Japta 2
Enemi blong Laef we i No Save Finis
1. ?From we gladtaem mo pis i no plante long wol, taswe yumi save askem ol wanem kwestin?
GLADTAEM long wol—kolosap evriwan i wantem samting ya. ?Be blong wanem plante man oli no glad? ?Wanem trabol blong olgeta? Kolosap evriwan i wantem pis. ?Be blong wanem ol kantri oli faet? ?Blong wanem plante man oli no laekem ol narafala man? ?Yu ting se i gat samfala paoa we i stap pusum ol man blong mekem ol nogud samting ya? ?Yu ting se wan paoa we yumi no save luk i stap kontrolem olgeta kantri?
2. ?Wanem ol fasin nogud ya we man i bin mekem, nao yumi stap tingbaot se maet wan nogud paoa we yumi no save luk, hem nao i stap kontrolem ol man?
2 Plante man oli bin ting se maet i tru we i gat wan paoa olsem. ?Blong wanem oli ting olsem? From we oli luk ol rabis fasin blong ol man taem oli stap faet—oli yusum posen gas blong jokem mo bonem man gogo i ded, oli yusum faea bom mo atomik bom. Mo oli yusum masket we i sutum faea i go, mo oli putum man long ol nogud kalabus we i hablok. Oli kilim i ded plante milyan man, woman mo pikinini, olsem oli jes mekem long Kambodia. ?Yu ting se ol rabis fasin ya oli kamaot olsem nomo? Yumi save se man hem i naf blong mekem plante rabis fasin, be taem yumi luk ol fasin ya we oli mekem we oli nogud nating, yumi mas save se wan nogud paoa we yumi no save luk, hem nao i stap pusum man blong mekem ol rabis fasin ya.
3. ?Baebol i soemaot we hu i stap rulum wol ya?
3 Ansa blong samting ya i no hadwok blong faenem. Baebol i soemaot we wan man we yumi no save luk, hem nao i stap kontrolem ol man mo ol nesen. Long Baebol, Jisas Kraes i kolem paoa ya “masta blong wol ya.” (Jon 12:31; 14:30; 16:11) ?Hu ya man ya?
4. ?Setan i bin soemaot wanem long Jisas? ?Hem i wantem givim wanem long Jisas?
4 Blong halpem yumi long faenemaot hu nao man ya, yumi mas tingbaot wanem i hapen long Jisas taem i jes statem wok blong hem long wol ya. Baebol i talem se taem Jisas i baptaes finis, hem i go long drae ples. Long ples ya wan man we yumi no save luk i traem pulum Jisas. Nem blong hem, Devel Setan. Baebol i talem se: “Nao bakegen, Devel [Setan] i tekem Jisas i go antap long wan bigfala hil, nao i soemaot long hem olgeta kingdom long wol ya wetem olgeta gudgudfala samting we oli gat. Nao i talem long hem, i se: ‘Olgeta samting ya bambae mi mi givim long yu, sipos yu yu foldaon long mi, yu mekem wosip long mi.’ ”—Matyu 4:8, 9.
5. (a) ?Wanem i soemaot se ol gavman blong wol oli blong Setan? (b) ?Baebol i soemaot we hu i “god blong fasin ya blong naoia”?
5 Yu tingbaot wanem Setan i wantem givim long Jisas Kraes. Hemia nao “olgeta kingdom long wol ya.” ?Olgeta gavman long wol ya oli rili blong Setan? Yes, oli blong hem ya. Sipos oli no blong hem, ?olsem wanem hem i save givim long Jisas? Mo sipos oli no blong hem, bambae Jisas i mas stretem hem long poen ya. Be hem i no mekem olsem. ?Blong wanem? !From we Setan hem i rili masta blong olgeta kantri long wol! Baebol i klia long samting ya, i se: “Olgeta wol i stap long paoa blong hem ya we i rabis.” (1 Jon 5:19) Baebol i kolem Setan ya “god blong fasin ya blong naoia.”—2 Korin 4:4.
6. (a) ?Tok ya blong Baebol long rul blong Setan, i halpem yumi blong savegud long wanem? (b) ?Setan i wantem mekem wanem long yumi? ?Taswe yumi mas mekem wanem?
