Japta 9
?Hel i Wanem Kaen Ples?
1. ?Plante skul oli tijim wanem long hel?
OL SKUL blong plante milyan man, oli bin tijim olgeta we hel i olsem wan ples blong mekem ol man we oli stap long hem oli harem i soa. Encyclopædia Britannica i talem se “Skul Katolik blong Rom i tijim we hel. . . . i blong foreva, soa we ples ya i stap givim, i no save finis.” Mo ensaeklopidia ya i talem we tijing ya blong skul Katolik, i “stap yet long plante [skul] blong ol Protestan.” Ol skul blong ol man Hindu, Budis mo Moslem, olgeta tu oli tijim we hel i wan ples blong harem i soa. From samting ya, plante man oli talem we hel i ples nogud, nao oli no wantem tokbaot.
2. ?God i ting wanem long fasin ya blong bonem ol pikinini long faea?
2 ?Be olsem wanem long hel, ples ya blong harem i soa? ?God i bin wokem? ?God i talem wanem taem ol man Isrel oli bin folem eksampel blong man we oli stap raonabaot long olgeta, nao oli stat blong bonem samfala pikinini blong olgeta long faea? God i talem long Baebol, i se: “Oli wokem ol hae ples blong Topet, we i stap long ples ya blong pikinini blong Hinom long medel blong ol hil, blong bonem ol pikinini boe mo ol pikinini gel blong olgeta long faea. Hemia i wan samting we neva mi talem blong mekem, mo we neva hat blong mi i tingbaot.”—Jeremaea 7:31.
3. ?Blong wanem i no stret blong ting se God i mekem man i harem i soa?
3 Tingbaot hemia: sipos neva hat blong God i tingbaot blong rusum man long faea, ?yu ting se hem nao i wokem hel, ples blong faea, blong mekem olgeta we oli no man blong hem oli harem i soa? Baebol i talem se: “God i [stampa blong] lav.” (1 Jon 4:8) ?Yu ting se wan God we i gat lav olsem, hem i wantem mekem plante man oli harem nogud nating foreva? ?Yu yu wantem mekem olsem? From we yumi save long lav blong God taswe yumi mas lukluk long Tok blong hem, blong faenemaot hel i olsem wanem. ?Hu ya olgeta ya we oli go long hel, mo oli stap blong hamas taem?
SEOL MO HADES
4. (a) ?Wanem tufala Hibru mo Grik wod ya we oli tanem i kam “hel”? (b) Long King James Version oli tanem Seol i kam olsem wanem?
4 Webster’s Dictionary i talem we Englis wod ya hell i sem mak long Hibru wod ya Seol mo Grik wod ya Hades. Long ol Jeman Baebol oli no yusum wod ya hell, be oli raetem Hoelle. Long Potagis oli raetem Inferno, long Spanis oli raetem Infierno, mo long Franis oli raetem Enfer. Olgeta we oli bin mekem Authorized Version no King James Version, oli tanem Seol i kam “hel” blong 31 taem, mo i kam “beregraon” blong 31 taem, mo i kam “hol” blong 3 taem. Douay Version blong skul Katolik i tanem Seol i kam “hel” blong 64 taem. Long Kristin haf blong Baebol long Grik (we plante man oli kolem “Nyutesteman”), King James Version i tanem Hades i kam “hel” long olgeta 10 ples blong hem.—Matyu 11:23; 16:18; Luk 10:15; 16:23; Wok 2:27, 31; Revelesen 1:18; 6:8; 20:13, 14.
5. ?Wanem kwestin ya we yumi save askem long Seol mo Hades?
5 ?Be wanem ples ya Seol, no Hades? From we King James Version i tanem tok Hibru ya Seol i go long trifala defren wod, olsem hel, beregraon mo hol, taswe i klia se trifala ples ya i sem mak nomo. Mo sipos hel i olsem beregraon nomo, i no stret blong talem se hel i ples blong faea, blong mekem man i harem i soa. Oraet, ?Olsem wanem nao? ?Seol no Hades i minim beregraon, no i minim ples blong faea?
