Japta 1

Laef Foreva i No blong Drim Nomo

1, 2. ?Blong wanem plante man oli no bilif se man i save laef foreva long gladtaem long wol?

TEDE, man i no save faenem gladtaem we i save stap longtaem. Plante samting i mekem we man i harem nogud. I kasem sik, i kam olfala, i hanggri, fasin blong brekem loa i olbaot, mo plante moa samting olsem i stap spolem laef blong ol man. From ol samting ya maet yu ting se ol tok ya blong laef we i no save finis i gyaman nomo. Maet yu ting se tok ya i stap westem taem, from we laef olsem i blong drim nomo.

² Ating plante man oli agri wetem yu. Olsem ya nao, ?blong wanem yumi save bilivim tok ya, se yu save laef foreva long paradaes long wol? ?Mo blong wanem yumi save bilif, se laef we i no save finis i no wan drim nomo?

BLONG WANEM YUMI SAVE BILIVIM

3. ?Wanem i soemaot se God i wantem we ol man oli glad long wol?

³ Yumi save bilivim, from we wan Bigfala Paoa i bin rerem wol ya wetem evri samting we yumi nidim, hem ya nao God we i gat olgeta paoa. !Hem i mekem wol ya i stret nomo long yumi! Mo hem i mekem we man mo woman tufala i save glad tumas long ples blong tufala, wol ya—foreva.—Sam 115:16.

4. ?Blong wanem ol scientist oli talem se bodi blong man hem i naf blong i laef foreva?

⁴ Ol scientista oli save finis we bodi blong yumi i gat paoa blong mekem hem wan i kam nyuwan oltaem. Taem ol cellb blong bodi i no moa gud, ol nyuwan i tekem ples, no paoa blong bodi i fiksemap ol cell ya. Fasin ya blong fiksemap bodi hem i naf blong i wok gud olsem foreva. Be i no mekem olsem. Nao ol scientist ya oli no save risen blong samting ya. Oli no savegud blong wanem man i stap kam olfala. Oli talem se sipos ol samting long saed blong man i gud, bambae hem i save laef foreva.—Sam 139:14.

5. ?Baebol i talem we God i wantem mekem wanem wetem wol ya?

⁵ God i wantem we ol man oli gat glad laef long wol ya foreva. !Sipos i olsem, bambae samting ya i mas kamtru! Yes, laef we i no save finis, hemia i no blong drim nomo. ?Baebol we i gat ol plan blong God long hem, i talem wanem long ol bisnes ya? Baebol i talem se “God i mekem wol.” Mo bakegen, i se: “Hem nao i putum wol i stap, hem i no mekem blong nating nomo, be hem i mekem blong man i stap long hem.”—Aesea 45:18.

6. (a) ?Wanem i stap kamaot long wol tede? (b) ?God i wantem we i olsem?

⁶ Tede, plante man oli stap long wol, ?be yu ting se oli stap long hem long fasin we God i wantem? Man oli stap long evri ples. ?Be yu ting se oli stap olsem wan famle we i glad, olsem God i wantem fastaem finis? No gat. Ol man oli seraot long plante haf. Haf i no laekem nating narafala haf. Oli stap brekem loa. Oli faet. Plante milyan man oli sot long kakae mo oli sik. Plante oli tingting tumas long faenem haos, long faenem wok, mo long ol kaon mo ting we oli mas pem. Ol samting ya i no save leftemap nem blong God. Olsem ya nao, man i no stap yusum wol long wei we God i wantem.

7. ?Taem God i mekem faswan man mo woman finis, hem i wantem wanem plan blong hem i wok?

⁷ Taem God i mekem faswan man mo woman finis, i putum tufala long wan paradaes long wol ya. Hem i wantem we tufala i mekem paradaes ya i kasem evri ples long wol. Hem i givim oda long tufala, i se: “Yutufala i mas tekem plante pikinini blong yufala bambae i kam plante, nao yufala i mas fulumap wol mo bos long hem.” (Jenesis 1:28) Yes, God i wantem we ol stret man nomo oli kontrolem wol ya, long fasin blong pis mo gladtaem.