6 Tok ya i halpem yumi long savegud blong wanem Jisas i bin talem se: “Kingdom blong mi i no blong wol ya.” (Jon 18:36) Mo tok ya i halpem yumi long savegud blong wanem ol kantri oli no laekem ol narafala kantri, mo oli wantem spolem olgeta, be ol man olsem yumi oli wantem pis nomo. Yes, “Setan, hem i stap gyaman long olgeta man long wol.” (Revelesen 12:9) Hem i wantem gyaman long yumi tu. Hem i no wantem we yumi kasem presen long God, presen blong itenel laef. Taswe yumi mas strong, blong hem i no save pulum yumi long mekem ol fasin nogud. (Efesas 6:12) Blong blokem Setan, fastaem yumi mas savegud hem mo ol fasin blong hem.
HU NAO SETAN
7. ?Blong wanem yumi no save luk Setan?
7 Devel Setan i tru i stap ya. Hem i no olsem ol fasin nogud nomo we i stap insaed long ol man. No gat. Yumi no save luk Setan, mo yumi no save luk God tu. God mo Setan, tufala i speret. Tufala i narakaen olgeta long yumi, tufala i hae moa long olgeta man. Ae blong yumi i no naf blong luk ol speret olsem.—Jon 4:24.
8. ?Blong wanem plante man oli ting se God i mekem Setan?
8 ?Be sipos God i olsem lav, blong wanem hem i mekem Setan? (1 Jon 4:8) God i no mekem hem. Be maet wan man i talem, i se: ‘God i mekem evriwan, i mekem Setan tu. ?Sipos God i no mekem, hu i mekem? ?Setan i kam long wea?’
9. (a) ?Ol enjel oli wanem kaen man? (b) ?Tufala wod ya “devel” mo “setan” i minim wanem?
9 Baebol i soemaot we God i bin mekem plante speret, olsem hem. Long Baebol oli kolem enjel, mo “pikinini blong God.” (Job 38:7; Sam 104:4; Hibrus 1:7, 13, 14) God i mekem olgeta oli gud olgeta. I no gat wan blong olgeta we i olsem wan devel, no wan setan. Wod ya “devel” i minim se man blong spolem nem blong narafala man. Mo wod ya “setan” i minim olsem man we i agensem man.
10. (a) ?Hu i mekem Devel Setan? (b) ?Olsem wanem wan gud man i save mekem hem wan i kam stilman?
10 Be afta, wan blong ol speret pikinini ya blong God, i mekem hem wan i kam Devel, olsem wan man blong gyaman we i stap spolem nem blong ol narafala man. Mo hem i mekem hem wan i kam Setan, olsem wan man we i agensem God. God i no mekem hem i olsem, be afta, hem nomo i mekem hem wan i kam Devel Setan. Wan eksampel: Wan stilman i no wan stilman taem hem i bon. Maet hem i kam long wan gudfala famle, maet papa mo mama blong hem tufala i folem fasin we i stret, mo maet ol brata mo sista blong hem neva oli brekem loa. Be from we hem i stap tingting tumas long ol gudfala samting we mane i save pem, hemia nao taswe man ya i kam stilman. ?Olsem wanem speret pikinini ya blong God i mekem hem wan i kam Devel Setan?
11. (a) ?Enjel ya we i girap nogud long God, hem i save long wanem plan ya blong God? (b) ?Enjel ya i tingting tumas long wanem? ?From samting ya, afta hem i mekem wanem?
11 Enjel ya we afta i kam Setan, hem i stap taem God i bin mekem wol mo faswan man mo woman, Adam mo Iv. (Job 38:4, 7) Hem i stap lesin taem God i talem long tufala, se tufala i mas karem pikinini. (Jenesis 1:27, 28) Enjel ya i save, se bambae wol i fulap wetem ol stret man we oli wosip long God. Hemia nao plan blong God. Be enjel ya i ting se hem i flas mo waes tumas. Hem i wantem we ol man oli wosip long hem, oli no wosip long God. (Esikel 28:13-15; Matyu 4:10) Hem i no sakem rong tingting ya, be i wantem. From nogud tingting ya, taswe afta hem i mekem wan samting blong traem pulum ona mo haenem ya we i wantem. ?Hem i mekem wanem?—Jemes 1:14, 15.
12. (a) ?Enjel ya i toktok long Iv olsem wanem? ?I talem wanem long hem? (b) ?Olsem wanem enjel ya i kam Devel Setan? (c) ?Yumi no mas ting se Setan i olsem wanem kaen man?
