Soemaot Respek Long Ol Man

BAEBOL i talem se yumi mas “ona long olgeta man,” mo yumi “no mas tok nogud long nem blong narafala man.” (1 Pita 2:17; Taet. 3:2) I tru, evri man we yumi storian wetem olgeta, “God i mekem olgeta long pija blong hem.” (Jem. 3:9) Jisas Kraes i ded from evri man. (Jon 3:16) Mo tu, i stret we olgeta man oli harem gud nius, nao oli save tekem aksen blong kasem laef. (2 Pita 3:9) Sam man oli gat ol fasin we oli pulum yumi blong ona moa long olgeta, no maet yumi ona long olgeta from we oli gat haenem.

Maet sam man oli ting se i no nid blong gat respek olsem Baebol i talem. ?From wanem oli tingting olsem? From we oli ting se folem kastom, i stret blong ona long sam man nomo. Maet hemia i dipen long laen blong man, kala blong skin blong hem, sipos hem i man no i woman, sipos bodi blong hem i strong no nogat, sipos hem i olfala no i yangfala, sipos hem i rijman no i puaman, sipos hem i gat haenem no nogat. Mo tu, plante haeman tede oli mekem kruked fasin. From samting ya, plante man oli no moa respektem olgeta. Antap long hemia, long sam kantri, ol man oli harem nogud from we laef i had. Maet oli mas wok plante aoa evri dei blong kasem ol stamba samting nomo we oli nidim. Mo ating oli stap long medel blong ol man we oli no gat respek tu. Plante yangfala oli no laekem ol tija blong olgeta, ale oli pulum ol fren blong olgeta blong oli joen wetem olgeta blong agensem ol tija ya. Ol yangfala olsem oli save agensem eni man we i hae moa long olgeta. Oli wajem ol stori long televisin we oli gat paoa long olgeta. Ol stori ya oli soem ol pikinini we oli trikim papa mama blong olgeta, mo oli mekem olsem we oli bos long papa mama tu. Yu mas strong blong blokem ol tingting ya blong wol, nao bambae oli no mekem se yu lusum respek we yu yu gat long ol narafala. Taem yu yu gat respek long ol narafala, bambae oli glad moa blong storian wetem yu, mo blong talemaot tingting blong olgeta.

Taem Yu Go Luk Wan Man. Ol man oli ting se, taem wan man i mekem wok blong God, hem i mas jenis gud, mo i mas mekem fasin we i stret long wok blong hem. Klos mo fasin we i stret long wan ples, maet i no stret long narafala ples. Long sam ples, sipos wan man we i go storian wetem narafala i no tekemaot hat blong hem, no i putum han blong hem long poket blong traoses blong hem, ol man oli ting se hem i no gat respek. Be long sam narafala ples, ol man oli no wari long fasin ya. Yu mas save tingting blong ol man long ples blong yu. Olsemia, bambae yu no spolem tingting blong olgeta. Mo tu, fasin blong yu bambae i mekem se oli glad blong lesin long gud nius we yu talemaot.

Yu mas lukaot gud taem yu singaot wan man long nem blong hem, antap moa wan olfala. Long plante ples, sipos ol yangfala oli singaot ol bigman long nem blong olgeta, ol man oli ting se oli no gat respek. Long sam ples, ol bigman tu oli no stap singaot ol strenja long nem blong olgeta. Long plante lanwis, man we i toktok long wan olfala no wan haeman i no mas yusum tok ya “yu,” be hem i mas talem “yufala” blong soemaot respek. Long sam ples, ol man oli yusum narafala rod.

Taem Yu Talem Halo. Long ol smol taon mo vilej, ol man oli talem halo long olgeta we oli mitim long rod, mo taem oli go insaed long wan haos. Samtaem maet oli smael long narafala, no maet oli sakem hed smol, no maet oli mekem saen nomo wetem ae blong olgeta. Sipos oli no mekem wan long ol fasin ya nating, narafala i save ting se oli no gat respek.

