Japta 11

“Gohed Blong Lukaot Kingdom Fastaem”

1. (a) ?From wanem i gat 1.900 yia nao we Jisas i talem we oli mas lukaot Kingdom fastaem? (b) ?Yumi mas tingbaot wanem kwestin?

I GAT 1.900 yia nao, Jisas i mekem wan tok long Galili. Hem i talem se: “Yufala i mas gohed blong lukaot Kingdom fastaem mo stret fasin blong hem.” ?From wanem hem i talem ol tok ya? I tru we Kraes i kam king long plante handred yia biaen. Be bambae Jeova i yusum Kingdom blong Mesaea blong mekem tabu nem blong hem i stret olgeta, mo blong mekem bigfala plan blong hem i kamtru long wol. Enikaen man we i rili luksave samting ya, i mas putum Kingdom long fas ples blong laef blong hem. Samting ya i tru long faswan handred yia, mo hemia i tru moa naoia from we Kingdom i stap rul. ?Fasin blong laef blong yu i soemaot we yu yu stap lukaot Kingdom blong God fastaem?—Mat. 6:33.

2. ?Ol man blong wol oli ronem wanem samting tede?

² Ol man tede oli lukaot sam narafala samting. Oli ronem ol rij samting mo ol klos, ol kakae, mo olting no ol pleplei we oli save pem. (Mat. 6:31, 32) Fasin blong laef blong olgeta i soemaot we oli tingbaot olgeta wan wan mo ol pleplei nomo. Sipos oli bilif long hem, oli putum God i stap long seken ples long laef blong olgeta.

3. (a) ?Jisas i pulum ol disaepol blong hem blong oli lukaot wanem? ?From wanem? (b) ?Blong wanem yumi no mas wari tumas long saed blong olting we yumi nidim?

³ Be Jisas i givim advaes ya long ol disaepol blong hem: “I nogud yufala i stap hivimap ol gudgudfala samting blong yufala long wol ya blong kam rij man,” from we ol samting ya oli no save stap foreva. Be hem i talem se: “Yufala i mas hivimap ol gudgudfala samting blong yufala long heven,” from wok blong Jeova. Hem i pulum ol man ya blong oli mekem ae blong olgeta “i klia gud,” from we oli mas lukluk wan samting nomo: Oli wantem mekem wil blong God. Hem i talem long olgeta: “Yufala i no save mekem yufala i man blong wok blong God, nao long semtaem nomo, yufala i man blong wok blong mane.” ?Be olsem wanem long saed blong ol samting we yumi nidim—ol kakae, ol klos mo wan haos? Jisas i talem se: “I nogud yufala i stap tingting tumas from laef blong yufala.” Nao hem i storebaot ol pijin—olsem wanem God i stap givim kakae long olgeta. Hem i leftemap tingting blong ol man blong hem blong oli tingtinggud long ol flaoa—olsem wanem God i givim naesfala klos long olgeta. ?Ol man blong Jeova we oli gat hed, oli no gudfala moa long ol narafala samting ya? Taswe Jisas i talem se: “Oraet nao, yufala i mas gohed blong lukaot Kingdom fastaem mo stret fasin blong hem. Nao biaen bambae hem i givim olgeta samting ya [we oli nidim] long yufala.” (Mat. 6:19-34) ?Yu yu bilivim ol tok ya? ?Fasin blong yu i soemaot we yu yu gat bilif ya?

Yu Yu No Mas Letem Wan Samting i Spolem Kingdom Trutok

4. ?Sipos wan man i tingbaot tumas olting blong hem, wanem samting i save hapen from? Talem wan store.

⁴ Sipos wan man i tingbaot olting blong wol nomo, hem i save kasem tumas trabol from. Nating sipos hem i talem se hem i laekem Kingdom, be sipos hat blong hem i pulum hem long sam narafala samting fastaem, hem i save spolem Kingdom trutok. (Mat. 13:18, 19, 22) Olsem ya nao, wan taem wan yangfala man we i rij i askem long Jisas, se: “?Mi mi mas mekem wanem blong kasem itenel laef?” Jisas i ansa long man ya. Nao, ol tok blong man ya oli soemaot we hem i gat wan gudfala laef mo hem i mekem i gud long ol narafala. Be hem i fas tumas long olting blong hem. Hem i no naf blong livim olting ya blong kam biaen long Kraes. Taswe hem i lusum jans ya blong kam wan rula wetem Kraes long Kingdom blong heven. Jisas i talem se: “!Man! Bambae i hadwok tumas blong olgeta we oli gat mane, blong go insaed long kingdom blong God.”—Mak 10:17-23.