12 Enjel ya we i girap nogud long God, hem i yusum wan snek blong toktok long faswan woman, Iv. Tede, samfala man tu oli save yusum trik ya blong mekem narafala man i ting se wan anamol no doli i stap toktok. Olsem ya nao, i rili enjel ya we i stap toktok long Iv. Baebol i kolem hem “snek ya blong fastaem.” (Revelesen 12:9) Hem i talem long Iv, i se: ‘God i stap gyaman, mo hem i no wantem we yu yu kasem ol gudfala save we oli blong yu.’ (Jenesis 3:1-5) Hemia nao wan gyaman tok we i mekem hem i kam wan rabis enjel. Hem i agensem God, hem i wan Setan. Olsem ya nao, i no stret sipos yumi ting se Setan hem i gat hon, mo wan bigfala fok, mo we hem i masta long wan ples aninit long graon, nao i stap mekem ol man long ples ya oli harem nogud tumas. Hem i rili wan enjel we i gat bigfala paoa. Be hem i rabis enjel.
STAMPA BLONG OL TRABOL LONG WOL
13. (a) ?Iv i bin mekem wanem? (b) ?Setan i bin talem se hem i naf blong mekem wanem?
13 Iv i bilivim gyaman tok ya blong Setan, ale hem i brekem loa blong God. Afta, Iv i pulum hasban blong hem tu i mekem olsem. (Jenesis 3:6) Setan i talem we ol man oli no nidim God. Ol man oli save rul long man nomo. Oli no wantem we God i halpem olgeta. Mo tu, Setan i talem we hem i naf blong pulum olgeta laen blong Adam mo Iv, oli aot long saed blong God.
14. ?Blong wanem God i no bin kilim i ded Setan?
14 Sipos God i wantem, hem i naf blong kilim i ded Setan wantaem nomo. Be fasin olsem i no ansarem ol tok ya we Setan i bin sakem long fes blong God. Ol enjel tu oli stap luk mo lesin long ol bisnes ya. Olgeta oli stap tingting long tok ya blong Setan. Taswe God i letem Setan i stap, blong hem i gat jans blong mekem tok blong hem i kamtru. ?Wanem risal blong samting ya?
15, 16. (a) ?Olgeta taosen yia ya we oli pas finis, oli soemaot wanem long saed blong toktok ya we Setan i bin sakem long fes blong God? (b) ?Wanem taem i kolosap?
15 Plante taosen yia i pas finis, be neva ol man oli bin rul gud long olgeta. Olsem ya nao, i no tru we oli no nidim God. Olgeta gavman blong man oli no wok gud. Plante man oli bin harem nogud tumas long han blong olgeta. Baebol i soemaot we Setan i kontrolem ol gavman ya. God i bin letem ol man mo Setan oli rul olsem blong longtaem finis, blong soemaot we Setan hem i no save pulum evri man oli aot long saed blong God. Oltaem i gat samfala man we oli stap wosip long God, mo oli harem hem. Long Baebol yu yu save ridim store blong Job. Setan i bin traem blokem Job blong hem i no moa mekem wosip long God, be hem i no naf ya. Oltaem Job i bin mekem ol wok blong God.—Job 1:6-12.
16 Ol toktok ya we Setan i bin sakem long fes blong God, oli gyaman nomo. I stret nomo we bambae oli kilim hem i ded, from we hem i girap nogud long fes blong God. Naoia yumi stap long stret taem blong God bambae i finisim rul blong Setan. Baebol i tokbaot wan impoten faet long heven, we ol man long wol oli no naf blong lukluk, no harem. Ridimgud store blong Baebol long samting ya, i se:
17. (a) ?Baebol i talem wanem long faet ya long heven? (b) ?Wanem i hapen long olgeta we oli stap long heven? ?Mo olsem wanem long olgeta we oli stap long wol?
17 “Nao i gat bigfala faet i stat long heven. Maekel [hem ya Jisas Kraes we i stanap finis long ded] wetem ol enjel blong hem oli stap faetem bigfala algita ya. Bigfala algita ya wetem ol enjel blong hem oli traem faetem olgeta, be oli lus, nao oli no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man.’ Hem i gyaman long olgeta man long wol finis, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol: ‘Nao from samting ya, yu heven, mo yufala evriwan we i stap long heven, yufala i mas harem gud. Be sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smoltaem nomo blong hem i stap yet.’ ”—Revelesen 12:7-9, 12, NTB.
