Ol Man Blong Rul Long Ples Blong Ol Speret Man

?HU I stap rul antap long wol ya? ?I gat samfala oli stap rul, we oli gat moa paoa bitim man? Sipos no, ?God i letem ol man, blong olgeta nomo oli lukaot long olgeta? Blong faenem ansa long ol kwestin ya, fastaem, i gud yumi tingbaot wan samting we i hapen, taem Jisas Kraes i stap mekem wok blong hem long wol ya.

Smoltaem afta we Jisas i baptaes, wan speret man, we nem blong hem Devel Setan, i traem hem. Baebol i tokbaot wan long ol traem ya, i se: “Setan i tekem Jisas i go antap long wan bigfala hil, nao i soemaot long hem olgeta kantri long wol ya wetem ol gudgudfala samting we oli gat.” (Matyu 4:8) Nao Setan i talem long Jisas, i se: ‘Bambae mi mi putum olgeta paoa blong rul long ol kantri ya, wetem olgeta gudgudfala samting blong olgeta, oli stap long han blong yu. From we oli stap long han blong mi finis, mo mi mi save givim long hu man we mi wantem givim long hem. Oraet, sipos yu yu nildaon long mi, yu mekem wosip long mi, bambae olgeta samting ya i blong yu.’​—Luk 4:​6, 7.

Setan i talem se hem i bos long olgeta kantri, no gavman, blong wol ya. ?Jisas i ansa olsem wanem? ?Hem i talem se tok ya blong Setan i gyaman? No gat. Long wan narafala taem, hem i soemaot se tok ya i tru, taem hem i talem se Setan i “masta blong wol ya.”​—Jon 14:30.

Baebol i talem se, Setan i wan rabis enjel we i gat bigfala paoa. Kristin aposol Pol i talem se Setan i joen wetem ol ‘rabis speret,’ mo se oli ‘rul long wol ya we i stap long tudak.’ (Efesas 6:​11, 12) Mo tu, aposol Jon i talem se, ‘fulwol i stap long paoa blong Setan.’ (1 Jon 5:19) Buk blong Revelesen i talem se Setan i “gyaman long olgeta man long wol finis, i lidim olgeta oli go krangke.” (Revelesen 12:9) Mo tu, Revelesen i tokbaot Setan olsem wan bigfala algita, we i givim ‘paoa blong hem long ol politik gavman blong wol ya, i mekem oli sidaon long bigfala jea blong hem, mo i givim paoa long olgeta blong wokem plante samting.’​—Revelesen 13:2.

Ol samting we oli stap hapen long wol, oli soem se wan nogud paoa i stap wok, i stap kontrolem ol man blong spolem olgeta nomo. ?I gat wan narafala risen we i save mekem se ol gavman blong man oli no naf blong putum pis? ?Wanem narafala samting bakegen i save pulum ol man blong no laeklaekem olgeta nating mo blong kilkilim olgeta oli ded? Long wan faet we i kamaot bitwin ol man long wan kantri, wan woman we hem i harem nogud tumas blong lukluk ol dedbodi olbaot mo ol man ya we oli stap kilkilim olgeta, i talem se: “Mi no save olsem wanem samting olsem i save hapen. Hem i bitim fasin blong no laekem nating narafala. Wan rabis speret i stap yusum ol man ya blong kilkilim olgeta bakegen.”

Wan Prapa Speret Man We i Agensem God

Tede, plante man oli no bilif se Devel Setan i stap. Be, hem i no minim nogud fasin insaed long ol man, olsem samfala oli bilif. Baebol mo ol samting we oli stap hapen long wol ya, oli soem se Setan i wan prapa speret man. Mo tu, Setan i agens long Jeova God fulwan. I tru, Setan i no hae olsem God. Jeova i Man ya we i Wokem olgeta samting, mo i gat olgeta paoa. Taswe, hem i gat raet blong rul antap long olgeta samting we hem i mekem.​—Revelesen 4:11.

God i no wokem wan rabis man we i agensem Hem. No gat. Be, wan long ol speret “pikinini blong God,” i stat blong tingbaot hem wan nomo, nao i wantem tumas blong kasem wosip we Jeova nomo i gat raet blong kasem. (Job 38:7; Jemes 1:​14, 15) Tingting ya i pulum hem blong rebel agens long God. Taem speret man ya i rebel, hem i mekem hem wan i kam Devel (we i minim se “man we i gyaman blong spolem nem blong narafala man”) Setan (we i minim se “man we i agensem man”). Taem yu tingbaot ol samting ya, maet yu wantem save from wanem God i letem Setan i rul long wol.

Risen From Wanem God i Letem Setan i Rul

?Yu yu save tingbaot samting we Setan i talem long Jisas long saed blong fasin blong rul long wol? Setan i talem se: ‘Bambae mi mi putum olgeta paoa blong rul long ol kantri ya, i stap long han blong yu. . . . From we hem i stap long han blong mi finis.’ (Luk 4:6) Tok ya i soem se, Devel Setan i stap rul from we God i letem hem nomo. ?Be from wanem God i letem Setan i rul?

