Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • wt chap. 16 pp. 144-150
  • “Yufala i Mas Lavlavem Yufala”

I no gat video yet long haf ya.

Sori, i gat problem taem i stap lodem video ya.

  • “Yufala i Mas Lavlavem Yufala”
  • Wosipim Trufala God
  • Ol Sabtaetol
  • Sem Samting
  • Taem Problem i Kamaot
  • Lukaot Rod Blong “Go Moa”
  • “Yufala i Mas Laeklaekem Yufala”
    Wosip
  • “Antap Long Ol Narafala Samting, Yufala i Mas Lavlavem Yufala”
    !Lukaot Gud!
  • Yufala i Mas Lavlavem Yufala Moa, Olsem We Yufala i Wan Brata Nomo
    Wajtaoa—2009
  • ?Olsem Wanem Blong Mekem Lav Bitwin Yumi i Stap Strong Oltaem?
    Wajtaoa i Talemaot Kingdom Blong Jehova (Stadi)—2023
Luk Moa Samting
Wosipim Trufala God
wt chap. 16 pp. 144-150

Japta Sikistin

“Yufala i Mas Lavlavem Yufala”

1. ?Wanem samting we plante man oli sapraes long hem taem oli kam long ol miting blong ol Witnes Blong Jeova?

TAEM ol man oli kam fastaem long ol miting blong ol Witnes Blong Jeova, plante long olgeta oli sapraes long lav we ol Witnes oli soem. Oli luksave samting ya from we ol brata sista oli welkamemgud olgeta mo oli glad blong stap tugeta. Ol man we oli joen long ol bigfala asembli blong yumi, oli luksave lav ya tu. Wan man blong raetem niuspepa i tokbaot wan asembli i se: ‘I no gat man we i tekem drag mo i no gat drong man. I no gat man we i tok strong long narawan mo i no gat man i singsingaot strong. Oli no puspusum olgeta. I no gat tok swea. I no gat man i jikim narafala no i yusum doti tok. I no gat man i smok tabak. I no gat man i stil. Oli no saksakem ol tin mo pepa olbaot long gras. Mi neva luk wan samting olsem.’ Olgeta samting we man ya i tokbaot oli ol pruf blong lav. Taem ol man oli gat lav olsem, oli ‘no save mekem fasin we man i sek nogud long hem, mo oli no save tingbaot olgeta nomo.’—1 Korin 13:4-8, NW.

2. (a) ?Taem yumi stap gru long saed blong spirit, olsem wanem long fasin blong yumi blong soem lav? (b) ?Folem fasin blong Kraes, wanem kaen lav we yumi nidim blong wokem?

2 Lav bitwin ol brata, hemia nao mak blong ol trufala Kristin. ( Jon 13:35) Taem yumi kam bigman long saed blong spirit, yumi lanem blong soemaot lav ya moa. Aposol Pol i prea se ol Kristin brata blong hem ‘oli save kam we oli stap lavlavem olgeta moa.’ (Filipae 1:9) Aposol Jon i soem se lav i mas pusum yumi blong lego sam samting we yumi nomo i wantem. Hem i raetem se: “Taem Kraes i letem laef blong hem blong sevem yumi, hem i soemaot fasin ya blong lavem narafala man. Mo i stret nomo blong yumi tu, yumi letem laef blong yumi, blong givhan long ol Kristin brata mo sista blong yumi.” (1 Jon 3:16; Jon 15:12, 13) ?Yumi rere blong lego prapa laef blong yumi from ol brata blong yumi? I tru se i no oltaem we yumi mas mekem olsem. ?Be yumi traehad go kasem wanem mak blong halpem olgeta naoia, nating se samtaem yumi bisi no yumi taed?

3. (a) ?Long wanem rod maet yumi save go moa blong soemaot lav? (b) ?From wanem i impoten we naoia yumi mas lavlavem yumi?

