Japta 16

?Olsem Wanem Yu Save Kam Kolosap Long God?

1. ?Wanem ol samting we oli sem mak long plante skul?

WAN turis we i go long wan kantri long Orien, hem i sapraes long ol kastom blong skul we hem i luk long wan tempel blong Budis. I no gat wan pija blong Meri mo Kraes. Be plante long ol narafala kastom blong wosip, oli kolosap sem mak long ol kastom blong jyos blong hem long kantri blong hem. Olsem nao, hem i luk we oli prea wetem ol bidbid, mo oli talemaot ol prea bakegen mo bakegen long fasin we i olsem singsing. Plante narafala man tu oli bin luksave ol samting ya. Long Is mo long Wes saed blong wol, ol fasin blong wosip we ol man oli yusum blong traem kam kolosap long God no long samting we oli stap wosip long hem, oli kolosap sem mak.

2. ?Olsem wanem wan buk i eksplenem prea, mo plante man oli prea from wanem risen?

² Bighaf blong ol man oli yusum prea, blong traem kam kolosap long God. Wan buk i eksplenem prea olsem se, “wan fasin blong man blong toktok wetem samting we i tabu no hae—olsem God, plante god, ples we i afsaed long wol blong yumi, no ol paoa we oli hae moa long man.” (The New Encyclopædia Britannica) Be, samfala, taem oli toktok wetem God long prea, oli tingting nomo long wanem we oli save kasem from. Wan eksampel: Wan man i askem long wan Wetnes blong Jeova se: “?Sipos yu prea blong mi, ol trabol we mi mi gat long famle, long wok, mo long saed blong sik, bambae oli finis?” Ating man ya i ting se bambae oli finis. Be plante man we oli prea, oli faenem se ol trabol blong olgeta oli gohed nomo. Taswe, maet yumi askem se, ‘?From wanem nao yumi mas kam kolosap long God?’

?FROM WANEM YUMI MAS KAM KOLOSAP LONG GOD?

3. ?Ol prea blong yumi oli mas go long hu, mo from wanem?

³ Prea i no jes wan kastom we i no gat mining. Mo tu, hem i no jes wan rod blong kasem wan samting. Wan bigfala risen blong prea long God, i blong gat wan gudfala fasin fren wetem hem. Taswe, ol prea blong yumi oli mas go long Jeova God nomo. Deved i talem long Sam ya blong hem se: ‘Oltaem Jeova i stap kolosap long olgeta we oli stap singaot i go long hem.’ (Ol Sam 145:18) Jeova i singaot yumi blong fren wetem hem mo blong gat pis wetem hem. (Aesea 1:18) Olgeta we oli wantem mekem samting ya, oli agri long man we i raetem Sam ya: ‘Taem we mi mi kam, mi stap kolosap long God, hemia i gud tumas long mi.’ ?From wanem? From we olgeta we oli kam kolosap long Jeova God, bambae oli kasem trufala glad mo tingting we i kwaet.—Ol Sam 73:28.

4, 5. (a) ?From wanem i impoten blong prea long God? (b) ?Wanem kaen fasin fren we yumi save wokem wetem God tru long prea?

⁴ ?From wanem yumi mas prea long God blong halpem yumi, sipos hem i ‘save finis ol samting we yumi sot long hem, taem we yumi no askem ol samting ya long hem yet’? (Matyu 6:8; Ol Sam 139:4) Prea i soem se yumi gat bilif long God, mo yumi luk hem olsem Stampa blong “evri samting we oli gud mo evri presen we oli nambawan.” (Jemes 1:17; Hibrus 11:6) Jeova i haremgud tumas long ol prea blong yumi. (Proveb 15:8) Hem i glad blong harem ol toktok we i gat mining, we yumi talem blong soem tangkyu long hem mo blong presem hem. Hem i olsem wan papa, we i glad tumas blong harem ol toktok blong talem tangkyu we i kamaot long hat blong smol pikinini blong hem. (Ol Sam 119:108) Taem papa mo pikinini tufala i frengud, tufala i save toktok tugeta long nambawan fasin. Wan pikinini we papa blong hem i laekem hem tumas, hem i wantem toktok wetem papa blong hem. Sem samting i tru long saed blong fasin fren blong yumi wetem God. Sipos yumi rili gat tangkyu from ol samting we yumi stap lanem long saed blong Jeova, mo lav we hem i bin soem long yumi, bambae yumi wantem tumas blong toktok wetem hem long prea.—1 Jon 4:16-18.