8. ?Blong wanem yumi save se God i no jenisim plan blong hem, taem faswan man mo woman tufala i no moa wantem harem hem?

⁸ From we faswan man mo woman tufala i brekem loa blong God, tufala i no naf blong holem laef we i gogo i no save finis. Be samting ya i no jenisim plan blong God. !Plan ya bambae i mas kamtru ya! (Aesea 55:11) Baebol i promes, i se: “Bambae wol i blong ol stret man, mo bambae oli stap long hem foreva.” (Sam 37:29) God i wantem givim itenel laef long ol man we oli stap mekem wok blong hem. Plante taem Baebol i talem olsem.—Jon 3:14-16, 36; Aesea 25:8; Revelesen 21:3, 4.

YUMI WANTEM LAEF—?BE LONG WEPLES?

9. (a) ?Ol man oli wantem wanem? (b) ?Baebol i minim wanem taem i talem se ‘God i putum tingting long laef we i no save finis long hed blong man’?

⁹ God i wantem we yumi kasem laef we i no save finis, nao samting ya yumi glad tumas from. Tingbaot: ?Sipos yu mas jusumaot, long wanem dei bambae yu wantem ded long hem? Yu no save jusumaot ya. Yu no wantem ded. Eniwan we hem i no krangke no sik tumas, i no wantem ded. Taem God i mekem yumi, i mekem we yumi i wantem laef tumas, i no mekem we yumi i wantem ded. Baebol i tokbaot fasin ya we God i mekem man long hem, i se: “Hem i putum tingting long [laef] we i no save finis long hed blong man.” (Eklesiastis 3:11, Byington) ?Mining blong tok ya i olsem wanem? I minim se ol man olsem yumi, oli wantem laef we i no save finis, oli no wantem ded. From samting ya, longtaem finis plante man oli bin traem faenem wei blong oli no kam olfala.

10. (a) ?Ol man oli wantem laef long weples? (b) ?Blong wanem yumi save se God i givim jans long yumi blong kasem laef we i no save finis?

¹⁰ ?Ol man oli wantem laef long weples? Long ples blong olgeta, wol ya. Man i blong wol, mo wol i stret blong hem. (Jenesis 2:8, 9, 15) Baebol i talem se: “Hem [God] i putum wol i stap long stret ples blong hem; neva bambae wan samting i save muvum hem.” (Sam 104:5) From we God i mekem wol blong i no save finis, i stret we man tu i save laef foreva. God i mekem we ol man oli wantem tumas laef we i no save finis. Nao from we God i laekem tumas ol man, taswe i givim jans long olgeta blong kasem laef olsem. Sipos hem i no givim jans blong oli kasem samting ya we hem i mekem oli wantem, i no stret ya.—1 Jon 4:8; Sam 133:3.

LAEF WE YU YU WANTEM

11. ?Baebol i talem wanem blong soemaot we ol man bambae oli save laef foreva wetem gudfala bodi?

¹¹ Lukluk long pija long nekis pej. ?Ol man long pija ya oli glad long wanem kaen laef? ?Yu yu wantem stap wetem olgeta? !Ating yes! Yu luk long fes blong olgeta. !Oli no sik, oli yangfala ya! Sipos oli talem long yu se oli gat plante taosen yia finis, ?bambae yu bilivim olgeta? Baebol i talem, se olgeta we oli olfala bambae oli kam yang bakegen, olgeta we oli sik bambae oli strong bakegen, ol man we leg blong olgeta i nogud bambae oli save wokbaot gud, ol blaenman bambae oli save lukluk, olgeta we sora blong olgeta i fas bambae sora blong olgeta i open, mo ol man we oli no save toktok bambae oli save toktok. Taem Jisas i stap long wol, hem i mekem plante merikel i kamaot long ol sikman. Samting ya hem i mekem blong soemaot we hem bambae i save mekem bodi blong ol man oli kam gud bakegen. Taem ya blong mekem olsem, i kolosap nao.—Job 33:25; Aesea 33:24; 35:5, 6; Matyu 15:30, 31.

