Japta 6
Jisas Kraes—?God i Sanem Hem?
1, 2. (a) ?Wanem i soemaot we Jisas Kraes hem i wan man we i stap long wol bifo? (b) ?Wanem ol kwestin ya blong Jisas?
KOLOSAP olgeta man oli bin harem nem blong Jisas Kraes. Ol wok blong hem i jenisim plante samting long wol. I no gat narafala man we i bin mekem olsem hem ya. !Stampa blong almanak we kolosap ol man naoia oli stap yusum, hemia yia we oli ting se Jisas i bon long hem! The World Book Encyclopedia i talem se: “Olgeta yia bifo long yia ya [we Jisas i bon long hem] yumi makem B.K.T., no bifo Kristin Taem. Olgeta yia biaen long yia ya, yumi makem K.T., no Kristin Taem.”
2 Jisas hem i no wan man we i stap long tingting blong ol man nomo. Hem i bin stap long wol, olsem wan prapa man. Encyclopædia Britannica i talem se: “Bifo longtaem, ol enemi blong ol Kristin neva oli talem se Jisas i no rili wan man.” ?Hu nao Jisas ya? ?I tru we God i sanem hem i kam? ?Blong wanem ol man oli savegud nem blong hem?
HEM I LAEF BIFO
3. (a) ?Enjel i talem we Meri bambae i bonem pikinini blong hu? (b) ?Olsem wanem vajin ya Meri, i save karem Jisas?
3 Jisas i bon long wan vajin. I no gat narafala man we i bon olsem. Nem blong gel ya, Meri. Wan enjel i tokbaot pikinini blong hem, i se: “Hem bambae i wan hae man, mo ol man bambae oli save singaot hem se Pikinini blong God ya we i Antap Tumas.” (Luk 1:28-33, NTB; Matyu 1:20-25) ?Be olsem wanem wan woman we neva wan man i go long hem yet, i save bonem wan pikinini? Tabu speret blong God i save mekem samting ya i hapen. Jeova i bin putum laef blong nambawan speret Pikinini blong hem long heven, i go long bel blong vajin ya, Meri. !Hemia i wan merikel ya! Jeova i bin mekem we fas woman Iv, i save karem pikinini. Nao i no hadwok long God blong mekem Meri ya i karem pikinini, be i no gat papa we i man. Baebol i eksplenem samting ya, i se: “Be long stret taem we God i makem, hem i sanem stret Pikinini blong hem i kam. Pikinini ya i bon long wan woman.”—Galesia 4:4, NTB.
4. (a) ?Wanem gudfala laef ya we Jisas i gat bifo we hem i bon long wol? (b) ?Jisas i talem wanem blong soemaot we bifo hem i laef long heven?
4 Bifo we hem i bon long wol ya, Jisas i stap long heven, nao hem i wan speret man we i gat bigfala paoa. God tu hem i speret. Ol man oli no naf blong lukluk ol speret ya. (Jon 4:24) Plante taem Jisas i bin tokbaot haenem ya blong hem long heven. Wan taem hem i prea, i se: “Papa, naoia i taem blong mi mi stap wetem yu, mo blong yu yu leftemap nem blong mi, i kam olsem haenem ya we mi gat fastaem, taem we wol i no stap yet.” (Jon 17:5) Mo hem i talem, i se: “Yufala i blong ples daon, mi mi blong ples antap.” “?Be olsem wanem sipos yufala i luk we Pikinini blong man i go antap bakegen, long ples ya we hem i stap long hem fastaem?” “Taem we Ebraham i no bon yet, be mi ya mi stap we mi stap.”—Jon 8:23; 6:62; 8:58; 3:13; 6:51.
5. (a) ?Blong wanem oli kolem Jisas se “Tok,” “Fasbon” mo “stret Pikinini ya blong [God], wan nomo we hem i gat”? (b) ?Jisas i bin halpem God long wanem wok?
