?Hel i Wan Trufala Ples? ?Baebol i Talem Wanem?
Ansa we Baebol i givim
Sam olfala Inglis Baebol, olsem King James Version, oli yusum tok ya “hel” long sam vas. (Ol Sam 16:10; Ol Wok 2:27a) Olsem yu luk long pija long atikol ya, plante man oli bilif se hel i wan ples we ol rabis man oli bon long faea blong kasem panis. ?Olsem wanem? ?Hemia wan tijing blong Baebol?
Long atikol ya
?Hel i wan ples we man i safa blong olwe?
Nogat. Long sam olfala lanwis Baebol, tok ya we oli transletem i kam “hel” (Hibru, “Seol”; Grik, “Hades”) i minim “Gref,” hemia beregraon blong ol man. Baebol i soemaot se ol man long “Gref” oli no moa laef.
Ol dedman oli no save samting, taswe oli no harem i soa. “I no gat wok, o tingting, o waes, o save, long hel.” (Prija 9:10, Douay-Rheims Version) Long hel, i no gat noes blong man we i singaot from hem i safa. Baebol i talem se: “Ol rabis man bambae oli sem, mo bambae oli stap kwaet long gref [hel, Douay-Rheims].”—Ol Sam 31:17; King James Version (30:18, Douay-Rheims); Ol Sam 115:17.
God i talem se ded nao i panis blong sin, be i no se man i safa long helfaea. God i talem long fas man Adam, se ded nao i panis blong man we i brekem loa blong God. (Jenesis 2:17) Hem i no talem se man ya bambae i safa olwe long hel. Biaen, Adam i mekem sin, nao God i talemaot panis blong hem se: “Yu yu das taswe bambae yu gobak long das.” (Jenesis 3:19) Bambae hem i no moa laef. Sipos panis blong Adam i blong bon long helfaea, i sua se God bambae i talem. God i no jenisim panis blong ol man we oli no obei long ol loa blong hem. Longtaem afta we Adam i mekem sin, God i pulum wan man blong raetem long Baebol se: “Pei blong sin, hemia ded.” (Rom 6:23) I no nid blong panisim man moa, from we “taem man i ded, hem i fri long olgeta sin blong hem.”—Rom 6:7.
God i no laekem nating tingting ya se man i safa blong olwe. (Jeremaea 32:35) Tingting ya i agensem tijing blong Baebol se “God hem i lav.” (1 Jon 4:8) Hem i wantem se yumi wosipim hem from we yumi lavem hem, i no from we yumi fraet blong safa blong olwe.—Matiu 22:36-38.
Ol gudfala man oli go long hel. Ol Baebol we oli yusum tok ya “hel” oli soemaot se ol gudfala man blong God, olsem Jekob mo Job, oli save se bambae oli go long hel. (Jenesis 37:35; Job 14:13) Baebol i talem se Jisas Kraes i stap long hel, taem hem i ded go kasem we i laef bakegen. (Ol Wok 2:31, 32) Taswe, i klia se taem ol Baebol ya oli yusum tok ya “hel,” oli stap tokbaot Grefb nomo.
?Olsem wanem long parabol blong rijman mo Lasaros?
Parabol ya blong Jisas i stap long Luk 16:19-31. Ol parabol oli pijatok blong tijim yumi long saed blong God mo ol gudfala fasin. Taswe, parabol blong rijman mo Lasaros i no tokbaot samting we i rili hapen. (Matiu 13:34) Blong kasem save moa long parabol ya, ridim haf ya “?Hu Ya Rijman Mo Lasaros?”
?Hel i wan pijatok we i soemaot se man i stap longwe long God?
Nogat. Baebol i soemaot klia se dedman i no moa save wan samting. Taswe, tijing ya se dedman i save se hem i stap longwe long God, i agensem Baebol.—Ol Sam 146:3, 4; Prija 9:5.
?Man i save kamaot long hel?
Yes. Baebol i tokbaot naen man we oli kamaot long Gref (we sam Baebol oli transletem i kam “hel”) taem oli laef bakegen.c Sipos oli save se oli bin stap long hel, bambae oli tokbaot wanem i hapen long ples ya. Be i gud blong makem se i no gat wan long olgeta we oli talem se oli stap safa o oli save samting we i hapen long olgeta. ?From wanem? Olsem Baebol i tijim, oli no save wan samting, i olsem we oli “slip” ded nomo.—Jon 11:11-14; 1 Korin 15:3-6.
a Bighaf blong ol niufala Inglis Baebol oli no yusum tok ya “hel” long Ol Wok 2:27. Be oli yusum ol tok olsem “gref,” (New Century Version); “ples blong ol dedman,” (New International Version); “ol dedman” (The Passion Translation). Sam narafala Baebol oli yusum Grik tok ya “Hades.”—Holman Christian Standard Bible, NET Bible, New American Standard Bible, English Standard Version.
b Luk bokis ya “Ol Tok We Olfala Lanwis Baebol i Yusum.”