Japta 2
Leftemap Jeova, Trufala God Ya
1. (a) ?Hu ya trufala God? (b) ?Taem yumi kasem save long hem, weswe save ya i gat paoa long laef blong yumi?
LONG ol Kristin brata blong hem, aposol Pol i raetem, se nating we i gat plante god, “blong yumi i gat wan God ya nomo we i Papa . . . mo i gat wan Masta nomo, Jisas Kraes.” (1 Kor. 8:5, 6) “Wan God ya nomo” we Pol i tokbaot, i Jeova we i wokem olgeta samting. (Dut. 6:4; Rev. 4:11) Ol man we oli gat fasin tangkyu, oli lanem ol gudgudfala fasin blong God. Oli kasem save long ol samting we hem i mekem long ol man, mo ol samting ya oli pulum olgeta blong oli kam kolosap long Hem. ?Wanem samting i kamaot from? Blong olgeta, i luk olsem we i stret nomo blong leftemap Hemia ya we oli tinghae tumas long hem. Oli leftemap hem from ol tok mo ol wok blong olgeta. Taem lav blong olgeta i gru, hem i pulum olgeta blong oli tokbaot God long ol narafala. Antap bakegen, oli traehad tumas blong mekem sem mak long hem, i stret nomo long paoa ya we oli naf, from oli man nomo. Baebol i leftemap tinting blong yumi, blong mekem olsem from we hem i talem se: “Yufala i mas kam man blong mekem sem fasin blong God, olsem ol pikinini we hem i gat lav long yufala, mo yufala i mas gohed blong wokbaot long lav.” (Efesas 5:1, 2) Blong ona long advaes ya, yumi mas kasem save long God Jeova long ol fasin we hem i rili gat.
Ol Gudgudfala Fasin Blong Jeova
2.Talem sam gudfala stampa fasin blong God, we oli pulum yumi blong presem hem.
2 Long ol pej blong Baebol, yumi faenemaot sam stret tok we oli soemaot ol nambawan fasin blong God. Taem yu yu ridim olgeta, yu yu mas tekem taem blong tingbaot mining blong ol gudgudfala fasin ya. Yu yu mas luksave weswe oli impoten blong yu. Olsem ya nao, “God i lav.” (1 Jon 4:8) “Olgeta rod blong hem oli stret.” (Dut. 32:4) ‘Long Hem, i gat waes.’ (Job 12:13) Hem i “strong long paoa blong hem.” (Aes. 40:26) ?Sipos yu yu tingtinggud long ol nambawan fasin ya, we oli stampa fasin blong God, samting ya i pulum yu blong leftemap God mo presem Hem?
3.?Wanem narafala fasin blong Jeova oli pulum yumi?
3 Baebol i mekem yumi kasem moa save long ol gudgudfala fasin blong Jeova, hem i talem se “God i gat sore mo hem i haremgud, hem i slo blong kam kros, mo hem i gat fulap gladhat mo trutok.” (Eks. 34:6) “Yu yu gud, O Jeova, mo yu yu rere blong fogivim.” (Sam 86:5) “Long saed blong Jeova, ae blong hem oli lukraon long wol, blong soemaot paoa blong hem long olgeta we hat blong olgeta i fulwan long hem.” (2 Kron. 16:9) “God i no mekem i defren long ol kaen man, be hem i agri long man ya blong evri nesen, sipos man ya i fraetgud long hem mo i mekem stretfasin.” (Wok 10:34, 35) Jeova i “gat gladhat blong givim,” mo hem i “hapi God ya.” (Jemes 1:5; 1 Tim. 1:11) !I gud tumas blong mekem wok blong nambawan God ya, we i stap lukaotgud long yumi!
4. (a) ?Jeova i askem we yumi holemfas long hem olsem wanem? ?Weswe samting ya i impoten? (b) ?Sam 34:3 i singaot yumi blong mekem wanem?
4 Stret wetem ol stampa fasin ya blong hem, Jeova i wan “God we i wantem we oli wosip long hem wan nomo.” (Eks. 20:5) Blong mekem stret wok blong hem, yumi mas mekem ful wok blong hem wan nomo. Yumi no save laekem wol ya tu, we Setan i god blong hem. (1 Jon 2:15-17; 2 Kor. 4:3, 4) Jeova i luksave sipos wan man i gyaman nomo long stretfasin blong hem. Hem i save gud ol samting we yumi mekem, mo ol filing insaed long yumi tu. Hem i luksave wanem kaen man yumi traem karem ol fasin from. Sipos yumi rili laekem stretfasin, hem i givhan long yumi. (Jer. 17:10; Prov. 15:9) From we Jeova i gat ol gudgudfala fasin ya, plante milyan man oli glad tumas blong ona long krae ya, we wan man blong raetem Sam i talem se: “O leftemap Jeova wetem mi, yufala pipol, mo yumi mas leftemap nem blong hem tugeta.” (Sam 34:3) ?Yu yu wan man blong kampani ya?
