Kam Gud Moa Long Fasin Blong Storian
?YU YU luk se i isi blong storian wetem ol man, no nogat? Plante man oli wari bigwan taem oli tingbaot se bambae oli mas storian wetem narafala, antap moa taem oli no save hem. Ol man olsem oli ol man blong sem. Ating oli stap tingting se: ‘?Bambae mi tokbaot wanem? ?Bambae mi talem wanem blong statem storian ya? ?Bambae mi mekem wanem blong storian i save gohed?’ Sam narafala man we oli no sem oli laekem blong toktok, mo maet olgeta nao oli lidim ol storian. Maet i had blong olgeta oli traem pulum narafala blong toktok, mo blong oli lanem blong lesin long wanem we narafala i talem. Taswe, yumi evriwan, nomata we yumi stap sem no yumi no fraet blong toktok, yumi mas lanem fasin blong storian we i stret.
Yu Save Stat Long Haos
Sipos yu wantem kam gud moa long fasin blong storian, yu save stat long haos nomo. Ol storian we oli leftemap tingting blong narafala oli save karem glad i kam long famle.
Stamba samting we yumi mas mekem blong yumi save storian olsem, se yumi mas tingbaot ol narafala. (Dut. 6:6, 7; Prov. 4:1-4) Sipos yumi tingbaot ol narafala, bambae yumi storian wetem olgeta, mo bambae yumi lesin taem oli wantem talem wan samting. Be wan narafala impoten samting tu, se yumi mas save ol gudfala samting blong tokbaot. Sipos yumi wanwan i stap folem wan program blong ridim Baebol mo blong mekem prapa stadi blong yumi, bambae yumi gat plante samting blong serem wetem narafala. Sipos yumi yusum gud smol buk ya Ridimgud Ol Tok Blong Baebol Evri Dei, bambae yumi save gat ol gudfala storian. Maet i gat wan gudfala samting i hapen long wok blong prij. Maet yu bin ridim wan samting we i tijim yu, no wan fani stori. Yu save serem samting ya taem famle i joen wanples. Fasin ya bambae i givhan long yu blong yu save storian tu wetem ol man afsaed long famle.
Yu Storian Wetem Man We Yu No Save Hem
Plante man oli fraet lelebet blong storian wetem wan man we oli no save hem. Be from we ol Witnes blong Jehova oli lavem God mo oli lavem ol man raonabaot long olgeta, oli traehad blong lanem blong storian long ol trutok blong Baebol wetem ol man. ?Wanem i save givhan long yu blong yu kam gud moa long saed ya?
Tingting blong God we i stap long Filipae 2:4 i save givhan bigwan. Vas ya i pulum yumi blong yumi ‘givgivhan long yumi long laef blong yumi. I nogud wan man i stap lukaot long laef blong hem nomo.’ Yu traem tingbaot samting ya: Taem yu jes mitim wan man, hem i luk yu olsem wan strenja. ?Yu save mekem wanem blong hem i no fraet? Taem yu talem halo long hem, yu mas smael mo soemaot se yu glad blong storian wetem hem. Be i gat sam narafala samting tu blong tingbaot.
Maet man ya i stap tingting long wan samting. Nao sipos yu traem pulum hem blong i tokbaot samting we i stap long tingting blong yu be yu no kea long wanem we i stap long tingting blong hem, bambae hem i no wantem storian wetem yu. ?Jisas i mekem wanem taem hem i mitim wan woman Sameria klosap long wan wel? Tingting blong woman ya i stap long wok we hem i stap mekem blong pulum wota. Taswe, Jisas i tokbaot wota ya, mo sloslo hem i jenisim storian i go long trutok.—Jon 4:7-26.
Sipos yu lukluk gud long ol samting, maet yu tu yu luksave wanem samting i stap long tingting blong man. ?Yu luk se man ya i hapi no i sore? ?Hem i olfala, i handikap, no i sik? ?Yu luk se i gat pikinini long haos? ?I luk olsem se man ya i gat mane, no hem i stap traehad blong kasem ol samting blong laef? ?Ol samting blong flasem haos mo ol jen we hem i werem, oli soemaot se hem i strong long skul blong hem? Sipos yu tokbaot ol samting ya long fastok blong yu, maet man ya bambae i harem se yu yu laekem sem samting olsem hem.