6. (a) ?Olsem wanem Baebol i soemaot we Seol mo Hades i minim sem mak nomo? (b) ?From we Jisas i bin stap long Hades, taswe yumi mas save wanem?
6 Bifo we yumi ansa long kwestin ya, yumi mas mekem i klia se, tok Hibru ya Seol mo Grik wod ya Hades, tufala i minim sem mak nomo. Ol Sam 16:10 long Hibru haf blong Baebol, mo Wok 2:31 long Kristin haf blong Baebol long Grik, tufala vas ya i soemaot we samting ya i tru. Tufala vas ya i stap long nekis pej. Yu save luk we Wok 2:31 i yusum wod ya Hades, blong talemaot Seol we i stap long Sam 16:10. Mo vas ya i mekem i klia se Jisas Kraes i bin stap long Hades, no hel. ?Be olsem wanem? ?Yumi mas tingting se God i bin mekem Kraes i harem i soa long faea blong hel? !No gat ya! Jisas i bin stap long beregraon blong hem nomo.
7, 8. ?Store blong Jekob mo san blong hem Josef, mo blong Job, i soemaot olsem wanem we Seol i no ples blong harem i soa?
7 Taem Jekob i stap kraekrae from we hem i ting se pikinini blong hem Josef i ded, hem i talem se: “!Bambae mi mi godaon long pikinini blong mi long Seol, mi kraekrae long hem!” (Jenesis 37:35) Be long vas ya, King James Version i tanem Seol i kam “beregraon,” mo Douay Version i tanem i kam “hel.” Be tingtinggud long bisnes ya. ?Jekob i ting se pikinini blong hem Josef i stap long ples blong harem i soa, we neva hem i save aot long hem? ?Mo hem i wantem go long ples ya blong stap wetem pikinini blong hem? ?No i olsem we Jekob i ting se pikinini blong hem i ded long beregraon, nao Jekob tu i wantem ded?
8 Yes, olgeta gud man oli go long hel blong Baebol. Gudfala man ya Job, we hem i kasem plante trabol, hem i prea long God, i se: “Plis yu haedem mi long Seol [beregraon, King James Version; hel, Douay Version] . . . yu makem dei we bambae yu yu save tingbaot mi bakegen.” (Job 14:13) Tingbaot hemia: Sipos Seol i ples blong faea mo blong harem i soa, yu ting se Job i wantem go long ples ya, gogo kasem taem we God bambae i tingbaot hem bakegen? No gat. Be i klia se Job i wantem ded, i wantem go long beregraon, blong ol trabol blong hem i save finis.
9. (a) ?Olgeta we oli stap long Seol, oli stap olsem wanem? (b) ?Seol mo Hades i olsem wanem?
9 Long ol vas long Baebol we i gat wod ya Seol, neva i talem we i gat laef, no wok, no panis long ples ya. Be plante taem Baebol i givim wod ya long saed blong ded no blong ples we i no gat laef no wok. Eklesiastis 9:10 i talem se: “Wanem samting we han blong yu i faenem blong wokem, yu mas wokem long olgeta paoa blong yu, from we i no gat wok, no tingting, no save, no waes fasin, long Seol [beregraon, King James Version; hel, Douay Version], ples ya we bambae yu go long hem.” Olsem ya nao, ansa i klia, se Seol mo Hades i no ples blong harem i soa, be tufala wod ya i minim beregraon blong ol man. (Sam 139:8) Ol gud man, mo ol nogud man, oli go long hel blong Baebol.
AOT LONG HEL
10, 11. ?Taem Jona i stap long bel blong fis, blong wanem hem i talem se hem i stap long hel?
10 ?Man i save aot long hel? Tingbaot store blong Jona. God i mekem wan bigfala fis i solemdaon Jona, blong hem bambae i no save draon. Nao taem Jona i stap long bel blong fis ya, hem i prea, i se: “From we mi mi harem nogud tumas, taswe mi singaot long Jeova, nao hem i ansa long mi. Long bel blong Seol [hel, King James Version mo Douay Version (2:3)] mi mi singaot blong yu yu halpem mi. Nao yu harem voes blong mi.”—Jona 2:2.
