?From Wanem Yumi Ded?
“Naoia, i no moa gat noes antap long ol hil. Kolosap yu no save harem wan smol win nating we i mufmuvum lif blong ol tri. Ol pijin oli stap slip long ol tri. Yu wet, i no longtaem, bambae yu yu spel olsem olgeta ya.”—JOHANN WOLFGANG VON GOETHE, MAN JEMANI WE I RAETEM OL NAESFALA VAS.
1, 2. (a) ?God i wokem ol man blong oli wantem wanem? (b) ?Faswan man mo woman i gat wanem kaen laef?
GOD i wokem ol man blong oli wantem tumas blong stap laef gogo i no save finis. Yes, Baebol i talem se hem i putum “wan filing long hat blong olgeta, se oli wantem laef gogo i no save finis.” (Eklesiastis 3:11, Beck) Be God i no jes mekem we ol man oli wantem stap laef blong olwe. Hem i givim jans long olgeta tu blong kasem laef olsem.
2 God i wokem faswan papa mama blong yumi, Adam mo Iv, wetem tingting mo bodi we i stretgud olgeta. (Dutronome 32:4) !Tingbaot—tufala i no soa olbaot long bodi, tufala i no fraet mo wari! Mo tu, God i putum tufala i stap long wan naesfala paradaes. God i gat tingting se ol man bambae oli laef gogo i no save finis, mo se, bambae oli fulumap wol wetem ol pikinini we oli stretgud olgeta. (Jenesis 1:31; 2:15) Taswe, ?from wanem ded i kasem yumi?
Ded i Kamaot From Fasin Blong No Obei
3. ?Blong laef gogo i no save finis, Adam mo Iv i mas mekem wanem?
3 God i talem long Adam se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:16, 17) Taswe, Adam mo Iv i mas mekem wan samting, sipos tufala i wantem stap laef gogo i no save finis. Tufala i mas obei long God.
4. Taem Adam mo Iv i sin, ?from wanem tufala i lusum jans blong laef gogo i no save finis long Paradaes?
4 Sore tumas, Adam mo Iv i brekem loa blong God. (Jenesis 3:1-6) Ale, tufala i kam sinman, from we “mining blong tok ya sin, hemia nao, we man i brekem loa.” (1 Jon 3:4) Nao, Adam mo Iv i no moa gat jans blong laef gogo i no save finis. ?From wanem? From we “pei we ol man bambae oli kasem, from we oli stap mekem sin, hemia we bambae oli ded.” (Rom 6:23) Taswe, taem God i talemaot panis long Adam mo Iv, hem i se: “Mi mi wokem yu long graon fastaem, mo bambae yu yu kam graon bakegen.” Nao hem i sakem faswan papa mama ya blong yumi oli aot long Paradaes. Long sem dei we tufala i sin, bodi blong tufala i stat kam nogud, ale, sloslou tufala i ded.—Jenesis 3:19, 23, 24.
“Ol Man Oli Stap Ded”
5. ?Long wanem rod ded i kasem olgeta man?
5 Afta long samting ya, sin i stap long blad blong Adam mo Iv. Taswe, tufala i no save gat ol pikinini we oli stretgud olgeta. I sem mak sipos yumi traem kukum bred long wan sospen we i no flatgud. Evri bred we yumi kukum, bambae oli no flatgud tu. (Job 14:4) Tru ya, evri pikinini we i bon i soem klia se, faswan papa mama blong yumi tufala i no moa gat bodi we i stretgud olgeta mo laef we i no save finis, mo tufala i mekem se ol pikinini blong tufala oli no gat samting ya tu. Kristin aposol Pol i raetem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”—Rom 5:12; skelem wetem Ol Sam 51:5.
6. ?From wanem ded i stap kasem yumi?
6 Ol man blong sayens tede oli no save from wanem yumi kam olfala mo yumi ded. Be, Baebol i talem se yumi ded from we yumi bon wetem sin we yumi kasem long faswan papa mama blong yumi. Be, ?wanem bambae i hapen long yumi taem yumi ded?