5 Bifo we hem i kamdaon long wol ya, oli kolem Jisas se Tok blong God. Nem ya i soemaot we hem i gat wok long heven, wok blong tok long nem blong God. Mo tu, oli kolem hem se “Fasbon” blong God, mo “stret Pikinini ya blong [God], wan nomo we hem i gat.” (Jon 1:14; 3:16; Hibrus 1:6) Samting ya i min se God i mekem hem, bifo we hem i mekem ol narafala speret pikinini. Han blong God nomo i mekem Pikinini ya. God i mekem ol narafala samting tu, be oltaem “fasbon” Pikinini ya i halpem hem. (Kolosi 1:15, 16) Olsem ya nao, taem God i bin talem se: “Naoia yumi mekem man long pija blong yumi,” hem i bin toktok long Pikinini ya. Man ya we biaen i kamdaon long wol, i bon long wan woman, hem nao i bin givhan long God blong wokem olgeta samting we oli stap. !Hem i bin stap long heven wetem Papa blong hem blong plante yia finis! Yumi no save hamas yia.—Jenesis 1:26; Proveb 8:22, 30; Jon 1:3.
LAEF BLONG HEM LONG WOL
6. (a) ?Wanem i hapen smoltaem bifo, mo smoltaem biaen long taem ya we Jisas i bon? (b) ?Jisas i bon long weples? ?Weples hem i gruap?
6 Meri i promes blong Josef. Be taem Meri i kasem bel, Josef i ting se Meri i bin slip wetem wan narafala man. Nao i no moa wantem mared long hem. Be Jeova i eksplenem gud long Josef, se tabu speret blong Hem i mekem we Meri i gat bel. Nao Josef i mared long Meri. (Matyu 1:18-20, 24, 25) Afta, taem tufala i stap mekem visit long taon ya Betlehem, Jisas i bon. (Luk 2:1-7; Maeka 5:2) Taem Jisas i bebi yet, King Herod i wantem kilim hem i ded. Be Jeova i talemaot plan blong Herod long Josef, nao Josef i tekem famle blong hem, nao oli ronwe oli go long Ijip. Taem King Herod i ded finis, Josef mo Meri tufala i gobak long Nasaret long Galili wetem Jisas. Jisas i gruap long ples ya.—Matyu 2:13-15, 19-23.
7. (a) ?Wanem i hapen taem Jisas i gat 12 yia? (b) ?Taem Jisas i stap gruap, hem i lanem wanem wok?
7 Taem Jisas i gat 12 yia finis, hem i go wetem famle blong hem long Jerusalem. Oli go from spesel lafet ya we oli kolem Pasova. Long Jerusalem, hem i spenem tri dei long tempel, nao hem i stap lesin long ol tija, mo hem i askem ol kwestin long olgeta. Ol man we oli stap lesin long Jisas, oli sapraes long gudsave blong hem. (Luk 2:41-52) Taem Jisas i stap gruap long Nasaret, hem i lanem wok blong kapenta. Josef tu hem i kapenta, nao ating hem i bin tijim Jisas.—Mak 6:3; Matyu 13:55.
8. ?Wanem i kamaot taem Jisas i gat 30 yia?
8 Taem hem i gat 30 yia finis, wan bigfala samting i jenisim laef blong Jisas. Hem i go long Jon Baptaes, nao i askem hem blong hem i mekem baptaes long hem, i godaon olgeta aninit long wora blong Jodan Reva. Baebol i talem se: “Taem Jisas i baptaes finis, hem i kamaot long wora; !Nao luk! wantaem nomo heven i open, mo hem i luk speret blong God i stap kamdaon olsem wan sotleg i kamdaon, i kam kasem hem. !Luk! Nao wan voes long heven i talem se: ‘Hemia Pikinini blong mi, we mi lavem hem tumas, tingting blong mi i glad tumas long hem.’ ” (Matyu 3:16, 17) Jon i save se God i bin sanem Jisas ya i kam.
9. (a) ?Long wanem taem Jisas i kam Kraes? ?Blong wanem? (b) ?Baptaes blong Jisas i soemaot wanem?