11 ?Jona i minim wanem taem hem i talem se “long bel blong hel”? Hem i no minim we i gat faea long bel blong fis ya. Be hem i minim se maet bambae bel blong fis ya i kam olsem beregraon blong hem. Jisas Kraes i tokbaot hem wan, i se: “Olsem we Jona i stap tri dei mo tri naet long bel blong bigfala fis, ale long sem fasin, Pikinini blong man bambae i stap tri dei mo tri naet insaed long graon.”—Matyu 12:40.
12. (a) ?Wanem i soemaot we man i save aot long hel? (b) ?Wanem moa i soemaot we “hel” i minim “beregraon”?
12 Jisas hem i ded blong tri dei long beregraon. Be Baebol i talem se: “[God] i no livim sol blong hem long hel . . . God i mekem Jisas ya i laef bakegen finis long ded.” (Wok 2:31, 32, King James Version) Long sem fasin, God i mekem Jona i stanap i laef bakegen long hel, olsem ples ya we kolosap bambae i beregraon blong hem. Hemia i kamaot taem fis ya i traot long sanbij, nao Jona i kamaot bakegen. !Yes, man i save aot long hel! I gat gudfala promes i stap, se ol dedman bambae oli mas aot long hel (Hades). Revelesen 20:13 i talem olsem, i se: “Mo solwora i givimbak ol dedman we oli stap long hem, mo ded wetem hel [Hades] tufala i givimbak ol dedman we oli stap long tufala: nao man ya i jajem olgeta man ya from ol fasin we oli mekem.”—King James Version.
GEHENA MO LUGUN BLONG FAEA
13. ?Wanem Grik wod ya we oli tanem i kam “hel” blong 12 taem, long King James Version?
13 Be maet samfala man oli no agri, oli se: ‘Baebol i tokbaot faea blong hel mo lugun blong faea. ?Ating samting ya i soemaot we hel i ples blong harem i soa, a?’ I tru we samfala translesen blong Baebol, olsem King James Version, i tokbaot “faea blong hel,” mo i tokbaot man we i stret blong oli “sakem hem i go long hel, long faea ya we neva i save ded samtaem.” (Matyu 5:22; Mak 9:45) Long Kristin haf blong Baebol long Grik, i gat 12 vas we King James Version i yusum “hel” blong tanem Grik wod ya Gehena. ?Olsem wanem long Gehena ya? ?Hemia i ples blong faea? Be yumi luk finis long wod ya Hades, we hemia tu oli tanem i kam “hel” blong talemaot beregraon nomo.
14. ?Wanem Gehena? ?Oli mekem wanem long ples ya?
14 I klia gud, se tok Hibru ya Seol wetem tok Grik ya Hades, i minim beregraon nomo. ?Oraet, be wanem mining blong Gehena? Long Hibru haf blong Baebol, Gehena i makem wan ples we nem blong hem “Hinom,” we hem i stap daon long medel blong ol hil. Mo tu, Hinom i nem blong ples ya afsaed long wol blong Jerusalem, ples ya we ol man Isrel oli bonem pikinini blong olgeta long faea, blong mekem sakrafaes. Afta, gudfala King Josaea i stopem rabis fasin ya. (2 King 23:10) Nao oli mekem Hinom ya i ples blong doti nomo.
15. (a) ?Long taem blong Jisas, oli yusum Gehena blong mekem wanem? (b) ?Be neva oli sakem wanem long hem?
15 Olsem ya nao, taem Jisas i stap long wol, Gehena i ples blong doti blong Jerusalem. Oli bonem ol doti ya long faea. Mo blong faea ya i save bon long dei mo long naet, oli sakem salfa long hem. Smith’s Dictionary of the Bible, Volume 1, i eksplenem samting ya, i se: “[Hinom] i kam olsem ples blong doti blong taon ya, nao ol man oli sakem ol dedbodi blong ol rabis man long hem, wetem ol anamol we oli ded, mo olgeta narakaen rabis tu.” Be neva oli sakem laef samting long hem.
16. ?Wanem i soemaot we Gehena i olsem wan pija blong samting we i blong go lus olgeta?
