?Pikinini blong mi i naf blong yusum gud Intenet? ?Hem i strong inaf blong satem ol websaet we oli soemaot ol nogud samting?
Rul blong Baebol: “Yufala i no mas tokbaot nating enikaen doti fasin blong seks, mo enikaen doti samting, mo toktok blong yufala i no mas soemaot se yufala i griri, . . . yufala i no mas mekem ol fasin blong sem, mo yufala i no mas talem ol krangke tok mo ol tokplei we oli doti.”—Efesas 5:3, 4.
?I nidim sosol media?
Laef blong yumi i no dipen long sosol media, mo tu, yumi save gat wan gudfala, hapi laef, taem yumi no yusum sosol media. Plante yangfala oli harem gud nating se oli no yusum sosol media. Sam long olgeta, oli bin yusum sosol media bifo, be biaen oli mekem desisen blong sakemaot.
“Mi luk olsem wanem sosol media i spolem sista blong mi, nao mi mekem desisen blong mi no moa yusum. Naoia, mi glad moa, mo mi luk se mi gat plante moa gudfala ekspiriens long laef.”—Nathan we i gat 17 yia.
Stamba poen: Bifo we yu letem pikinini blong yu i yusum sosol media, yu mas meksua se hem i naf blong bos long tingting blong hem, we i no spenem taem bitim mak long sosol media, i jusum ol gudfala fren, mo i blokem ol samting we i nogud.
Rul blong Baebol: “Man we i tingting gud, hem i skelem gud wanwan step blong hem.”—Ol Proveb 14:15.