9 Jeova i kafsaedem tabu speret blong Hem i go long Jisas, blong makemaot no putumap hem, blong bambae hem i king blong kingdom ya blong Hem, we bambae i kam. Taem tabu speret i makemaot hem olsem finis, Jisas i kam “Mesaea” no “Kraes.” Tufala wod ya, Hibru mo Grik, i min se: “Putum oel long hed blong man, blong makemaot hem, blong hem i man blong mekem spesel wok.” Olsem ya nao, long taem ya Jisas i kam Jisas Kraes, no Mesaea (Anointed long Englis). Aposol Pita i tokbaot “Jisas ya, man Nasaret, we God i makemaot hem wetem tabu speret, mo wetem paoa.” (Wok 10:38) Mo taem hem i baptaes long wora, Jisas i soemaot we naoia hem i wantem mekem olgeta wok ya, we God i sanem hem i kamdaon long wol from. ?Wanem impoten wok ya?
BLONG WANEM HEM I KAM LONG WOL
10. ?Jisas i kam long wol blong talemaot wanem trutok?
10 Taem hem i stap eksplenem blong wanem hem i kam long wol, Jisas i talem long man Rom ya Ponjes Paelet, we hem i hed gavman, i se: “Mi mi bon, mo mi kam long wol ya blong wan samting nomo, blong mekem wetnes long trutok.” (Jon 18:37) ?Be wanem ol trutok ya we Jisas i mas talemaot? Faswan, ol trutok blong Papa blong hem long heven. Jisas i bin tijim ol man blong hem blong prea we nem blong Papa blong hem i kam tabu. (Matyu 6:9) Mo hem i prea se: “Mi mi talemaot finis nem blong yu long ol man ya we yu yu bin givim long mi.” (Jon 17:6) Mo hem i talem se: “Mi mas talemaot gud nyus blong kingdom blong God, from we God i sanem mi blong mi mekem olsem.”—Luk 4:43.
11. (a) ?Blong wanem Jisas i ting se wok blong hem i impoten tumas? (b) ?Neva Jisas i slak long wanem? ?Yumi mas mekem wanem?
11 ?Wok ya blong talemaot kingdom mo nem blong Papa blong hem, hem i impoten olsem wanem long Jisas? Hem i talem long ol man blong hem, i se: “Kakae blong mi hemia, we mi mekem ol samting we hem ya we i sanem mi i wantem, mo mi finisim ol wok blong hem.” (Jon 4:34) Long tingting blong Jisas, wok blong God i impoten, olsem kakae. ?Blong wanem? From we long Kingdom blong hem, God bambae i save mekem ol plan blong hem long ol man, oli kamtru. Kingdom ya bambae i tekemaot olgeta rabis fasin, mo i tekemaot olgeta samting we i bin spolem nem blong Jeova. (Daniel 2:44; Revelesen 21:3, 4) Oltaem nomo Jisas i bin talemaot nem mo kingdom blong God. Neva hem i slak long samting ya. (Matyu 4:17; Luk 8:1; Jon 17:26; Hibrus 2:12) Oltaem nomo Jisas i bin talemaot ol trutok, nating sipos ol man oli no laekem. Hem i wan gudfala eksampel blong yumi folem. Fasin ya blong hem i mekem God i glad.—1 Pita 2:21.
12. ?Wanem narafala impoten risen ya we Jisas i bin kam long wol?
12 Blong yumi save kasem itenel laef aninit long rul blong kingdom blong God, Jisas i mas kafsaedem blad blong hem fastaem, blong i ded. Olsem tufala aposol blong Jisas i bin talem se: “From blad blong Kraes, naoia yumi kam stret man finis [long fes blong God].” “Blad blong Jisas, Pikinini blong God, i stap mekem yumi klin long olgeta sin.” (Rom 5:9; 1 Jon 1:7) Impoten risen blong Jisas i kam long wol hemia, blong hem i save givim laef blong hem, from yumi. Hem i talem se: “Pikinini blong man i no kam blong ol man oli mekem wok blong hem, be hem i kam blong mekem wok blong olgeta, mo blong givim laef blong hem blong pemaot plante man, blong oli go fri.” (Matyu 20:28) ?Be wanem mining blong samting ya, se Kraes i givim laef blong hem blong “pem rod”? ?Blong wanem blad blong hem i mas ron, nao i ded, blong sevem yumi?
HEM I GIVIM LAEF BLONG HEM BLONG PEMAOT YUMI
13. (a) ?Wanem mining blong wod ya “pemaot”? (b) ?Jisas i bin givim wanem blong pemaot yumi long sin mo ded?
