Japta 17

“Yufala i Mas Laeklaekem Yufala”

1, 2. (a) ?Taem oli kam long ol miting blong ol Wetnes blong Jeova, ol nyufala man oli luk wanem? (b) ?Olsem wanem oli luk fasin ya tu long ol asembli blong yumi?

TAEM ol nyufala man oli kam long ol kongregesen blong ol Wetnes blong Jeova, oli sek nomo long lav we oli luk long ples ya. Oli luk we ol brata oli frengud nomo, mo oli mekem welkam long olgeta wanwan.

² Olgeta man we oli kam long ol asembli blong yumi, oli makem ol gudfala fasin blong ol man we oli stap. Wan man we i raetem ol nyus, i talem se: “I no gat man we i drong long alkol no drag. I no gat bigmaot we i singaot. I no gat man we i pusum wan narafala man. I no gat tokswea. I no gat tok blong jikim man, i no gat tok we oli doti nomo. I no gat man blong smok. I no gat man blong stil. I no gat tin we oli stap olbaot long graon. Hemia i rili defren.” Olgeta samting ya oli soemaot we yumi laeklaekem yumi. Hemia lav ya ‘we i no mekem fasin we i no stret mo i no stap tingbaot ol prapa samting blong hem wan nomo.’—1 Korin 13:4-8.

3. (a) ?Olsem wanem i mas kam klia moa we yumi laekem ol man? (b) ?Sem mak long Kraes, yumi mas laekem ol brata olsem wanem?

³ Fasin blong laekem ol narafala i wan mak blong ol tru Kristin. (Jon 13:35) Taem yumi kam bigman long speret, yumi mas folem moa fasin ya. Aposol Pol i prea we oltaem ol brata blong hem ‘oli stap laeklaekem olgeta moa.’ (Filipae 1:9, NTB; 1 Tesalonaeka 3:12) Pita i pulum ol Kristin blong oli laekem “olgeta famle blong ol brata.” (1 Pita 2:17) Sipos yumi laekem tru ol brata blong yumi, bambae yumi traem savegud olgeta. I no naf we yumi stap wetem olgeta long miting nomo, mo i no naf we yumi talem ‘halo’ long olgeta long ol wanwan taem nomo. Aposol Jon i soemaot we yumi mas rere blong lusum prapa laef blong yumi blong halpem ol brata. Hem i talem se: “From samting ya, yumi save fasin blong laeklaekem yumi, from we hem ya [Pikinini blong God] i givim prapa sol [laef] blong hem from yumi. Nao yumi tu, yumi mas givim prapa sol [laef] blong yumi blong givhan long ol brata blong yumi.” (1 Jon 3:16; Jon 15:12, 13) Yumi no lusum prapa laef blong yumi yet blong givhan long ol brata blong yumi. ?Be yumi rere blong mekem samting ya? ?Oraet nao, yumi rere blong givhan long ol brata, nomata sipos samting ya i spolem yumi lelebet?

4. (a) ?Long wanem narafala rod yumi save laekem ol brata moa? (b) ?From wanem i impoten we yumi laekem ol brata moa?

⁴ Tru ya, yumi mas givhan long ol brata blong yumi long wan kaen fasin we yumi rere blong letem prapa laef blong yumi from. Be i gat wan narafala bigfala samting: Yumi mas laekem ol brata long ol strong filing blong yumi. Tok blong God i talem long yumi, se: “Yufala i mas laeklaekem yufala olsem we yufala i wan brata nomo.” (Rom 12:10, NTB) Yumi evriwan i laekem sam brata finis long fasin ya. ?Be olsem wanem nao? ?Yumi save laekem plante brata moa long fasin ya? Olfala fasin ya blong wol i kolosap finis nao, taswe yumi stap kolosap moa long ol Kristin brata blong yumi. Baebol i wekemap tingting blong yumi, i talem se: “Yumi kam kolosap finis long taem we ol samting blong wol ya bambae i lus. . . . Antap long ol narafala samting, yufala i mas stap laeklaekem yufala tumas. Yufala i no mas kam slak long samting ya, from we fasin blong laekem tumas ol man, hem i save blokem plante sin.”—1 Pita 4:7, 8, NTB.

5. ?From wanem i no stret we yumi ting se ol trabol oli no save kamaot long kongregesen?

