Stadi 31
Pruvum Tok Blong Yu Long Ol Man We Oli Lesin, Halpem Olgeta Blong Haremsave
1, 2. ?Olsem wanem blong soemaot we tok i stret?
1 Taem yu toktok yu wantem se ol man we oli stap, oli lesin long yu, be i no hemia nomo. Yu wantem tu blong oli akseptem ol poen we yu talem mo mekem i wok long laef blong olgeta. Bambae oli mekem olsem sipos oli bilif se wanem we yu stap talem long tok blong yu i tru mo sipos hat blong olgeta i stret. Blong soemaot we tok i stret, i min se yu mas givim ol pruf. Be oltaem ol pruf nomo oli no naf. Yu nidim sam poen blong sapotem ol pruf ya. Taswe, blong talem sam poen blong soemaot we tok i stret, i gat tri stampa samting: faswan samting, ol pruf; namba tu samting, fasin blong talem ol pruf folem ol namba no oda; namba tri samting, fasin mo rod we yu yusum blong talem ol pruf ya. Long stadi ya, we i laenap long poen ya “Soemaot we tok i stret” long Pepa Blong Givim Advaes, bambae yumi lukluk long samting we man i talem, wanem pruf hem i givim, be yumi no lukluk long fasin blong talem ol pruf.
2 Fasin blong soemaot we tok i stret i dipen long ol trufala stampa risen, mo hemia nao rod we man blong givim advaes bambae i folem blong tingbaot poen ya. Ol pruf blong yu oli mas soemaot we tok i stret, nating sipos yu mas ridim long buk. Sipos fasin blong soemaot tok we i stret i dipen long fasin blong givim tok mo i no dipen long ol pruf we yu yusum blong stanemap poen blong yu, nao bambae yu nidim blong wok long fasin ya moa blong yu save mekem tok blong yu i stanap strong mo i stret.
3-6. Talem from wanem yu mas putum wan faondesen.
3 Wokem faondesen. Bifo we yu givim ol poen blong yu, i impoten blong putum wan gudfala faondesen fastaem. Yu mas soem klia wanem poen blong tok blong yu. Mo i gud blong putum wan faondesen taem yu tokbaot ol samting we yufala i agri tugeta long hem.
4 Samtaem yu mas eksplenem klia mining blong ol tok. Yu mas tekemaot olgeta samting we oli no laenap wetem tok. Yu no mas hareap taem yu stap stanemap faondesen blong yu. Yu mas mekem faondesen i strong, be yu no mekem faondesen i wan bigfala samting olsem we hem i ful bilding. Sipos yu mekem wan tok we i blong pruvum wan poen, skelemgud ol defren poen we oli sapotem blong faenem ol poen we oli no strong mo givhan long yu blong luksave rod we yu folem blong pruvum poen blong yu mo tokbaot stampa blong bisnes ya.
5 Taem yu mekemrere tok blong yu, yu mas traem tingbaot fastaem save we ol man we bambae oli lesin oli bin kasem finis long poen we yu wantem tokbaot. Samting ya bambae i soem long yu wanem faondesen we yu nidim blong stanemap fastaem bifo we yu talemaot ol pruf.
6 Waes mo Kristin fasin i soem kaen fasin mo fasin blong tingbaot narafala man, nating se hemia i no poen we yumi stap wok long hem. Oltaem yu mas yusum fulwan save blong yu long saed blong ol Kristin rul mo openem hat mo tingting blong ol man we oli lesin long yu.
7-13. Eksplenem mining blong “trufala pruf.”
7 Givim ol trufala pruf. Sipos yu olsem wan man blong givim tok, yu bilif no yu talem wan samting, fasin ya i no “pruvum” se samting ya i tru. No gat. Oltaem yu mas tingbaot se ol man we oli lesin long yu oli gat raet blong askem se, “?From wanem samting ya i tru?” no, “?From wanem yu talem se samting ya i olsemia?” Yu wan man blong givim tok, oltaem yu mas naf blong ansa long kwestin ya “?From wanem?”
8 Ol kwestin ya “?Olsem wanem?” “?Hu ya?” “?Weples?” “?Wetaem?” “?Wanem?” oli nidim ol save nomo blong ansa long olgeta, be kwestin ya “?From wanem?” i nidim ansa we i givim ol risen. Kwestin ya nomo i nidim ansa olsem mo yu nao yu mas eksplenem be i no blong talem nomo ol trutok blong hem. Hem i pulum yu blong tingting. From samting ya, taem yu mekemrere tok blong yu, askem kwestin ya long yu bakegen, se: “?From wanem?” Nao mekem sua se yu save givim ol ansa.