Maet man blong haos i no openem doa, be hem i toktok long yu biaen long doa. ?Samting ya i soemaot wanem? Ating man ya i fraet blong openem doa long ol strenja. Maet yu save statem wan storian wetem hem long poen ya, nating se hem i stap biaen long doa.
Long sam kantri, yu save pulum ol man blong oli storian taem yu tokbaot yu wan fastaem. Maet yu talem se, yu yu blong weples, from wanem yu kam long haos blong olgeta, from wanem yu bilif long God, from wanem yu stat blong stadi Baebol, mo sam samting long Baebol we oli givhan long yu finis. (Wok 26:4-23) Be i tru se taem yu mekem olsem, yu mas waes gud, mo tu, bigfala tingting we yu wantem givim long olgeta i mas klia long tingting blong yu. Biaen, maet man blong haos i tokbaot hem wan mo i talemaot tingting blong hem.
Long sam kantri, kastom blong ol man i blong welkamem gud ol strenja. Maet oli singaot yu yu kam sidaon insaed long haos. Taem yu sidaon, i gud yu soemaot respek mo yu askem sipos evriwan long famle oli oraet, nao yu lesin gud long wanem we oli talem. Fasin ya i save mekem we man blong haos i glad blong harem wanem we yu yu wantem talem. Long sam narafala kantri, ol man oli wantem save moa yet, ale maet yu mas spenem moa taem blong tokbaot yu wan. Nao maet oli luk se oli gat sem tingting olsem yu long sam samting. Hemia i save lidim yufala blong storian gud long trutok.
Long ples blong yu, maet i gat plante man we oli toktok ol narafala lanwis. ?Yu save mekem wanem blong storian wetem olgeta? Sipos yu lanem sam smol tok blong talem halo long ol narafala lanwis ya, ol man ya bambae oli luksave se yu kea long olgeta. Maet hemia i openem rod blong yu yu save storian moa wetem olgeta.
?Yu Save Mekem Wanem Blong Storian i Gohed?
Blong mekem storian i gohed, yu mas wantem blong kasem save long tingting blong narafala. I gud yu pulum man blong i talemaot tingting blong hem, sipos yu luk se hem i wantem. Ol gudfala kwestin oli save givhan. Rod we i beswan, hemia blong askem long man blong i talemaot tingting blong hem long wan samting. Blong ansa long ol kwestin olsem, plante taem man i mas toktok moa i bitim we hem i talem nomo se ‘yes’ no ‘no.’ Taswe, afta we yu tokbaot wan trabol we i kasem ol man long ples blong yu, maet yu askem se: “?Yu ting se trabol ya i kamaot from wanem?” No maet yu askem se: “Long tingting blong yu, ?wanem nao rod blong winim trabol ya?”
Taem yu askem wan kwestin, yu mas lesin gud long ansa we man i givim. Blong soemaot se yu stap lesin long samting we hem i talem, yu save mekem saen wetem han blong yu, yu saksakem hed blong yu, no yu talem wan tok. Be yu no mas katem toktok blong hem. Yu no mas tingting nomo long samting we yu yu wantem talem, be yu mas tingbaot wanem we hem i stap talem. “Yufala evriwan i mas rere oltaem blong lesin, be yufala i no mas hareap blong toktok.” (Jem. 1:19) Ol tok we yu talem blong ansa long hem, i mas soemaot se yu stap lesin gud.
Yu mas luksave se i no evri man we bambae oli ansa long ol kwestin blong yu. Sam man, maet oli ansa nomo wetem ae blong olgeta no maet oli smael. Sam narafala, maet oli jes talem ‘yes’ no ‘nogat.’ Be yu no mas harem nogud. Yu mas gat longfala tingting. Yu no mas fosem man blong i storian. Sipos hem i glad blong lesin, yu tekem janis blong serem sam tingting blong Baebol wetem hem. Sloslo, maet man ya i tingbaot yu olsem wan fren. Nao maet hem i wantem talemaot ol tingting blong hem long yu.