13 Samtaem i gat man we i stap stilim wan pikinini. Nao man ya i talem se sipos famle blong pikinini ya i wantem we pikinini ya i gofri, oli mas givim mane blong “pemaot” hem. Olsem ya nao, fasin blong “pemaot” i save mekem man i gofri long wan samting we i stap holem hem. I olsem wan samting we man i pem blong sevem laef blong hem. Jisas i bin givim gudfala laef blong hem, taem hem i man, blong mekem ol man oli fri long sin mo ded, from we tufala samting ya i stap holem olgeta. (1 Pita 1:18, 19; Efesas 1:7) ?Blong wanem oli nidim samting ya blong mekem oli gofri olsem?
14. ?Blong wanem yumi nidim Jisas blong pemaot yumi?
14 From we Adam, bubu blong yumi evriwan i brekem loa, i girap nogud long God. Fasin nogud ya blong hem, i mekem we hem i kam sinman. Baebol i soemaot we “mining blong tok ya sin, hemia nao, we man i brekem loa.” (1 Jon 3:4; 5:17) From samting ya, Adam i no naf blong kasem presen ya blong God, itenel laef. (Rom 6:23) Adam i lusum gudfala laef blong hem, long paradaes long wol. Mo from samting ya tu, ol pikinini blong hem, oli lusum sem samting ya. ?Be blong wanem ol pikinini blong Adam oli mas ded, taem hem i mekem sin?
15. Adam i mekem sin. ?Be blong wanem ol pikinini blong hem tu oli mas ded?
15 From we Adam i kam sinman, taswe sin mo ded i kasem olgeta pikinini blong hem. Yumi evriwan i laen blong hem, nao taswe samting ya i kasem yumi tu. (Job 14:4; Rom 5:12) “Olgeta evriwan oli mekem sin finis, mo oli stap longwe long ol gudgudfala fasin blong God.” Baebol i talem olsem. (Rom 3:23; 1 King 8:46) Mo man blong God, Deved, i talem se: “Mi mi nogud finis taem mama blong mi i harem nogud blong bonem mi. Mo taem mi stap yet long bel blong hem, be mi mi gat sin finis.” (Sam 51:5) From sin blong Adam, olgeta man oli stap kasem ded. ?Be olsem wanem sakrafaes blong Jisas i save mekem ol man oli gofri long sin mo ded?
16. (a) God i bin givim Jisas blong hem i pemaot ol man. ?Be olsem wanem samting ya i laenap wetem loa ya blong God, se sipos wan i ded, narawan tu i mas ded from? (b) ?Blong wanem Jisas nomo i naf blong pemaot olgeta man?
16 Wan loa blong God we hem i bin givim long ol man Isrel, i talem se: “Sipos wan i ded, narawan tu i mas ded from.” (Eksodas 21:23; Dutronome 19:21) From we hem i brekem loa blong God, Adam i bin lusum gudfala laef blong hem long paradaes wol. Ol pikinini blong Adam oli lusum sem samting ya tu. Jisas Kraes i bin givim gudfala laef blong hem blong pemaot, no pembak, samting ya we Adam i bin lusum. Yes, Jisas Kraes i bin “givim hem olsem wan stret praes blong pemaot olgeta man.” (1 Timote 2:5, 6) From we bodi mo laef blong hem i gud nomo, olsem Adam, taswe Baebol i kolem Jisas se “las Adam.” (1 Korin 15:45) I no gat narafala man we hem i naf blong givim hem blong pemaot olgeta man. Jisas nomo hem i naf. ?Blong wanem? From we Jisas nomo i stret nomo long pikinini ya blong God, Adam, we bodi blong hem i gud nomo.—Sam 49:7; Luk 1:32; 3:38.
17. ?Wanem samting ya we Jisas i bin givim long God blong pemaot ol man?
17 Taem Jisas i gat 33 yia haf, hem i ded. Be long namba tri dei biaen long ded blong hem, God i stanemap hem i laef bakegen. Afta 40 dei, hem i bin gobak long heven. (Wok 1:3, 9-11) Long heven ya, hem i speret man bakegen, nao hem i “stanap long fes blong God blong halpem yumi.” (Hibrus 9:12, 24) Long taem ya nao Jisas i pemaot yumi long laef blong hem, we i bin givim olsem wan sakrafaes. Naoia samting blong sevem ol man, i stap. ?Be long wetaem bambae ol gudfala samting blong samting ya oli save kamtru?
