Laef Long Pis Blong Nyufala Wol
?Taem yu yu luk pija we i stap long pepa ya, yu yu ting wanem? ?Yu yu wantem pis, glad mo ol gudfala fasin we yu yu luk long pija ya? Yes, yu save haremgud long ol samting ya. ?Be yu yu ting se hemia wan drim nomo? ?Yu yu ting se yumi save bilif we bambae ol samting ya oli kamtru?
Plante man oli ting se samting ya i no save kamtru. From we ol fasin blong tede oli nogud tumas. I gat: Ol faet, ol ples we kakae i sot long hem, ol sik, fasin blong kam olfala. Be yumi save putum tingting blong yumi i go strong long wan gudfala fyuja. Baebol i talem se: “Be God i promes finis blong putum nyufala skae [heven, NW] mo nyufala wol, we stret fasin nomo bambae i stap long hem. Mo yumi stap wet blong ol nyufala samting ya.”—2 Pita 3:13; Aesea 65:17.
“Nyufala heven mo nyufala wol ya,” oli no tru samting be oli olsem saen. Trufala wol mo trufala heven oli stret gud olgeta, mo Baebol i soemaot we bambae oli stanap blong olwe. (Sam 89:36, 37; 104:5) Bambae “nyufala wol” i minim ol stret man we oli save laef i stap long graon, mo “nyufala heven” bambae i minim wan stret kingdom long heven, no wan gavman we bambae i rulum ol man long wol. ?Be yu ting se i stret we yumi bilif long “nyufala wol” ya?
Ating yu yu save se fastaem God i mekem plan blong putum ol gudgudfala fasin ya long wol. Hem i putum faswan man mo woman, tufala i stap long Paradaes blong Iden we i bin stap long wol. Hem i talem long tufala se: “Yutufala i mas gat pikinini mo yutufala i mas kam plante blong fulumap wol, mo yutufala i mas bos long hem.” (Jenesis 1:28, NW) Yes, God i gat plan blong tufala i karem plante pikinini, mo i wantem we tufala i mekem Paradaes i kavremap olgeta ples blong wol. Be tufala i jusum rod blong no obei long God, taswe tufala i no stret blong gat laef we i no save finis. Be samting ya i no jenisim tingting blong God. !Bambae tingting blong hem i mas kamtru long nyufala wol!—Aesea 55:11.
Taem yu yu mekem Lodsprea, yu yu stap askem blong Kingdom blong God i kam. Yes, yu yu stap mekem prea blong gavman blong heven i tekemaot nogud fasin i no moa stap long wol, mo i rulum nyufala wol. (Matyu 6:9, 10) Yumi save bilivim God we bambae i mekem prea ya i kamtru, from we Tok blong hem i mekem promes ya, se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Sam 37:29.
Laef Long Nyufala Fasin Blong God
Bambae Kingdom blong God i blesem ol man i bitim mak. Bambae hem i mekem evri gud samting we God i mekem plan blong hem fastaem, blong givhan long ol man long wol. Bambae i no moa gat nogud fasin mo evri man long wol oli save frengud tugeta. Long Baebol, God i mekem promes ya, se: “Hem i stap mekem ol faet oli finis long olgeta ples long wol.” “Bambae wan nesen i no leftemap naef blong faet agens long wan nesen, mo bambae oli no moa lanem fasin blong faet.”—Sam 46:9; Aesea 2:4, NW.
Bambae olgeta ples blong wol oli kam olsem wan garen, wan paradaes. Baebol i talem se: “Bambae draeples i save haremgud, mo bambae draeples i save glad olsem we safran i putum flaoa blong hem. . . . From we long draeples bambae ol wora oli kamaot, mo ol krik tu oli kamaot long ol flat ples we oli drae bifo. Nao graon we i bin hot tumas i save kam olsem wan lugun we ol waelken oli gru long hem, mo graon we i tosta tumas bambae i save kam olsem ol springwora.”—Aesea 35:1, 6, 7, NW.
Yes, bambae ol man oli save glad tumas long Paradaes long wol. Bambae i no moa gat man we i harem nogud from we hem i sot long kakae. Baebol i talem se: “Graon ya blong yumi bambae i givim plante kakae long yumi.” (Sam 67:6; 62:16) Bambae olgeta man oli save haremgud long prapa wok blong olgeta, from we Hae God i mekem promes ya, se: “Nao bambae oli planem waen tri mo bambae oli kakae frut blong hem. . . . Bambae oli no planem wan tri blong wan narafala nomo i kakae frut blong hem.”—Aesea 65:21, 22, NW.
Long nyufala wol blong God, bambae ol man oli no stap hivap long sam bigfala bilding no oli no stap long sam doti ples, from we God i mekem plan ya, i se: “Tru ya, bambae oli wokem haos blong stap insaed long olgeta . . . bambae oli no bildim haos blong wan narafala man nomo i stap long hem.” Baebol i mekem promes ya tu: “Bambae oli no hadwok blong nating.” (Aesea 65:21-23, NW) Olsem ya nao, bambae ol man oli save haremgud long wan gudfala wok. Bambae ol man oli glad blong laef.
Long stret taem blong hem, bambae Kingdom blong God i mekem ol anamol oli gat pis bakegen olsem bifo, taem oli stap long garen blong Iden. Bambae ol man tu oli save gat pis wetem ol anamol. Baebol i talem se: “Bambae waeldog i stap wetem smol sipsip mo bambae pikinini blong lepad i slip wetem pikinini nani, nao smol buluk, smol laeon, mo anamol we i kakae gud, olgeta oli stap wanples; mo wan smol boe nomo bambae i lidim olgeta.”—Aesea 11:6-9, NW; Hosea 2:18.
Traem tingbaot: Long Paradaes long wol bambae i no moa gat sik. !Yes, ol kaen sik oli finis! Tok blong God i talem long yumi, se: “Bambae i no gat man ples we i talem se: ‘Mi mi sik.’ ” (Aesea 33:24, NW) “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:4.
Olsem Wanem Long Yu
Tru ya, ol promes ya blong God oli save pulum hat blong yu blong wantem laef long nyufala stret fasin ya. Maet sam man oli ting se ol blesing ya oli gud tumas taswe oli no save kamtru. Be God i stampa blong hem mo hem i ting se oli gud inaf.—Sam 145:16; Maeka 4:4.
Blong kasem laef we i no save finis long Paradaes long wol, wan man i mas mekem sam samting. Long wan prea, Jisas i talem wan samting we yumi mas mekem, se: “Mo hemia laef ya we i no save finis, we man i save yu, we yu nomo yu God Tru, mo we man i save mi ya, Jisas Kraes, mo yu yu sanem mi mi kam.”—Jon 17:3.
Taswe sipos yumi rili wantem laef long nyufala wol blong God, yumi mas lanem fastaem ol samting we hem i wantem, mo yumi mas mekem olgeta. Yes, samting ya i tru: “Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.” Bambae hem i save haremgud foreva long ol blesing we God bambae i givim.—1 Jon 2:17.
Sipos oli no putum wan narafala refrens, ol tok blong Baebol we oli stap long pepa ya oli kamaot long Nyutesteman long Bislama.