3 Ol wok we yumi mekem, we oli soemaot se yumi rere blong lego samting we yumi nomo i wantem, oli mas joen wetem trufala filing blong laekem ol brata sista blong yumi. Tok Blong God i pulum yumi blong mekem olsem: “Yufala i mas lavlavem yufala olsem we yufala i wan brata nomo.” (Rom 12:10) Yumi evriwan i gat filing ya long sam man. ?Be yumi save go moa mo soem filing ya long moa man bakegen? En blong rabis wol ya i stap kam klosap moa, taswe yumi nidim moa blong laekem ol Kristin brata sista blong yumi. Baebol i talem se: “Yumi kam klosap finis long taem we ol samting blong wol ya bambae i lus. . . . Antap long ol narafala samting, yufala i mas lavlavem yufala. Yufala i no mas kam slak long samting ya, from we man we i stap lavem narafala man, oltaem hem i save fogivim hem from ol sin blong hem.”—1 Pita 4:7, 8.

Taem Problem i Kamaot

4. (a) ?From wanem i save gat problem i kamaot insaed long kongregesen? (b) ?Wanem gudfala frut i save kamaot sipos yumi folem ol advaes blong Baebol, nating se i no isi blong mekem olsem?

4 Yumi no stretgud yet, taswe samtaem bambae yumi mekem samting we narafala i no glad long hem. Ol brata sista blong yumi, maet olgeta tu oli sin agensem yumi long ol defdefren fasin. (1 Jon 1:8) ?Sipos yu yu gat problem ya, bambae yu mekem wanem? Baebol i givim save we yumi nidim long saed ya. Be maet samting we hem i talem, i no laenap wetem wanem we yumi ol sinman i luk se i moa isi. (Rom 7:21-23) Nating se i olsem, i gud blong traehad blong mekem ol advaes blong Baebol oli wok long laef blong yumi. Taem yumi mekem olsem, yumi soemaot se yumi rili wantem mekem Jeova i glad. Mo tu, bambae yumi mekem lav we yumi gat long ol narafala i kam strong mo i tru moa.

5. ?Sipos narafala i mekem i nogud long yumi, from wanem i nogud blong givimbak?

5 Taem wan man i harem nogud from samting we narafala i mekem long hem, maet hem i lukaot rod blong givimbak long narafala ya. Be fasin ya i save pulum moa trabol i kam. Sipos narafala ya i nidim blong kasem panis, yumi mas livim samting ya i stap long han blong God. (Ol Proveb 24:29; Rom 12:17-21) Sam man oli no moa wantem toktok wetem hemia we i mekem i nogud long olgeta. Be yumi no mas mekem fasin ya long ol Kristin brata sista blong yumi from we, wan rod blong mekem we God i agri long wosip blong yumi hemia blong lavem ol brata sista blong yumi. (1 Jon 4:20) Taswe, Pol i raetem se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.” (Kolosi 3:13) ?Yu yu save mekem samting ya?

6. (a) ?Yumi mas fogivim brata blong yumi gogo kasem hamas taem? (b) ?Blong no kros longtaem from wan sin we narafala i mekem agensem yumi, yumi mas luksave wanem samting?

6 ?Olsem wanem sipos wan man i mekem i nogud long yumi bakegen mo bakegen, be i no rili mekem wan bigfala sin we kongregesen i save putumaot hem from? Aposol Pita i ting se taem narafala i mekem ol smosmol sin olsem, bambae hem i save fogif gogo kasem ‘seven taem.’ Be Jisas i talem se: “Mi mi no save talem se seven taem nomo. Yu save mekem sevente taem, we yu stap fogivim hem go kasem seven taem.” Jisas i makem gud se kaon we yumi gat long God i bigwan moa i winim eni kaon we maet yumi ting se man i mas pembak long yumi. (Matiu 18:21-35, Nyutesteman wetem Ol Sam long Bislama) Maet yumi no luksave se yumi mekem sin agensem God long plante samting evri dei—samtaem maet yumi sin from we yumi tingbaot yumi wan nomo, maet toktok no tingting blong yumi i no stret, no maet yumi no mekem ol samting we yumi mas mekem. (Rom 3:23) Be, God i gohed blong soem sore long yumi. (Ol Sam 103:10-14; 130:3, 4) Mo hem i wantem we yumi mekem i sem mak long ol narafala. (Matiu 6:14, 15; Efesas 4:1-3) Olsem nao, bambae yumi soemaot lav ya we i mekem se yumi “no save stap kros longtaem.”—1 Korin 13:4, 5; 1 Pita 3:8, 9.