⁵ Taem yumi prea long God we i Hae Olgeta, yumi mas soem respek. Be yumi no nidim blong wari tumas long ol wanwan tok we yumi yusum. (Hibrus 4:16) Yumi save toktok wetem Jeova enitaem. !Hem i wan bigfala blesing we yumi save ‘talemaot olgeta samting we oli stap long hat blong yumi’ long God, tru long prea! (Ol Sam 62:8) Fasin tangkyu we yumi gat long Jeova, bambae i lidim yumi blong frengud wetem hem, olsem man blong bilif, Ebraham, we i kam wan fren blong God. (Jemes 2:23) Be taem yumi prea long Masta King blong heven mo wol, yumi mas folem ol rul we hem i putumap long saed blong fasin blong toktok wetem hem.

OL RUL BLONG FOLEM BLONG KAM KOLOSAP LONG GOD

6, 7. God i no askem yumi blong pem hem blong lesin long ol prea, ?be hem i wantem se yumi mas gat wanem fasin taem yumi prea?

⁶ ?Yumi nidim mane blong prea long God? Plante man oli pem ol lida blong skul blong prea from olgeta. Samfala oli bilif tu se fasin blong God blong harem ol prea blong olgeta i dipen long hamas mane oli givim. Be, Tok blong God i no talem se yumi mas givim mane blong prea long Jeova. Ol samting we hem i givim long yumi long saed blong speret mo ol blesing we oli kamaot from fasin blong fren wetem hem long prea, yumi save kasem we yumi no pem nating.—Aesea 55:1, 2.

⁷ Oraet, ?be yumi mas gat wanem fasin? Yumi nidim wan hat we i stret. (2 Kronikel 6:29, 30; Proveb 15:11) Long hat blong yumi, yumi mas bilif strong long Jeova God olsem ‘Man we i Harem prea,’ mo Man we i “stap mekem i gud long olgeta we oli stap traem faenem hem.” (Ol Sam 65:2; Hibrus 11:6) Mo tu, yumi mas gat fasin daon long hat blong yumi. (2 King 22:19; Ol Sam 51:17) Long wan pijatok blong Jisas Kraes, hem i soem se taem wan man blong tekem mane blong takis i prea long God wetem wan hat we i gat fasin daon long hem, hem i moa stret long ae blong God bitim wan man Farisi we i gat flas tingting. (Luk 18:10-14) Taem yumi prea long God, yumi mas tingbaot se “eni man we hat blong hem i flas tumas, hem i wan samting we Jeova i no laekem nating.”—Proveb 16:5.

8. ?Sipos yumi wantem se God i ansa long prea blong yumi, yumi mas kam klin from wanem samting?

⁸ Sipos yumi wantem se God i ansa long ol prea blong yumi, yumi mas kam klin from ol nogud fasin. Taem disaepol Jemes i pulum ol narafala blong kam kolosap long God, hem i talem tu se: “Yufala man nogud, yufala i mas wasem han blong yufala. Yufala we i gat tu tingting, yufala i mas mekem tingting blong yufala i klin.” (Jemes 4:8) Ol man nogud oli save kasem pis wetem Jeova, sipos oli tanem tingting blong olgeta from ol nogud fasin, mo lego fasin blong laef we oli stap long hem bifo. (Proveb 28:13) Jeova i no save lesin long yumi, sipos yumi gyaman nomo se yumi kam klin long ol nogud wok. Tok blong God i talem se: ‘Jeova, oltaem hem i stap lukaotgud long ol stret man, oltaem hem i stap lesin long ol prea blong olgeta, be hem i stap tanem baksaed blong hem long olgeta we oli stap mekem i nogud.’—1 Pita 3:12.

9. ?Yumi mas prea long Jeova tru long hu, mo from wanem?