⁵ Be yumi stap sinman yet, taswe samtaem yumi save mekem sam samting we oli spolem ol narafala. Olgeta tu oli save mekem i rong long yumi. (1 Jon 1:8) ?Taem i gat sam trabol olsem, yu yu mas mekem wanem?

?Taem i Gat Sam Trabol, Yu Yu Mas Mekem Wanem?

6. (a) ?From wanem samtaem ol advaes blong Baebol oli faetem prapa tingting blong yumi? (b) ?Be sipos yumi biaenem ol gudfala tok blong Baebol, wanem samting i save kamaot from?

⁶ Baebol i soem rod long yumi. Be maet samtaem ol advaes blong hem oli agens long ol prapa tingting we yumi sinman i wantem. (Rom 7:21-23) Be sipos yumi traehad blong folem ol advaes ya, bambae yumi soemaot we yumi rili wantem mekem Jeova i glad. Fasin blong yumi blong laekem tumas ol man i save gru, i save kam bigfala moa.

7. (a) ?Sipos wan man i mekem nogud long yumi, from wanem yumi no mas givimbak long hem? (b) ?From wanem yumi no mas tanem baksaed long wan brata we i mekem i rong long yumi?

⁷ Sam man, taem oli harem nogud from wan narafala, oli traem givimbak long hem. Be fasin ya i mekem trabol i kam nogud moa. Sipos i mas gat rod blong givimbak, i oraet we yumi letem God i mekem. Hemia i wok blong hem. (Proveb 24:29; Rom 12:17-21) Maet samfala oli tanem baksaed long hemia we i mekem nogud long olgeta, oli no moa wantem toktok wetem hem. Be yumi no save mekem olsem long ol Kristin brata blong yumi. Yumi mas laekem ol brata blong yumi, mo God i save agri long wosip blong yumi. (1 Jon 4:20) ?Sipos yumi no toktok wetem wan man, no sipos yumi no wantem stap kolosap long hem, yu yu ting se i stret we yumi talem se yumi laekem hem? Nogat. Taem wan trabol olsem i kamaot, yumi mas winim hem. ?Be yumi mas mekem olsem wanem?

8, 9. (a) ?Sipos yumi gat wan poen long wan brata, i gud we yumi mekem wanem? (b) ?Be olsem wanem sipos plante taem hem i mekem sin bakegen agens long yumi? (c) ?From wanem yumi mas folem rod ya blong stretem ol trabol? ?Bambae wanem samting i save halpem yumi blong mekem olsem?

⁸ Aposol Pol i tokbaot samting ya, i se: “Yufala i mas stap givgivhan long yufala, mo taem wan long yufala i gat sam poen agens long narawan long yufala, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yufala.” (Kolosi 3:13, NTB) ?Yu yu save mekem olsem? ?Olsem wanem sipos plante taem wan man i mekem plante kaen sin agens long yu?

⁹ Aposol Pita i askem kwestin ya finis, nao hem i ting se hem i save fogivim sin blong brata blong hem long seven taem nomo. Jisas i ansa long hem, i se: “Mi mi talem long yu se i no mas kasem seven taem nomo, be i mas kasem sevente seven taem.” ?From wanem? Jisas i mekem wan pijatok we i soemaot olsem wanem yumi gat bigfala kaon long God. Hemia i winim olkaen rong we ol man oli save mekem long yumi. (Matyu 18:21-35) Evri dei, yumi stap mekem plante kaen sin agens long God—samtaem yumi stap tinghae tumas long yumi, from sam krangke tok no sam krangke tingting blong yumi, no ating yumi no mekem sam samting we yumi mas mekem. Samtaem yumi no luksave se yumi stap mekem i rong. No ating yumi gat plante wok, ale yumi hareap hareap long hem we yumi no naf blong tingtinggud long wok ya. Ded i pei blong sin, mo God i save tekemaot laef blong yumi blong pem ol sin blong yumi. (Rom 6:23) Be hem i gat sore nomo long yumi. (Sam 103:10-14) Taswe i stret nomo we hem i askem long yumi blong mekem semkaen fasin ya long ol narafala. (Matyu 6:14, 15; Efesas 4:1-3) Taem yumi gat sore olsemia, we yumi no kam kros long man ya we i mekem i rong long yumi, nao yumi kasem fasin blong laekem tumas ol man we Baebol i tokbaot, i se: “Hem i no tingbaot rong ya we oli mekem long hem.”—1 Korin 13:4, 5; 1 Pita 3:8, 9.