18. (a) ?Olsem wanem sakrafaes blong Jisas i save halpem yumi tede? (b) ?Mo bambae olsem wanem long fyuja?
18 Sakrafaes blong Jisas i save halpem yumi tede. ?Olsem wanem? Sipos oltaem yumi bilif long sakrafaes ya we i blong pemaot ol man, bambae yumi klin long ae blong God, mo bambae hem i lukaot long yumi. (Revelesen 7:9, 10, 13-15) Plante long yumi maet oli bin mekem ol bigfala sin, taem oli no save God yet. Naoia tu, yumi stap mekem ol mastik, samtaem ol mastik ya oli bigwan. Be from sakrafaes blong Jisas, yumi save askem God blong hem i fogivim yumi, nao bambae hem i harem yumi. (1 Jon 2:1, 2; 1 Korin 6:9-11) Mo long fyuja, sakrafaes ya bambae i openem rod blong yumi save kasem itenel laef long nyufala stret fasin, we i olsem wan presen long han blong God. (2 Pita 3:13) Long taem ya nao, bambae olgeta we oli stap bilif long sakrafaes blong Jisas, bambae oli fri long sin mo ded. !Bambae oli gudfala olgeta, mo bambae oli save laef foreva!
19. (a) ?Sakrafaes blong pemaot ol man, i mekem yu yu harem olsem wanem? (b) ?Aposol Pol i soemaot we yumi mas tangkyu olsem wanem, from sakrafaes ya?
19 ?Naoia yu yu tingting wanem long sakrafaes blong Jisas we i pemaot yumi? Ating hat blong yu i glad tumas, from we naoia yu yu save we God Jeova i lavem yu, nao taswe hem i bin givim Pikinini ya blong hem we hem i laekem tumas. (Jon 3:16; 1 Jon 4:9, 10) Be tingbaot tu long lav blong Kraes. Hem i wantem kamdaon long wol blong givim laef blong hem, from yumi. Yumi tangkyu tumas long hem. Aposol Pol i eksplenem olsem wanem yumi save soemaot we yumi tangkyu long Jisas, i se: “Hem i ded blong [sevem] olgeta man, blong bambae olgeta we oli laef oli no moa laef blong mekem ol wok blong olgeta nomo, be blong mekem ol wok blong hem ya we i ded finis, nao God i mekem hem i stanap i laef bakegen.” (2 Korin 5:14, 15) ?Olsem wanem long yu? ?Yu bambae yu yusum laef blong yu blong mekem ol wok blong God mo Pikinini blong hem long heven, Jisas Kraes, blong soemaot we yu yu stap tangkyu tumas?
BLONG WANEM JISAS I WOKEM OL MERIKEL
20. ?From we Jisas i bin tekemaot sik ya, leprosi, long wan man, samting ya i soemaot we Jisas i wanem kaen man?
20 Plante man oli save finis we Jisas i bin wokem ol merikel. Hem i sore tumas long ol man we oli gat trabol, nao i wantem yusum paoa ya we God i bin givim long hem, blong halpem olgeta. Wan man we i gat nogud sik ya, leprosi, i kam long Jisas, i se: “Sipos yu wantem, yu save mekem mi mi klin.” Nao Jisas “i sore tumas long hem, i putum han blong hem long hem, i talem long hem, i se: ‘Mi mi wantem. Yu nao yu klin.’ ” !Nao sik man ya i kam gud bakegen!—Mak 1:40-42.
21. ?Jisas i halpem plante man olsem wanem?
21 Mo i gat wan narafala store long Baebol we i soemaot sore blong Jisas we hem i gat long ol sik man, hemia nao: “Mo plante man tumas oli kam long hem. Oli tekem olgeta we leg blong olgeta i nogud, mo olgeta we oli blaen, mo olgeta we samting i spolem bodi blong olgeta, mo olgeta we oli no save toktok, mo plante narafala sik man tu, oli kam long hem. Oli tekem olgeta oli kam kolosap long Jisas, nao hem i mekem olgeta oli gud bakegen. Nao ol man we fastaem oli no save toktok, oli save toktok, mo ol man we samting i spolem bodi blong olgeta, bodi blong olgeta i gud bakegen. Ol man we leg blong olgeta i nogud oli save wokbaot gud, mo ol blaenman oli save lukluk. Mo taem ol man oli luk ol samting ya, oli sapraes tumas, nao oli stap presem God blong ol man Isrel.”—Matyu 15:30, 31, NTB.
