Gudfala Tok Blong Lidim Man i Go Long Vas

TIJING we yumi kasem long ol miting blong kongregesen i stanap long Baebol. Mo tu, ol vas blong Baebol oli stamba blong ol storian blong yumi long wok blong prij. Be blong mekem se ol vas oli givhan long storian blong yumi, yumi mas talem ol gudfala tok blong lidim man i go long vas.

I no naf blong talem wan vas mo askem long man blong i ridim wetem yu. I gud yu traehad blong mekem se ol tok we yu talem bifo we yu ridim wan vas i mekem tufala samting ya: (1) Ol tok blong yu oli mas pulum man blong wantem faenemaot wanem we vas i talem, mo (2) oli mas soemaot klia from wanem yu stap yusum vas ya. Yu save yusum plante defren rod blong mekem tufala samting ya.

Yu Askem Kwestin. I moa gud yu askem wan kwestin we i no isi blong man i faenem ansa blong hem. I gud yu traem yusum ol kwestin we oli pulum man blong i tingting. Jisas i mekem olsem. Taem ol Farisi oli kam luk Jisas long haos blong God, mo oli traem hem long fored blong ol man blong luk sipos hem i save mining blong tok blong Baebol, Jisas i askem long olgeta se: “?Wanem tingting blong yufala long Mesaea ya? ?Bambae hem i kamaot long laen blong hu?” Oli talem se: “Laen blong King Deved.” Nao Jisas i askem long olgeta se: “?Be olsem wanem we Tabu Spirit i givim waes long King Deved blong i singaot Mesaea ya, se Masta blong hem?” Nao hem i talem ol tok blong Ol Sam 110:1. Ol Farisi oli no moa save talem wan tok bakegen. Mo ol man we oli stap, oli glad tumas blong lesin long Jisas.—Mat. 22:41-46.

Long wok blong prij, maet yu askem kwestin blong lidim man i go long wan vas. Yu save talem se: “Mi mi gat wan prapa nem blong mi, mo yu tu yu gat nem blong yu. ?Yu ting se God i gat wan prapa nem blong hem? Yumi save faenem ansa blong kwestin ya long Eksodas 3:14 (ridim futnot tu).” Narafala kwestin se: “?Yu ting se wan dei bambae i gat wan gavman nomo we i rul long olgeta man? Yumi save luk ol tok we Daniel 2:44 i talem blong ansa long kwestin ya.” Wan moa bakegen se: “?Baebol i tokbaot ol samting we oli stap kamaot long taem blong yumi? I gud yu traem skelem ol tok blong 2 Timoti 3:1-5 wetem ol samting we yu stap luk tede.” Mo laswan: “?Bambae i gat wan taem we ol man oli no moa safa mo oli no moa ded? Yumi save faenem ansa blong kwestin ya long Baebol long Revelesen 21:4, 5.”

Taem yu givim wan tok long fored blong plante man, i gud yu yusum kwestin blong lidim olgeta oli go long ol vas. Samting ya i save pulum olgeta blong oli tingting bakegen long ol vas ya, nating we oli save olgeta finis. ?I tru se kwestin i save mekem olsem? Yes, i save mekem olsem, sipos kwestin we yu askem i stret long samting we man i wari long hem. Be nating se man i wantem save ansa blong kwestin ya, tingting blong hem i save go long narafala samting, taem yu stap ridim wan vas we hem i harem plante taem finis. Blong blokem samting ya, yu mas tingting gud blong faenem wan rod we i pulum ol man blong oli wantem lesin.

Yu Tokbaot Wan Problem. Maet yu tokbaot wan problem fastaem, nao biaen yu pulum man blong i lukluk wan vas we i soemaot rod blong winim problem ya. Be yu no mas mekem man i ting se vas ya nomo bambae i winim problem ya fulwan. Plante taem wan vas i soemaot smol haf nomo blong rod blong winim wan problem. Maet yu talem long man ya se taem yu stap ridim vas ya, hem i save traem faenem sam advaes long hem we bambae i givhan long hem blong winim problem ya.

Maet yu tokbaot wan fasin we God i talem se yumi mas gat, nao yu save yusum wan stori blong Baebol blong soemaot from wanem i waes blong folem fasin ya. Sam brata, sipos oli luk se i gat tu poen long vas (long sam vas maet i bitim tu poen) we i joen wetem samting we oli stap tokbaot, oli askem long man blong i traem faenem ol poen ya. Sipos i had tumas blong hem i luksave rod blong winim wan problem, yu save talem plante rod long hem, nao yu letem vas mo ol toktok blong yu biaen oli soemaot wanem rod i stret. Hemia i save pulum man blong i tingting.