5. ?Wanem samting bambae i halpem yumi blong kasem ol gud frut from yumi stadi ol fasin blong Jeova?
5 Bambae yu yu wantem tumas tokbaot God, mo bambae yu save faenem sam rod blong givhan long yu blong folem ol fasin blong hem, sipos yu yu luklukgud long ol nambawan fasin blong hem. Yu yu mas faenemaot (1) tru mining blong evri fasin ya, maet yu yu save luksave weswe oli defren long olgeta, (2) olsem wanem Jeova i soemaot ol gudgudfala fasin ya, mo hem i mekem long wanem kaen man, (3) olsem wanem yu yu save karem ol fasin ya, mo weswe oli gat paoa long fasin blong yu blong tingbaot ol samting.
6. Yusum gudfala fasin ya, se: lav, blong soemaot olsem wanem yu yu save stadi ol gudgudfala fasin blong Jeova. Yu yu mas mekem olsem from ansa long ol kwestin ya we oli stap long en blong haf ya. I gud blong yusum ol vas blong mekem wan ansa.
6 Naoia yumi tingbaot wan fasin nomo. ?Taem Baebol i talem se: “God i lav,” tok ya i minim wanem? (1 Jon 4:8) I gat defren kaen fasin blong lav. Long vas ya, Jon i yusum Grik tok ya se a·gaʹpe. Wod ya i blong tokbaot fasin blong lav we i hae moa, hemia fasin ya we Jeova God hem wan i mak blong hem. Lav ya i wan wei blong soemaot we hem i no tingbaot hem wan nomo. From samting ya, yu yu mas mekem rere ol prapa ansa blong yu long ol kwestin ya biaen. Yu yu mas yusum ol vas.
Olsem wanem ol wok blong Jeova oli soemaot fasin ya? (Wok 14:16, 17)
?Wanem ya i nambawan mak blong lav blong Jeova long ol man? (Jon 3:16) ?Jeova i mekem olsem from we man i gud long hem? (Rom 5:8)
?Weswe ol samting ya we Jeova God i mekim from Pikinini blong hem, oli mas gat paoa long laef blong yumi? (2 Kor. 5:14, 15, 18, 19)
?Weswe yumi, we yumi Kristin finis, yumi mas soemaot semkaen lav ya long ol Kristin brata blong yumi? (1 Kor. 13:4-7; 1 Jon 4:10, 11; 3:16-18)
?Yumi mas soemaot lav long hu ya bakegen? ?Olsem wanem? (Mat. 5:43-48; 28:19, 20; Gal. 6:10)
7. ?Long prapa stadi blong yu, olsem wanem yu yu save faenemaot sam narafala poen long saed blong ol gudgudfala fasin blong Jeova?
7 ?Yu yu wantem stadigud long sam narafala gudfala fasin blong Jeova? Blong statem stadi ya, maet yu yu save traem faenemaot ol poen long saed blong “stretfasin” mo “waesfasin,” mo biaen “gladhat” mo “fasin sore.” Yu yu save yusum ol “index” blong ol buk blong Watch Tower, mo sam konkodans blong Baebol (ol refrens blong ol vas). Bambae yu yu save faenem fulap save blong givim laet long yu.
Givhan Long Ol Narafala Blong Oli Lanem Trutok
8. (a) ?Ol man blong wol oli mekem wosip long wanem kaen god? (b) ?Hu ya i haed long krangke fasin ya? ?From wanem yu yu ansa olsemia?
8 I gat wan rod we i agensem wosip blong trufala God, se ol man oli mekem wosip long plante milyan narafala god. Long namba fo handred yia, ol jyos we oli talem oli Kristin oli agri long tijing blong “Triniti.” Ol man Babilon, ol man Ijip, ol Hindus, ol Budis oli tijim samting ya bifo long olgeta. Antap long fasin blong tingbaot God, i gat ol hed gavman we oli gat paoa, sam haeman blong spot, sam man blong singsing, we ol man oli mekem wosip long olgeta, olsem oli gyaman god nomo. Naoia i gat sam narafala god tu olsem: mane, fasin blong tinghae long hem wan nomo, mo seks. ?Hu ya i haed biaen long ol god ya? Hemia “god ya blong fasin ya blong wol,” se Devel Setan. (2 Kor. 4:4; 1 Kor. 10:20) Hem i yusum ol kaen trik blong traem mekem ol man oli tanem baksaed long Jeova, no mekem olgeta oli seraot long ol dedefren wosip blong olgeta.
