Japta 10

Wan Kingdom “We Bambae i No Lus”

1, 2. (a) ?Ol samting we oli hapen evri dei long wol oli soemaot wanem? ?Olsem wanem? (b) ?I gat wanem rod ya nomo blong winim ol trabol?

OL samting we oli hapen long wol evri dei oli soemaot we ol man oli no save haremgud, from we oli sakem hae rul blong Jeova mo oli traem rulum olgeta. I no gat gavman blong man we i blesem olgeta. Nating we ol man oli gat plante save long sayens i bitim bifo, oli no naf blong karemaot sin, blong winim ol sik mo blong finisim ded. Be defren nao, ol nesen oli gohed blong wokem sam nyu tul blong faet we oli nogud bitim bifo. Fasin raf i stap olbaot. Ol teknik mo fasin griri oli mekem man i spolem graon, wora mo win. From we kwiktaem nomo mane i lusum paoa blong hem mo from we i no gat wok, plante man oli hadwok tumas blong kasem ol samting blong laef. Plante man oli no moa gat hop.—Ekles. 8:9.

² ?I gat wan rod blong winim ol trabol ya? Yes, i gat Kingdom blong God. Jisas Kraes i tijim ol man blong hem blong oli prea from. (Mat. 6:9, 10) !Yumi mas gat tumas tankyu long God, from we bambae i no longtaem Kingdom i winim ol trabol ya!

3. (a) ?Long saed blong Kingdom, wanem samting i kamtru long heven long 1914 K.T.? (b) ?From wanem samting ya i impoten blong yumi?

³ Jisas Kraes i rul finis long Kingdom blong God i stat long 1914.a Long yia ya, ol samting we Daniel i luk long wan profet vison oli kamtru long heven. “Olfala ya blong ol dei,” Jeova God, i givim long Pikinini blong man, Jisas Kraes, “fasin blong rul mo fasin we i stret mo kingdom; blong ol man, ol nesen mo ol lanwis bambae oli mekem wok blong hem.” Daniel i raetem: “Rul blong hem i wan rul blong longtaem we bambae i no save pas, mo kingdom blong hem bambae i no lus.” (Dan. 7:13, 14) From Kingdom ya nao, bambae God i mekem olgeta we oli laekem stret fasin oli haremgud long ol gudfala samting we hem i mekem plan blong givim long faswan papa mo mama blong yumi long Paradaes.

4. ?Yumi intres long wanem kaen samting blong Kingdom tede? ?From wanem?

⁴ Ol man blong Kingdom oli intres tumas long fasin blong gavman ya mo ol wok blong hem. Oli wantem save wanem samting hem i stap mekem naoia, mo wanem samting bambae hem i mekem. Oli wantem save ol rul blong hem. Taswe oli tingtinggud long ol poen ya, mo from samting ya, oli laekem gavman ya mo oli rere blong talemaot hem long ol narafala.—Sam 48:12, 13.

Wan Stadi We i Kasem Hat Blong Yumi

5. (a) ?Olsem wanem Baebol i soemaot we Kingdom blong Mesaea i wan fasin blong hae rul blong God? (b) ?Olsem wanem ol samting we yumi lanem long Kingdom oli gat paoa long laef blong yumi?

⁵ Fastaem yumi lanem we Kingdom blong Mesaea i wan fasin blong prapa hae rul blong Jeova. God hem wan i givim “fasin blong rul mo fasin we i stret mo kingdom” long Pikinini blong hem. Olsem ya nao, afta we kingdom i stat rul, sam voes blong heven oli talem se: “Kingdom blong wol i kam kingdom blong Masta blong yumi [Jeova God] mo blong Kraes blong hem, mo hem [Jeova] bambae i rul olsem king foreva.” (Rev. 11:15) Taswe taem yumi lanem sam samting long Kingdom mo ol wok blong hem, yumi kam kolosap moa long Jeova hem wan. Samting ya i pulum yumi blong ona long hae rul blong hem foreva.

6. ?From wanem yumi glad we Jisas Kraes i King ya we Jeova i putumap?

⁶ !I gud tumas we Jeova i putumap Jisas Kraes long jea blong King! From we God i yusum Jisas olsem Hae Man blong Wok blong mekem wol mo ol man, Jisas i savegud ol samting we yumi nidim. Antap bakegen, i stat long taem ya, hem i soemaot ‘we hem i gat lav long ol pikinini blong man.’ (Prov. 8:30:31; Kol. 1:15:17) Lav blong hem i bigwan tumas, taswe hem i kam long wol blong givim laef blong hem olsem rensam blong yumi. From samting ya nao, hem i openem rod blong yumi fri long sin mo ded, blong yumi save kasem itenel laef.—Mat. 20:28.

7. (a) ?From wanem bambae gavman ya i stap longtaem? (b) ?Olsem wanem “slef ya we i stret mo waes” i joen long gavman ya blong heven?