5. (a) ?Pol i talem long Timote we hem i mas haremgud from wanem samting? ?Blong wanem? (b) ?Olsem wanem Setan i yusum “lav blong mane” olsem wan trap blong spolem man?

⁵ Sam yia biaen, aposol Pol i raetem wan leta i go long Timote, we i stap long Efesas, wan taon blong bisnes. Hem i talem long hem, se: “Yumi no karem nating i kam long wol, mo bambae yumi no save karem nating i aot long hem. Oraet nao, sipos yumi gat kakae mo klos, hemia i naf, yumi save haremgud wetem ol samting ya.” I stret nomo blong wok blong kasem “kakae mo ol klos” blong yumi wan wan mo blong famle blong yumi. Be Pol i givim woning ya: “Olgeta ya we oli strong blong kam rij, oli foldaon long sam samting we oli traem olgeta mo oli foldaon long wan trap. Ol samting ya we oli wantem oli krangke mo oli save spolem olgeta. Nao fasin ya i save mekem ol man oli draon long fasin blong lus.” Setan i gat hed. Fastaem hem i traem switim wan man long sam smol samting, mo plante taem, hem i mekem sam big samting oli kam biaen—ating wan jans blong kasem wan wok we i gud moa from mane, be i stilim taem blong mekem ol samting blong speret. Sipos yumi no lukaot gud, “lav blong mane” i save spolem fasin blong yumi blong tingbaot Kingdom fastaem. Olsem Pol i talem se: “From sam man oli ronem lav ya [blong mane], oli go longwe long bilif mo samting ya i sperem olgeta olbaot long plante kil.”—1 Tim. 6:7-10.

6. ?Blong yumi no foldaon long trap ya, yumi mas mekem wanem? (b) ?Tingting ya i stret, nating we ekonomi blong wol i stap foldaon tede?

⁶ From we hem i gat lav long Kristin brata blong hem, Pol i talem long Timote: “Yu yu mas ronwe long ol samting ya, mo yu yu mas faet long gudfala faet blong bilif.” (1 Timote 6:11, 12) Sipos yumi no wantem letem wol we i lavem mane, i spolem yumi, yumi mas traehad. Nao sipos yumi faet from bilif blong yumi, Jeova bambae i neva lego long yumi. Nomata we i gat trabol from ol praes oli go antap, mo from we i no moa gat wok, bambae hem i lukaotgud long yumi blong yumi gat ol samting we yumi rili nidim.—Hib. 13:5, 6.

Ol Faswan Disaepol Oli Soemaot Rod

7. ?Taem Jisas i sanem ol aposol blong hem oli prij long Isrel, hem i givim wanem advaes long olgeta? ?From wanem ol advaes ya oli stret nomo?

⁷ Jisas i trenem ol disaepol blong hem fastaem, mo biaen hem i sanem olgeta oli go prij long Isrel. Oli mas talemaot we “Kingdom blong heven i kolosap nao.” !Hemia wan gudfala mesej! Jisas Kraes, King ya we i Mesaea i stap wetem olgeta. From we ol aposol oli givim laef blong ol blong mekem wok blong God, Jisas i talem we oli mas trastem God, i se: “Yufala i no mas karem wan samting nating blong mekem trep, yufala i no mas gat wan wokingstik, no bag blong kakae, no mas gat bred, no mas gat mane, mo yufala i no mas tekem tu klos. Be long wanem haos yufala i go insaed long hem, yufala i mas stap long ples ya gogo kasem we yufala i aot long hem.” (Mat. 10:5-10; Luk 9:1-6; 10:4-7) Jeova hem wan i lukaotgud long ol samting we oli nidim, blong oli kasem ol samting ya from ol man Isrel. Hemia wan kastom long kantre ya blong mekem welkam long ol strenja.

8. (a) ?From wanem Jisas i talem sam defren advaes, jes bifo hem i ded? (b) ?Wanem samting i mas stap oltaem long fas ples blong laef blong olgeta?

⁸ Be biaen, jes bifo hem i ded, Jisas i talem long ol aposol blong hem we oli mas wok nao long sam fasin we oli defren. From we ol haeman oli traem blokem wok ya, nesen blong Isrel i save jenisim fasin blong hem blong mekem welkam long ol strenja. Antap bakegen, oli mas go talemaot Kingdom long ol Hiten ples. Oraet nao, oli save tekem wan “basket blong mane,” mo wan “bag blong kakae.” Nating we oli mekem olsem nao, oli mas gohed nomo blong lukaot Kingdom blong Jeova fastaem mo stret fasin blong hem. Oli mas trastem God we i save blesem olgeta taem oli traehad blong kasem kakae mo ol klos we oli nidim.—Luk 22:35-37.

