Japta 7
Yumi Lanem Wanem From God i Letem Rabis Fasin
1. (a) ?Sipos Jeova i panisim wantaem nomo tufala stronghed ya blong Iden, weswe long yumi? (b) ?Be defren nao, wanem nambawan rod blong lav, Jeova i openem long yumi?
NOMATA ol kaen trabol we yumi save gat long laef blong yumi, be God i no mekem i no stret long yumi from we yumi bon long wol ya. Taem hem i wokem faswan man mo woman long Paradaes, hem i mekem tufala i stret olgeta. Sipos hem i panisim tufala wantaem nomo, be i no save gat wan kaen man long wol we i stap wetem ol kaen sik, ol kaen fasin pua mo ol kaen nogud fasin blong hem. Jeova i gat sore, taswe hem i letem Adam mo Iv i karem wan famle bifo tufala i ded. Ol pikinini ya oli kasem ol nogud fasin from tufala. Be from Kraes, Jeova i mekem wan rod i open blong olgeta pikinini blong Adam we oli gat bilif long Jisas, oli save kasem bakegen ol samting we Adam i lusum—itenel laef long sam fasin blong wol we oli mekem man i harem gud tumas.—Dut. 32:4, 5; Jon 10:10.
2. ?Ol rod ya oli blong sevem yumi nomo?
2 Ol blesing ya we yumi wan wan i save kasem from samting ya, oli bitim mak. Be Baebol i soemaot long yumi we i gat wan samting we i gat bigfala mining, i bitim prapa rod ya blong sevem yumi.
From Bigfala Nem Blong Hem
3. ?Wanem bigfala poen i stap long saed blong fasin blong mekem plan blong Jeova i kamtru blong ol man blong wol?
3 Nem blong Jeova, i minim se gud nem blong hem olsem Hae Rula mo God blong trutok, i stanap long fasin ya we bambae plan blong hem i kamtru long saed blong wol mo ol man. From we Hem i gat haeples blong hem, pis mo fasin blong haremgud blong olgeta samting blong heven mo wol, oli stanap long fasin ya we bambae nem blong Hem i kasem bigfala respek, mo from fasin ya we olgeta man mo olgeta speret man oli mas obei long hem.
4. ?Wanem ya plan ya blong Jeova?
4 Biaen we hem i wokem Adam mo Iv, God i givim wan wok long tufala. I klia nomo we wok ya i no blong oli bos nomo long olgeta ples blong wol. I tru we oli mas mekem paradaes i kasem olgeta ples ya, be antap bakegen, tufala i mas fulumap wol long ol pikinini blong tufala. (Jen. 1:28) ?Plan blong God i save mestem rod ya, from we tufala i mekem sin, mo from we oli sakem doti long nem blong Hem?
5. (a) ?Stret long Jenesis 2:17, wetaem wan man we i kakae long tri ya blong save wanem samting i gud mo wanem samting i nogud, i mas ded? (b) ?Olsem wanem Jeova i mekem tok ya i kamtru? ?Olsem wanem Jeova i respektem plan blong hem long saed blong wol?
5 Jeova i givim woning ya long Adam, se sipos hem i no obei long hem mo i kakae long tri ya blong save wanem samting i gud mo wanem samting i nogud, be hem i mas ded “long dei ya” we hem i kakae. (Jen. 2:17) Stret long tok ya blong God, long stret dei ya we Adam i mekem sin, Jeova i mekem tufala ya we i brekem loa blong hem, i kasem panis blong ded. Tufala i no save ronwe long panis ya. Stret long loa blong Jeova, long tingting blong hem, Adam mo Iv i ded long stret dei ya. (Lukluk Luk 20:37, 38.) Be long saed blong prapa plan blong hem we i blong mekem wol i fulap long ol man, Jeova i letem tufala i karem wan famle, bifo we tufala i ded. Nomata ol samting ya oli kamaot olsem wanem, from we Jeova i tingbaot 1,000 yia oli olsem wan dei nomo, taem Adam i kasem 930 yia, i olsem we laef blong hem i finis long “dei ya” nomo. (Jen. 5:3-5; lukluk Sam 90:4; 2 Pita 3:8.) Olsem ya nao, ol tok blong Jeova oli tru nomo long saed blong panis ya we i mas kamaot. Nao plan blong hem blong mekem wol i kam fulap long ol pikinini blong Adam i no mestem. Be samting ya i minim, se long sam taem, hem i letem sam sinman oli laef i stap long wol nomo.