7. ?Yumi mas mekem wanem sipos wan brata i kros long yumi?

7 Maet samtaem yumi luk se wan brata i kros long yumi, be yumi no kros long hem, mo yumi no save from wanem hem i olsem. Maet yumi jus blong folem 1 Pita 4:8 we i talem se man we i gat lav ‘oltaem hem i save fogivim narafala.’ No maet yumi jus blong go luk hem mo toktok wetem hem blong traem gat pis bakegen wetem hem.—Matiu 5:23, 24.

8. ?Sipos wan Kristin brata no sista i mekem wan samting we yumi harem nogud from, yumi save mekem wanem?

8 Maet wan Kristin brata no sista i stap mekem samting we yu, mo sam narafala tu, i harem nogud from. ?I gud blong go toktok wetem hem long saed ya? Ating yes. Sipos yu talemaot problem ya long hem wetem kaen fasin, maet gudfala frut i save kamaot. Be fastaem ating i gud we yu askem long yu wan se: ‘?Samting ya we hem i mekem i rili go agensem wan rul blong Baebol? ?No maet problem ya i kamaot nomo from we mi mi gruap long wan ples no famle we i defren long hem?’ Maet yu stap putumap ol rul we oli stret long tingting blong yu nomo ale yu stap jajem narafala folem ol rul ya. I no stret blong mekem olsem. ( Jemes 4:11, 12) Jeova i mekem i sem mak nomo long olgeta man. Hem i glad long ol man nomata wanem kantri no famle we oli gruap long hem, mo hem i soem longfala tingting long olgeta taem oli stap gruap long saed blong spirit.

9. (a) ?Hu i stap stretem ol bigfala sin insaed long kongregesen? (b) ?Wetaem hem i wok blong yu blong go luk hemia we i sin agensem yu, mo yu mas gat wanem tingting taem yu mekem olsem?

9 Sipos wan memba blong kongregesen i mekem wan bigfala sin, olsem nogud fasin long saed blong seks, i gud blong stretem samting ya kwiktaem. ?Hu bambae i stretem? Ol elda. ( Jemes 5:14, 15) Be, sipos wan long kongregesen i sin agensem narawan long kongregesen, maet long saed blong mane no i talem wan rabis toktok agensem narawan, ale, hemia we i harem nogud i mas tekem faswan step blong go luk hemia we i mekem sin ya, nao taem tufala nomo i stap, tufala i mas tokbaot problem ya blong stretem. (Matiu 18:15) Sipos tufala i no save stretem, tufala i mas folem ol narafala step we Matiu 18:16, 17 i talem. Sipos yumi lavem brata blong yumi we i mekem rong mo yumi wantem we hem i ‘kam fren blong yumi bakegen’ bambae yumi traem bes blong yumi blong kasem hat blong hem.—Ol Proveb 16:23.

10. ?Taem wan problem i kamaot, wanem i save halpem yumi blong gat stret tingting long bisnes ya?

10 Taem wan problem i kamaot, nomata we hem i bigwan no i smol, yumi save stretem sipos yumi kasem save tingting blong Jeova long saed ya. I no gat wan sin we Jeova i agri long hem, mo long stret taem blong hem, hem i stap klinim ogenaesesen blong hem long ol man ya we oli no wantem tanem tingting blong olgeta from ol bigfala sin we oli mekem. Be, yumi no mas fogetem se yumi evriwan i stap mekem plante smosmol sin mo yumi nidim we Jeova i soem longfala tingting mo sore long yumi. Yes, Jeova i soemaot gudfala eksampol we yumi mas folem taem narafala i mekem sin agensem yumi. Taem yumi gat sore, yumi stap soemaot lav olsem God.—Efesas 5:1, 2.