9. ?Wanem rod i nambawan blong halpem wan man i lanem trutok long saed blong God?
9 ?Olsem wanem yumi save givhan long ol man, nating sipos oli Kristin no nogat? ?Weswe yumi save halpem olgeta oli kasem save long trutok? Wan gudfala rod i blong soemaot long olgeta olsem wanem Baebol i tokbaot God, olsem wanem hem i talem se God i hu, mo olsem wanem hem i storebaot ol gudgudfala fasin blong hem. Oraet nao, yumi mas soemaot ol samting ya tu from we fasin blong laef blong yumi i saenaot from ol gudgudfala fasin blong God.—1 Pita 2:12.
10. ?Taem yu yu toktok wetem wan man we i bilif long Triniti, i gud we yu yu mekem wanem fastaem?
10 ?Be, olsem wanem nao sipos wan memba blong wan jyos we i talem se hem i Kristin, i rao wetem yu, from we hem i talem se bilif blong “Triniti” i stanap long Baebol? Fastaem yu yu mas luksave se i gat sam ofisol tok blong talemaot tingting blong “Triniti,” be plante man oli gat prapa tingting blong olgeta long hem. Yu yu mas singaot olgeta blong oli talemaot ol prapa bilif blong olgeta. Biaen yu yu save skelem ol bilif blong hem wetem prapa Baebol blong hem. Biaen bakegen, yu yu mas pulum hem i jekemap ol ofisol bilif blong jyos blong hem wetem Tok blong God.
11. Tekem evri poen wanwan long ol faefala ya, yusum ol kwestin mo ol vas we oli stap long haf blong hem, blong soemaot we tijing blong “Triniti” i no stanap long Baebol.
11 Yumi mas rimemba oltaem se yumi wantem givhan long ol man. Naoia, yumi save tingbaot ol vas biaen, mo yumi mas tingtinggud long ol poen ya we oli stap wetem ol vas ya:
(1) Sam man blong bilif long Triniti oli talem strong se i gat tri man long God (Papa, Pikinini mo Tabu Speret) be i gat wan God nomo.
?Be, olsem wanem Wok 2:4, 17 i soemaot we “tabu speret” i no wan man?
?From wanem i gud blong makem hamas man, ol vas ya biaen oli tokbaot? (Jon 17:20-22; Wok 7:56; Rev. 7:10)
(2) Samfala oli bilif se olgeta memba blong “Triniti” oli sem mak long glori, we i no gat wan we i hae moa no i daon moa long narawan, se oli sem mak nomo long paoa, mo oli olfala sem mak nomo.
?Baebol i agri long ol tok ya? (Blong ansa, lukluk Jon 14:28; Matyu 24:36; Revelesen 3:14)
(3) Samfala oli yusum Jon 1:1 blong pruvum “Triniti.” Oli agyu se long Grik hanraet i no gat tok ya “wan,” nao taswe vas ya i mas kam: “Tok ya i God,” be no “Tok ya i wan god.”
?Jon 1:1 i tokbaot hamas man? ?Tri? ?Tu? ?Weswe Jon 1:18 i agensem tijing blong “Triniti”?
I tru we Grik lanwis i no gat sam tok olsem wod ya “wan” long bislama. Plante lanwis oli gat wan wod olsem. Oli yusum hem blong talem ol stret tok nomo. ?Sipos wan man i ting se i rong blong yusum wod ya (wan) long Jon 1:1, hem i wantem we oli tekemaot wod ya tu long Wok 28:6, olsem King James Version mo sam narafala oli putum wod ya i stap? (Wan narafala wei blong transletem Jon 1:1 i stap long An American Translation, se “Tok ya i gat fasin god,” se hem i gat ol semkaen fasin we God i gat)
(4) Ol man blong bilif long Triniti oli agyu se long Jenesis 1:1, 26, oli transletem Hibru wod El·o·himʹ i kam God, be Hibru wod ya i minim plante, taswe oli mas tanem hem i kam “ol God.”
?From wanem samting ya i no naf blong talem se i gat tri man nomo long “wan God”?
?Sipos Jenesis 1:1 i soemaot “Triniti,” weswe nao long Jajes 16:23 we i yusum el·o·himʹ blong “god,” mo Hibru “verb” i no soemaot wok blong plante, be blong wan nomo.
