Japta 15

Wokem Wan Famle We i Givim Ona Long God

1-3. ?From wanem samfala oli no save stretem ol problem long mared mo wetem ol pikinini, be from wanem Baebol i save givhan?

TRAEM tingbaot: Yu yu wantem wokem wan haos blong yu. Ale, yu pem wan graon. Wetem glad, yu mekem wan pija blong nyufala haos ya long tingting blong yu. ?Be olsem wanem sipos yu no gat ol tul, mo yu no save nating olsem wanem blong wokem wan haos? !Bambae ol fasin traehad blong yu oli blong nating nomo!

² Plante man mo woman taem oli mared, oli gat wan pija blong wan hapi famle i stap long tingting blong olgeta. Be oli no gat ol tul mo ol save we oli nidim blong wokem wan famle olsem. Smoltaem biaen long dei blong mared, ol nogud fasin oli kamaot. Evri dei, oli rao mo oli sakem ol tok kros. Taem oli gat pikinini, ol nyufala papa mo mama ya oli faenem se oli no save mekemgud wok blong ol papa mama, sem mak olsem oli no save mekemgud wok blong olgeta insaed long mared.

³ Be, i gud tumas we Baebol i save givhan. Ol rul blong hem oli olsem ol tul we yu save yusum blong wokem wan hapi famle. (Proveb 24:3) Naoia yumi luk olsem wanem blong mekem samting ya.

OL TUL BLONG WOKEM WAN HAPI MARED

4. ?From wanem i mas gat problem insaed long mared, mo wanem ol rul we Baebol i givim?

⁴ Nating se wan man mo woman we i mared, tufala i stret long tufala, be tufala i gat defren fasin long saed blong filing, laef blong tufala taem tufala i pikinini, mo famle blong tufala. From samting ya, tufala i mas gat sam problem afta we tufala i mared. ?Bambae tufala i mekem wanem blong winim ol problem ya? Taem ol man oli wokem wan haos, oli stap lukluk long plan blong hem. Ol plan ya oli olsem ol rul blong folem. Baebol i talem ol rul we God i givim, blong wokem wan hapi famle. Naoia yumi tokbaot sam long ol rul ya.

5. ?Olsem wanem Baebol i makem se i impoten blong gat fasin blong stap tru insaed long mared?

⁵ Fasin Blong Stap Tru. Jisas i talem se: “From we God i joenem tufala olsem, man i mas no brekemaot tufala bakegen.”a (Matyu 19:6) Aposol Pol i raetem se: ‘Mared i wan fasin we yufala evriwan i mas tinghae long hem. Bed blong mared i mas stap klin, from we God bambae i jajem boe mo gel we tufala i slip wan ples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.’ (Hibrus 13:4) Taswe, ol man mo woman we oli mared, oli mas harem se oli gat wan responsabiliti long fored blong Jeova blong stap tru long hasban no waef blong olgeta.—Jenesis 39:7-9.

6. ?Olsem wanem fasin blong stap tru i save mekem wan mared i stanap strong?

⁶ Fasin blong stap tru i mekem se tufala i gat respek long tufala, mo tufala i harem sef insaed long mared ya. Ol hasban mo waef we oli stap tru, oli save se hasban no waef blong olgeta bambae i givhan long olgeta, nomata wanem samting i hapen. (Eklesiastis 4:9-12) !Hemia i defren long olgeta we oli brekem mared blong olgeta taem wan smol problem nomo i kamaot! Ol man mo woman olsem, oli kwik blong talem se oli ‘jusum rong wan,’ mo se ‘oli no moa laekem hem.’ Oli ting se ansa long problem ya i blong tekem wan nyufala hasban no waef. Be fasin ya i spolem jans blong tufala ya blong kam bigman long ol filing blong tufala. Olgeta ya we oli no stap tru long hasban no waef blong olgeta, oli save karem sem problem i go long nyufala hasban no waef blong olgeta. Sipos wan man i gat wan gudfala haos be hem i faenem se ruf i lik, hem i traem blong fiksimap. Hem i no muf i go long narafala haos. Sem mak nao, taem wan man no woman i tekem wan nyufala hasban no waef, hemia i no rod blong stretem ol problem we oli stampa blong trabol insaed long mared. Taem ol problem oli kamaot, i no stret blong traem faenem rod blong ronwe long mared, be i stret blong wok had blong mekem mared ya i stanap strong. Fasin blong stap tru olsem, i soem se yu tingbaot mared blong yu olsem wan samting we i sas, we yu mas lukaotgud long hem, mekem i stap strong, mo tinghae long hem.

