Japta 7
Samting We God i Mekem Blong Sevem Ol Man
1, 2. (a) ?Wanem samting i mekem wan soldia blong Rom i luksave Pikinini blong God? (b) ?From wanem Jeova i letem Jisas blong i ded?
KOLOSAP 2,000 yia bifo, long wan aftenun we i hot lelebet, wan kapten blong ami blong Rom i wajem tri man we oli harem i soa tumas, mo sloslou oli ded. Soldia ya i lukluk moa long wan long trifala ya, hemia Jisas Kraes. Oli bin nilim Jisas long wan wud. Samting ya i kamaot long medel dei. Tudak i kavremap ples ya, taem stret menet we Jisas i ded long hem, i kam kolosap. Taem hem i ded, graon i seksek bigwan, mo soldia ya i singaot se: “Tru ya, man ya i Pikinini blong God.”—Mak 15:39.
2 !Pikinini blong God! Yes, soldia ya i talem tru. Samting we hem i luk, i moa impoten bitim ol narafala samting we oli bin hapen long wol samtaem. Bifo long taem ya, wanwan taem, God hem wan i bin singaot Jisas se, Pikinini blong Hem we hem i laekem tumas. (Matyu 3:17; 17:5) ?From wanem Jeova i letem Pikinini blong hem blong i ded? From we, hemia nao rod blong God blong sevem ol man long sin mo ded.
GOD I JUSUM HEM BLONG MEKEM WAN SPESEL WOK
3. ?From wanem i stret we God i jusum Pikinini blong Hem, wan nomo we Hem i gat, blong mekem wan spesel wok long saed blong ol man?
3 Olsem yumi tokbaot finis long buk ya, Jisas i laef bifo we hem i kam long wol. Baebol i kolem hem ‘wan Pikinini nomo’ we God i gat, from we Jeova hem wan i wokem hem. Biaen, God i yusum Jisas blong wokem olgeta narafala samting. (Jon 3:18; Kolosi 1:16) Jisas i laekem tumas ol man long wol ya. (Proveb 8:30, 31) !Taswe yumi no sapraes we Jeova i jusum Pikinini ya blong hem, wan nomo we hem i gat, blong mekem wan spesel wok, taem ol man oli kasem panis ya ded!
4, 5. ?Bifo we Jisas i kam long wol, Baebol i talem wanem long saed blong Laen blong Mesaea?
4 Taem God i talemaot panis blong Adam, Iv, mo Setan long garen blong Iden, hem i tokbaot wan “laen,” hemia wan Man blong Sevem ol man long fyuja. Laen ya bambae i kam blong stretem ol bigfala trabol we Devel Setan, “snek ya blong bifo,” i bin mekem. !Yes, Laen ya we God i bin talemaot, bambae i smasem Setan mo olgeta we oli folem hem!—Jenesis 3:15; 1 Jon 3:8; Revelesen 12:9.
5 Long ol handred yia biaen, sloslou God i givim moa save long saed blong Laen ya, we hem i sem mak long Mesaea. Olsem bokis long pej 37 i soem, ol profet tok oli talem plante samting long saed blong laef blong hem long wol. Wan eksampel: Hem i mas stanap strong taem ol man oli kilim hem mo mekem hem i harem soa long bodi blong hem. Hem i mas kasem trabol ya, blong mekem wok blong hem folem stampa tingting blong God.—Aesea 53:3-5.
FROM WANEM MESAEA I MAS DED
6. ?Daniel 9:24-26 i talem se bambae Mesaea i mekem wanem, mo olsem wanem?
6 Profet tok long Daniel 9:24-26 i talem se Mesaea, no Hemia we God i Jusumaot, bambae i mekem wan bigfala wok. Bambae hem i kam long wol ya “blong finisim ol fasin we oli brekem loa, mo blong tekemaot sin, mo blong kavremap rong, mo blong putum stret fasin i stap” foreva. Mesaea bambae i tekemaot panis blong ded long ol man we oli obei long hem. ?Be olsem wanem bambae i mekem samting ya? Profet tok ya i talem se bambae oli ‘katemdaon’ Mesaea ya, hemia i min se oli kilim hem i ded.
7. ?From wanem ol man Jyu oli kilim anamol olsem sakrifaes, mo ol anamol oli pija blong wanem samting?