⁹ Baebol i talem se: “I no gat wan stret man long wol we i stap gohed blong mekem ol gudfala samting mo i no mekem sin.” (Eklesiastis 7:20) Taswe, maet yu askem se: ‘?From samting ya, olsem wanem yumi save prea long Jeova God?’ Baebol i givim ansa se: “Sipos wan long yumi i mekem sin, i gat Jisas Kraes i stap, we fasin blong hem i stretgud, mo hem i man blong stanap long saed blong yumi blong tok from yumi long Papa blong yumi.” (1 Jon 2:1) Yumi sinman, be tru long Jisas Kraes, we hem i ded olsem wan ransom blong yumi, yumi save toktok wetem God long evri samting. (Matyu 20:28) Jisas nomo i rod we yumi mas prea tru long hem blong toktok wetem Jeova God. (Jon 14:6) Yumi no mas ting se praes blong ransom sakrifaes blong Jisas bambae i kavremap sin blong yumi, sipos yumi gohed blong mekem samting we yumi save se i no stret. (Hibrus 10:26) Be, sipos samtaem yumi mestem, taem yumi stap traehad blong no mekem ol nogud fasin, yumi save tanem tingting blong yumi, mo askem God blong fogivim yumi. Taem yumi prea long hem wetem wan hat we i gat fasin daon long hem, bambae hem i harem yumi.—Luk 11:4.

OL JANS BLONG TOKTOK WETEM GOD

10. ?Long saed blong prea, olsem wanem yumi save folem eksampel blong Jisas, mo wanem sam taem we yumi save prea yumi wanwan?

¹⁰ Jisas Kraes i tinghae tumas long fasin fren blong hem wetem Jeova. Taswe, oltaem Jisas i makemaot taem blong toktok wetem God long prea. (Mak 1:35; Luk 22:40-46) I gud we yumi tu, yumi folem eksampel blong Jisas mo prea long God oltaem. (Rom 12:12) I stret blong prea long stat blong evri dei. Mo bifo we yumi slip long naet, i stret we yumi talem tangkyu long Jeova from ol samting we i kamaot long dei ya. Tru long dei, mekem sua se yu prea long God “oltaem nomo.” (Efesas 6:18) Yumi save prea long hat blong yumi we yumi no yusum voes tu. Yumi save se Jeova i save harem yumi. Taem yumi wanwan i toktok wetem God, samting ya i halpem yumi blong mekem fasin fren blong yumi wetem hem i kam strong. Mo fasin blong prea long Jeova evri dei, i givhan long yumi blong kam kolosap moa long hem.

11. (a) ?From wanem ol famle oli mas prea tugeta? (b) ?Taem yu talem “Amen” long en blong prea, hemia i minim wanem?

¹¹ Jeova i stap lesin tu long prea we wan man i mekem blong wan grup. (1 King 8:22-53) Yumi save kam kolosap long God olsem wan famle, mo hed blong famle i save lidim famle long prea. Samting ya i mekem se famle i kam kolosap moa. Mo Jeova i save kam wan trufala man long tingting blong ol pikinini, taem oli harem we papa mama i prea long God wetem tingting daon. ?Olsem wanem nao, taem wan man i prea blong wan grup, maet long wan miting blong ol Wetnes blong Jeova? Sipos yumi stap long miting ya, yumi mas lesingud. Nao long en blong prea, wetem ful hat blong yumi, yumi save talem “Amen” we i minim se, “I tru.”—1 Korin 14:16.

OL PREA WE JEOVA I HAREM

12. (a) ?From wanem God i no ansa long sam prea? (b) ?From wanem yumi no mas tokbaot ol prapa nid blong yumi nomo long prea?

¹² Maet samfala oli ting se God i no stap ansa long prea blong olgeta, nating se oli prea long hem tru long Kraes. Aposol Jon i talem se: “Sipos yumi askem samting long [God] we i stret long tingting blong hem, hem bambae i harem prea blong yumi.” (1 Jon 5:14) Taswe, yumi mas askem samting we i stret long wil blong God. Hem i wantem se yumi haremgud long saed blong speret. Taswe taem yumi prea, i stret blong tokbaot eni samting we i gat paoa long yumi long saed blong speret. Yumi no mas letem fasin ya blong tokbaot ol nid blong yumi long saed blong bodi nomo, i pulum yumi. Eksampel: I stret blong prea from waes mo strong tingting taem yumi sik. Be ol wari long saed blong helt, oli no mas winim ol samting long saed blong speret. (Ol Sam 41:1-3) Wan Kristin woman i luksave se hem i wari tumas long saed blong helt blong hem. Ale hem i askem Jeova blong givhan long hem blong gat stret tingting long saed blong sik blong hem. From samting ya, ol trabol long saed blong helt blong hem i kam wan smol wari nomo. Mo hem i harem se hem i kasem ‘paoa ya we i bigfala tumas i blong God, i no blong hem.’ (2 Korin 4:7) Tingting ya we hem i wantem givhan long ol narafala long saed blong speret i kam strong moa, ale hem i joen long wok blong talemaot Kingdom fultaem.