Ansa blong kwestin ya i joen wetem ol samting we oli hapen long garen blong Iden, ples ya we Setan i statem wok blong hem olsem rula blong wol. Long Iden, Setan i talem se God i stap rul long fasin we i nogud, from we hem i no wantem givim wan gudfala samting long faswan man mo woman, Adam mo Iv. Setan i talem se, sipos tufala i kakae frut blong tri we God i putum tabu long hem, bambae tufala i fri. Bambae Adam mo Iv tufala i no moa stap aninit long rul blong Jeova, be tufala i save seraot long Jeova. !Bambae tufala i kam olsem God stret!​—Jenesis 2:​16, 17; 3:​1-5.

Taem Setan i gyaman olsem mo i trikim Iv, nao Iv i pulum Adam blong brekem loa blong God, Setan i mekem se faswan man mo woman ya, tufala i kam aninit long rul mo han blong hem. Olsem nao, Setan i kam god blong tufala, god ya we i agensem Jeova. Be, Adam mo Iv, tufala i no kam fri. Oli kam olsem slef blong Setan, slef blong sin, mo slef blong ded.​—Rom 6:16; Hibrus 2:​14, 15.

Folem stret fasin blong Jeova, hem i gat raet blong kilim i ded wantaem nomo, Setan mo tufala ya we oli jes stat blong biaenem hem. (Dutronome 32:4) Be, i gat wan kwestin i stanap long saed blong stret fasin blong God. Setan i talem se fasin blong Jeova blong rul i no stret. From we God i waes tumas, hem i letem taem i pas, blong pruvum se fasin blong seraot long hem i karem bigfala trabol. Jeova i letem tufala rebel ya, Adam mo Iv, oli laef blong smoltaem, blong oli save gat pikinini.​—Jenesis 3:​14-19.

Nating se bighaf blong ol pikinini blong Adam oli no wantem we Jeova i rul long olgeta, fasin we God i mekem long ol man we oli stap wosip long Hem, i soem se rul blong hem i moa gud long ol narafala fasin blong rul. Fasin blong agri fulwan long rul blong Jeova, i karem glad mo trufala seftaem. Be, rul blong man aninit long paoa blong Setan, i mekem se ol man oli harem nogud mo oli no sefgud. Yes, “man i rulum ol man blong spolem olgeta nomo.” (Eklesiastis 8:9) Aninit long rul blong ol man long wol ya we i stap long paoa blong Setan, ol man oli no gat trufala seftaem mo glad we i stap longtaem. Be, i gat gudfala risen blong tingbaot wan gudfala fyuja.

!Taem Blong Setan i Sot!

Ol samting we Setan i stap mekem long wol ya, oli blong smoltaem nomo. !Bambae Jeova i no letem rul blong Setan i gohed longtaem! Kolosap nao, bambae Devel Setan i no moa gat paoa blong mekem wan samting. Bambae wan narafala man i rul antap long wol ya, wan king we i gat stretfasin, we God nomo i jusum. King ya, hem i Jisas Kraes. Long saed blong taem we King ya i tekem jea blong hem long heven, Revelesen i talem se: “Ol kingdom blong wol ya oli kam aninit long paoa blong [Jeova], wetem Mesaea blong hem.” (Revelesen 11:15) Fasin we Baebol i yusum blong kaontem ol yia, wetem ol profet tok blong Baebol we oli kamtru, oli pruvum se samting ya i hapen long yia 1914.​—Matyu 24:​3, 6, 7.

Mo tu, Baebol i tokbaot samting we i hapen smoltaem afta we Jisas i tekem jea blong hem olsem king. Baebol i se: “Nao i gat bigfala faet i stat long heven. Maekel [Jisas Kraes] wetem ol enjel blong hem oli stap faetem bigfala algita ya [Devel Setan]. Bigfala algita ya wetem ol enjel blong hem oli traem faetem olgeta, be oli lus, nao oli no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man.’ Hem i gyaman long olgeta man long wol finis, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.”​—Revelesen 12:​7-9.

?Wanem samting i kamaot taem oli sakemaot Setan long heven? Olgeta long heven, oli haremgud, ?be olsem wanem long ol man we oli stap long wol? Revelesen 12:12 i talem se: “Sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smoltaem nomo blong hem i stap yet.” Tru ya, taem oli sakemaot Setan long heven, samting ya i mekem bigfala trabol i kamaot long wol. Buk ya The Columbia History of the World i talem se: “Bigfala trabol we i kamaot long Faet Blong Fo Yia, stat long 1914 kasem 1918 . . . i soem long ol kantri long Wes se, oli no naf blong protektem ol man long ol krangke fasin blong olgeta, mo long nogud tingting we i stap pusum olgeta. Strong tingting blong ol kantri long Wes, neva i bin kamgud bakegen afta we trabol ya i spolem.”

I gat moa samting bitim strong tingting we i brokdaon, i joen wetem ol trabol long taem blong yumi. Jisas i talem profet tok ya, se: “Ol man bambae oli save mekem faet long ol narafala man. Mo ol kantri bambae oli save mekem faet long ol narafala kantri. Ol man bambae oli gat hadtaem blong kasem kakae. Mo olbaot long wol, bambae graon i seksek.” Hem i talem tu se bambae i gat ol strong sik. (Matyu 24:​7, 8; Luk 21:11) Mo tu, Baebol i talem se, long ‘ol las dei’ blong wol blong Setan, plante man bambae “oli save tingbaot olgeta nomo, mo bambae oli wantem mane tumas, . . . oli no save ona long papa mo mama blong olgeta, . . . oli man blong mekem i strong tumas oltaem long ol narafala man.” Mo tu, ol man bambae “oli wantem tumas ol samting we oli stap haremgud long hem, i winim we oli stap laekem God.”​—2 Timote 3:​1-5.

Stret olsem we Baebol i talem, ol faet, ol strong sik, kakae i sot, graon i seksek, mo fasin blong ol man we i stap kam moa nogud, oli kam antap moa stat long 1914. Ol samting ya oli soem se enemi ya blong God mo ol man, we i kros tumas​—Devel Setan​—oli sakemaot hem finis long heven, mo naoia hem i stap soemaot kros blong hem long wol ya nomo. Be Baebol i soem tu se bambae God i no letem Setan i wok longtaem. Hem “i gat smol taem nomo blong hem i stap yet” bifo Amageden. Long taem ya, God bambae i spolem rabis wol ya we Setan i bos long hem.

?Wanem bambae i hapen long Setan long taem ya? Aposol Jon i raetem se: “Nao mi luk wan enjel we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen. Nao hem i holem bigfala algita ya, we i snek ya blong bifo, we nem blong hem ‘Setan’ no ‘Man we i stap agensem man.’ Nao i fasem hem long jen ya blong i stap wan taosen yia, nao i sakem hem i go long bigfala hol ya, mo i lokem doa blong hol. Mo i putum mak long doa ya blong bambae man i no openem.” (Revelesen 20:​1-3) !Olgeta man we oli stap safa, bambae oli haremgud tumas!

Haremgud Tumas Aninit Long Rul Blong Kingdom

Taem Setan i no moa gat paoa, Kingdom blong God long han blong Jisas Kraes, bambae i rul fulwan long olgeta bisnes blong man. Bambae i no moa gat plante gavman long wol. Wan gavman nomo long heven bambae i stap, blong rul antap long ful wol. Bambae i no moa gat faet, mo bambae pis i stap long olgeta ples. Aninit long rul blong Kingdom blong God, bambae olgeta man oli joengud olsem wan kampani blong ol brata we oli gat lav.​—Ol Sam 72:​7, 8; 133:1; Daniel 2:44.

?Bambae Jisas i soemaot wanem fasin taem hem i stap rul? Taem hem i stap long wol bifo, hem i soem bigfala lav long ol man. Hem i sore long ol man, nao i givim kakae long olgeta we oli hanggri. Hem i mekem ol sikman oli kamgud bakegen, i mekem ol blaenman oli lukluk, ol man we oli no save toktok, oli toktok, mo olgeta we leg blong olgeta i nogud oli wokbaotgud. !Mo Jisas i mekem sam dedman oli laef bakegen tu! (Matyu 15:​30-38; Mak 1:34; Luk 7:​11-17) Ol merikel ya oli soemaot long smol fasin, ol bigbigfala samting we bambae Jisas i mekem olsem King, long fyuja. !Bambae i nambawan tumas blong gat wan man blong rul we hem i naf blong givim ol gudfala samting olsem!

Olgeta we oli stap aninit long rul blong Jeova, bambae oli kasem plante blesing we oli no save finis. Baebol i promes se: “Long taem ya, ae blong ol blaenman bambae i open, mo sora blong ol man we oli no save harem, bambae i no moa fas. Long taem ya, man we i wokbaot nogud, bambae i save klaemap olsem wan man dia, mo tang blong man we i no save toktok, bambae i singaot from glad blong hem.” (Aesea 35:​5, 6) Aposol Jon i tokbaot nambawan taem ya, hem i raetem se: “Nao mi harem wan tok we i kamaot long bigfala jea blong God, we i singaot bigfala, i talem se ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.’”​—Revelesen 21:​3, 4.

Ol blesing we oli kamaot taem Jeova God i rul tru long Pikinini blong hem, Jisas Kraes, bambae oli moa, bitim enikaen trabol we yumi kasem long wol ya we Devel Setan i bos long hem. Long nyufala wol we God i promes long hem, bambae ol man oli no save tingting se, ‘?Hu nao i stap rul?’ (2 Pita 3:13) Ol man we oli obei, bambae oli hapi mo oli sefgud long wan wol we tufala speret Man ya we oli gat lav, Jeova mo Kraes, oli rulum. I gud sipos yu tu yu bilif strong long hop ya, se yu save stap long medel blong ol man ya we oli obei long tufala.

[Tok blong pija long pej 7]

Bambae ol man oli sefgud long wol ya aninit long rul blong Kingdom blong God

[Foto Credit Line blong pija long pej 4]

NASA photo