9 Samtaem yu save yusum tok blong wan man we ol narafala man oli akseptem olsem haeman, olsem ol risen long ol tok we yu talem. Samting ya i min se sipos hem i talem samting ya, hem i mas tru from we ol man oli luksave hem olsem we hem i save evri samting. Samting ya i givim inaf risen blong bilivim tok ya. Yes, Hemia we i Hae moa long saed ya, hem i Jeova God. Taswe taem yu yusum wan vas long Baebol blong sapotem tok blong yu samting ya i naf blong pruvum tok blong yu. Yumi kolem samting ya “testimoni” from we hem i “testimoni (tok)” blong wan wetnes we ol narafala man oli akseptem hem.
10 Taem yu yusum ‘testimoni (tok)’ blong narafala man olsem, yu mas mekem sua se ol man we oli lesin long yu oli save akseptem wetnes blong yu. Sipos yu yusum tok blong ol man, yu mas savegud long laef blong olgeta mo olsem wanem ol narafala man oli stap lukluk olgeta. Plante man bambae oli akseptem Baebol olsem wan tok we i kamaot long God, be sam narafala man oli lukluk Baebol olsem man nomo i raetem mo from samting ya Baebol i nating nomo long olgeta. Sipos i olsem maet yu save yusum ol narafala pruf no maet fastaem yu save soem olsem wanem Baebol i tru.
11 Be lukaotgud. Yu mas yusumgud ol pruf. Yu no mas talem wan tok be yu no tingbaot fastaem ol narafala tok we i stap raonabaot long hem. Yu mas meksua se wanem yu talem, hemia nao tingting blong man we i talem tok ya. Yu mas yusum stret ol refrens. Yu mas lukaotgud tu long ol namba we yu talem. Sipos yu no talem stret, samting ya bambae i mekem trabol long yu bakegen. Tingbaot wan man we i no save swim mo hem i draon long wan reva we i dip olsem wan mita nomo. Hem i fogetem hol long medel blong reva we i dip olsem tri mita.
12 Pruf we i kamaot long laef hemia i defren long pruf we i kamaot long tok blong man no blong God. Hem i pruf we i stanap long ol trufala samting we oli stap hapen bitim ol toktok blong ol narafala man. Blong pruvum se ol tingting we yu wantem talem oli stret mo blong yusum ol pruf we oli kamaot long laef blong pulum man blong luksave, yu mas gat sam trufala samting long laef mo sam poen blong sapotem ol tingting blong yu.
13 Sipos olgeta pruf we yu givim (i no nid blong oli stap long oda) oli naf blong pulum ol man we oli lesin long yu oli kasem save, bambae man blong givim advaes i makem i gud. Man blong givim advaes bambae i askem hem wan se, “?Hem i soem long mi se tok ya i tru?,” bambae hem i tingbaot tok ya olsem ol man we oli stap lesin long yu oli tingbaot. Sipos samting ya i soemaot we tok i stret nao bambae hem i save talem se tok blong yu i gud.
14. ?Wan gudfala sot toktok we i kavremap olgeta poen i olsem wanem?
14 Sot toktok we i kavremap ol bigfala poen. Sam sot toktok we oli kavremap ol bigfala poen oli impoten blong soemaot we tok i stret. Hem i laswan rod blong mekem ol man oli kasem save, i pulum man blong luksave moa ol poen we yu yusum long tok blong yu. I no naf we yu talem bakegen ol trufala poen long wan sot toktok we i kavremap ol bigfala poen, be i gud blong talem se, “from samting ya i olsem, mo from hemia i olsem, nao yumi save talem se. . .” Fasin ya i blong pulum ol defren poen oli joen mo finisim tok. Plante taem gudfala sot toktok we i kavremap ol poen nao i pulum tugeta ol defren poen mekem se i soemaot se tok i tru.
15, 16. ?From wanem yumi mas givhan long ol man we oli stap lesin long yumi blong haremsave?
15 Nating se ol poen we yu yusum long tok blong yu oli tru, i no naf blong jes talem ol tok we oli tru. Yu mas givim tok long wan fasin we i mekem ol man oli haremsave, blong oli kasem save tok blong yu mo long en blong tok blong yu oli save kasem poen olsem we yu wantem. Hemia nao wanem i stap long pepa blong givim Advaes se “Halpem man blong haremsave.”
16 Yu mas wantem fasin ya blong toktok from we God i toktok wetem yumi long fasin we yumi haremsave. Mo tu, Jisas i stap eksplenem ol parabol blong hem long ol disaepol mo i givim ol samting long olgeta blong oli tijim ol trutok ya long ol narafala man. Blong givhan long ol man we oli stap lesin long yu blong oli haremsave, i min se yu mas yusum ol rod ya blong yu save givhan long ol man we oli stap lesin long yu oli kasem save long tok blong yu, oli kasem tingting olsem yu mo oli save yusum ol poen blong yu blong tijim ol narafala man.
17, 18. ?Olsem wanem yumi save yusum wan poen mo holem go kasem en blong tok?