13. Folem Matyu 6:9-13, ?wanem sam samting we yumi save tokbaot long ol prea blong yumi?

¹³ ?Yumi save tokbaot wanem long ol prea blong yumi, blong mekem se Jeova i glad blong lesin long olgeta? Jisas Kraes i tijim ol disaepol blong hem long stret rod blong prea. Long prea ya we i olsem wan eksampel, we i stap long Matyu 6:9-13, hem i soemaot ol samting we i stret blong yumi prea from. ?Wanem samting we yumi mas tingbaot fastaem long ol prea blong yumi? Nem mo Kingdom blong Jeova God i mas kam fastaem. I stret tu blong askem God blong givim ol samting we yumi nidim long saed blong bodi. I impoten tu blong askem fogif from ol sin blong yumi, mo blong askem God blong sevem yumi long ol traem mo long han blong rabis man ya, Devel Setan. Jisas i no wantem we yumi talem prea ya olsem wan singsing, no we yumi talem bakegen mo bakegen baehat, we yumi no tingting long mining blong hem. (Matyu 6:7) ?Bambae i gat wanem kaen fasin fren bitwin papa mo pikinini, sipos pikinini i talem sem toktok evritaem long papa blong hem?

14. Antap long fasin blong askem ol samting, ?wanem kaen prea bakegen we yumi mas mekem?

¹⁴ Antap long ol prea blong askem samting long God, mo ol prea blong askem strong we oli rili kamaot long hat, yumi mas prea blong presem God mo blong talem tangkyu long hem. (Ol Sam 34:1; 92:1; 1 Tesalonaeka 5:18) Yumi save prea from ol narafala tu. Taem yumi prea from ol brata mo sista blong yumi long saed blong speret, we oli kasem trabol no we ol man oli kilim mo ronem olgeta, yumi soem se yumi intres long olgeta. Mo Jeova i glad blong lesin, taem yumi soemaot we yumi tingbaot olgeta. (Luk 22:32; Jon 17:20; 1 Tesalonaeka 5:25) Yes, aposol Pol i raetem se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.”—Filipae 4:6, 7.

GOHED BLONG PREA OLTAEM

15. ?Yumi mas tingbaot wanem sipos i luk olsem se God i no stap ansa long prea blong yumi?

¹⁵ Nating se yu stap kasem save long saed blong God, maet yu harem se samtaem God i no ansa long prea blong yu. Maet samting ya i hapen, from we i no stret taem blong God blong ansa long wan spesel samting we yu askem long prea. (Eklesiastis 3:1-9) Maet Jeova i letem wan samting i gohed blong sam taem. Be, i tru se hem i stap ansa long prea, mo hem i save beswan taem blong mekem olsem.—2 Korin 12:7-9.

16. ?From wanem yumi mas gohed oltaem blong prea, mo olsem wanem samting ya i save gat paoa long fasin fren blong yumi wetem God?

¹⁶ Taem yumi gohed blong prea oltaem, fasin ya i soemaot se long hat blong yumi, yumi rili intres long samting we yumi stap talem long God. (Luk 18:1-8) Eksampel, maet yumi askem Jeova blong givhan long yumi blong winim wan slak fasin. Taem yumi gohed blong prea mo mekem ol samting we oli laenap wetem prea blong yumi, yumi stap soemaot se yumi rili tru long hat blong yumi. Yumi mas toktok klia mo tru, taem yumi askem ol samting long God. I impoten tumas blong mekem dip prea taem yumi kasem wan traem. (Matyu 6:13) Sipos yumi gohed blong prea taem yumi stap traem blong winim ol nogud fasin we oli stap pulum yumi, bambae yumi luksave olsem wanem Jeova i stap givhan long yumi. Samting ya bambae i mekem bilif mo fasin fren blong yumi wetem Jeova i kam strong moa.—1 Korin 10:13; Filipae 4:13.

17. ?Olsem wanem yumi save kasem gudfala frut from fasin blong dipen long prea taem yumi mekem wok blong God?