6, 7. (a) ?Olsem wanem ol tok blong Eksodas 9:15, 16 oli soemaot long yumi from wanem Jeova i letem rabis fasin i gohed? (b) ?Long saed blong Fero, olsem wanem Jeova i soemaot paoa blong hem? mo ?Olsem wanem oli talemaot nem blong hem long wol? (c) ?Weswe bambae long en blong rabis fasin ya long wol?
6 Ol tok ya we Jeova i talem long wan rula blong Ijip long ol dei blong Moses, oli givim moa save from wanem God i letem rabis fasin i gohed blong sam taem. Taem Fero i blokem ol man Isrel oli no aot long Ijip, Jeova i no kilim hem wantaem nomo. Hem i sanem ten trabol oli kam long kantri ya, we ol trabol ya oli soemaot paoa blong Jeova long plante defren fasin we oli narakaen. Taem Fero i kasem woning long saed blong namba seven trabol ya, Jeova i talem long hem we hem i save ravemaot hem wetem ol man blong hem tu, isi nomo, blong i no moa stap long wol. “Be,” Jeova i talem se “hemia nao, from wanem mi mi letem yu yu stap laef, blong soemaot paoa blong mi long yu, mo blong mekem we ol man oli talemaot nem blong mi long olgeta ples blong wol.”—Eks. 9:15, 16.
7 Taem Jeova i mekem Isrel i go fri, be plante man long olgeta ples blong wol oli kasem save long nem blong hem. Tede, i gat samwe long 3,500 yia we oli pas finis, be ol man oli no fogetem yet ol samting ya we God i bin mekem. From samting ya, oli talemaot prapa nem blong Jeova, mo antap long samting ya, trutok long saed blong hemia we i karem nem ya i go olbaot long wol. Samting ya i soemaot gudnem blong Jeova, we i wan God we i holemfas long ol kontrak blong hem, mo i mekem wok long saed blong ol man blong hem. Hem i soemaot we i no gat nating we i save blokem strongfala paoa blong hem. Be bambae bigfala trabol ya we i stap kamtru blong spolem olgeta rabis fasin we yumi save luk, no we ae i no save luk tu, hemia nao bambae i bitim mak blong samting ya. Bambae oli neva fogetem bigfala paoa ya mo bigfala glori ya, we samting ya i givim long nem blong Jeova. Yes, hemia bambae i wan bigfala samting blong histri blong heven mo wol. !Ol blesing we oli kamaot from, oli neva save finis!—Esik. 38:23; Rev. 19:1, 2.
‘!Waes Blong God i Dip Tumas!’
8. ?Long saed blong stret fasin blong God, aposol Pol i mekem yumi tingbaot wanem?
8 Long leta blong hem we hem i raetem i go long ol man Rom, aposol Pol i askem kwestin ya, se: “?I gat sam fasin we oli no stret long God?” Nao hem i ansa long kwestin ya blong soemaot fasin sore blong God, mo hem i talem bakegen ol samting we Jeova i talem long Fero. Hem i mekem tingting blong yumi tu i rimemba se yumi man we i olsem graon nomo long han blong wan man blong wokem graonpot. ?Graon ya i save toktok long man we i stap wokem hem, blong ripotem fasin ya we bambae oli yusum hem? Pol i talem se: “Oraet nao, God, nating we hem i wantem soemaot kros blong hem mo mekem ol man oli kasem save long paoa blong hem, be tingting blong hem i longfala, nao i letem ol kap ya blong kros oli stap, nating we oli blong lus nomo. Hemia nao i blong mekem ol rij samting blong glori blong hem oli kamtru long saed blong ol kap blong sore, we hem i mekem olgeta oli rere fastaem blong kasem glori, se yumi ya, we hem i singaot yumi, i no long ol man Jyu nomo be long ol hiten man tu. ?Weswe nao?”—Rom 9:14-24.
