Japta 28

Wok Tugeta Long Fasin Blong Lav

1. (a) ?Olsem wanem yu save kam haf blong kongregesen blong God? (b) ?Wanem oda ya we bambae yu mas obei long hem?

TAEM bambae yu yu kasem moa save long God Jeova, mo long ol samting we hem i wantem mekem, mo yu glad tumas from, bambae yu wantem stap joen wetem olgeta man we oli gat sem bilif mo hop we yu yu gat. Taem yu yu mekem olsem, bambae yu tu yu haf blong ogenaesesen we God i gat long wol, wan ogenaesesen blong ol tru Kristin brata. “Yufala i mas lavem evriwan long kampani ya blong ol brata.” Hemia nao wan oda we bambae yu mas obei long hem.​—1 Pita 2:17; 5:​8, 9.

2. (a) ?Wanem nyufala loa ya we Jisas i givim long ol man blong hem? (b) ?Tok ya se “yufala i mas lavlavem yufala” i soemaot wanem? (c) ?Lav i impoten olsem wanem?

² Jisas Kraes i mekem i klia, se ol man blong hem oli mas lavlavem olgeta. Hem i talem long olgeta, i se: “Mi mi givim wan nyufala loa long yufala, se yufala i mas lavlavem yufala . . . Sipos yufala i stap lavlavem yufala, bambae olgeta man oli luksave se yufala i man blong mi.” (Jon 13:​34, 35) Tok ya se “yufala i mas lavlavem yufala” i soemaot klia, se ol tru Kristin bambae oli olsem wan kampani nomo. (Rom 12:5; Efesas 4:25) Samting we i blong makem kampani ya, hemia nao we ol memba oli stap lavlavem olgeta. Sipos man i no gat lav, ol narafala samting i blong nating nomo.​—1 Korin 13:​1-3.

3. ?Olsem wanem Baebol i talemgud se ol Kristin oli mas lavlavem mo givgivhan long olgeta?

³ Blong ol Kristin blong bifo oli no fogetem ol gudfala poen ya, oli stap kasem ol tok olsemia: “Yufala i mas kaen gud long yufala.” “Yufala i mas mekem welkam long yufala.” “Yufala i mas olsem slef blong yufala.” “Yufala i mas kaen long yufala, yufala i mas gat gladhat long yufala.” “Yufala i no mas kros long yufala, mo taem wan long yufala i faenem poen agens long narawan long yufala, be oltaem nomo tufala ya i mas fofogivim tufala.” “Yufala i mas stap toktokgud long yufala blong mekem tingting blong yufala i harem gud, mo yufala i mas givgivhan long yufala.” “Yufala i mas gat pis long yufala.” “Yufala i mas lavlavem yufala tumas.”​—Rom 12:10; 15:7; Galesia 5:13; Efesas 4:32; Kolosi 3:​13, 14; 1 Tesalonaeka 5:​11, 13; 1 Pita 4:8; 1 Jon 3:23; 4:​7, 11.

4. ?Wanem i soemaot se ol Kristin oli mas lavlavem olgeta, be oli mas lavem ol narafala man tu?

⁴ Be hemia i no min se ol tru Kristin oli mas lavem ol memba blong ogenaesesen blong God nomo. Oli mas lavem olgeta narafala man tu. Baebol i enkarajem olgeta blong bambae oli mekem we lav blong olgeta i kam bigfala moa, blong bambae olgeta oli lavlavem olgeta moa, mo blong bambae oli lavem “olgeta man” moa. (1 Tesalonaeka 3:12; 5:15) Aposol Pol i soemaot olsem wanem long samting ya, i talem se: “Yumi mas mekem i gud long olgeta man, be antap moa, yumi mas mekem olsem long olgeta ya we oli bilif, oli brata blong yumi.” (Galesia 6:10) Olsemia nao, ol Kristin oli mas lavem olgeta man, ol enemi tu, be antap moa, oli mas lavem olgeta memba blong ogenaesesen blong God, olgeta brata mo sista long saed blong speret.​— Matyu 5:44.

5. ?Wanem i soemaot we ol tru Kristin blong bifo, mo blong tede, oli gat lav?

⁵ Plante man oli save we ol Kristin blong bifo oli stap lavlavem olgeta. Tertulian, we i man blong raetem ol buk long Seken handred yia, i raetem we ol man oli stap talem se: ‘!Yu luk olsem wanem olgeta oli stap lavlavem olgeta! !Mo olsem wanem olgeta oli rere blong givim laef blong olgeta, blong halpem olgeta!’ Lav we i olsem, yumi save faenem long olgeta tru Kristin tede. ?Be hemia i min se neva ol tru Kristin oli kasem samfala trabol wetem olgeta samtaem?