9. (a) ?Olsem wanem Pol i lukaot long Kingdom fastaem? (b) ?Olsem wanem hem i kasem olting we hem i nidim? (c) ?Hem i givim wanem advaes long ol poen ya?

⁹ Aposol Pol i soemaot gudfala rod long fasin blong ona long advaes ya blong Jisas. Laef blong Pol i stanap long minista wok blong hem. (Wok 20:24, 25) Taem hem i stap long wan ples blong prij, hem i kasem olting blong hem from we hem i wokem sam haos tapolen. Hem i no ting se ol narafala oli mas givim olting blong hem. (Wok 18:1-4; 1 Tes. 2:9; 1 Kor. 9:18) Be hem i gat tangkyu taem oli mekem welkam long hem mo taem oli givim sam presen long hem. Olsem ya nao, oli soemaot lav blong olgeta. (Wok 16:15, 34; Fil. 4:15-17) Hem i no pusum ol Kristin man mo ol Kristin woman blong oli daonem ol wok blong olgeta long famle, blong oli mekem wok blong prij. Nogat. Be oli mas skelem gud ol samting blong lukaot long ol defren responsabiliti blong olgeta. Hem i givim advaes blong oli wok from han blong olgeta, blong oli laekem ol famle blong olgeta mo blong oli gat gladhat blong givim presen i go long ol narafala. (Efes. 4:28; 2 Tes. 3:7-12; Taet. 2:3-5) Hem i talem we oli mas trastem God, be oli no mas trastem olting blong wol. Oli mas yusum laef blong olgeta long wan fasin we i soemaot we oli rili kasem save wanem samting blong laef oli impoten moa. Stret long ol tijing blong Jisas, samting ya i minim se yumi mas lukaot Kingdom blong God mo stret fasin blong hem fastaem.—Fil. 1:9-11.

Lukaot We Kingdom i Stap Fastaem Long Laef Blong Yu

10. (a) ?‘Lukaot Kingdom fastaem’ ol tok ya oli minim wanem? (b) ?Be yumi no mas daonem wanem wok?

¹⁰ ?Yumi yusum hamas taem blong talemaot Kingdom long ol narafala? Samting ya i laenap long fasin blong laef blong yumi, be i laenap moa long fasin ya we tangkyu blong yumi i dip olsem wanem. Yufala i mas rimemba we Jisas i no talem se, ‘Lukaot Kingdom taem yu yu no gat narafala samting blong mekem.’ Hem i no talem tu se ‘Sipos yu yu storebaot Kingdom smol nomo, yu yu stap mekem ol samting we i naf.’ From we hem i savegud we Kingdom i impoten tumas, hem i talemaot wil blong Papa blong hem, se: “Yufala i mas gohed oltaem blong lukaot kingdom blong hem.” Aposol Matyu i raetem: “Nao yufala i mas gohed blong lukaot kingdom fastaem mo stret fasin blong hem.” (Luk 12:31; Mat. 6:33) Nating we bighaf blong yumi i mas wok blong karem olting we famle blong yumi i nidim, sipos yumi rili gat bilif, bambae laef blong yumi i mas stanap long wok blong God long saed blong Kingdom. Be yumi no mas daonem ol responsabiliti long famle blong yumi.—1 Tim. 5:8; Prov. 29:15.

11. (a) ?Jisas i yusum wanem pijatok blong soemaot we yumi evriwan i no naf blong mekem sem mak long wok blong talemaot Kingdom? (b) ?Wanem fasin blong laef oli laenap long samting ya?

¹¹ Samfala oli save mekem moa long minista wok blong prij. Be, long pijatok we Jisas i mekem blong tokbaot defren kaen graon, hem i soemaot we olgeta hat we oli olsem ol gudfala graon oli rili karem frut. ?Oli karem hamas? Ol fasin blong laef blong ol man oli defren. Samfala oli gat sik, samfala oli olfala, samfala oli gat famle. Be sipos yumi gat bigfala tangkyu long God, yumi save mekem plante wok.—Mat. 13:19, 23.

12. ?Ol yangfala oli save gat wanem mak long saed blong speret?