16 Ol man blong Jerusalem oli savegud long ples blong doti ya. Taswe oli save long mining blong tok ya we Jisas i talem long ol nogud hae man blong skul, i se: “!Yufala i olsem snek! !Yufala i olsem pikinini blong snek stret! Kot i jajem yufala se bambae yufala i mas go long Gehena. ?Weswe yufala i ting se yufala i save ronwe long hem?” (Matyu 23:33) Jisas i no minim se ol hae man ya blong skul bambae oli harem i soa. !Taem ol man Isrel oli stap bonem ol laef pikinini blong olgeta, God i talem we neva hat blong hem i tingbaot blong mekem nogud samting ya! Olsem ya nao, i klia se Jisas i yusum Gehena ya i olsem wan pija blong samting we i blong go lus olgeta. Hem i min se ol nogud hae man ya blong skul, oli no naf blong bambae oli stanap oli laef bakegen long ded. Ol man we oli stap lesin long tok blong Jisas, oli haremsave se olgeta we oli stap go long Gehena, oli olsem ol rabis long ples blong doti, bambae oli lus olgeta.
17. ?Wanem “lugun blong faea” ya? ?Olsem wanem yumi save we i olsem?
17 ?Wanem “lugun blong faea” ya we Baebol i tokbaot long buk blong Revelesen? Mining blong hem i kolosap sem mak long Gehena. I no minim ples blong harem i soa, be i min se ded foreva, no samting we i blong go lus olgeta. Baebol i talem sem mak long Revelesen 20:14: “Mo ded wetem Hades [hel, King James Version mo Douay Version], oli sakem tufala i go long lugun blong faea. Lugun blong faea ya, hemia i min se seken ded ya.” Yes, lugun blong faea ya, hemia “seken ded” ya. I no gat man we i save stanap i laef bakegen long “seken ded” ya. I klia se “lugun” ya i olsem wan pija, from we oli sakem ded mo hel (Hades) i go long hem. Prapa faea i no save bonem ded mo hel. Be paoa blong God i save spolem tufala, blong tufala i lus olgeta. Bambae i mas olsem ya.
18. ?Baebol i minim wanem taem i talem se Setan bambae i harem i soa foreva long “lugun blong faea”?
18 Be maet samfala man i talem se: ‘Baebol i talem we Devel Setan bambae i stap long lugun blong faea ya, nao hem i harem i soa foreva.’ (Revelesen 20:10) ?Hemia i minim wanem? Taem Jisas i stap long wol, samtaem oli kolem gad blong kalabus se man blong givim “soa.” Jisas i tokbaot wan man long wan store blong hem, i se: “Nao masta ya blong hem i kros tumas, hem i putum man ya i go long han blong ol man blong givim soa, gogo hem i pemaot olgeta kaon ya blong hem.” (Matyu 18:34, King James Version) Olgeta ya we oli sakem long “lugun blong faea,” olsem “seken ded,” neva oli save laef bakegen, nao taswe i olsem we oli stap long kalabus blong ded, foreva. I olsem we oli stap long han blong ol gad foreva, nao neva bambae oli save aot long kalabus blong ded. Ol rabis man oli no rili harem i soa, from we yumi save finis se ol dedman oli no moa stap. Tingting blong ol man ya i finis olgeta.
RIJ MAN MO LASROS
19. ?Olsem wanem yumi save we store ya blong Jisas blong rijman wetem Lasros, i olsem wan pijatok nomo?
19 ?Be wanem mining blong tok blong Jisas long wan parabol blong hem, “Nao puaman ya i ded, mo ol enjel oli kam karem i go stap kolosap long Ebraham: nao rijman tu i ded, mo ol man oli berem hem; mo long hel [Hades] hem i stap harem sobodi, nao i lukluk i go antap, i luk Ebraham we i stap longwe, mo Lasros we i stap long saed blong hem.”? (Luk 16:19-31, King James Version) Yumi luk finis we Hades i olsem beregraon nomo, i no ples blong harem i soa, taswe i klia se Jisas i stap talemaot wan parabol, no wan pijatok nomo. Mo tingbaot hemia: ?Yu ting se hel i kolosap nomo long heven, nao man we i stap long hel i save toktok wetem man we i stap long heven? ?Mo tu sipos rijman ya i stap long lugun blong prapa faea, olsem wanem Ebraham i save sanem Lasros i kam blong mekem tang blong rijman ya i kol wetem wora we i stap long fingga blong hem nomo? Yes, ol samting ya oli soemaot i klia gud, se store ya blong Jisas i no truwan, be i olsem wan parabol, no wan pijatok nomo.