Taem yu toktok wetem ol man, yu save openem rod blong visitim olgeta bakegen. Sipos wan man i askem plante kwestin, yu save ansa long sam long olgeta, be yu livim wan no tu i stap blong yu ansarem nekis taem. Yu save talem long man ya se bambae yu go lukaot moa save, mo nekis taem bambae yu serem ol save ya wetem hem. Sipos wan man i no askem kwestin, yu save finisim storian blong yu wetem wan kwestin we yu ting se maet i pulum tingting blong hem, nao yu talem long hem se bambae yu ansa long kwestin ya nekis taem. Yu save faenem fulap defren tingting long buk ya Reasoning From the Scriptures, wetem tufala smol buk ya Statem Wan Storian Long Baebol Mo Gohed Long Hem, mo ?Wanem Samting We God i Wantem Yumi Blong Mekem?, mo long ol Wajtaoa mo Wekap! we yumi kasem i no longtaem.
Yu Joen Wanples Wetem Ol Narafala Kristin
Taem yu mitim wan narafala Witnes blong Jehova, ?yu yu traehad blong save hem? ?No yu yu stap kwaet nomo? Sipos yumi lavem ol Kristin brata mo sista blong yumi, yumi mas wantem blong save olgeta. (Jon 13:35) ?Yu save mekem wanem blong statem wan storian wetem wan brata no sista? Maet i isi moa sipos yu talem nem blong yu fastaem mo yu askem nem blong hem. Yu save askem long hem se hem i kasem trutok olsem wanem. Kwestin ya i save statem wan gudfala storian mo i save givhan long yu blong yu save gud hem. Nating se fastaem toktok blong yu i fasfas lelebet, be taem yu traehad blong save narafala, yu soemaot se yu kea long hem, mo hemia nao samting we i impoten.
?Taem yu storian wetem wan fren long kongregesen, wanem i save givhan long yu blong yu storian gud wetem hem? Yu mas soemaot se yu kea long hem mo long famle blong hem. Sipos yu storian wetem hem afta long miting, yu save tokbaot sam gudfala tingting we oli kamaot long miting ya. Hemia i save givhan long yu mo long hem tu. Maet yu wantem tokbaot wan gudfala poen we yu ridim long Wajtaoa no Wekap! we i jes kamaot. Be i nogud yu tokbaot ol samting ya blong soem save blong yu nomo, no from we yu wantem traem hem. Yu tokbaot ol poen ya from we, taem yu ridim olgeta yu yu harem gud tumas long olgeta. Maet yutufala i save storian long wan tok we yu no hem i mas mekem long Tiokratik Skul, mo yu save talem sam tingting we yu gat long tok ya. Mo tu, yu save storian long sam samting we oli bin hapen long wok blong prij.
From we yumi wantem kasem save long ol man, plante taem yumi tokbaot ol samting we ol man oli talem no mekem. Maet yumi laekem tu blong talem ol fani stori. ?Olsem wanem? ?Ol storian olsem bambae oli mekem narafala i kam strong moa? Sipos yumi folem ol advaes long Tok blong God mo yumi letem lav i lidim yumi, ol storian blong yumi bambae oli mekem narafala i kam strong moa.—Prov. 16:27, 28; Efes. 4:25, 29; 5:3, 4; Jem. 1:26.
Bifo we yumi joen long wok blong prij, yumi mas rere gud. I gud yu rerem sam samting blong tokbaot wetem ol fren blong yu tu. Taem yu ridim no yu harem sam samting we oli pulum tingting blong yu, yu save makem olgeta blong serem wetem ol narafala. Sloslo, bambae yu luk we yu gat plante samting blong tokbaot. Bambae yu save tokbaot plante gudfala samting long ol storian blong yu. Bambae yu no tokbaot nomo ol smosmol samting long laef blong yumi evri dei. !Antap long olgeta samting ya, ol toktok blong yu bambae i soemaot se yu tinghae long Tok blong God!—Sam 139:17.