9. (a) ?Hu ya “ol kap blong kros we oli stret blong lus nomo”? (b) ?From wanem Jeova i letem tingting blong hem i longfala nating we oli mekem nogud? ?Olsem wanem en blong ol samting ya bambae i mekem i gud blong olgeta we oli laekem hem?
9 I stat long taem ya we Jeova i talem ol profet tok we oli stap long Jenesis 3:15, Setan mo ol laen blong hem oli kam “ol kap blong kros . . . we oli blong lus nomo.” Long ol taem ya, Jeova i soemaot we tingting blong hem i longfala. Ol rabis man oli jikim ol rod blong hem, oli mekem trabol long ol man blong hem, mo oli kilim prapa Pikinini blong hem i ded. Be Jeova i soemaot we hem i save holem kros blong hem, mo samting ya i mekem sam blesing oli save stap foreva blong ol man blong hem. Olgeta man we hem i wokem oli gat jans blong luk ol rabis frut we oli kamaot from we samfala oli mekem stronghed agens long God. Long sem taem ya, ded blong Jisas i openem wan rod blong mekem ol man we oli obei oli kam fri, mo blong ‘brekem olgeta wok blong devel.’—1 Jon 3:8; Hib. 2:14, 15.
10. ?From wanem Jeova i letem ol rabis fasin oli stap long ol laswan 1,900 yia?
10 I gat 1,900 yia nao we Jisas i laef bakegen, be Jeova i letem yet “sam kap blong kros” oli stap, i no mekem olgeta oli lus. ?From wanem? From we long sem taem ya, hem i stap mekem rere seken haf ya blong laen blong woman ya, hemia nao olgeta we oli mas joen long Jisas Kraes long Kingdom blong hem long heven. (Gal. 3:29) Olgeta ya, ol 144,000, oli ol “kap blong sore” we aposol Pol i tokbaot. Fastaem, sam man blong ol man Jyu oli kam insaed long kampani ya. Biaen sam man Sameria we oli sakomsaes oli joen, mo biaen bakegen sam man blong ol hiten nesen. Taswe Jeova i wok long plan blong hem, mo long ol taem ya tingting blong hem i longfala. Hem i no fosem wan man blong mekem wok blong hem, be hem i givim bigfala blesing long olgeta we oli agri long ol rod blong hem we oli stanap long lav. Naoia, fasin ya blong mekem rere kampani ya blong heven, i kolosap finis.
11. ?Wanem narafala kampani tu i stap kasem blesing from tingting blong Jeova i longfala?
11 ?Be weswe nao long saed blong ol man we oli mas stap long wol? Long stret taem blong God, bambae plante taosen milyan man oli laef bakegen, oli kam man we oli ona long Kingdom. Antap bakegen, i stat long 1935, Jeova i mekem tingting blong hem i longfala, blong i gat rod blong hivimap tugeta wan “bigfala kampani” long olgeta nesen, blong bambae oli sef.—Rev. 7:9, 10; Jon 10:16.
12. (a) ?From ol samting ya, yumi lanem wanem long saed blong Jeova hem wan? (b) ?Weswe long tingting blong yumi long fasin ya blong wok blong Jeova?
12 ?I gat sam fasin we oli no stret long olgeta samting ya? !Nogat! Sipos God i no spolem ol rabis man, se “ol kap blong kros,” hemia nao i blong soemaot sore long sam narafala. Samting ya i stret long plan blong hem. ?Weswe nao wan man i save ripotem fasin ya? Defren nao, taem yumi lukluk plan blong hem we i stap ron olsem, yumi lanem plante samting long saed blong Jeova hem wan. Yumi sapraes tumas long ol defren fasin blong ol gudgudfala fasin blong hem—stret fasin blong hem, fasin sore blong hem, tingting blong hem we i longfala, mo ol defren fasin blong waes blong hem. Waes rod ya we Jeova i yusum blong ansa long poen ya foreva, i wan tru wetnes we fasin blong rul blong hem i beswan. Yumi save talem wetem aposol Pol: “!Olsem wanem waes fasin, mo ol save, mo ol rij fasin blong God oli dip tumas! !Yumi no naf blong skelem ol jajmen blong hem, mo yumi no naf blong faenemaot ol rod blong hem!”—Rom 11:33.