22. ?Wanem i soemaot we Jisas i sore tumas long ol man ya we hem i stap halpem olgeta?
22 Jisas i wantem tumas blong halpem ol man ya we oli sik tumas olsem, taswe hem i talem long ol man blong hem, i se: “Mi mi sore tumas long ol man ya. Oli stap wetem mi tri dei finis, nao oli no moa gat kakae. Mo mi no save sanem olgeta oli gohom we oli no gat kakae, from we sipos mi mekem olsem, maet sam man bambae oli hafded from hanggri long rod.” Jisas i bin yusum seven bred mo sam smol fis, blong givim kakae long “fo taosen man, be oli no kaontem ol woman mo ol pikinini.”—Matyu 15:32-38, NTB.
23. ?Blong wanem Jisas i wantem mekem pikinini blong wan wido i laef bakegen long ded?
23 Long wan narafala taem bakegen, Jisas i mitim wan kampani we i stap kamaot long wan taon, nem blong hem Naen. Baebol i talem se: “Olgeta ya oli stap karem wan dedman, oli go blong berem hem. Dedman ya i pikinini blong wan wido, wan pikinini nomo we hem i gat . . . Nao taem Masta blong yumi i luk woman ya, hem i sore tumas long hem.” Hem i luksave trabol blong woman ya. Nao Jisas i tok long dedman ya, se: “Yang man, mi mi talem long yu, yu girap.” !Ale, wan merikel i kamaot! “Nao dedman ya i girap, i sidaon, nao i stat toktok. Nao Jisas i talem long wido ya, i se ‘Hem ya pikinini blong yu.’ ” !Ating mama blong man ya i glad tumas! ?Sipos samting olsem i kamaot long yu, bambae yu harem olsem wanem? Nyus blong merikel ya i goaot i kasem ol ples raonabaot, mo ol ples farawe. Taswe olgeta man olbaot oli savegud Jisas.—Luk 7:11-17, NTB.
24. ?Ol merikel blong Jisas oli soemaot wanem long fyuja?
24 Be ol merikel ya we Jisas i wokem, oli blong halpem ol man blong smoltaem nomo. Ol man ya we Jisas i bin tekemaot sik blong olgeta, oli kam sik bakegen biaen. Mo olgeta ya we Jisas i bin mekem oli laef bakegen long ded, oli ded bakegen biaen. Be ol merikel ya blong Jisas, oli soemaot we God i bin sanem hem i kam, mo we hem i stret Pikinini blong God. Mo tu, ol merikel ya oli soemaot we paoa blong God i save tekemaot enikaen trabol long man. Mo oli soemaot long yumi ol gudfala samting we oli save kamaot long wol, taem kingdom blong God nomo bambae i stap rul. !Long taem ya, olgeta we oli hanggri bambae oli kasem kakae, olgeta we oli sik bambae oli kam gud bakegen, mo ol dedman bambae oli stanap oli laef bakegen! Sik, ded, no enikaen narafala trabol, neva bambae oli save spolem gladtaem blong ol man bakegen. !Ol samting ya i olsem wan gudfala blesing ya!—Revelesen 21:3, 4; Matyu 11:4, 5.
HEM YA WE I RUL LONG KINGDOM BLONG GOD
25. ?Wanem trifala haf blong laef blong Jisas?
25 Laef blong Pikinini blong God, i gat trifala haf blong hem. Faswan hemia, olgeta yia we hem i bin stap wetem Papa blong hem long heven, bifo we hem i kam man. Sekenwan hemia, afta we hem i bon hem i spenem 33 yia haf long wol ya. Namba tri hemia, naoia hem i laef long heven bakegen olsem wan speret man. ?Wanem wok blong hem long heven naoia?
26. ?From we oltaem hem i strong long wok blong hem long wol ya, taswe Jisas hem i naf blong mekem wanem?