7 Ol man Isrel bifo, oli savegud long fasin ya blong givim presen blong kasem fogif from sin. Folem Loa we God i givim long olgeta tru long Moses, oltaem oli kilim anamol olsem sakrifaes blong mekem wosip long God. Ol sakrifaes ya, oli mekem ol man Isrel oli tingbaot se ol man oli nidim wan samting blong fogivim no kavremap sin blong olgeta. Aposol Pol i eksplenem rul ya olsemia: “Sipos i no gat blad blong anamol i ron, bambae God i no save tekemaot ol sin blong ol man.” (Hibrus 9:22) Ol Kristin oli no moa folem Loa blong Moses wetem ol rul blong hem, olsem rul blong mekem sakrifaes. (Rom 10:4; Kolosi 2:16, 17) Oli save tu se ol anamol we oli kilim olsem sakrifaes oli no save fogivim ol sin fulwan, mo blong olwe. Ol anamol ya, oli olsem pija nomo blong wan sakrifaes we i moa gud, hemia sakrifaes blong Mesaea, no Kraes. (Hibrus 10:4, 10; skelem wetem Galesia 3:24.) Be, maet yu askem se, ‘?I rili gat nid blong Mesaea i ded?’
8, 9. ?Wanem ol gudfala samting we Adam mo Iv tufala i lusum, mo tufala i pasem wanem i go long ol pikinini blong tufala?
8 Yes, Mesaea i mas ded blong sevem ol man. Blong save from wanem i olsem, yumi tingtingbak long samting we i hapen long garen blong Iden. Mo yumi traem blong kasem save long bigfala samting we Adam mo Iv tufala i lusum, taem tufala i no moa obei long God. !Tufala i gat jans blong kasem laef we i no save finis! Mo tu, from we tufala i pikinini blong God, tufala i save toktok wetem God stret. Be taem tufala ya i no moa wantem se Jeova i rul long tufala, tufala i lusum olgeta samting ya. Mo tufala i mekem se sin mo ded i kasem olgeta laen blong man.—Rom 5:12.
9 I sem mak sipos faswan papa mama blong yumi tufala i bin westem bigfala mane, ale tufala i mekem wan bigfala kaon we tufala i no save pem. Adam mo Iv tufala i pasem kaon ya i go long olgeta pikinini blong tufala. Taem yumi bon, yumi no stretgud olgeta we yumi no gat sin. Taswe, yumi evriwan i sinman, mo yumi kasem ded. Taem yumi kasem sik, no yumi talem sam toktok blong spolem narafala we yumi wantem tumas blong tekembak biaen, samting ya i kamaot from kaon ya we tufala i givim long yumi, hemia sin. (Rom 7:21-25) Wan hop nomo we yumi gat, i blong kasem bakegen samting we Adam i lusum. Be, yumi no save kasem laef we i stretgud olgeta from wok we yumi mekem, olsem we hem i pei blong yumi. From we olgeta man we oli no stretgud olgeta oli mekem sin samtaem, pei blong yumi evriwan i ded nomo, i no laef.—Rom 6:23.
10. ?I nidim wanem blong pembak samting we Adam i lusum?
10 ?Be, i gat samting we i save pemaot laef ya we Adam i lusum? Blong folem ol rul blong God long saed blong stret fasin, i mas gat samting we i sem mak, olsem wan laef i pemaot narafala laef. (Eksodas 21:23) Taswe wan man i mas ded blong pemaot laef ya we tufala i lusum. Laef blong wan man olsem yumi, i no naf. Long saed blong ol sinman, Ol Sam 49:7, 8 i talem se: “I no gat wan man i save pemaot laef blong hem blong bambae i no go long beregraon. Man i no save pem laef blong hem long God, blong bambae i stap laef olwe, from we praes blong laef blong man i bigfala tumas, olgeta samting we man i save givim, neva bambae i naf blong samting ya.” ?Samting ya i min se i no gat rod nating? I no minim olsem.
11. (a) ?Tok ya “ransom,” i minim wanem long lanwis Hibru? (b) ?Hu nomo i save pemaot ol man, mo from wanem?
11 Long lanwis Hibru, tok ya “ransom” i minim mane we man i pem blong mekem wan slef i kam fri. Mo tu, tok ya i karem mining blong samting we i sem mak. Wan man we i stretgud olgeta, laef blong hem nomo i sem mak long samting we Adam i lusum. Biaen long Adam, i gat wan man nomo we i stretgud olgeta, i bon long wol ya, hemia Jisas Kraes. Taswe Baebol i talem se Jisas i olsem “las Adam ya.” Mo i talem klia se hem i ‘givim hem wan olsem wan ransom, we i stret blong pemaot olgeta man.’ (1 Korin 15:45; 1 Timote 2:5, 6) !Adam i pasem ded i go long ol pikinini blong hem, be Jisas i givim laef we i no save finis! Fas Korin 15:22 i eksplenem se: “Olsem we olgeta man we oli joen long Adam oli save ded, ale, long sem fasin, olgeta man we oli joen long Kraes oli save laef bakegen long ded.” Taswe i stret nomo we Baebol i kolem Jisas se “Papa blong Olwe.”—Aesea 9:6, 7.
