?Wanem Bilif Blong Ol Wetnes Blong Jeova?

“Be mifala i glad blong harem ol tingting blong yu. From we mifala i save we olbaot long evri ples, ol man oli stap tok nogud long kampani ya blong yu.” (Ol Wok 28:22) Ol lida ya we oli stap long Rom long faswan handred yia oli soemaot gudfala rod. Oli wantem harem ol man we oli wetnes long bisnes ya, be oli no wantem harem ol man olbaot.

Tede i gat sam man we oli tok nogud long ol Wetnes blong Jeova. Sipos wan man i ting se bambae i lanem trutok long fasin ya, hem i mastik nomo. Taswe mifala i glad blong talem long yu ol bigfala bilif blong mifala.

Baebol, Jisas Kraes, Mo God

Mifala i bilif se “olgeta tok ya blong Baebol oli kamaot long God fastaem.” (2 Timote 3:16) I gat sam man we oli talem se mifala i no Kristin, be tok ya i no tru. Mifala i agri olgeta wetem aposol Pita we i talem se: “Mo i no gat wan narafala man nating we i save sevem yumi. From we olbaot long wol ya, be God i no givim nem blong wan narafala man nating long yumi we hem i stap yusum blong sevem yumi.” Man ya i Jisas Kraes.—Ol Wok 4:12.

Be Jisas i bin talem se hem i “Pikinini blong God,” we ‘Papa i sanem hem i kam.’ Taswe ol Wetnes blong Jeova oli bilif se God i hae moa long Jisas. (Jon 10:36; 6:57) Jisas hem i talem se: “Papa . . . hem i hae moa long mi.” (Jon 14:28; 8:28) Taswe mifala i no bilif se Jisas i sem mak long Papa blong hem, mo mifala i no bilif long Triniti. Be mifala i bilif se God i wokem Jisas, taswe Jisas i stap aninit long Hem.—Kolosi 1:15; 1 Korin 11:3.

Long Engglis, nem blong God i Jehovah. Long Bislama oli yusum Jeova. Baebol i talem se: “Blong ol man bambae oli save gud yu, we nem blong yu nomo JEOVA, se yu yu hae moa long olgeta wol.” (Ol Sam 83:18, King James Version) Jisas i ona long tok ya, taswe hem i leftemap nem blong God. Hem i tijim ol man blong hem long prea ya: “Papa blong mifala we yu stap long heven, nem blong yu i tabu.” Mo hem wan i mekem prea ya: “Mi mi stap talemaot nem blong yu, blong mekem ol man ya we yu tekemaot olgeta long han blong wol blong givim long mi, oli save yu.”—Matyu 6:9; Jon 17:6.

Ol Wetnes blong Jeova oli bilif se oli mas folem fasin blong Jisas, taswe oli stap talemaot nem blong God mo ol plan blong hem. From samting ya, mifala i karem nem ya: Ol Wetnes blong Jeova, from we mifala i folem Jisas we i “tru wetnes blong hem.”—Revelesen 1:5; 3:14. Taswe i stret nomo we Aesea 43:10 i talem long ol man blong God, se: “ ‘Yufala i olsem ol wetnes blong mi,’ hemia nao ol tok blong Jeova,‘yufala i man blong wok blong mi we mi mi jusum finis.’ ”

Kingdom Blong God

Jisas i tijim ol man blong hem blong oli prea, se: “Letem Kingdom blong yu i kam.” Kingdom ya i gudfala stampa tok blong ol tijing blong hem. (Matyu 6:10; Luk 4:43) Nao, ol Wetnes blong Jeova oli bilif se Kingdom i wan tru gavman we i stap long heven. Bambae gavman ya i rulum wol, mo Jisas Kraes i King long Kingdom ya. Baebol i talem se: “Bambae gavman i stap long hem, . . . mo bambae gavman mo pis blong hem oli gru gogo i no save finis.”—Aesea 9:6, 7, KJ.

Be Jisas Kraes i no stap hem wan nomo olsem King long gavman blong God. Hem i gat sam narafala man we oli rul wetem hem long heven. Aposol Pol i talem se: “Bambae yumi tu i save rul tugeta olsem king.” (2 Timote 2:12, NW) Baebol i talem se ol man ya we bambae oli rul wetem Kraes long heven oli no plante tumas. “Mo i gat wan handred fotefo taosen man ya we God i pemaot olgeta oli fri long wol.”—Revelesen 14:1, 3.

Yumi save se enikaen gavman long wol i gat ol man blong hem we oli lesin long hem. Taswe ol Wetnes blong Jeova oli bilif se plante taosen milyan man bambae oli save kasem laef we i no save finis aninit long ol rula ya we i stap long heven. Bambae wol i kam wan naesfala paradaes bakegen, we i fulap long ol stret man blong Kingdom blong God. Bambae olgeta evriwan i onagud long rul blong Kraes mo ol narafala king we oli stap wetem hem. From samting ya, ol Wetnes blong Jeova oli strong blong talem se bambae graon i neva lus. Yes, bambae promes ya blong Baebol i kamtru: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29; 104:5.