⁷ Gavman ya i stanap strong, mo hem i save stap longtaem, from we Jeova hem wan i no save ded nating. (Hab. 1:12; Sam 146:3-5, 10) Jisas Kraes i defren long ol king blong wol, from we God i putumap hem, mo hem i neva save ded bakegen. (Rom 6:9; 1 Tim. 6:15, 16) I gat 144,000 narafala man blong God we oli joen wetem Kraes long ol jea blong king long heven. God i tekem ol man ya long “evri laen mo evri lanwis mo evri pipol mo evri nesen.” Olgeta ya tu oli kasem laef we i neva save ded. (Rev. 5:9, 10; 1 Kor. 15:42-44, 53) Bighaf blong olgeta ya i stap finis long heven, mo ol narafala we oli stap yet long wol oli olsem “slef ya we i stret mo waes.” Kampani ya i lukaot gud long olting blong Kingdom long wol.—Mat. 24:45-47.

8, 9. (a) ?Bambae Kingdom ya i tekemaot wanem samting we i stap seraotem wol? (b) ?Taswe sipos yumi no wantem kam badfren blong Kingdom blong God, yumi no mas joen long wanem kaen kampani mo wanem kaen wok?

⁸ Bambae i no longtaem, long stret taem blong Jeova, ol ami blong Hem oli stat faet blong klinim wol. Bambae oli spolem olgeta man we oli jus blong no save God, oli lus foreva, from we oli no agri long hae rul blong God mo oli daonem lav blong hem we i kam from Jisas Kraes. (2 Tes. 1:6-9) Bambae hemia i dei blong Jeova. Hemia nao i taem ya we ol man oli wet long hem longtaem finis, blong God i soemaot we hem i Hae Rula we i stret nomo.

⁹ Rabis rula blong wol ya i stap lidim olgeta gyaman jyos, olgeta gavman blong man mo ol ami blong olgeta. Nao bambae ol samting ya oli lus foreva. Olgeta man we oli soemaot se oli blong wol ya, from we oli ronem wan kaen laef we i tingbaot olgeta wan wan nomo, oli agensem ol loa, mo oli gat nogud fasin long saed blong seks, bambae oli lus long ded. God bambae i tekemaot Setan mo ol devel blong hem, blong oli no moa save spolem ol man. Oli kalabus blong wan taosen yia. !Yes, bambae ol man we oli laekem stretfasin, oli fri bigwan!—Rev. 18:21, 24; 19:11-16, 19-21; 20:1, 2.

Olsem Wanem Kingdom i Mekem Ol Plan Blong Hem

10. (a) ?Olsem wanem bambae Kingdom blong Mesaea i mekem plan blong Jeova i kamtru long wol? (b) ?Samting ya i minim wanem blong ol man we oli laef i stap long wol?

¹⁰ Bambae Kingdom blong Mesaea i mekem plan blong God i kamtru long wol. (Jen. 2:8, 9, 15; 1:28) Kam kasem tede, man i no naf blong mekem plan ya i kamtru. Be, Pikinini blong man, Jisas Kraes, i bos long “wol ya we bambae i kamtru.” Olgeta we bambae oli no ded long dei blong Jeova blong jajem rabis wol ya, oli save wok olsem wan nomo aninit long King Jisas Kraes. Oli glad tumas blong ona long enikaen oda blong hem blong mekem wol i kam Paradaes. (Hib. 2:5-9, NTB) Bambae olgeta man oli save haremgud from wok blong han blong olgeta, mo oli save kasem ol frut from graon i givim plante.—Sam 72:1, 7, 8, 16-19; lukluk Aesea 65:21, 22.

11. (a) ?Olsem wanem bambae ol man blong Kingdom oli save kam stret gud olgeta long bodi mo tingting blong olgeta? (b) ?Bambae wanem samting i hapen from?

¹¹ Taem God i wokem Adam mo Iv, tufala i stret gud olgeta. From we God i gat plan blong fulumap wol long ol pikinini blong ol, oli mas stret gud long bodi mo tingting blong olgeta. Bambae taem Kingdom i rul, plan ya i save kamtru. Blong mekem olsem, olgeta fasin blong sin oli mas finis. Nao from samting ya, Kraes i wok olsem King, be tu hem i Hae Pris. Tingting blong hem i longfala, mo bambae hem i givhan long olgeta man blong hem, blong oli kasem blesing from sakrafaes blong prapa laef blong hem we i gat paoa blong kavremap sin. Bambae ol ae we oli blaen oli open. Bambae ol sora we oli fas oli harem. Bambae bodi we i bagarap from ol yia mo ol sik i kam gud bakegen olsem bodi blong pikinini. Bambae i no moa gat sik we i stap longtaem. Bambae dei ya i kam we i no moa gat wan man i save talem se: “Mi mi sik.” Yes, bambae ol man we oli fraetgud long God oli fri nomo, from we oli no moa karem baden blong sin mo ol nogud fasin blong hem.—Lukluk Aesea 33:22, 24; 35:5, 6; Job 33:25; Luk 13:11-13.