17 Holem poen we man i agri long hem. Wanem yu talem mo tu olsem wanem yu talem tok blong yu i impoten tumas blong stanemap wan poen we man i agri long hem, long fastok blong yu. Be yu no mas lusum poen ya taem yu gohed long tok blong yu, sipos no bambae ol man oli no moa lesin long yu tu. Yu mas gohed blong talem ol poen blong yu long fasin we ol man we oli stap lesin long yu oli save glad long hem. Olsemia nao yu mas tingbaot tingting blong olgeta long samting we yu tokbaot mo yusum save ya blong givhan long olgeta blong oli haremsave se ol poen long tok blong yu oli stret.
18 Wan gudfala eksampel blong stanemap wan poen blong yusum mo holem poen ya go kasem we yu finisim tok, olsem blong givhan long ol man blong oli haremsave, hemia toktok blong aposol Pol we i stap long Ol Wok 17:22-31. Makem olsem wanem hem i stanemap wan poen fastaem mo gudfala fasin blong holem poen ya long ful tok blong hem. Taem hem i finisim tok blong hem, hem i pulum sam man we oli stap lesin blong oli bilif long trutok, olsem wan jaj we i stap long taem ya tu i bilif.—Ol Wok 17:33, 34.
19-23. Talem sam rod we yu save yusum blong eksplenem gud ol poen.
19 Tekem taem blong eksplenem ol poen. Blong mekem ol man we oli stap lesin oli tingtinggud long wan samting, i impoten se oli mas kasem inaf poen long wan rod we i mekem se oli no jes fogetem tok blong yu from we oli no kasem save long ol poen blong hem. Yu nao yu mas givhan long olgeta.
20 Blong samting ya i karem frut, lukaotgud se yu no kavremap tumas poen. Ol man bambae oli fogetem ol gudfala poen long tok blong yu sipos yu hareap blong givim tok blong yu. Tekem taem blong eksplenem gud ol poen, blong mekem se ol man oli no jes harem ol poen ya nomo be oli kasem save long olgeta tu. Taem yu talem wan impoten poen, tekem taem blong wok long hem blong mekem i klia. Ansa long ol kwestin olsem ?From wanem? ?Hu? ?Olsem wanem? ?Wanem samting? ?Wetaem? ?Weples? Long rod ya givhan long ol man we oli stap lesin long yu blong oli kasem moa save long hem. Samtaem yu save talem sam poen we oli sapotem wan poen we yu tokbaot no yu save talem sam poen we oli agensem, blong makem se yu yu stap skelem ol samting. Sem mak olsem se, afta we yu talem wan rul yu save faenem se i gud blong eksplenem blong givhan long ol man we oli stap lesin blong luksave olsem wanem oli save mekem i wok long laef blong olgeta. Yes, yu mas gat fasin luksave. Blong eksplenem eni poen, samting ya i dipen long taem we bambae yu yusum mo olsem wanem poen ya i impoten long tok blong yu.
21 Oltaem ol kwestin oli gud blong givhan long ol man we oli lesin blong oli haremsave. Ol kwestin we oli no nidim ansa, hemia we yu askem ol man be i no blong oli ansa long yu, mo tu yu spel smol, samting ya bambae i wekemap tingting blong olgeta. Sipos yu stap toktok long wan no tu man nomo, olsem long wok blong prij, yu save yusum ol kwestin blong pulum tufala blong tufala i talem tingting blong tufala, mo long rod ya mekem sua se tufala i kasem save mo akseptem ol tingting we yu talem.
22 From we yu wantem lidim tingting blong ol man we oli stap lesin long yu, yu mas mekem tok blong yu i stanap long ol samting we oli save finis, maet oli lanem long prapa ekspiryens blong olgeta no oli lanem long ol tok we yu bin talem. Taswe, taem yu save se yu bin wok i naf long sam poen, yu mas tingbaot ol samting we ol man we oli stap lesin long yu oli bin save finis long poen we yu tokbaot.
23 Oltaem i impoten blong luk fasin blong ol man we oli lesin long yu blong mekem sua se oli stap folem yu. Sipos i gat nid, yu mas gobak mo mekem ol poen we yu talem finis oli kam klia moa. Sipos yu yu no lukaotgud blong givhan long olgeta blong oli haremsave, bambae oli lusum rod we yu folem blong givim tok blong yu.
24. ?From wanem i gud blong soemaot long ol man we oli stap lesin long yumi olsem wanem ol poen oli stret long olgeta?
24 Mekem tok i stret long ol man we stap lesin. Sipos yu talem wan poen, mekem sua se yu soem olsem wanem poen ya i sapotem samting we yu stap tokbaot. Mo tu, talem sam samting we i save pusum man blong mekem samting long laef blong hem, pulum ol man we oli stap lesin long yu blong oli mekem ol samting we i laenap wetem ol trufala poen we yu bin talem. Sipos tok blong yu i rili pulum olgeta blong haremsave, bambae oli rere blong mekem i wok long laef blong olgeta.