12. ?Ol pija ya oli soemaot wanem?

¹² !Ples ya blong olgeta i olsem wan gudfala garen! I olsem paradaes ya we faswan man mo woman tufala i lusum finis. Kraes i promes finis se bambae i mas olsem. (Luk 23:43) Mo tu, paradaes ya i gat pis long hem. Man blong olgeta ples—blakman, waetman, yalaman—oli stap olsem wan famle nomo. Olgeta anamol tu oli gat pis. Lukluk pikinini ya we i stap plei wetem laeon. Olgeta oli no gat risen blong oli fraet. God i tokbaot samting ya, i se: “Mo bambae lepad i slip kolosap long yangfala nani, mo pikinini blong buluk mo yangfala laeon mo anamol we i fatfat gud, bambae oli stap tugeta; mo wan smol boe nomo i lidim olgeta . . . Mo laeon bambae i kakae drae gras olsem buluk. Mo pikinini we i stap tekem titi yet, bambae i plei long hol blong [snek ya we nem blong hem] kobra.”—Aesea 11:6-9.

13. ?Taem ol plan blong God bambae oli kamtru, wanem ol samting ya we bambae oli finis?

¹³ Long paradaes ya we God i wantem givim long man, bambae i gat gladtaem long hem. Graon bambae i mekem we gudfala kakae i fulap. Bambae i no moa gat man we i hanggri. (Sam 72:16; 67:6) Wo, fasin blong brekem loa mo blong trabol, fasin blong no laekem narafala man, mo fasin blong man i tingbaot hem wan nomo, bambae oli finis ya. !Neva bambae i olsem bakegen! (Sam 46:8, 9; 37:9-11) ?Yu yu bilif we ol samting ya bambae oli save kamaot?

14. ?Olsem wanem yumi save se God bambae i tekemaot ol trabol long man?

¹⁴ Tingbaot: ?Sipos yu yu naf, bambae yu tekemaot ol trabol ya long ol man? ?Bambae yu mekem ol samting we hat blong ol man oli wantem? !Bambae yu mekem ya! Gudfala Papa blong yumi long heven, hem bambae i mekem olsem. Ol samting we yumi wantem, hem bambae i givim. Sam 145:16 i talem se: “Yu yu openem han blong yu, nao ol samting we oli laef oli kasem ol samting we oli wantem.” ?Wetaem bambae samting ya i kamaot?

GUDFALA BLESING OLI KOLOSAP

15. (a) ?En blong wol i minim wanem long graon ya we yumi wokbaot long hem? (b) ?I minim wanem long ol nogud man? (c) ?I minim wanem long olgeta we oli stap mekem wil blong God?

¹⁵ Blong mekem ol gudfala blesing ya oli kamaot, God bambae i tekemaot olgeta nogud fasin wetem olgeta we oli stampa blong ol samting ya. Long semtaem, God bambae i lukaot long olgeta we oli stap mekem wok blong hem. Baebol i talem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i stap foreva.” (1 Jon 2:17) !Bambae ol samting oli jenis ya! Be en blong wol i no minim se en blong graon ya we yumi wokbaot long hem. Bambae i olsem taem blong Noa, taem wora i bin kavremap olgeta ples long wol. Ol nogud man, mo ol nogud fasin blong olgeta, ol samting ya nao bambae oli mas lus. Be ol man we oli stap mekem wok blong God, bambae oli no save lus. Bambae wol ya i klin gud, mo ol man we oli stap long hem bambae oli fri long olgeta man blong trabol ya blong bifo.—Matyu 24:3, 37-39; Proveb 2:21, 22.