26 Longtaem finis i klia nomo se Jisas i mas kam king. Enjel tu i talem long Meri, i se: “Hem bambae i king, nao hem i rul . . . foreva. Mo kingdom blong hem bambae i no save finis.” (Luk 1:33) Taem hem i stap mekem wok blong God long wol ya, oltaem nomo hem i stap tokbaot kingdom blong God. Hem i tijim ol man blong hem blong prea, olsem hemia: “Letem kingdom blong yu i kam. Letem ol samting we yu yu wantem oli kamaot long wol, olsem oli kamaot finis long heven.” Mo hem i enkarajem olgeta blong “tingting long faenem kingdom blong God” oltaem. (Matyu 6:10, 33) From we oltaem tingting blong hem i stap strong long wok blong hem, taem hem i stap long wol, taswe hem i naf blong hem i save kam king blong kingdom blong God. ?Hem i statem wok ya blong king taem hem i jes kambak long heven?
27. (a) ?Taem Jisas i gobak long heven, hem i mekem wanem? (b) ?Wanem faswan wok blong Jisas, taem hem i kam king blong kingdom blong God?
27 No. Hem i no mekem ya. Aposol Pol i poen long Ol Sam 110:1, nao i eksplenem se: “Man ya [Kraes] i bin givim wan sakrafaes nomo blong tekemaot ol sin [blong ol man], nao sakrafaes ya hemia naf blong i save stap foreva. Nao hem i go sidaon long raet saed blong God, mo i stap wet long ples ya, gogo God bambae i mekem ol enemi blong hem olsem wan smol jea, we i ples blong putum leg blong hem.” (Hibrus 10:12, 13) Jisas i stap wet long oda blong Jeova, we i talem se: “Yu yu go stap long medel blong ol enemi blong yu, nao yu winim olgeta.” (Sam 110:2) Long stret taem ya nao, hem i bin stat blong klinim heven, i sakemaot Setan mo ol enjel blong hem. Baebol i tokbaot risal blong faet ya, se: “!Naoia God blong yumi i sevem yumi, mo naoia paoa mo kingdom blong hem i kamtru finis, mo naoia Kraes i gat paoa long evri samting, from we man ya we i agensem ol brata blong yumi, we long dei mo naet hem i stap talemaot ol poen blong hem long olgeta long fes blong God, naoia God i sakemdaon hem finis!” (Revelesen 12:10) Olsem yu yu ridim finis long buk ya, faet ya long heven i kamaot finis, mo Jisas Kraes i stap rul finis long medel blong ol enemi blong hem.
28. (a) ?Kolosap Kraes bambae i mekem wanem? (b) ?Blong hem bambae i lukaot long yumi, naoia yumi mas mekem wanem?
28 Kolosap nao, Kraes mo ol enjel blong hem long heven, bambae oli tekemaot olgeta gavman blong wol ya. (Daniel 2:44; Revelesen 17:14) Baebol i talem we Kraes i “gat wan naef blong faet we i sap gud . . . we bambae hem i yusum blong kilim ol man blong evri kantri. Hem bambae i bos long ol man ya, mo saen blong paoa blong hem, wokingstik we oli wokem long aean.” (Revelesen 19:11-16, NTB.) Blong soemaot we yumi naf blong hem i save lukaot long yumi, taem bambae hem i kilim i ded ol man, yumi mas soemaot long fasin blong yumi, we yumi bilif long Jisas Kraes. (Jon 3:36) Yumi mas kam man blong hem, mo yumi mas harem hem, olsem we hem i King blong yumi long heven. ?Yu bambae yu mekem olsem?
[Tok blong pija long pej 58]
Jisas hem i aot long wok kapenta, blong i save go baptaes. Nao hem i kam Mesaea, i statem spesel wok blong Jeova
[Tok blong pija long pej 63]
Bodi mo laef blong Jisas i gud nomo, olsem Adam. Tufala i stret nomo
[Tok blong pija long pej 64]
Jisas i sore tumas long olgeta we oli sik mo hanggri. Taswe hem i halpem olgeta
[Tok blong pija long pej 67]
Merikel blong mekem dedman i laef bakegen, i soemaot ol gudfala wok we Jisas bambae i save mekem taem kingdom blong God i stap rul