FRUT BLONG SIN

6. ?Blong wanem ol tru Kristin samtaem oli mekem sin agens long olgeta?

⁶ From we yu yu stadi long Baebol, taswe yu save finis se yumi evriwan i kasem sin long papa mo mama blong yumi, Adam mo Iv. (Rom 5:12) Ale, taswe i isi nomo long yumi blong mekem ol samting we i no stret. Baebol i talem se: “Yumi evriwan i foldaon plante taem.” (Jemes 3:2; Rom 3:23) Mo yu mas save we ol memba blong ogenaesesen blong God oli gat sin, nao samtaem oli save mekem samfala samting we i no stret. Hemia nao i save mekem trabol i kamaot long ol tru Kristin ya.

7. (a) ?Blong wanem Pol i talem long Yuodia mo Sintike we tufala i mas gat “wan tingting nomo”? (b) ?Olsem wanem yumi save se tufala ya i gudfala Kristin woman?

⁷ Tingbaot tufala woman ya Yuodia mo Sintike, long kongregesen blong Filipae bifo. Aposol Pol i raet, i se: “Yuodia mo Sintike, mi mi talem strong long yutufala, se yutufala i mas gat wan tingting nomo long Masta.” ?Blong wanem Pol i enkarajem tufala woman ya blong gat “wan tingting nomo”? I klia se i gat samfala trabol bitwin long tufala. Baebol i no talem trabol ya i olsem wanem. Maet trabol ya i kamaot long jelas nomo. Be tufala ya i gudfala woman. Tufala i Kristin longtaem finis. Long plante yia bifo, tufala i stap joen wetem Pol long wok blong prij. Taswe hem i raet long kongregesen, i se: “Mi wantem blong yu yu stap givhan long tufala woman ya we tufala i hadwok finis wetem mi long gud nyus.”​—Filipae 4:​1-3.

8. (a) ?Wanem trabol ya we i kamaot long Pol mo Banabas? (b) ?Sipos yu yu stap wetem tufala ya bifo, nao yu luk trabol ya, maet yu tingting wanem?

⁸ Trabol i bin kamaot tu long aposol Pol mo fren blong hem, Banabas. Taem tufala i rere blong mekem seken trep blong go prij, Banabas i wantem tekem kasen blong hem, Mak, i kam tu. Be Pol i no wantem tekem Mak i kam, from we bifo Mak ya i no stap wetem tufala gogo kasem en blong faswan trep blong tufala, be i aot long tufala i tanraon i gobak long haos. (Wok 13:13) Baebol i talem se: “Ale, nao tufala i rao long bisnes ya, tufala i go wanwan.” (Wok 15:​37-40, NTB) !Tingbaot samting ya! Sipos yu yu stap wetem Pol mo Banabas bifo, nao yu luk we “tufala i rao” olsem, ?bambae yu ting se tufala ya i no blong ogenaesesen blong God, from we tufala i stap mekem olsem?

9. (a) ?Wanem sin ya blong Pita, mo blong wanem hem i mekem olsem? (b) ?Pol i mekem wanem taem hem i luk samting ya?

⁹ Long wan narafala taem, Pita i mekem i no stret. Hem i no moa wantem stap wetem ol Kristin Jentael, from we hem i fraet se samfala Kristin Jyu bambae oli no moa laekem hem, from we olgeta ya oli ting se oli gud moa long ol Kristin Jentael. (Galesia 2:​11-14) Taem aposol Pol i luk samting ya, hem i tok strong long Pita long fes blong olgeta we oli stap, from fasin nogud ya blong hem. ?Sipos yu nao yu Pita, bambae yu harem olsem wanem?​—Hibrus 12:11.

WINIM OL TRABOL LONG FASIN BLONG LAV

10. (a) ?Pita i mekem olsem wanem taem Pol i stretem hem? (b) ?Yumi save lanem wanem long eksampel ya blong Pita?

¹⁰ Pita i save kros long Pol. Hem i save harem we tingting blong hem i soa, from we Pol i stretem hem long fes blong ol man. Be Pita i no mekem olsem. (Eklesiastis 7:9) Tingting blong Pita i stap daon. Hem i harem tok ya blong Pol, mo i no letem lav ya we hem i gat long Pol i kam slak from. (1 Pita 3:​8, 9) Afta, Pita i raetem wan leta i go long ol Kristin brata blong hem, i tokbaot Pol, i se: “Longfala tingting blong Masta blong yumi i olsem jans blong yufala blong bambae yufala i save sef, olsem we brata blong yumi Pol, we yumi lavem hem tumas, i raetem long leta we i go long yufala, long waes we God i givim long hem.” (2 Pita 3:15) Trabol ya we i kamaot i fol blong Pita, be hem i winim trabol ya long fasin blong lav.​—Proveb 10:12.

11. (a) Pol mo Banabas tufala i rao, be olsem wanem tufala i soemaot we tufala i tru Kristin? (b) ?Yumi lanem wanem long store blong tufala?

¹¹ ?Be olsem wanem long trabol ya blong Pol wetem Banabas? Fasin blong lav i winim trabol ya tu. From we afta, taem Pol i raetem leta i go long kongregesen blong Korin, nao i tokbaot we hem mo Banabas i stap hadwok tugeta. (1 Korin 9:​5, 6) Fastaem ating Pol i gat gudfala risen blong i no wantem Mak i kam long trep blong hem. Be afta, taem Mak i kam bigman finis long wok blong Kraes, Pol i raet long Timote, i se: “Yu go tekem Mak i kam wetem yu, from we hem i save givhan long mi long ol wok.” (2 Timote 4:11) Sipos bambae yumi gat trabol wetem samfala brata, eksampel ya i save halpem yumi blong winim trabol ya.

12. (a) ?Blong wanem yumi save ting se Yuodia mo Sintike tufala i stretem trabol blong tufala? (b) Olsem Galesia 5:​13-15 i talem, ?blong wanem i impoten blong ol Kristin oli stretem ol trabol blong olgeta long fasin blong lav?

¹² ?Be olsem wanem long Yuodia mo Sintike? ?Tufala i stretem trabol blong tufala? ?Tufala i letem lav i kavremap ol sin we tufala i mekem agens long tufala? Baebol i no talem wanem i hapen long tufala. Be from we tufala i gudfala woman we bifo i wok wetem Pol long ol Kristin wok blong hem, ating tingting blong tufala i stap daon, nao tufala i harem tok blong Pol. Taem tufala i kasem leta blong Pol, ating tufala i go luk tufala blong stretem trabol blong tufala long fasin blong lav.​—Galesia 5:​13-15.

13. ?Wanem eksampel ya blong God Jeova blong soemaot lav?

¹³ Maet i gat wan man, no samfala man long kongregesen, we i trabol lelebet wetem yu. Maet oli no naf yet long prapa Kristin fasin, be tingbaot hemia: ?God Jeova i stap wet gogo ol man oli sakem ol rabis fasin blong olgeta, nao afta nomo i save lavem olgeta? No gat. Baebol i talem se: “Be God i soemaot lav blong hem long yumi, from we Kraes i ded blong sevem yumi taem yumi sinman yet.” (Rom 5:8) Yumi mas folem eksampel ya blong God, nao yumi mas soemaot lav long olgeta ya we oli stap mekem nogud.​—Efesas 5:​1, 2; 1 Jon 4:​9-11; Sam 103:10.

14. ?Wanem advaes ya blong Jisas we i soemaot se yumi no mas jajem ol narafala man?

¹⁴ Yumi evriwan i gat sin, nao taswe Jisas i tijim we yumi no mas jajem ol narafala man. I tru we ol narafala man oli gat fol, be yumi tu i gat. Jisas i askem, i se: “?Olsem wanem yu stap lukluk pis wud ya we i smol nomo, we i stap long ae blong brata blong yu, be yu no save luk bigfala timba ya we i stap long ae blong yu?” (Matyu 7:​1-5, NTB) Hemia i gudfala advaes ya, nao i save halpem yumi blong bambae yumi save wok gud wetem ol brata mo sista blong yumi.

15. (a) ?Blong wanem i impoten blong yumi fogivim brata no sista we yumi faenem poen agens long hem? (b) ?Long parabol blong Jisas long Matyu japta 18, olsem wanem hem i tijim yumi blong fogivim ol narafala man?

¹⁵ Yumi mas gat sore, mo yumi mas fogiv. I tru we samtaem yu save faenem poen agens long wan brata no sista. Be yumi mas tingbaot advaes blong Baebol, we i talem se: “Yufala i no mas kros long yufala, mo taem wan long yufala i faenem poen agens long narawan long yufala, be oltaem nomo tufala ya i mas fofogivim tufala.” ?Be blong wanem yu mas fogivim ol narafala man taem oli stap mekem i no stret long yu? From we “Jeova i fogivim [yu].” (Kolosi 3:13) Jisas i talem se sipos yumi wantem we God i fogivim yumi, yumi mas fogivim ol narafala man. (Matyu 6:​9-12, 14, 15) Olsem king ya blong parabol blong Jisas, Jeova i fogivim yumi plante taosen taem finis. ?Ale, weswe yumi no save fogivim ol brata blong yumi blong samtaem nomo?​—Matyu 18:​21-35; Proveb 19:11.