7. ?From wanem i had samtaem blong ol hasban mo waef oli toktokgud tugeta, be olsem wanem fasin blong putum “nyufala laef” i save givhan?

⁷ Fasin Blong Toktok Tugeta. Wan proveb long Baebol i talem se: “Olgeta plan blong man oli save foldaon sipos oli no toktokgud tugeta fastaem.” (Proveb 15:22) Be, i no isi long samfala hasban mo waef blong toktokgud tugeta. ?From wanem? From we evriwan i gat defren fasin blong talemaot tingting mo filing blong hem. Hemia wan trutok we plante taem i mekem se tufala i no kasem save long tufala, mo tufala i harem nogud. Maet fasin we tufala i gruap long hem i wan risen blong samting ya. Wan eksampel, maet samfala oli gruap long wan famle we papa mo mama tufala i rao oltaem. Nao taem ol pikinini oli mared, maet oli no save olsem wanem blong toktok long hasban no waef blong olgeta long fasin we i kaen mo wetem lav. Nating se i olsem, haos blong yu i no nid blong kam olsem ‘wan haos we i fulap long rao.’ (Proveb 17:1) Baebol i talem klia se yumi mas wokem ‘nyufala fasin blong laef.’ Hemia i no agri wetem fasin kros, fasin blong singaot strong, mo fasin blong tok nogud long narafala.—Efesas 4:22-24, 31.

8. ?Wanem i save givhan taem yu no agri wetem hasban no waef blong yu?

⁸ ?Yu save mekem wanem taem yutufala i no agri long wan samting? Sipos fasin kros i kam antap, maet i gud we yu folem advaes blong Proveb 17:14 se: “I gud yu gowe bifo rao i kamaot.” Yes, maet yu save livim storeyan ya blong wan narafala taem, taem yutufala i no moa kros. (Eklesiastis 3:1, 7) Impoten samting se, traehad blong ‘rere oltaem blong lesin, no hareap blong tok, mo no hareap blong kros.’ (Jemes 1:19) Yu mas wantem blong stretem trabol ya, be i no blong winim rao. (Jenesis 13:8, 9) Jusum ol tok mo wan fasin blong toktok we bambae i mekem se yutufala i kam kwaet. (Proveb 12:18; 15:1, 4; 29:11) Samting we i impoten, yu no mas stap kros longtaem. Tugeta, yutufala i save toktok wetem God long prea we i kamaot long tingting we i stap daon, blong askem help blong hem.—Efesas 4:26, 27; 6:18.

9. ?From wanem yumi save talem se hat i stampa blong fasin blong toktok tugeta?

⁹ Wan proveb blong Baebol i talem se: “Hat blong waesman i mekem se maot blong hem i soemaot we hem i kasem save. Nao maot blong hem i gat paoa long tingting blong narafala man.” (Proveb 16:23) Taswe, trufala stampa blong fasin blong toktokgud tugeta, hemia hat, i no maot. ?Wanem tingting blong yu long hasban no waef blong yu? Baebol i pulum ol Kristin blong ‘gat sore long narafala.’ (1 Pita 3:8) ?Yu save sore long hasban no waef blong yu taem hem i harem nogud from i wari long wan samting? Sipos yes, samting ya bambae i givhan long yu blong save stret rod blong givim ansa.—Aesea 50:4.

10, 11. ?Olsem wanem hasban i save folem advaes blong 1 Pita 3:7?

¹⁰ Ona Mo Respek. Baebol i talem se ol Kristin hasban oli mas ‘tingtinggud long ol woman blong olgeta, long ol laef blong olgeta long mared. Oli mas ona long ol woman blong olgeta, from we oli no strong olsem ol man.’ (1 Pita 3:7) Blong givim ona, wan hasban i mas luksave ol gudfala fasin blong waef blong hem. Wan hasban we hem i ‘tingtinggud long woman blong hem,’ hem i tinghae long ol filing, ol gudfala fasin, mo ol save blong hem, mo long respek we woman i gat long hem wan. Mo tu, hem i mas wantem blong kasem tingting blong Jeova long saed blong ol woman, mo ol fasin we Hem i wantem se ol man oli mekem long ol woman.

