Talemaot Gud Nyus—Yumi Storeyan Wetem Ol Man
1 Wan diksonari i talem se fasin blong toktok i wan rod blong tu man i “talemaot long tufala ol filing blong tufala, ol samting we tufala i luk, mo tingting blong tufala.” ?Be olsem wanem yumi save toktok wetem ol man we oli no intres long jyos no oli bisi tumas? Jisas i wantem se ol man oli talemaot tingting blong ol, taswe hem i askem ol gudfala kwestin long olgeta.—Jon 4:9-15, 41, 42.
2 Yumi mas prea strong long God blong hem i halpem yumi blong faenem ol man we oli intres long trutok mo blong hem i mekem rod blong yumi toktok wetem ol man ya. Sipos yumi stap tingbaot ol man we yumi mitim long wok blong prij se olgeta tu oli save kam man blong Jeova, bambae i isi moa blong yumi givim wetnes long olgeta. Gudfala tingting ya bambae i halpem yumi, ale yumi gat gudfala fasin blong prij. Ol man bambae oli luksave se yumi rili intres long ol mo tingting blong yumi i strong finis. Olgeta fasin ya bambae oli pulum olgeta we oli intres long trutok.
YUMI YUSUM OL TUL WE YUMI GAT
3 Reasoning buk i givim plante gudfala fas tok long ol pej 9 kasem 15. Long ol fas tok ya, i gat plante gudfala kwestin. Sipos man ya we yumi toktok wetem i ansa long wan kwestin, yumi mas lesin gud long hem mo ol tok blong yumi oli mas soemaot se yumi tingbaot ol tok blong hem.—Kol. 4:6.
4 Yes, taem yu putum kwestin long man, yu no save tumas wanem samting man ya bambae i ansa long yu. Taswe, yu mas rere blong ansa stret long ol tok blong hem. Yu mas traem mekem toktok blong yu wetem man ya i gohed nomo. Blong mekem olsem, yu save soemaot long hem ol narafala samting we Baebol i talem long poen ya we hem i intres long hem, mo yu save askem sam moa kwestin we yu tingtinggud long hem fastaem.
YUMI RERE FASTAEM
5 Maet yu save finis tingting blong ol man we oli stap long ples blong yu. Sipos i olsem, yu mas jusum gud ol fas tok we oli stap long Reasoning buk, ol fas tok we oli wok gud long teritori ya. Afta, maet yu yu save tanem wan fas tok ya blong hem i kam stret wetem stampa tok blong prij. Ol fas tok blong yu oli mas pulum tingting blong man. Yu save askem kwiktaem wan kwestin long saed blong wan trabol, nao yu save givim ansa blong Baebol long kwestin ya. Taem we man blong haos i talem wan samting, yu yu mas yusum ol tok blong hem we oli stret. I nogud yu agensem ol tok blong hem. Yu mas intres long ol tingting mo ol filing blong hem, ale man ya i gohed nomo blong toktok wetem yu. Yu mas traem faenem wan samting we yutufala i agri long hem from we samting ya nao bambae i kam olsem faondesen blong toktok blong yutufala. Sipos yu tokbaot ol gudfala blesing blong Kingdom blong God, gavman ya we bambae i finisim ol trabol blong ol man, yu mas soemaot long voes blong yu se ol samting ya bambae oli kamtru mo we yu yu trastem promes we God i mekem.
6 Maet wan man i no agri wetem yu, be yu save yusum rod ya blong gohed nomo blong toktok wetem olgeta. Sipos man blong haos i rere blong lesin long yu, yu save askem long hem se: “?Yu yu gat tingting olsem longtaem finis?” Biaen yu save soemaot long hem wanem samting Tok blong God i talem long bisnes ya. Sipos yu luk we man ya i no wantem storeyan moa long bisnes ya, yu no mas fosem hem blong hem i agri long ol samting we yu stap talem. I moa gud yu yu finisim toktok ya long kwaet fasin. Ale, bambae rod i open blong yu talemaot gud nyus long hem bakegen.—Prov. 12:8, 18.
7 Sam pablisa oli storeyan moa wetem ol man taem oli tekem evri jans blong talemaot gud nyus. Haf ya blong Kristin minista blong yumi i isi moa long olgeta. Yu no mas fraet blong go toktok long ol man we yu mitim long ol rod. Sipos ol man oli mekem garen no oli spel long yad blong olgeta, i oraet nomo blong yu go storeyan wetem ol. Maet bambae olgeta oli glad tumas from we yu yu intres long ol wok we oli mekem mo yu save pulum tingting blong olgeta long promes we God i mekem long Baebol se i no longtaem, bambae wol i kam wan paradaes. Taem we yu yu statem wan toktok wetem wan man, yu mas traehad blong storeyan gud wetem hem, ale taem yu yu livim hem bambae hem i glad. Taem yu yu finis toktok wetem wan man, traehad blong mekem we man ya i gat moa gud tingting long God, Tok blong hem mo ol man blong God. Sipos yu yu gohed olsem, maet yu no kasem hat blong man ya, be man ya bambae i save lesin long nekis Wetnes we i pas long haos blong hem.