10. ?Sipos wan brata i gat poen long yumi, yumi mas mekem wanem?

¹⁰ Maet samtaem yumi luksave se yumi no gat poen long wan brata, be yumi harem we hem i gat poen long yumi. ?Yumi mas mekem wanem nao? Kwiktaem yumi mas go toktok wetem hem blong frengud wetem hem bakegen. Baebol i talem long yu we yu yu mas go luk brata ya—yu no mas wet we hem i kam luk yu. (Matyu 5:23, 24) Ating samting ya i hadwok. Blong mekem olsem yu yu mas laekem brata ya, mo tingting blong yu i mas stap daon. ?Olsem wanem? ?Tufala fasin ya oli strong inaf long yu, blong yu yu folem advaes ya blong Baebol? Hemia nao wan bigfala mak we yu yu mas wok strong blong kasem.

11. ?Sipos wan brata i mekem sam samting we yumi trabol from, yumi mas mekem wanem?

¹¹ Be ating wan brata i mekem sam samting we yu yu harem nogud from—no ating sam narafala tu oli harem nogud from. ?Maet i gud sipos wanfala man i go toktok wetem hem? Sipos yu wan yu go tokbaot trabol ya wetem hem, yu yu mas kaengud long hem. Ating toktok ya i save karem gud frut. Be fastaem yu yu mas skelem ol kwestin ya: ‘?Baebol i rili talem se ol samting we hem i mekem oli no stret? no ?Mi mi trabol long samting ya from fasin blong ples blong mi i narakaen long fasin blong ples blong hem?’ Sipos i olsem, yu yu mas lukaot gud blong no putumap ol prapa rul blong yu blong jajem brata ya. (Jem. 4:11, 12) Jeova God i stap mekem i sem mak nomo long olgeta man, nomata oli blong wanem ples, mo tingting blong hem i longfala long olgeta, blong oli save gohed long speret.

12. (a) ?Sipos wan brata no wan sista i mekem wan bigfala sin, hu ya i mas stretem trabol ya? (b) ?Wetaem wan man we oli mekem i rong long hem, i save girap blong stretem trabol ya? ?Wanem plan blong hem fastaem?

¹² Be sipos wan brata no wan sista blong kongregesen i mekem wan bigfala sin, oli mas stretem kwiktaem. ?Be hu ya i mas stretem trabol ya? Ol elda oli mas mekem. Be sipos trabol ya i kamaot from wan bisnes blong mane we ol brata oli mekem, no from we wan brata no wan sista i spolem nem blong wan narafala from ol nogud tok blong hem, hemia we i harem nogud i mas go fastaem blong givhan long brata no sista blong hem we i mekem nogud long hem. Tru ya, maet samfala oli save ting se i hadwok. Be long Matyu 18:15-17, Jisas i talem we yumi mas mekem olsem. Sipos yu yu rili laekem brata blong yu, mo yu yu wantem we hem i stap yet brata blong yu, oraet nao taem yu yu go toktok wetem hem, samting ya i save halpem yu blong toktok gud. Bambae yu yu traem faenem rod blong kasem hat blong hem.—Prov. 16:23.

13. ?Sipos yu yu gat wan trabol wetem wan brata, wanem samting i save halpem yu blong gat stret tingting nomo long bisnes ya?

¹³ Taem wan trabol i kamaot, nating hem i bigwan no smolwan, be yumi mas save Jeova i stap ting olsem wanem long samting ya. Jeova i no laekem enikaen sin, be hem i save se yumi olgeta i gat sin. Ol man we oli stat mekem sin, mo oli no tanem tingting blong olgeta from, God i putumaot olgeta oli no moa stap long ogenaesesen blong hem. Hem i mekem olsem long prapa taem blong hem nomo. ?Be olsem wanem long yumi? Tingting blong God i longfala long olgeta we oli stap long kongregesen, hem i gat sore long olgeta. Olsem ya nao, hem i soemaot rod long yumi. Taem yumi mekem olsem, yumi folem fasin blong hem we i laekem olgeta man.—Efes. 5:1, 2.