Yu Leftemap Baebol Olsem Tok We i Gat Paoa. Maet yu pulum man finis blong i wantem harem samting we yu stap tokbaot, mo yu talem defdefren tingting we ol man oli gat long saed ya. Nao blong lidim hem i go long wan vas, yu save talem olsem: “Yu traem luk wanem we Tok blong God i talem long poen ya.” Samting ya i soemaot long hem from wanem ol tok ya we yu ridim i gat paoa.

Jehova i yusum ol man olsem Jon, Luk, Pol, mo Pita blong oli raetem sam haf blong Baebol. I tru, ol man ya oli raetem ol tok, be Jehova nao i Stamba blong ol tok ya. Sipos yu talem se “Pita i raetem” no “Pol i talem” blong lidim man i go long wan vas, maet hemia i no gat bigfala paoa olsem we yu talem se ol tok long vas ya i kamaot long God. Hemia i tru moa taem yu stap toktok long ol man we oli no stadi Baebol. I gud yu tingbaot tok we Jehova i givim long Jeremaea. Bifo we Jeremaea i talemaot sam long ol tok ya, hem i talem se tok ya i kamaot long Hae God. (Jer. 7:2; 17:20; 19:3; 22:2) Maet yu yusum nem blong Jehova long ol tok blong yu blong lidim man i go long ol vas, no maet yu no mekem olsem. Nating se yu mekem olsem wanem, be bifo we yu finisim storian blong yu, i gud yu traehad blong soemaot se ol tok we Baebol i talem i kamaot long God.

Yu Tingbaot Stori We Vas i Stap Long Hem. Bifo we yu jusum ol tok blong lidim man i go long wan vas, yu mas save gud stori we vas ya i stap long hem. Maet yu talemaot stori ya fulwan. Sipos no, maet yu yusum sam save nomo we i kamaot long stori ya. Yu traem tingbaot sipos yu wantem lidim man blong i ridim tok blong Job, gudfala man ya blong God. ?Yu ting se i gud blong yusum sem tok we bambae yu yusum blong lidim man blong i ridim tok blong wan giaman fren blong Job? Ating nogat. Yu traem tingbaot buk blong Ol Wok. Luk nao i raetem buk ya. Be hem i talemaot tok blong Jemes, Pita, Pol, Filip, Steven, sam enjel, Gamaliel, mo sam narafala man Jiu we oli no Kristin. Ale, sipos yu wantem yusum wan vas blong Baebol, ?bambae yu talem se hemia i tok blong hu? Deved i no raetem olgeta samting long buk blong Ol Sam. Mo Solomon i no raetem olgeta tok long buk blong Ol Proveb. I gud tu blong save se man we i raetem wan buk blong Baebol i stap toktok i go long hu, mo wanem poen we hem i stap tokbaot.

Yu Yusum Sam Narafala Save. I gud sipos yu save soemaot se ol samting we oli hapen long taem we oli raetem wan stori long Baebol, oli laenap wetem ol samting we yu yu stap tokbaot. Hemia wan gudfala rod. Samtaem yu nidim ol narafala save, blong yu kasem save klia long wan vas. Long tok blong yu, maet yu mas tokbaot sakrefaes blong Jisas we i pemaot yumi, nao yu wantem yusum Hibrus 9:12, 24. Bifo we yu ridim tufala vas ya, i gud yu tekem smoltaem blong eksplenem Rum ya we i Tabu we i Tabu, long Haos Tapolen blong God. ?From wanem? From we tufala vas ya oli soemaot se Rum ya i pija blong ples we Jisas i go long hem, taem hem i go antap long heven. Be i nogud yu talem tumas save. Samting ya i save mekem se vas we yu ridim biaen i no moa gat paoa.

Yu save kam gud moa blong talem ol gudfala tok blong lidim man i go long wan vas, sipos yu lesin gud long ol brata we oli givim plante tok finis. Yu traem blong makem ol defren rod we oli yusum. Nao yu tingting gud long ol rod ya mo from wanem oli gud. Taem yu stap rerem ol tok blong yu, yu jusum ol stamba vas. Yu tingting plante long wanem samting we ol vas ya wanwan oli mas soemaot long tok blong yu. Yu tingrere long ol tok we bambae yu talem blong lidim ol man oli go long ol vas ya. Olsem nao, olgeta vas ya wanwan bambae oli mekem wan gudfala wok. Biaen, yu mekem sem samting long ol narafala vas we bambae yu yusum. Taem yu kam gud moa long poen ya, bambae yu leftemap Tok blong God long tingting blong ol man.