20. ?Long parabol ya, wanem mining blong (a) rijman? (b) Lasros? (c) ded blong tufala? (d) soa blong rijman?
20 Rijman long parabol ya, hem i pija blong ol hae man blong skul we oli no wantem Jisas, nao afta oli kilim hem i ded. Lasros hem i pija blong ol man we oli lesin long Pikinini blong God, oli folem hem. Taem rijman mo Lasros tufala i ded, hemia i olsem pija blong soemaot we naoia samting i defren long tufala. Samting we i defren, hemia: Jisas i stat blong givim kakae blong speret long ol man we oli olsem Lasros, from we oli hanggri tumas. Long taem ya, ol man Lasros ya oli kam gud man long ae blong Bigfala Ebraham, God Jeova. Mo long semtaem ya, olgeta gyaman hae man blong skul, oli “ded” long ae blong God, olsem hem i no moa wantem olgeta. Nao taem ol man blong Kraes oli talemaot ol rabis wok blong ol gyaman lida ya, oli kros tumas, oli stap kakae tut blong olgeta from. (Wok 7:51-57) Olsem ya nao, pijatok no parabol ya, i no tijim yumi we samfala dedman oli stap harem i soa long faea blong hel.
OL TIJING BLONG SETAN
21. (a) ?Wanem ol gyaman tijing ya we Setan i stampa blong hem? (b) ?Blong wanem yumi save se tijing blong pegatri i gyaman?
21 Setan i talem long Iv, i se: “Bambae yutufala i no save ded.” (Jenesis 3:4; Revelesen 12:9) Be Iv hem i ded ya. I no gat wan haf blong hem we i no ded. Tijing ya we i talem se sol i no save ded, hemia i wan gyaman tok we Setan i stampa blong hem. Mo wan narafala gyaman tok blong hem, i talem we sol blong ol nogud man oli stap harem i soa long hel no pegatri. Baebol i soemaot klia, se ol dedman oli no save tingting nating. Taswe yumi save se tufala tijing ya blong Setan i gyaman nomo. Wod ya “pegatri,” no tijing blong pegatri, i no gat long Baebol.
22. (a) ?Yumi lanem wanem long japta ya? (b) ?Save ya i mekem wanem long yu?
22 Yumi luk finis we hel (Seol, no Hades) i ples blong spel. Ol dedman we oli stap long hem, ol gud man mo ol nogud man, oli stap wet blong bambae oli save stanap oli laef bakegen. Mo yumi luk finis tu we Gehena i no wan ples blong harem i soa. Be Baebol i yusum tok ya olsem wan pija blong samting we i blong go lus olgeta. Sem mak bakegen, lugun blong faea i no wan ples blong prapa faea, be hemia i minim “seken ded.” Ol man we oli go long hem, neva bambae oli save stanap oli laef bakegen. Hel i no ples blong, from we neva hat blong God i tingbaot blong mekem fasin olsem. Mo tu, i no stret blong mekem wan man i harem i soa foreva, from rong fasin blong hem long wol ya blong smol yia nomo. !I gud tumas blong savegud long trutok we i soemaot ol samting ya long saed blong ded! Trutok ya i save mekem yumi fri long olgeta gyaman tijing, mo kastom, we oli blong mekem ol man oli fraet.—Jon 8:32.
[Tok blong pija long pej 83]
Hibru wod ya “Seol” mo Grik wod ya “Hades” tufala i minim sem samting nomo
[Tok blong pija long pej 84]
?Taem fis i solemdaon hem finis, blong wanem Jona i talem se: ‘Long bel blong hel mi mi singaot’?
[Tok blong pija long pej 86]
Gehena i ples afsaed long wol blong Jerusalem. Hemia i pija blong samting we i blong go lus olgeta