Yumi Mas Mekem “Moa Yet”

14. (a) ?From wanem Pol i talem long ol Kristin se oli mas mekem “moa yet” long fasin blong laekem hem mo ol narafala brata? (b) ?Olsem wanem ol vas blong Baebol we oli stap long haf ya oli soemaot long yumi we yumi mas tingtinggud long samting ya?

¹⁴ Aposol Pol i stap plante manis wetem kongregesen blong Korin mo hem i wok strong blong leftemap tingting blong ol. Hem i wok strong blong givhan long ol brata long ples ya mo hem i laekem olgeta tumas. !Be sore tumas! I gat samfala we oli no laekem hem. Oli toktok nogud long hem. From samting ya, hem i pulum olgeta blong mekem “moa yet” blong laekem hem mo ol narafala brata. (2 Kor. 6:11-13; 12:15) Yumi evriwan i mas skelem fasin blong yumi: ?Yumi rili laekem ol narafala mo yumi traem faenem rod blong mekem “moa yet” long ol fasin ya?—1 Jon 3:14; 1 Kor. 13:3.

15. ?Sipos i gat sam brata no sista we yumi no laekem olgeta tumas, wanem samting i save halpem yumi blong rili laekem olgeta?

¹⁵ ?Olsem wanem? ?I gat samfala long kongregesen we yumi hadwok blong frengud wetem? Sipos yumi traem fogivim ol smolsmol fol blong ol, olsem we yumi wantem oli mekem long yumi, bambae yumi save frengud wetem olgeta. (Prov. 17:9; 19:11) Nao sipos yumi traem tingbaot ol gudgudfala fasin blong ol, samting ya i save halpem yumi blong frengud wetem ol. ?Yumi rili luksave olsem wanem Jeova i stap yusum ol brata ya? Sipos yumi tingbaot samting ya, bambae fasin blong yumi blong laekem olgeta i save gru, i save kam bigfala moa.—Luk 6:32, 33, 36.

16. ?Yumi save mekem wanem blong yumi mekem “moa yet” long ol brata sista blong kongregesen blong yumi?

¹⁶ Tru ya, yumi no naf blong mekem olgeta samting blong givhan long ol man. Ating yumi no gat rod blong talem “halo” long olgeta brata sista long evri miting. Yumi no save singaot olgeta wantaem oli kam kakae wetem yumi. Yumi evriwan i frengud moa wetem samfala brata sista i winim ol narafala. ?Be yumi save mekem “moa yet”? ?Long olgeta miting, yumi save toktok wetem samfala brata sista we yumi no save gud olgeta yet? ?Samtaem, yumi save singaot wanfala i kam prij wetem yumi? Sipos yumi rili laeklaekem yumi, bambae yumi save faenem rod blong soemaot fasin ya.

17. ?Taem yumi mekem asembli wetem ol brata we yumi no save olgeta, yumi save mekem wanem blong soemaot we yumi laekem olgeta tumas?

¹⁷ Long ol asembli, yumi gat rod blong mekem “moa yet” long fasin blong laekem ol brata. Ating plante handred oli kam. Yumi no save sekhan long olgeta evriwan. Be yumi save gat ol gud fasin we oli soemaot we yumi tingbaot olgeta fastaem, mo yumi no stap tingbaot tumas long yumi. Nomata yumi no save olgeta fastaem, taem program i no stat yet, yumi save sekhan mo toktok wetem samfala we oli stap raonabaot long yumi. Long fyuja, bambae olgeta man we oli stap long wol, oli save kam brata mo sista we oli joen tugeta long wosip blong God mo Papa blong olgeta. !Long taem ya, bambae yumi save olgeta wanwan, mo yumi save ol gudgudfala fasin blong olgeta! !Bambae yumi haremgud tumas from! Yes, bambae yumi laekem olgeta tumas, mo fasin ya i pulum yumi moa blong mekem olsem. I gud nomo sipos yu yu stat mekem olsem naoia nomo.

Tingtingbak

● ?Taem trabol i kamaot long ol brata sista, oli save stretem olgeta olsem wanem? ?From wanem?

● ?Taem yumi gohed long speret, yumi mas mekem wanem tu blong mekem fasin blong laekem ol brata i gru, i kam bigfala moa?

● ?Olsem wanem yumi save laekem plante moa brata, blong oli kam gudfala fren blong yumi?