Lukaot Rod Blong “Go Moa”

11. ?From wanem Pol i leftemap tingting blong ol Kristin long Korin blong “go moa”?

11 Pol i stap plante manis long taon ya Korin long Gris, blong givhan long kongregesen long ples ya. Hem i wokhad blong halpem ol brata, mo hem i laekem olgeta tumas. Be sam long olgeta oli no gat gudfala filing blong lav long Pol. Oli stap tok agensem hem. Taswe Pol i givim advaes long olgeta se oli mas “go moa” long fasin blong olgeta blong soem lav long narafala. (2 Korin 6:11-13, NW ; 12:15) I gud yumi evriwan i tingbaot se, yumi stap soemaot lav long narafala go kasem wanem mak, mo i gud yumi lukaot rod blong “go moa” long fasin ya.—1 Jon 3:14.

12. ?Olsem wanem lav we yumi gat long olgeta insaed long kongregesen i save gru moa?

12 ?I gat samfala insaed long kongregesen we yumi faenem i had blong frengud wetem olgeta? Sipos yumi traehad blong fogetem ol fasin blong olgeta we yumi no laekem—olsem we yumi wantem se olgeta tu oli mekem long yumi—samting ya i save mekem se yumi gat filing blong laekem olgeta. Mo tu, filing we yumi gat long olgeta i save kam gud moa sipos yumi lukaotem sam gudfala fasin we oli gat mo putum tingting blong yumi i stap long ol gudfala fasin ya nomo. I sua se long rod ya nao bambae yumi lavem olgeta moa.—Luk 6:32, 33, 36.

13. ?Olsem wanem yumi save go moa blong soem lav long olgeta long kongregesen blong yumi?

13 I tru, yumi no naf blong mekem plante samting blong givhan long olgeta man evriwan. Maet yumi no save sekhan mo talem halo long olgeta man long evri miting. Yumi no save singaot evri brata sista oli kam kakae long haos blong yumi. ?Be maet yumi save spenem smol taem blong save moa wan long kongregesen we yumi no savegud hem? ?Maet wanwan taem yumi save singaot wan brata no sista we yumi no save gud hem blong i prij wetem yumi?

14. ?Taem yumi kampani wetem ol Kristin we yumi no save olgeta, olsem wanem yumi save soem se yumi gat lav?

14 Ol Kristin asembli oli ol nambawan taem blong soem lav blong yumi long plante moa man. Maet plante taosen man oli kam long ol asembli ya. Yumi no save mitim olgeta evriwan, be yumi save soemaot se yumi tingbaot ol narafala fastaem long yumi. Taem program blong asembli i stop blong yumi spel smol, yumi save soem intres long ol man raonabaot long yumi sipos yumi go storian wetem samfala we yumi no save olgeta. Wan dei long fiuja, olgeta man long wol ya bambae oli ol brata mo sista, we oli joengud blong wosipim trufala God mo Papa blong evri man. !Long taem ya bambae yumi glad tumas blong savsave yumi! Lav we yumi gat long narafala hemia nao bambae i pusum yumi blong wantem mekem olsem. Ale, i gud we yumi stat naoia blong soem lav ya.

Tingtingbak

• ?Olsem wanem blong stretem ol problem we oli save kamaot bitwin ol Kristin, mo from wanem yumi mas mekem olsem?

• ?Taem yumi stap gru long saed blong spirit, olsem wanem lav blong yumi tu i mas gru?

• ?Olsem wanem blong soem lav long moa man i bitim ol gudfala fren blong yumi nomo?

[Tok blong pija long pej 148]

Yumi soem Kristin lav long plante defren rod, olsem long ol miting blong kongregesen

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem