Japta 14
Ol Faswan Disaepol Blong Jisas
JISAS i stap 40 dei finis long drae ples. Nao hem i kambak bakegen long Jon. Jon ya i bin mekem baptaes long Jisas. Jon i luk we Jisas i stap wokbaot i kam, ale hem i poenem Jisas, nao hem i talem long ol man we oli stap storeyan wetem hem se: “!Olgeta! Man ya, hem i olsem smol sipsip blong God, we hem bambae i tekemaot sin blong olgeta man long wol. Hemia man ya we mi stap tokbaot bifo, we mi talem se ‘Mi mi kam fastaem, be wan i stap kam biaen long mi we hem i hae moa long mi, from we hem i stap taem mi mi no bon yet.’ ” Nating we Jon i bon fastaem long kasen-brata blong hem Jisas, be hem i save se Jisas i stap fastaem long hem. Fastaem Jisas i stap laef olsem wan speret man long heven.
Be sam wik bifo, taem Jisas i kam long Jon blong tekem baptaes, i luk olsem we Jon i no rili save sipos Jisas i Mesaea, no no gat. Jon i talem se: “Taem mi mi kam, mi no save we hemia man ya, be mi kam, mi stap mekem baptaes long wora, blong mi save soemaot man ya long ol man Isrel.”
Nao Jon i gohed blong eksplenem long ol man we oli stap lesin long hem wanem i bin hapen taem hem i baptaesem Jisas, i se: “God i sanem mi blong mi mekem baptaes long wora, mo taem mi mi kam, mi no save we hemia man ya. Be God i talemaot long mi, se ‘Bambae yu save luk Tabu Speret i kamdaon, i stap long wan man. Man ya bambae i mekem baptaes long Tabu Speret.’ Nao biaen, mi luk we Tabu Speret i aot long heven, i kamdaon long man ya, olsem wan sotleg we i kamdaon, i sidaon long hem. Oraet, mi mi luk samting ya, mo mi mi wetnes blong hem. Man ya, hem i Pikinini blong God.”
Long nekis dei, Jon i stap stanap wetem tu disaepol blong hem. Nao bakegen Jisas i wokbaot i kam. Jon i luk Jisas, nao hem i talem se: “!Olgeta! Man ya, hem i olsem smol sipsip blong God.” Nao tufala disaepol ya blong Jon Baptaes i harem tok ya, ale tufala i biaen long Jisas. Wan blong tufala ya, nem blong hem Andru. Narawan ya, i klia se hemia man we i raetemdaon ol samting ya. Nem blong hem tu i Jon. I luk olsem we Jon ya i kasen-brata blong Jisas tu, mo i pikinini blong sista blong Meri, we nem blong hem Salome.
Jisas i luk raon, i luk we Andru mo Jon tufala i stap kam biaen long hem, nao hem i talem se: “?Yutufala i lukaot wanem?”
Tufala i talem se: “?Rabae, yu yu stap long weples?”
Jisas i ansa, i se: “Yutufala i kam luk.”
Hemia i samting olsem fo kilok long aftenun, nao Andru mo Jon tufala i stap wetem Jisas, gogo i tudak. Andru i hapi tumas, taswe biaen hem i hareap blong go faenem brata blong hem, nem blong hem Pita. Nao hem i talem long Pita se: “E, mifala i faenem Mesaea.” Nao hem i tekem Pita i kam long Jisas. Ating long semtaem Jon i faenem brata blong hem, Jemes, mo hem i tekem hem i kam long Jisas tu. Be stret long fasin blong hem, taem Jon i raetemdaon Gospel blong hem, hem i no talemaot samting ya we hem wan i mekem.
Long nekis dei, Jisas i faenem Filip. Hem i man Betsaeda. Hemia ples blong Andru mo Pita tu. Nao hem i talem long Filip se: “Yu kam, yu biaen long mi, yu man blong mi.”
Nao Filip i go faenem Nataniel, we narafala nem blong hem se Batolomiu. Nao hem i talem long hem se: “Mifala i faenem man ya we Moses i bin raetem ol tok blong talem hem bifo, long buk blong Loa. Ol profet bifo tu oli bin raetem tok blong talem hem. Hem i wan man Nasaret, i pikinini blong Josef, nem blong hem Jisas.” Be tingting blong Nataniel i hafhaf. Hem i talem se: “?Wanem? ?Yu ting se gudfala samting i save kamaot long Nasaret?”
Filip i ansa, i se: “Ale, yu kam traem luk.” Taem tufala i stap wokbaot i go long Jisas, Jisas i luk Nataniel, nao hem i talem se: “Olgeta, hemia wan prapa man Isrel ya. Hem i no save gyaman.”
Nataniel i askem long Jisas se: “?Yu yu save mi olsem wanem?”
Jisas i ansa long hem i se: “Mi mi luk yu finis, taem we yu stap aninit long tri ya we oli kolem figtri, taem we Filip i no go singaot yu yet.”
Nataniel i sapraes tumas. Hem i talem se: “Rabae [we i minim Tija], yu yu Pikinini blong God. Yu yu King blong ol man Isrel.” (NW)
Jisas i askem long hem, i se: “?Yu yu bilif from we mi talem se ‘Mi mi luk yu finis, taem we yu stap aninit long figtri ya’? Bambae yu yu save luk ol samting we oli strong moa long hemia.” Nao hem i promes long olgeta se: “Tru mi talem long yufala, bambae yufala i save luk we skae i open, mo ol enjel blong God oli stap go antap long heven, oli stap kamdaon long mi, mi Pikinini blong Man.”
I no longtaem, Jisas wetem ol nyufala disaepol blong hem, oli aot long ples blong Jodan Reva, oli wokbaot i go long Galili. Jon 1:29-51.
▪ ?Hu ya ol faswan disaepol blong Jisas?
▪ ?Hu ya i faenem Pita blong talemaot Jisas long hem? ?Mo ating hu ya i faenem Jemes?
▪ ?Wanem i pruvum long Nataniel se Jisas i Pikinini blong God?