?From wanem ol tok ya blong Hibru hanraet oli yusum tok ya “ol God” olsem sipos i gat plante? Hemia wan wei blong Hibru lanwis blong tokbaot tingting ya blong soemaot ol nambawan samting we oli hae tumas. Sipos samting ya i min se i no gat wan nomo long bisnes ya, be ol “verb” oli mas soemaot wok blong plante, be long ol vas ya oli no mekem olsem.
(5) From we ol jyos ya oli pulum tingting blong man i go long Jisas nomo (mo oli tekemaot nem blong Jeova long plante translesen blong Baebol), sam man oli tingbaot Jisas nomo, sipos oli tokbaot God.
?Olsem wanem Jisas i soemaot rod long yumi, long saed blong wosip? (Luk 4:8)
12. ?From wanem i stret nomo we Jisas i singaot Papa blong hem, se “Trufala God ya nomo”?
12 Nating we samtaem Baebol i talem se hem i “wan god,” no “Strong God ya,” be Jisas i leftemap Papa blong hem. Hem i talem se Papa ya i “God blong mi mo God blong yufala.” (Jon 1:1; 20:17; Aes. 9:6) Hem i agri wetem Moses, we bifo i bin talem, se: “Jeova i trufala God; i no gat wan narafala we i olsem hem.” (Dut. 4:35) Jeova i stanap, i defren tumas long ol gyaman god, we oli sam samting nomo, oli man nomo, no Devel Setan. Hem i narakaen olgeta, i olsem we Jisas i kolem hem, se: “Trufala God ya nomo.”—Jon 17:3.
“Wokbaot Long Nem Blong Jeova”
13, 14. ?“Gat save” mo “wokbaot long” nem blong Jeova, tufala tok ya i minim wanem?
13 Afta we oli stap plante yia, long fasin olbaot blong no save se God hem i hu, plante man oli harem gud tumas taem oli luk prapa nem blong God, Jeova, long Baebol blong olgeta. (Eks. 6:3) Be, bambae oli save haremgud blong olwe from save ya, sipos “oli wokbaot long nem blong Jeova foreva.” (Maeka 4:5) Blong mekem olsem, i no naf blong gat save long nem blong Jeova, mo i no naf blong talem se yumi Wetnes blong Jeova.
14 Long saed blong bigfala mining blong nem blong God, Sam 9:10 i talem se: “Olgeta we oli save nem blong yu, bambae oli trastem yu, . . . O Jeova.” ?Samting ya i minim wanem? Hem i no minim fasin blong save nem blong Jeova nomo, from we maet wan man i save nem ya be hem i no trastem Jeova. “Olgeta we oli gat save” blong prapa nem blong God, oli laekem fasin God blong Jeova, oli ona long hem mo oli obei long ol loa blong hem. Sem mak nao, “wokbaot long nem blong Jeova” i minim se oli givim laef blong olgeta i go long hem, mo oli karem nem blong hem olsem wan man blong wosip long hem. Oli rili folem ol samting we God i wantem. (Luk 10:27) ?Yu yu stap mekem olsem?
15. ?Sipos yumi wantem mekem wok blong Jeova foreva, tingting ya nomo se: yumi mas mekem olsem, i mas pulum yumi from?
15 Sipos yumi wantem mekem wok blong Jeova foreva, be yumi no mas letem tingting ya se “yumi mas” i pulum tingting blong yumi nomo long wok ya. Aposol Pol i wekemap tingting blong Timote, we i mekem wok blong Jeova long plante yia finis, se: “Yu yu mas trenem yu, from plan blong yu i blong fasgud long God.” (1 Tim. 4:7) Fasin ya we i fasgud long God i kamaot long hat. Hem i stanap long fasin blong laekem man ya we yumi fasgud long hem. “Fasin blong fasgud long God” i wan bigfala respek long Jeova hem wan. Hem i soemaot lav we i holemfas long Hem, from we yumi laekem Hem mo ol rod blong Hem. Fasin ya i pulum yumi blong mekem ol narafala oli tinghae long nem blong hem. Yumi mas karem “fasin ya blong fasgud long God.” Hemia wan mak we yumi wantem kasem long laef blong yumi, sipos yumi wantem wokbaot foreva long nem blong Jeova, trufala God.—Sam 37:4; 2 Pita 3:11.
Tingtingbak
● ?Weswe long ol gudfala fasin blong Jeova? ?Olsem wanem yumi save kasem gudfala frut from yumi kasem klia save long evri gudfala fasin blong hem?
● ?Olsem wanem yumi save halpem ol narafala blong oli kasem trutok long saed blong God?
● ?Yumi mas mekem wanem blong “gat save” mo “wokbaot long nem blong Jeova”?