OLSEM WANEM HEM I PEM RANSOM
12. ?Long wanem taem Jisas i kam Mesaea, mo biaen, hem i mekem wanem long laef blong hem?
12 Kolosap long koltaem long 29 K.T., Jisas i go luk wan famle blong hem, Jon, blong tekem baptaes. Ale, Jisas i givim hem wan blong mekem ol samting we God i wantem. Long taem ya, Jeova i makemaot Jisas wetem tabu speret. Olsem nao, Jisas i kam Mesaea, no Kraes, hemia we God i jusumaot. (Matyu 3:16, 17) Nao Jisas i statem wok blong hem blong prij, blong tri yia mo haf. Hem i wokbaot long olgeta ples long kantri blong hem. Hem i talemaot Kingdom blong God, mo hem i hivimap ol man we oli bilif long hem blong oli folem hem. Be i no longtaem, samfala oli agensem hem, olsem profet tok i bin talem.—Ol Sam 118:22; Ol Wok 4:8-11.
13. ?Wanem ol samting we oli kamaot jes bifo we Jisas i ded, olsem wan man blong holemtaet bilif blong hem?
13 Jisas i no fraet blong talemaot ol gyaman fasin blong ol lida blong skul, ale oli wantem kilim hem i ded. Biaen, oli mekem wan rabis plan. Insaed long plan ya, oli pulum wan fren blong Jisas blong putum Jisas long han blong ol enemi, oli holem hem blong nating nomo, oli jajem hem long fasin we i no folem loa, mo oli sakem gyaman tok ya se Jisas i agensem gavman. Oli kilim Jisas, oli spet long hem, jikim hem, mo wipim hem wetem wan wip we i blong terem ol mit blong bodi. Biaen, hedgavman blong Rom, Ponjes Paelet, i talemaot panis blong hem, se hem i mas ded long wan pos. Ale, oli nilim hem long wan wud mo oli stanemap wud ya. Evri taem Jisas i traem blong pulum win, hem i harem nogud bitim mak, mo i tekem sam haoa blong hem i ded. Long olgeta trabol ya, Jisas i holemstrong long God, long fasin we i stretgud olgeta.
14. ?From wanem God i letem Pikinini blong hem blong i harem nogud tumas mo i ded?
14 Olsem nao, long Naesan 14, 33 K.T., Jisas i givim laef blong hem, “blong pem rod blong olgeta man oli gofri.” (Mak 10:45; 1 Timote 2:5, 6) Jeova we i stap long heven, i stap lukluk gudfala Pikinini blong hem, taem hem i harem nogud tumas mo taem hem i ded. ?From wanem God i letem samting ya we i nogud olgeta i hapen? Hem i mekem olsem from we hem i laekem tumas ol man. Jisas i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Mo tu, ded blong Jisas i tijim yumi se stret fasin blong Jeova God i stret olgeta. (Dutronome 32:4) Maet samfala oli ting se God i mas lego stret loa ya se ‘laef i mas pemaot laef,’ mo fogetem we i nidim wan stret man blong stretem sin blong Adam. Be Jeova i no mekem olsem, from we oltaem hem i folem ol prapa loa blong hem mo hem i leftemap olgeta, nating se long rod ya hem i no mekem i isi long hem wan.
15. ?From we i no stret fasin blong letem Jisas i stap ded blong olwe, ale Jeova i mekem wanem?
15 Mo tu, stret fasin blong Jeova i mekem se ded blong Jisas i gat wan hapi risal. ?Sipos Jeova i rili gat stret fasin, hem i save letem Jisas we i stap tru long Hem, i stap ded foreva? !No gat! Profet tok long Hibru haf blong Baebol, i talem se man ya we i stap tru long God, i no save stap oltaem long beregraon. (Ol Sam 16:10; Ol Wok 13:35) Hem i ded blong kolosap tri dei, mo biaen Jeova God i mekem hem i laef bakegen, olsem wan speret man we i gat bigfala paoa.—1 Pita 3:18.
16. ?Jisas i mekem wanem taem i gobak long heven?