¹¹ Long haos blong yu, maet yu gat wan plet we yu yusum oltaem, we hem i isi blong brekem. ?Yu yu stap lukaotgud long plet ya? Ating Pita i stap tingbaot samting olsem taem hem i yusum tok ya “oli no strong.” Mo samting ya i mas pusum ol Kristin hasban blong soem kaengud fasin long waef blong olgeta we oli laekem tumas.

12. ?Olsem wanem waef i save soem se hem i gat bigfala respek long hasban blong hem?

¹² ?Be Baebol i givim wanem advaes long ol waef? Pol i raetem se: ‘Woman i mas gat bigfala respek long man blong hem.’ (Efesas 5:33) Wan waef i mas harem se hasban blong hem i tinghae long hem mo i laekem hem tumas. Sem mak, wan hasban i mas harem se waef blong hem i gat respek long hem. Wan waef we i gat respek, bambae i tingbaot filing blong hasban blong hem. Bambae hem i no talemaot ol slak fasin blong hasban blong hem, nating se hasban i wan Kristin no no gat. Bambae hem i no tok agens long hasban blong hem mo daonem hem taem tufala i stap tufala nomo, no long fored blong ol narafala man. Fasin ya i save spolem respek we hasban blong hem i gat long hem wan.—1 Timote 3:11; 5:13.

13. ?Olsem wanem blong talemaot ol tingting long kwaet fasin?

¹³ Samting ya i no min se wan waef i no save talemaot tingting blong hem. Sipos i gat wan samting we hem i no agri long hem, hem i save talem wetem respek. (Jenesis 21:9-12) Fasin blong talemaot tingting blong hem long hasban blong hem i olsem fasin blong sakem wan bol. Hem i save sakem slou we i mekem se hasban blong hem i save kasem isi nomo, no hem i save sakem strong tumas we i givim kil long hasban blong hem. !I moagud we tufala evriwan i no yusum ol tok we i spolem narawan, be we tufala i toktok long fasin we i kaen mo i gud!—Matyu 7:12; Kolosi 4:6; 1 Pita 3:3, 4.

14. ?Yu mas mekem wanem, sipos hasban no waef blong yu i no wantem folem ol rul blong Baebol insaed long mared?

¹⁴ Olsem yumi luk finis, ol rul blong Baebol oli save halpem yu blong wokem wan hapi mared. ?Be olsem wanem sipos hasban no waef blong yu i no intres long ol tok blong Baebol? Yu save kasem plante gudfala frut yet, sipos yu folem ol save blong God long wok blong yu insaed long famle. Pita i raetem se: “Yufala woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man ya blong yufala oli luk we fasin blong yufala i klin gud, mo i blong ona nomo, hemia i naf blong pulum olgeta.” (1 Pita 3:1, 2) Mo samting ya i tru tu long wan hasban we waef blong hem i no intres long Baebol. Nating se hasban no waef blong yu i jusum wanem rod, ol rul blong Baebol oli save mekem yu yu kam moagud, olsem wan hasban no waef. Save blong God i save mekem se yu kamgud moa, olsem wan papa no mama tu.

TRENEM OL PIKININI FOLEM SAVE BLONG GOD

15. ?Olsem wanem ol rong fasin blong trenem pikinini i save pas i go long ol pikinini tu, be olsem wanem blong jenisim samting ya?

¹⁵ Ating yu gat wan so no hama. Be samting ya nomo i no save mekem we yu gat gudhan blong wokem ol haos. Sem mak nao, maet yu gat pikinini, be samting ya nomo i no save mekem we yu gat gudhan long wok blong papa no mama. Nating se ol papa mama oli save no oli no save, be plante taem oli stap trenem ol pikinini blong olgeta long sem fasin olsem papa mama blong olgeta oli bin trenem olgeta bifo. Taswe, samtaem ol rong fasin blong trenem ol pikinini oli pas i go long ol pikinini we oli kam biaen. Wan olfala Hibru proveb i talem se: “Ol papa oli kakae frut we i no raep, be maot blong ol pikinini blong olgeta i kam konkon from.” Baebol i soem se wan man i no nidim blong folem rod we papa mama blong hem i folem. Hem i save jusum narafala rod, wan rod we i laenap wetem ol loa blong Jeova.—Esikel 18:2, 14, 17.

