Oli Kasem Trabol From Stretfasin

Maet ol fren no famle blong yu oli talem se ol Wetnes blong Jeova oli stap kasem trabol from loa. Oli save talem tu se sam gavman oli blokem olgeta, no ol Wetnes oli man nogud. ?From wanem sam man oli tok agens long ol Wetnes?

Ol Wetnes oli obei long loa blong kantri, taswe i no gat risen blong tok agens long olgeta from. Be ol tok ya i kamaot from we ol Wetnes oli stap folem rod we Jisas i soemaot nomo. Jisas i talem long ol disaepol blong hem se sam man bambae oli tok nogud long olgeta, bambae oli mekem trabol long olgeta, mo bambae oli gyaman blong talem evri kaen rabis samting agens long olgeta. Samting ya i mas kamaot from we Setan we i agensem God, hem i god blong wol ya, mo hem i wantem tanem tingting blong olgeta we oli stap wosip long God.—Matyu 5:10-12; 10:16-22,34-39; 24:9,10;Jon 15:17–16:3; 2 Timote 3:12; 1 Pita 5:8; Revelesen 12:17.

Taem oli holem ol aposol, mo oli mas pas long kot, samting ya i no kamaot from we oli brekem loa, oli kilim sam man, no oli agensem gavman. !Nogat! Samting ya i kamaot from we olgeta oli prij long saed blong gud nyus. Taem aposol Pol i pas long kot, nao hem i askem blong pas long wan kot we i hae moa, hem i mekem samting ya blong pruvum se ol Kristin oli gat raet long saed blong loa blong talemaot gud nyus ya.—Ol Wok 4:18-20; 5:28-32; Filipae 1:7.

Tede, ol Wetnes blong Jeova oli mekem Kristin fasin blong obei long loa blong kantri, oli pem takis blong olgeta, mo oli soemaot respek long ol haeman. Olgeta oli pembak ol samting blong Sisa i go long Sisa, mo ol samting blong God i go long God. Sipos samtaem oli kasem sam trabol from gavman, oli kamaot from we gavman i no luksave wok blong olgeta blong prij, no from we oli no joen nating long bisnes blong ol nesen. Be ol Wetnes blong Jeova oli mas gat fasin olsem ol aposol bifo, we oli talem se: “Mifala i mas obei long God, mifala i no save obei long ol man nomo.”—Ol Wok5:29; Mak 12:17; Jon 18:36; Taetas 3:1, 2.

Ol Wetnes blong Jeova oli no lukaotem trabol. Olgeta oli wantem wan laef we i kwaet nomo mo i gat pis. Be sipos oli mas kasem trabol from we oli folem loa blong God mo eksampel blong Jisas, oli glad blong stanap strong.—Matyu 5:10-12; Ol Wok5:40, 41; 1 Korin 4:12; 1 Timote 2:2; 1 Pita 3:14, 15; 4:12-16.

• ?From wanem sam man oli toktok nogud mo mekem trabol long ol Wetnes blong Jeova?

• ?From wanem ol Wetnes blong Jeova samtaem oli kasem trabol from gavman, olsem ol Kristin aposol bifo?

• ?Olgeta we oli stap mekem wok blong Jeova, oli gat wanem tingting taem samfala oli agensem olgeta?

[Tok Blong Pija Long Pej 29]

Jisas i stap fored long Paelet, mo aposol Pol i stap kalabus from wok blong talemaot Kingdom blong God