16 Taem Jisas i ded, hem i lego laef blong hem olsem wan man, blong olwe. Taem hem i laef bakegen blong go long heven, hem i kam wan speret man we i givim laef long ol man. Antap moa, taem Jisas i go antap long ples ya we i moa tabu bitim ol narafala ples long heven mo wol, hem i joen wetem gudfala Papa blong hem bakegen. Mo tu, hem i givim praes blong laef blong hem olsem wan man we i stretgud olgeta, i go stret long God. (Hibrus 9:23-28) Biaen, praes blong gudfala laef ya, i save pemaot ol man we oli obei long God. ?Samting ya i mekem wanem long yu?
RANSOM BLONG KRAES MO YU
17. ?Olsem wanem yumi save kasem fasin fogif we i stanap long ransom sakrifaes blong Kraes?
17 Traem tingbaot tri rod, we ransom sakrifaes blong Kraes i givhan long yu, naoia tu. Fastaem, hem i rod blong kasem fogif from ol sin. From bilif long blad blong Jisas we i ron, yumi “friman finis,” yes, “hem i fogivim yumi finis from ol sin blong yumi.” (Efesas 1:7) Taswe, yumi save askem God blong fogivim yumi long nem blong Jisas, sipos yumi mekem wan bigfala sin tu. Sipos yumi rili tanem tingting blong yumi, Jeova i save yusum praes blong ransom sakrifaes blong Pikinini blong hem. God i save fogivim yumi. Hem i save givim blesing ya long yumi, we tingting blong yumi i no moa jajem yumi from samting we yumi bin mekem. Hem i no givim panis blong ded long yumi, nating se panis ya i stret long sin we yumi bin mekem.—Ol Wok 3:19; 1 Pita 3:21.
18. ?Olsem wanem sakrifaes blong Jisas i givim hop long yumi?
18 Namba tu samting, ransom sakrifaes blong Kraes i stampa blong hop blong yumi long fyuja. Long wan drim, aposol Jon i luk ‘wan bigfala hif blong man, i no gat man i save kaontem olgeta,’ we bambae oli laef tru long bigfala trabol long en blong rabis fasin blong wol ya, we i stap kam. ?From wanem olgeta ya bambae oli stap laef be plante narafala God i kilim olgeta i ded? Wan enjel i talem long Jon se, bigfala hif blong man ya, oli “wasem klos blong olgeta finis blong mekem oli waet long blad blong Smol Sipsip ya we i ded,” hemia Jisas Kraes. (Revelesen 7:9, 14) Sipos yumi gat strong bilif long blad blong Jisas Kraes we i ron, mo yumi laef folem ol loa blong God, bambae yumi save klin long ae blong God. Mo bambae yumi save gat jans blong kasem laef we i no save finis.
19. ?Olsem wanem sakrifaes blong Kraes i pruvum se hem mo Papa blong hem, tufala i laekem yu tumas?
19 Namba tri samting, ransom sakrifaes i givim nambawan pruf se Jeova i laekem yumi tumas. Ded blong Kraes i soemaot tu wok blong lav, we oli bigfala moa bitim ol narawan long histri blong heven mo wol: (1) Lav we God i gat blong sanem Pikinini blong hem blong ded from yumi; (2) Lav we Jisas i gat blong givim laef blong hem olsem wan ransom. (Jon 15:13; Rom 5:8) Sipos yumi rili gat strong bilif, lav ya i save kasem yumi evriwan. Aposol Pol i talem se: ‘Pikinini blong God i laekem mi tumas, nao i givim laef blong hem, i ded blong sevem mi.’—Galesia 2:20; Hibrus 2:9; 1 Jon 4:9, 10.
20. ?From wanem yumi mas soemaot bilif long ransom sakrifaes blong Jisas?
20 From samting ya, yumi mas soemaot bilif long ransom sakrifaes blong Jisas. Olsemia nao, yumi soem fasin tangkyu from lav ya we God mo Kraes i soem long yumi. Sipos yumi mekem olsem, samting ya i save lidim yumi blong kasem laef we i no save finis. (Jon 3:36) Be, nambawan risen blong Jisas i laef mo i ded long wol ya, i no blong sevem yumi. No gat. Faswan samting we hem i tingbaot, i wan kwestin we i moa impoten, we i joen wetem ful heven mo wol. Long japta we i kam biaen, bambae yumi luk we kwestin ya i impoten long yumi evriwan, from we hem i soem from wanem God i letem rabis fasin mo fasin we man i safa i stap longtaem tumas long wol ya.
JEKEM SAVE BLONG YU
?From wanem Jisas i mas ded blong sevem ol man?
?Olsem wanem hem i pem ransom?
?Olsem wanem yu yu kasem blesing from ransom?