16. ?From wanem i impoten blong givim ol samting we famle blong yu i nidim, mo wanem i stap insaed long wok ya?

¹⁶ Jeova i wantem se ol Kristin papa mama oli lidimgud mo lukaotgud long ol pikinini blong olgeta. Pol i raetem se: “Man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timote 5:8) !Hemia ol strong tok ya! Fasin blong mekemgud wok blong yu blong givim ol samting we famle blong yu i nidim, we i minim lukaot long ol pikinini blong yu long saed blong bodi, speret mo filing, hemia wan blesing mo wan responsabiliti we ol man blong God oli gat. Baebol i givim ol rul we oli save halpem ol papa mama blong wokem wan hapi laef blong ol pikinini blong olgeta. Tingbaot sam long olgeta ya.

17. ?I nidim wanem blong mekem se ol pikinini blong yu oli save gat loa blong God i stap long hat blong olgeta?

¹⁷ Soem wan gudfala eksampel. Ol papa mama long Isrel bifo oli kasem oda ya: ‘Yufala i mas tijim ol pikinini blong yufala long [ol tok blong God], mo yufala i mas tokbaot samting ya taem yufala i sidaon long haos, taem yufala i wokbaot long rod, taem yufala i slip, mo taem yufala i girap.’ Ol papa mama oli mas tijim ol pikinini blong olgeta long ol rul blong God. Be tok we i kam fastaem long ol advaes ya i talem se: “Ol tok ya we mi mi stap talem long yufala tede, oli mas stap long hat blong yufala.” (Dutronome 6:6, 7) Yes, ol papa mama oli no save tijim samting we oli no save long hem. Fastaem, ol loa blong God oli mas stap strong long hat blong yufala wanwan, sipos yufala i wantem raetem olgeta long hat blong ol pikinini blong yufala.—Proveb 20:7; skelem wetem Luk 6:40.

18. ?Long saed blong fasin blong soem lav, olsem wanem Jeova i givim nambawan eksampel long ol papa mama?

¹⁸ Mekem olgeta oli sua long lav blong yu. Long baptaes blong Jisas, Jeova i talem se: “Yu yu Pikinini blong mi we mi laekem yu tumas. Tingting blong mi i haremgud tumas long yu.” (Luk 3:22) Olsem nao, Jeova i soem se hem i agri long Pikinini blong hem, i talemaot klia se hem i glad long hem, mo i mekem hem i sua long lav blong Hem. Biaen, Jisas i talem long Papa blong hem se: “Yu laekem mi tumas, bifo olgeta, taem we wol i no stap yet.” (Jon 17:24) Taswe, yufala ol papa mama we yufala i man blong God, soem long ol toktok mo fasin blong yufala se yufala i laekem ol pikinini blong yufala—mo mekem samting ya oltaem. Rimemba, ‘lav i stap mekem man i go antap.’—1 Korin 8:1.

19, 20. ?Wanem i joen wetem fasin blong stretem ol pikinini we i karem frut, mo olsem wanem eksampel blong Jeova i save givhan long ol papa mama?

¹⁹ Fasin stretem. Baebol i makem se i impoten blong stretem ol pikinini long lav. (Proveb 1:8) Ol papa mama we oli sakem responsabiliti blong lidim ol pikinini blong olgeta naoia, bambae oli sua blong kasem frut we oli harem nogud long hem long fyuja. Be, ol papa mama oli kasem woning tu blong no bitim mak long fasin blong stretem. Pol i raetem se: ‘Yufala ol papa, bambae yufala i no agensem ol pikinini blong yufala oltaem. From we sipos yufala i stap mekem olsem, bambae tingting blong olgeta i foldaon.’ (Kolosi 3:21) Ol papa mama oli no mas bitim mak long fasin blong stretem ol pikinini blong olgeta. Mo oli no mas toktok oltaem long saed blong ol rong blong olgeta, mo daonem ol wok blong olgeta.