¹² I gud blong putumap sam mak we yumi wantem kasem. Samting ya i halpem yumi blong mekem moa long minista wok blong Kingdom. Ol yangfala oli save tingtinggud long nambawan eksampel blong Timote. Yangfala Kristin ya blong bifo i wok strong. (Fil. 2:19-22) ?Taem wan yangfala Kristin i finisim skul blong hem, yu yu ting se i gat wan narafala wok we i moa gud, i bitim fultaem minista wok? Ol narafala we oli olfala moa, oli save haremgud tu sipos oli wantem kasem sam mak long saed blong speret.

13. (a) ?Hu ya i save luksave mak ya we yu wan yu naf long hem long Kingdom wok? (b) ?Sipos yumi rili lukaot Kingdom fastaem, yumi stap soemaot wanem?

¹³ Yumi no mas toktok smol from olgeta we yumi ting se oli save mekem moa. Be bilif blong yumi i mas pulum yumi blong gohed nomo long wok blong God, gogo kasem mak ya we ol prapa fasin blong yumi oli letem yumi naf long hem. (Rom 14:10-12; Gal. 6:4) Store blong Job i soemaot we Setan i talem se yumi intres nomo long ol prapa samting blong yumi. Hem i talem se yumi mekem wok blong God from we yumi tingbaot yumi wan wan nomo. Be sipos yumi rili lukaot Kingdom fastaem, yumi save soemaot we Devel Setan i wan bigfala gyaman. Yumi save soemaot we wok blong God i gat fas ples long laef blong yumi, be hemia i no ol prapa samting blong yumi. From ol wok mo ol tok blong yumi, yumi save soemaot we yumi laekem tumas Jeova, yumi holemstrong long hae rul blong hem mo yumi gat lav long ol narafala man.—Prov. 27:11; Job 1:9-11; 2:4, 5.

14. (a) ?From wanem i gud blong gat wan program blong mekem minista wok? (b) ?Plante Wetnes blong Jeova oli yusum hamas taem long minista wok blong prij? ?From wanem?

¹⁴ Sipos yumi gat wan gudfala program, yumi save mekem moa wok. Jeova hem wan i gat ‘ol prapa taem blong hem’ blong mekem plan blong hem i kamtru. Taswe yumi mas mekem sem mak long hem. (Eks. 9:5; Mak 1:15; Gal. 4:4) Taem i gat rod from, i gud blong joen long minista wok blong prij long wan dei no ating sam dei moa evri wik. Plante taosen Wetnes blong Jeova raonabaot long wol oli joen long wok blong haftaem paenia, mo oli haremgud blong spenem tu haoa blong prij long wan dei, no ating moa. Samfala oli mekem samting ya long ful yia, sam narafala oli mekem sam manis blong yia. Plante taosen moa oli mekem wok blong fultaem paenia. Oli talemaot mesej blong Kingdom long tri haoa long wan dei, no ating moa. Sam narafala oli mekem spesel paenia no misinari, mo oli yusum moa taem blong mekem wok blong Kingdom. Yumi evriwan i mas lukaotgud blong holem olgeta jans blong talemaot Kingdom long olgeta man we oli wantem lesin. (Lukluk Jon 4:7-15.) Yumi evriwan i mas tinghae long profet tok ya blong Jisas, se “Gud nyus ya blong Kingdom bambae oli mas talemaot long olgeta ples blong wol we i gat man, blong oli wetnes long olgeta nesen; nao biaen bambae en i kam.” Yumi wantem tumas joen long wok ya, i stret long ol fasin blong laef blong yumi.—Mat. 24:14; Efes. 5:15-17.

15. ?Long saed blong minista wok blong yumi, from wanem yu yu ting se advaes blong 1 Korin 15:58 i stret nomo?

¹⁵ Long olgeta ples blong wol, nomata long wanem nesen oli stap laef long hem, ol Wetnes blong Jeova oli joengud long bigfala wok ya. Oli ona long advaes ya blong Baebol, se: “Yufala i mas strong, yufala i no mas foldaon, yufala i gat plante wok blong mekem long wok blong Masta, from we yufala i save se wok ya i no blong nating long saed blong Masta.”—1 Kor. 15:58.

Tingtingbak

● ?Taem Jisas i talem se yumi mas lukaot Kingdom fastaem, hem i soemaot we wanem samting i mas kam long seken ples?

● ?Olsem wanem yumi mas tingbaot ol samting we yumi wan wan mo famle blong yumi i nidim? ?Bambae God i givhan olsem wanem?

● ?Taem ya we yumi pas blong mekem Kingdom wok i impoten? ?From wanem?