¹⁷ I gud blong wokem wan fasin blong prea oltaem long tingting blong yumi, taem yumi stap mekem tabu wok blong Jeova God. Olsem nao, bambae yumi luksave se yumi no stap mekem wok blong hem long prapa paoa blong yumi nomo. Jeova nao i givim paoa blong mekem ol wok blong hem. (1 Korin 4:7) Fasin blong luksave samting ya, bambae i givhan long yumi blong gat tingting daon, mo bambae i mekem fasin fren blong yumi wetem hem i dip moa. (1 Pita 5:5, 6) Yes, yumi gat gudfala risen blong gohed blong prea oltaem. Ol dip prea blong yumi, wetem impoten save olsem wanem blong kam kolosap long Papa blong yumi long heven we i gat lav, bambae i mekem laef blong yumi i rili hapi.

TOKTOK WETEM JEOVA I NO GAT WAN SAED BLONG HEM NOMO

18. ?Olsem wanem yumi save lesin long God?

¹⁸ Sipos yumi wantem se God i harem ol prea blong yumi, yumi mas lesin long ol samting we hem i talem. (Sekaraea 7:13) Hem i no moa yusum ol profet blong talemaot ol mesej blong hem. Mo hem i no stap yusum ol speret man blong mekem olsem. (Dutronome 18:10-12) Be yumi save lesin long God taem yumi stadi long Tok blong hem, Baebol. (Rom 15:4; 2 Timote 3:16, 17) Long saed blong prapa kakae, maet yumi mas lanem blong laekem ol kakae we oli gud long bodi blong yumi. Olsem nao, yumi kasem advaes blong wokem wan fasin we ‘yumi wantem tumas melek ya we i klin gud, we i blong tingting blong yumi.’ Ridim Tok blong God evri dei, blong wokem wan fasin we yumi laekem tumas ol kakae long saed blong speret.—1 Pita 2:2, 3; Ol Wok 17:11.

19. ?Olsem wanem fasin blong tingting dip long ol samting we yu ridim long Baebol i save givhan long yu?

¹⁹ Tingting dip long ol samting we yu ridim long Baebol. (Ol Sam 1:1-3; 77:11, 12) Hemia i min se yu mas skelem ol save ya. Fasin ya i olsem fasin blong bel blong tantanem ol kakae. Yu save tantanem ol kakae long saed blong speret, taem yu joenem ol samting we yu stap ridim wetem ol samting we yu save finis. Tingbaot olsem wanem ol save ya i joen wetem laef blong yu, mo olsem wanem hem i soemaot ol fasin mo wok blong Jeova. Olsem nao, tru long prapa stadi blong yu, yu save tekem kakae long saed blong speret we Jeova i stap givim. Samting ya bambae i pulum yu blong kam kolosap moa long God, mo bambae i givhan long yu blong winim ol problem we oli kamaot evri dei.

20. ?Olsem wanem fasin blong go long ol Kristin miting i save halpem yumi blong kam kolosap long God?

²⁰ Yu save kam kolosap long God tu, taem yu lesin long ol storeyan long saed blong Tok blong Hem long ol Kristin miting. Hemia i olsem ol man Isrel, we oli lesingud taem oli hivap blong harem Loa blong God we oli ridim long pablik ples. Ol tija long Isrel bifo, oli putum mining insaed long ol tok we oli ridim long Loa. Olsem nao, oli halpem ol man we oli stap lesin, blong kasem save mo blong wantem mekem ol samting we oli harem. Samting ya i mekem bigfala glad i kamaot. (Nehemaea 8:8, 12) Ale, go long ol miting blong ol Wetnes blong Jeova, olsem we i wan kastom blong yu. (Hibrus 10:24, 25) Fasin ya bambae i halpem yu blong kasem ol save blong God mo mekem i wok long laef blong yu, mo bambae i givim glad long yu. Taem yu joen long famle blong ol Kristin brata long ful wol, bambae samting ya i givhan long yu blong stap kolosap long Jeova oltaem. Mo yu save faenem trufala fasin blong stap sefgud long medel blong ol man blong God, olsem we bambae yumi luk.

JEKEM SAVE BLONG YU

?From wanem yu mas kam kolosap long Jeova?

?Wanem sam rul we yu mas folem blong kam kolosap long God?

?Wanem ol samting we yu save tokbaot long ol prea blong yu?

?From wanem yu mas gohed oltaem blong prea?

?Olsem wanem yu save lesin long Jeova tede?