18. (a) ?Long wanem taem wo i bin stat long heven? (b) ?Stat long taem ya we oli “sakemaot” Setan long heven, wanem i hapen long wol?
18 ?Faet ya i bin kamaot long wanem taem? Plante samting i soemaot we i bin kamaot long 1914, taem i gat Faswan Bigfala Faet blong Wol. Olsem Revelesen i talemaot, oli sakemaot Setan long heven long taem ya. Hemia i min se naoia yumi stap long “smoltaem nomo” ya we Baebol i tokbaot. Olgeta fasin blong brekem loa, ol man oli fraet, oli stap faet, oli sot long kakae, oli kasem plante kaen sik, mo plante moa nogud samting olsem, oli soemaot long yumi se naoia yumi stap long “lasdei” blong wol ya blong Setan.—Matyu 24:3-12; Luk 21:26; 2 Timote 3:1-5.
19. (a) ?Setan i stap hadwok long wanem? (b) ?I waes we yumi mekem wanem?
19 Setan i save se “smoltaem nomo” ya blong hem i kolosap finis, taswe hem i stap traehad blong blokem ol man long wosip blong God. Hem bambae i mas lus, nao i wantem we plante man bambae oli lus tugeta wetem hem. Baebol i talem we hem i olsem wan laeon we i kros tumas, i wantem kakae man. (1 Pita 5:8, 9) Sipos yumi no wantem we hem i kasem yumi, yumi mas savegud long ol rod blong hem we hem i stap yusum blong gyaman long ol man.—2 Korin 2:11.
OL GYAMAN ROD BLONG SETAN
20. (a) ?Setan i win long gyaman fasin ya blong hem? (b) ?Blong wanem plante man oli ting se ol rod blong Setan i gud nomo?
20 Yu no mas ting se ol gyaman rod we Setan i yusum blong pulum ol man oli isi nomo blong luk. Hem i savegud long olgeta fasin blong trikim man. Hem i bin trikim man blong plante taosen yia finis, be yet, plante man oli no ting se hem i tru i stap. Oli ting se ol rabis fasin oli stret long wei blong ol man, ol fasin ya oli no save finis samtaem. Setan i olsem ol bigfala bos blong ol stilman mo ol rabis man olsem. Ol lida ya oli mekem we oli gud man long ae blong ol man, be hemia i olsem trik nomo. Long ples haed oli stap mekem ol fasin nogud. Baebol i eksplenem fasin ya, i se: “Oltaem Setan i stap jenisim hem wan i kam olsem wan enjel blong laet.” (2 Korin 11:14) Ol rod blong hem blong pulum mo trikim ol man, maet oli gud nomo long ae blong plante man.
21. ?Setan i bin yusum wanem plan blong hem?
21 Taem Setan i bin toktok long Iv, hem i tekem fes olsem blong fren. Afta, hem i trikim Iv blong hem i mekem samting we hem i ting se i gud nomo blong mekem. (Jenesis 3:4-6) Sem mak tede, Setan i yusum samfala man blong oli enkarajem ol man blong tingbaot ol gavman blong olgeta nomo, oli no moa tingbaot wok blong God. Fasin olsem i mekem we ol man oli ting se gavman no kantri blong olgeta i gud tumas, ol narafala ples oli no sem mak. Risal blong samting ya i olsem olgeta nogud faet. Mo long taem ya blong yumi, Setan i mekem ol man oli yusum olgeta kaen plan blong traem faenem pis mo we i blong mekem ol ples oli sefgud. Wan plan blong olgeta i bin stanemap Yunaeted Nesen. ?Be yu ting from samting ya naoia wol i gat pis? !No gat ya! Setan i yusum Yunaeted Nesen blong pulum ol man, blong oli no tingbaot plan blong God long mekem pis i kamaot. Hemia nao kingdom blong God long han blong Jisas Kraes, “Jif blong Pis.”—Aesea 9:6; Matyu 6:9, 10.
22. ?Setan i no wantem we yumi savegud long wanem samting?
