?Ol Witnes Blong Jehova Oli Bilif Long Jisas?

Yes. Mifala i bilif long Jisas. Jisas i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Mifala i bilif se Jisas i aot long heven i kamdaon long wol ya, mo i givim laef blong hem we i stret gud olgeta olsem wan sakrefaes blong sevem ol man. (Matiu 20:28) Taem hem i ded mo i laef bakegen, hem i mekem se ol man we oli bilif long hem oli save kasem laef we i no save finis. (Jon 3:16) Mifala i bilif tu se Jisas i King naoia long Kingdom blong God long heven, we bambae i putum pis long wol ya i no longtaem. (Revelesen 11:15) Be mifala i bilif long tok blong Jisas se: ‘Papa blong mi i hae moa long mi.’ (Jon 14:28) Taswe, mifala i no mekem wosip long Jisas, from we mifala i no bilif se hem i God ya we i gat olgeta paoa.