Wan Rod Blong Soemaot We Yumi Holemfas Long Hem
13. (a) ?Taem yumi kasem sam hadtaem, yumi gat jans blong mekem wanem? (b) ?Wanem samting i save halpem yumi blong ansa from waes fasin nomo?
13 From we God i no spolem yet ol rabis fasin blong wol mo from we hem i no mekem yet ol man oli stanap gud bakegen, samtaem yumi save kasem sam trabolsoa. ?Weswe nao sipos i gat hadtaem olsem? ?Yumi tingbaot olgeta, olsem sam jans blong joen long fasin ya blong mekem nem blong Jeova i no moa gat doti, mo blong soemaot we Devel i wan gyaman nomo? Yumi save mekem olsem, sipos yumi tingbaot advaes ya: “Yu yu mas waes, pikinini blong mi, mo yu mas mekem hat blong mi i haremgud, blong mi mi save ansa long hemia we i stap jikim mi.” (Prov. 27:11) Setan, hemia nao speret man ya we i stap jikim Jeova. Hem i talem se sipos sam man oli lusum olting blong olgeta no sipos oli kam sik, be oli save putum nogud i go long God, yes, oli save tok nogud long hem. (Job 1:9-11; 2:4, 5) Yumi mekem hat blong Jeova i haremgud, taem yumi holemstrong long God long ol hadtaem ya, from we yumi soemaot we ripot ya i no tru long saed blong yumi. Yumi trastem Jeova, we i gat switlav long ol man blong hem. Sem mak nomo we hem i mekem long saed blong Job, long stret taem blong hem, Jeova bambae i givim pei long olgeta we oli holemstrong long hem.—Jem. 5:11; Job 42:10-16.
14. ?Sipos yumi trastem Jeova taem yumi kasem hadtaem, yumi save kasem wanem blesing from?
14 Sipos yumi trastem Jeova, sipos yumi stanap long hem taem i gat sam trabol, yumi save karem sam gudgudfala fasin. From ol samting we Jisas i harem nogud from, hem “i lanem fasin obei” no wan fasin ya we i bitim ol samting we hem i save fastaem. Yumi tu yumi save lanem—fasin blong mekem tingting i longfala, fasin blong stanap strong, mo fasin tankyu from ol stret rod blong Jeova. ?Bambae tingting blong yumi i save stap longfala, blong yumi agri long fasin ya we i trenem yumi?—Hib. 5:8, 9; 12:11; Jem. 1:2-4.
15. ?Taem yumi stap kasem hadtaem, olsem wanem ol narafala oli save kasem blesing from?
15 Ol narafala bambae oli save lukluk ol samting we yumi mekem. From we oli lukluk we yumi gat lav long stret fasin, maet samfala bambae oli save luksave olgeta ya we oli rili ol “brata” blong Kraes tede. Nao sipos oli joen long “ol brata ya” long wosip blong olgeta, oli save kasem ol blesing blong itenel laef. (Mat. 25:34-36, 40, 46) Jeova mo Pikinini blong hem oli wantem we olgeta oli gat jans ya. ?Yumi tu i wantem samting ya? ?Yumi rere blong stanap strong long hadtaem blong mekem samting ya i kamtru?
16. ?Olsem wanem fasin blong yumi blong tingbaot ol hadtaem ya, i joen long kwestin blong yuniti?
16 !I stret nomo we yumi tingbaot ol hadtaem ya, oli olsem sam jans blong soemaot we yumi holemfas long Jeova, mo yumi wantem mekem wil blong hem i kamtru! Sipos yumi mekem olsem, samting ya i soemaot klia we yumi rili stap wokbaot long yuniti wetem God mo Kraes, long yuniti ya we Jisas i mekem prea long hem blong ol trufala Kristin.—Jon 17:20, 21.
Tingtingbak
● ?Nating we hem i letem rabis fasin i stap, weswe Jeova i soemaot we hem i gat bigfala respek long nem blong hem?
● ?Olsem wanem fasin blong God blong letem “ol kap blong kros,” i mekem fasin sore blong hem i kasem yumi?
● ?Weswe yumi mas tingbaot ol hadtaem ya we yumi save kasem?