22 Sipos yumi wantem kasem laef we i no save finis, fastaem yumi mas kasem save long God, mo long Pikinini blong hem we i King, mo long kingdom tu. (Jon 17:3) Devel Setan i no wantem we yu yu kasem gudfala save ya. Bambae hem i traehad blong blokem yu. ?Olsem wanem hem i save mekem olsem? Bambae hem i mekem sam narafala man oli girap long fes blong yu. Maet oli laf long yu, no oli jikim yu. Baebol i talem se: “Olgeta we oli wantem joen long Jisas Kraes blong mekem laef blong olgeta i stret long fes blong God, bambae ol man oli ronem olgeta, oli mekem i nogud long olgeta.”—2 Timote 3:12.
23. (a) ?Olsem wanem Setan i save yusum ol fren no famle blong tanem tingting blong yumi? (b) ?Blong wanem neva yu mas lego from trabol?
23 Maet samfala fren no famle blong yu oli tok long yu, oli no laekem we yu yu stadi long Baebol. Jisas Kraes i talem, i se: “Tru ya, bambae man i gat ol enemi blong hem, we olgeta oli blong haos blong hem nomo. Man we i laekem papa no mama blong hem moa, i winim we hem i laekem mi, hem i no stret blong i kam man blong mi; mo man we i laekem boe no gel blong hem moa, i winim we hem i laekem mi, hem i no stret blong hem i kam man blong mi.” (Matyu 10:36, 37) Maet samfala famle blong yu, oli traem tanem tingting blong yu, from we olgeta oli no savegud long ol gudfala trutok blong Baebol. Oli ting se oli stap halpem yu. ?Be sipos yu yu lego long stadi ya we yu stap mekem long Tok blong God, Baebol, taem trabol i girap long yu, God bambae i ting olsem wanem long yu? Mo tu, sipos yu yu lego bambae yu no save givhan long olgeta fren mo famle ya, blong bambae oli save se stret save blong Baebol hem i impoten tumas. Man we i kasem save ya bambae i kasem laef, be man we i no kasem bambae i lus. Sipos yu yu lanem plante samting long Baebol, mo yu mekem ol samting ya oli wok long laef blong yu, maet bambae ol fren mo famle ya oli luksave we fasin blong yu i gud. Maet olgeta tu oli wantem lanem ol trutok ya.
24. (a) ?Wanem ol rod ya we Setan i yusum blong blokem ol man, blong oli no kasem save long Baebol? (b) ?Stadi long Baebol hem i impoten olsem wanem?
24 Mo tu, maet Setan i traem pulum yu yu mekem samfala fasin nogud, fasin we God i no laekem. (1 Korin 6:9-11) No maet hem i mekem yu yu ting se yu no gat naf taem blong stadi long Baebol, yu yu bisi tumas. ?Be yu ting se i gat wan samting long wol we hem i impoten moa, i winim save ya long Baebol? !Yu no mas letem enikaen samting i blokem yu blong no kasem gudfala save ya, from hemia i olsem rod blong halpem yu blong kasem itenel laef long paradaes long wol!
25. ?Sipos oltaem nomo yumi stap blokem Setan, hem bambae i no save mekem wanem long yumi?
25 Baebol i talem se: “Yufala i mas blokem Devel [Setan].” Sipos yu yu mekem olsem, “hem bambae i ronwe long yu.” (Jemes 4:7) Hemia i no minim se sipos yu yu blokem Setan hem bambae i no moa kambak blong mekem trabol long yu. Man ya i no save lego ya. Oltaem bambae hem i stap kambak. Be sipos oltaem nomo yu yu blokem hem, hem bambae i no save mekem we yu yu agensem God. Yu yu mas strong blong kasem ol gudfala save ya blong Baebol, mo yu yu mas mekem ol samting ya we yu stap lanem. Sipos yu yu mekem olsem, Setan bambae i no save winim yu long wan narafala gyaman rod blong hem, hemia ol gyaman skul.
[Tok blong pija long pej 17]
?Sipos ol gavman long wol ya oli no blong Setan, hem i gat raet blong givim long Kraes?
[Tok blong pija long pej 19]
Stilman ya hem i no stilman taem hem i bon. Sem mak bakegen, God i no bin mekem Devel Setan i wan “devel.” Fastaem hem i olsem wan gudfala enjel nomo
[Tok blong pija long pej 21]
Long faet long heven oli sakemaot Setan mo ol rabis enjel blong hem oli kamdaon long wol. Naoia yu yu stap kasem frut blong samting ya
[Tok blong pija long pej 24]
Maet olgeta oli no wantem we yu yu stadi long Baebol