12. (a) ?I mas gat wanem bakegen blong man i kam stret gud olgeta? (b) ?Olsem wanem bambae samting ya i hapen? ?Wanem frut blong wok ya?

¹² Be blong kasem fasin we i stret gud olgeta, i no naf blong gat wan gudfala bodi mo wan gudfala tingting. Hemia i minim se man i mas gat ol gudgudfala fasin blong Jeova, from we hem i wokem man ‘long pija blong God, i stret olsem hem.’ (Jen. 1:26) From samting ya, oli mas tijim ol man. Long Nyufala Fasin ya bambae “stretfasin i stap long hem.” Profet Aesea i talemaot we “bambae ol man blong graon ya oli lanem stretfasin.” (2 Pita 3:13; Aes. 26:9) Stretfasin i mekem ol man oli gat pis—pis long ol man long olgeta nesen, pis long olgeta fren, pis long famle, mo antap long ol samting ya, pis wetem God hem wan. (Aes. 32:17; Sam 85:10-13) Lelebet, lelebet, olgeta we oli lanem stretfasin, bambae oli lanem wil blong God long saed blong olgeta. Taem bambae oli gat lav long ol rod blong Jeova, we i go dip long hat blong olgeta, oli save folem ol rul ya long evri fasin blong laef blong olgeta. Jisas we i stret olgeta, i save talem se: ‘Oltaem mi mi mekem ol samting we Papa blong mi i glad long hem.’ (Jon 8:29) !Bambae laef i gud tumas, taem tok ya i tru long olgeta man!

Sam Samting We Oli Kamtru Finis

13. Yusum ol kwestin ya blong soemaot ol wok blong Kingdom mo ol samting we yumi wan wan i mas mekem from.

¹³ Ol man we oli gat bilif oli lukluk klia nomo ol wok we Kingdom i mekem finis. Ol kwestin we oli stap biaen mo ol vas oli save mekem yu yu rimemba ol wok ya mo sam samting we ol man blong Kingdom oli mas mekem naoia:

?King ya i faet agens long hu fastaem? ?Wanem samting i hapen from? (Rev. 12:7-10, 12)

?Afta we Kraes i sidaon long jea blong king, hem i hivimap ol memba blong wanem kampani? (Mat. 24:31; Rev. 7:1-4)

?Long Matyu 25:31-33, Jisas i tokbaot wanem narafala wok we hem i mas mekem afta we hem i sidaon long jea blong king blong hem mo bifo we hem i spolem ol rabis man?

?Olsem wanem hem i mekem wok ya? ?Hu ya i joen long wok ya? (Mat. 24:14; Sam 110:3; Rev. 14:6, 7)

?From wanem ol badfren blong politik mo blong jyos oli no naf blong blokem wok ya? (Wok 5:38, 39; Sek.4:6)

?From wok blong tijim man tede, olsem wanem sam man oli jenisim laef blong olgeta blong ona long Kingdom rul? (Aes. 2:4; 1 Kor. 6:9-11)

Kingdom i Blong Longtaem

14. (a) ?Bambae Kraes i rul long hamas taem? (b) ?Bambae hem i mekem wanem long rul blong hem?

¹⁴ Afta we oli sakem Setan mo ol devel blong hem long bigfala hol ya, Jisas Kraes wetem ol 144,000 man we oli joen long hem, bambae oli rul blong wan taosen yia. (Rev. 20:6) Long taem ya, bambae oli mekem ol man oli kam stret gud olgeta. Oli tekemaot olgeta gavman mo olgeta paoa we oli agensem Jeova. Biaen we oli mekem samting ya finis, Jisas bambae i givimbak Kingdom ya long Papa blong hem, “blong God i olsem olgeta samting blong evriwan.”—1 Kor. 15:24, 28.

15. ?Olsem wanem i tru we bambae Kingdom ‘i neva lus’?

¹⁵ Taswe bambae prapa ples blong Jisas long saed blong wol i jenis. Be, rul blong hem “i blong longtaem” mo Kingdom blong hem “bambae i no lus.” (Dan. 7:14) ?Olsem wanem? Hemia i minim se paoa blong rul bambae i no save pas long han blong sam narafala man we oli gat defren plan. Bambae ol wok ya blong Kingdom ‘oli neva save lus.’ Olgeta wok ya we Kingdom i mekem blong soemaot we nem blong Jeova mo plan blong hem long wol i stret, bambae oli stanap foreva.

Tingtingbak

● ?From wanem Kingdom blong God i rod ya nomo blong winim ol trabol? ?Hem i stat rul long wetaem?

● ?Wanem fasin blong Kingdom i pulum hat blong yu? ?Bambae hem i mekem wanem? ?From wanem?

● ?Yumi save lukluk wanem wok ya we Kingdom i mekem finis? ?Olsem wanem yumi save joen long ol wok ya?

[Futnot]