²⁰ Jeova God, Papa blong yumi long heven, i soemaot rod long saed blong fasin blong stretem. Hem i neva strong tumas long fasin blong hem blong stretem. God i talem long ol man blong hem se: “Bambae mi mas givim panis long yu kasem stret mak blong hem.” (Jeremaea 46:28) Ol papa mama oli mas folem fasin blong Jeova long saed ya. Fasin blong stretem we i strong tumas mo we i bitim mak ya blong stretem mo tijim pikinini, hem i rili fasin blong agensem pikinini.

21. ?Olsem wanem ol papa mama oli save luksave sipos fasin stretem blong olgeta i stap karem frut?

²¹ ?Olsem wanem ol papa mama oli save luksave sipos fasin stretem blong olgeta i stap karem gudfala frut? Oli save ansarem kwestin ya, ‘?Fasin stretem we mi givim, i mekem wanem long pikinini blong mi?’ Hem i mas tijim pikinini. Pikinini blong yu i mas kasem save from wanem yu yu stap stretem hem. Mo tu, ol papa mama oli mas tingbaot wanem bambae i kamaot biaen we oli stretem pikinini blong olgeta. I tru, kolosap olgeta pikinini, fastaem oli harem nogud taem oli kasem fasin stretem. (Hibrus 12:11) Be fasin blong stretem pikinini i neva mas mekem hem i fraet, no i harem se yu lego hem, mo i no mas givim tingting long hem se hem i nogud olgeta. Bifo we Jeova i stretem ol man blong hem, hem i talem se: “Yufala i no fraet, . . . from we mi mi stap wetem yufala.” (Jeremaea 46:28) Yes, yu mas stretem pikinini blong yu long fasin we hem i harem se yu stap kolosap long hem, olsem wan papa no mama we i laekem hem tumas, mo we i stap givhan long hem.

KASEM WAES WE I “LIDIMGUD YU”

22, 23. ?Olsem wanem yu save kasem waes we yu nidim, blong lidimgud yu blong wokem wan hapi famle?

²² Yumi save glad se Jeova i givim ol tul we yumi nidim blong wokem wan hapi famle. Be i no naf blong gat ol tul ya nomo. Yumi mas lanem blong yusum olgeta long fasin we i stret. Wan eksampel, wan man blong wokem haos i save kam les blong yusumgud ol tul blong hem. Maet hem i yusum sam tul long fasin we i no stret nating. Long ol taem olsem, ating risal blong wok blong hem, i wan haos we i no strong tumas. Sem mak, maet naoia yu luksave sam nogud fasin we sloslou oli bin kam insaed long famle blong yu. Maet sam fasin oli stap longtaem finis mo i had blong jenisim olgeta. Be, yu mas folem advaes ya blong Baebol se: “Wan waes man bambae i lesin mo kasem moa tijing, mo wan man we i gat dip save, hem nao i kasem waes we i lidimgud hem.”—Proveb 1:5.

²³ Yu save kasem waes we i lidimgud yu, taem yu gohed blong kasem save ya blong God. Yu mas kwik blong luksave ol rul blong Baebol we oli stret long famle laef, mo jenisim ol fasin we yu nidim blong jenisim. Luklukgud fasin blong ol Kristin we oli bigman long saed blong speret, we oli givim wan gudfala eksampel, olsem ol hasban mo waef mo ol papa mama. Toktok wetem olgeta. Antap long ol samting ya, prea mo talemaot ol wari blong yu long Jeova. (Ol Sam 55:22; Filipae 4:6, 7) Hem i save halpem yu blong gat wan hapi famle we i givim ona long hem.

[Futnot]

JEKEM SAVE BLONG YU

?Olsem wanem fasin blong stap tru, toktokgud tugeta, soem ona mo respek, oli givhan blong mekem wan hapi mared?

?Olsem wanem ol papa mama oli save mekem ol pikinini oli sua long lav blong olgeta?

?Wanem ol samting we i joen wetem fasin blong stretem we i karem gudfala frut?