16. ?Wanem ol samting ya we oli mas kamaot long “lasdei”?

¹⁶ Be maet wan man i talem se: ‘Olgeta trabol long wol i stap kam nogud moa, i no stap godaon. ?Olsem wanem yumi save talem se bigfala jenis i kolosap?’ Jisas Kraes i bin talemaot plante samting we oli blong kamtru long fyuja. Taswe naoia ol man blong hem oli mas luklukgud long ol tok profet ya, blong oli luksave wanem i stret taem blong God blong finisim wol ya. Jisas i bin talem se long las dei blong olgeta fasin blong wol, bambae i mas gat ol bigfala wo, bambae kakae i sot, bambae ol bigfala etkwek oli plante. Olgeta fasin blong brekem loa bambae oli go antap, mo plante man oli no moa laekem ol narafala man. (Matyu 24:3-12) Hem i talem se bambae “ol man blong ol kantri bambae oli harem nogud nating, mo oli no moa save stretem trabol blong olgeta.” (Luk 21:25) Mo tu, Baebol i talem se: “Long lasdei laef long wol ya bambae i kam strong tumas.” (2 Timote 3:1-5) Ol samting ya oli stap kamaot naoia. ?I tru?

17. ?Sam waes man oli talem wanem long ol samting ya we oli stap kamaot tede?

¹⁷ Plante man we oli savegud long ol nyus blong wol, oli talem se wan bigfala jenis i kolosap. Wan eksampel hem i wan bos blong Herald, wan nyuspepa blong Miami, long Amerika, i raetem se: “Eni man we hem i save tingting lelebet, hem i mas luksave we ol bigbigfala trabol we oli kamaot finis long taem ya, i soemaot, se wol ya kolosap i mas jenis olgeta . . . Jenis ya i mekem we laef blong ol man bambae i defren olgeta, foreva.” Mo wan man Amerika, Lewis Mumford, we hem i raetem ol buk, i se: “Fasin blong laef blong ol man i stap godaon. Tru tumas . . . Bifo, taem fasin blong man i bin godaon olsem, i godaon long samples nomo . . . Be naoia, from we ol ples long wol oli no moa longwe from [radyo mo telefon,] taem wan kantri i stap godaon olsem, olgeta wol i mas godaon.”

18. (a) ?Olgeta samting we oli stap hapen tede, oli soemaot wanem blong fyuja? (b) ?Wanem bambae i tekem ples blong ol gavman?

¹⁸ Olgeta fasin long wol tede, oli soemaot we naoia yumi stap kolosap long taem we bambae wol i lus. Yes, kolosap nao bambae God i klinim wol, i tekemaot olgeta ya we oli stap spolem. (Revelesen 11:18) Bambae God i tekemaot olgeta gavman blong naoia, blong stretfala gavman blong hem bambae i rulum olgeta wol. Hemia nao Kingdom gavman ya we Kraes i tijim ol man blong hem blong prea long hem.—Daniel 2:44; Matyu 6:9, 10.

19. ?Yumi mas mekem wanem sipos yumi wantem laef foreva?

¹⁹ Sipos yu laekem laef, mo yu wantem stap foreva long wol ya aninit long rul blong God, yu mas hareap blong kasem stret save blong God. Yu mas lanem ol plan blong hem, mo wanem hem i wantem man i mekem. Jisas Kraes i prea long God, i se: “Mo hemia laef ya we i no save finis, we man i save yu, we yu nomo yu God tru, mo we man i save Jisas Kraes, we yu yu sanem hem i kam.” (Jon 17:3) !Bambae yumi save laef foreva ya! Yumi glad tumas we samting ya i no blong drim nomo. Be blong kasem gudfala blesing ya, fastaem yumi mas save long wan enemi blong God we hem i stap traem blokem blesing ya.

[Ol Futnot]

[Tok blong pija long pej 9]

?Long fastaem God i wantem we wol i olsem?