16. (a) ?1 Jon 4:​20, 21 i soemaot we lav blong God, mo lav long ol narafala Kristin, tufala i mas laenap olsem wanem? (b) ?Sipos wan brata i faenem wan poen agens long yu, yu mas mekem wanem?

¹⁶ Yumi no stap folem fasin blong trutok sipos long semtaem yumi no soemaot lav long ol brata no sista blong yumi, mo yumi no wantem fogivim olgeta. (1 Jon 4:​20, 21; 3:​14-16) Olsemia nao, sipos samtaem yu gat trabol wetem wan narafala Kristin, i nogud we yu no moa toktok wetem hem. I nogud yu no moa laekem hem, be yu mas stretem trabol ya long fasin blong lav. Sipos fasin blong yu i mekem we brata blong yu i harem nogud, yu mas rere blong talem sore long hem, mo blong askem we hem bambae i fogivim yu.​—Matyu 5:​23, 24.

17. ?Sipos man i mekem i no stret long yu, wanem nao i gud blong mekem?

¹⁷ ?Be olsem wanem sipos samfala i mekem we tingting blong yu i harem i soa, no i mekem i no stret long yu? Baebol i ansa, i se: “Yu no mas talem se: ‘Olsem we hem i mekem long mi, mi bambae mi mekem sem mak long hem bakegen.’ ” (Proveb 24:29; Rom 12:​17, 18) Advaes blong Jisas Kraes i talem se: “Sipos wan man i slavem fes blong yu long raet saed, yu mas givim narafala saed long hem tu.” (Matyu 5:39) Fasin blong slavem fes olsem i no blong man i karem kil, be i blong mekem we tingting blong hem i harem i soa, no blong mekem man i faerap. Olsemia nao, Jisas i tijim ol man blong hem blong oli no mas letem wan faet, no wan rao, i pulum olgeta. Sipos “man i mekem i nogud long [yu], no i tok nogud long [yu], be yu no mas givimbak long hem bakegen,” yu mas “lukaot fasin we i kwaet, mo [yu] mas traehad blong kasem.”​—1 Pita 3:​9, 11; Rom 12:14.

18. ?From we God i stap lavem olgeta man, eksampel ya blong hem i lanem yumi long wanem?

¹⁸ Yumi lanem finis we yumi mas “lavem evriwan long kampani ya blong ol brata.” (1 Pita 2:17) God Jeova hem i eksampel blong folem. Hem i stap mekem i sem mak nomo long olgeta man. Long ae blong hem, olgeta laen blong man oli sem mak nomo. (Wok 10:​34, 35; 17:26) Long “bigfala trabol tumas” ya we bambae i kam, God bambae i stap lukaot long olgeta ya we “oli kamaot long olgeta laen, mo long olgeta hafples, mo long olgeta kala, mo long olgeta lanwis.” (Revelesen 7:​9, 14-17) Yumi mas folem eksampel ya blong God. Olsem, yumi no mas lavem lelebet nomo olgeta ya we oli kam long defren laen, no long narafala kantri, no sipos oli haeman no oli man nating nomo, no sipos kala blong skin blong olgeta i narakaen.

19. (a) ?Yumi mas mekem olsem wanem long ol Kristin long kongregesen? (b) ?Wanem samting ya blong tangkyu tumas from?

¹⁹ I gud blong yumi savegud olgeta we oli stap long Kristin kongregesen. Samting ya i mekem we bambae yu yu lavem olgeta ya, mo we bambae yu yu glad tumas long olgeta. Yu mas tok gud long olgeta we oli olfala, olsem we oli stret papa no mama blong yu. Mo yu mas tok long ol yangfala olsem we oli stret brata no sista blong yu. (1 Timote 5:​1, 2) Sipos yumi haf blong famle ya we God i gat long wol, we ol memba blong hem oli stap wok tugeta long fasin blong lav, hemia nao wan samting blong tangkyu tumas from. !Bambae i gud tumas blong kasem itenel laef long paradaes long wol, wetem wan famle we i gat lav olsem!​—1 Korin 13:​4-8.

[Tok blong pija long pej 233]

?Trabol ya blong Yuodia mo Sintike i save lanem wanem long yumi?

[Tok blong pija long pej 235]

?Rao ya blong Pol wetem Banabas, i min se tufala i no memba blong ogenaesesen blong God?

[Tok blong pija long pej 236]

Ol tru Kristin oli letem lav i kavremap ol poen, we oli faenem

[Tok blong pija long pej 237]

Long ogenaesesen blong God, ol Kristin oli wok gud tugeta from fasin blong lav