?Be Kingdom blong God bambae i kam olsem wanem? ?Bambae olgeta man oli rere blong lesin long gavman blong God? Nogat. Baebol i talem se God i mas mekem wan samting long wol fastaem, mo biaen nomo Kingdom i save rulum wol. “Bambae God blong heven i stanemap wan Kingdom we neva i save lus. Nao Kingdom hem wan. . . . bambae i smasem mo i finisim olgeta kingdom ya, mo hem wan bambae i stanap blong longtaem.”—Daniel 2:44, NW.

?Bambae wetaem Kingdom blong God i kam? Ol Wetnes blong Jeova oli talem se bambae Kingdom i kam i no longtaem, from we oli stap luk ol profet tok blong Baebol oli stap kamtru tede. Taswe mifala i wantem halpem yu blong yu tingbaot lelebet long ol profet tok long saed blong “ol lasdei” blong rabis fasin ya blong wol. Yu yu save faenem olgeta tok ya long Matyu 24:3-14; Luk 21:7-13, 25-31; mo 2 Timote 3:1-5.

From we mifala i ‘laekem tumas Jeova, God blong mifala, long olgeta hat, olgeta sol, olgeta tingting, mo olgeta paoa blong mifala,’ mo from we ‘mifala i laekem ol narafala man,’ mifala i no letem sam samting oli seraot mifala olsem: Ol defren nesen, kala blong skin mo ol sosiol ples. (Mak 12:30, 31) Plante man oli makem gud we mifala i laeklaekem mifala olsem Kristin brata nomo long olgeta nesen. (Jon 13:35; 1 Jon 3:10-12) Olsem ya nao, mifala i no joen nating long ol politik bisnes blong ol nesen. Mifala i traem folem rod blong ol faswan disaepol blong Jisas, olsem hem wan i talem se: “Olsem we mi mi no man blong wol ya, olgeta tu oli no man blong wol ya.” (Jon 17:16) Mifala i bilif se mifala i no mas joen nating long fasin blong wol, taswe mifala i traem blokem enikaen nogud fasin we oli stap olbaot long wol tede, olsem: Fasin gyaman, fasin stil, fasin blong slip olbaot, fasin blong mekem krangke long man no woman blong hem, fasin blong man we i slip wetem man, nogud fasin blong yusum blad, fasin blong mekem wosip long gyaman god mo ol narafala fasin we Baebol i blokem.—1 Korin 6:9-11; Efesas 5:3-5; Ol Wok 15:28, 29.

Oli Gat Hop Long Fyuja

Ol Wetnes blong Jeova oli no ting se i gat laef ya nomo. Oli bilif we Jeova i sanem Kraes i kam long wol blong i givim laef blong hem blong pemaot yumi. From samting ya, ol man oli save stanap long fes blong God mo oli save kasem laef we i no save finis long wan nyufala fasin blong wol. Wan aposol blong Jisas i talem se: “From we blad blong Kraes i ron, hem i mekem yumi kam stret man finis long fes blong God.” (Rom 5:9; Matyu 20:28) Ol Wetnes blong Jeova oli tangkyu tumas long God mo Pikinini blong hem from ransom ya we i openem rod blong laef we i no save finis.

Ol Wetnes blong Jeova oli gat strong bilif long laef ya, from we oli bilif se God i save mekem ol dedman oli girap i laef bakegen long Kingdom blong hem. Mifala i bilivim evri tok we i kam long Baebol, se taem wan man i ded, hem i ded olgeta “mo long stret dei ya ol tingting blong hem oli lus.” (Ol Sam 146:3, 4; Esikel 18:4; Eklesiastis 9:5) Yes, bambae ol dedman oli save kasem laef bakegen from we God i save tingbaot olgeta blong mekem olsem.—Jon 5:28, 29.

Yes, store blong Noa mo ol famle blong hem we oli sef long bigfala ren, i mekem ol Wetnes blong Jeova oli save gud se i gat plante man we oli stap laef naoia we bambae oli no ded taem Kingdom blong God i finisim ol gavman we oli stap tede. Bambae olgeta man ya oli save laef i stap foreva long wol we i kam klin olgeta. (Matyu 24:36-39; 2 Pita 3:5-7, 13) Be mifala i bilif se wan man we i wantem sef i mas obei long ol samting we Jeova i askem long hem. Baebol i talem se: “Mo wol ya . . . i stap lus. . . . Be man we i stap mekem ol samting we God i wantem, hem i stap we bambae i no save lus samtaem.”—1 Jon 2:17; Ol Sam 37:11; Revelesen 7:9, 13-15; 21:1-5.

Long pepa ya, mifala i no gat naf ples blong tokbaot olgeta bilif blong ol Wetnes blong Jeova, be mifala i singaot yu blong kasem sam moa save long olgeta.

Sipos oli no putum wan narafala refrens, ol tok blong Baebol we oli stap long pepa ya oli kamaot long Nyutesteman long Bislama.

[Tok blong makem poen long pej 4]

Mifala i karem nem ya: Ol Wetnes blong Jeova, from we mifala i folem fasin blong Jisas