Be nating se yu talem halo long sam man, oli save harem yet se yu no gat respek long olgeta. ?From wanem? From we maet oli harem se yu no tinghae long olgeta. Long wol tede, plante man oli makem ol narafala from bodi blong olgeta nomo. Maet oli no glad blong toktok long olgeta we oli handikap no oli sik. Be Tok blong God i talem wanem we yumi mas mekem blong soemaot se yumi lavem mo respektem ol man olsem. (Mat. 8:2, 3) Yumi evriwan i gat sam problem we yumi kasem from sin blong Adam. ?Olsem wanem? ?Bambae yu yu harem se narafala i respektem yu sipos oltaem hem i makem yu from samting we i rong long bodi blong yu? ?Yu yu laekem moa sipos man i luksave ol gudfala fasin blong yu?

Taem yu gat respek, yu luksave hu nao i hed blong narafala. Long sam ples, taem yumi prij, yumi mas toktok fastaem long hed blong famle, bifo we yumi prij long famle blong hem. I tru se Jehova nao i givim wok ya long yumi blong prij mo blong tijim ol man. Be yumi mas luksave tu se Jehova i givim wok long ol papa mama blong tijim, stretem, mo lidim ol pikinini blong olgeta. (Efes. 6:1-4) Taswe, taem yu go long wan haos, i stret nomo we yu toktok fastaem long papa mama, bifo we yu storian wetem ol pikinini blong tufala.

Taem man i laef longtaem, hem i kasem plante save mo waes. I stret we ol narafala oli respektem hem. (Job 32:6, 7) Fasin ya i givhan long wan yangfala sista we hem i mekem wok blong paenia long kantri blong Sri Lanka. Hem i go long haos blong wan olfala man, nao man ya i no glad, hem i talem se: “Yu wan yangfala nomo, yu yu no naf blong tijim mi long Baebol.” Yangfala ya i ansa se: “No olfala, mi mi no kam blong tijim yu long wan samting. Mi kam blong serem wan save wetem yu we mi mi lanem. Mi glad tumas long save ya, taswe mi wantem serem wetem ol narafala.” Ol tok we paenia ya i talem wetem respek i pulum olfala ya blong lesin. Hem i askem se: “?Ale, yu yu lanem wanem?” Sista ya i talem se: “Mi mi lanem se yumi save laef blong olwe, mo mi lanem wanem we yumi mas mekem blong kasem laef ya.” Ale olfala man ya i wantem se wan Witnes blong Jehova i kam blong stadi Baebol wetem hem. Plante olfala oli no talem wan samting blong soemaot se oli wantem kasem respek, be taem narafala i gat respek long olgeta, oli glad tumas.

Long ol aelan blong Pasifik mo long sam narafala ples bakegen, i gat wan spesel fasin blong toktok blong soemaot respek, we man i mas mekem taem i kam insaed long wan vilej no taem i go luk jif. From we ol Witnes oli folem fasin ya, plante taem ol jif oli glad blong lesin, mo oli glad blong letem olgeta oli storian wetem ol man long vilej. Be yu mas lukaot gud se yu no ona long narafala bitim mak. I no stret blong talem ol tok blong switim man, mo i no nid blong mekem olsem tu. (Prov. 29:5) Long sam lanwis, i gat ol spesel tok we man i yusum blong soemaot respek long narafala. I stret we ol Kristin oli yusum ol tok ya, be oli no mas bitim mak.

Taem Yu Stap Toktok. Baebol i talem se taem yumi eksplenem bilif blong yumi, ‘yumi mas toktok gud we yumi ona’ long narafala. (1 Pita 3:15, 16) Taswe, nating sipos yu yu naf blong soemaot kwiktaem ol rong tingting blong narafala, be i no waes blong mekem samting ya. Fasin ya i save mekem man i sem. I moa gud yu lesin fastaem, mo maet yu askem long hem from wanem hem i tingting olsem. Nao taem yu yusum ol tok blong Baebol blong soemaot trutok long hem, yu no fogetem ol tingting we hem i talemaot long yu.

Yu mas gat respek long ol man wanwan. Mo taem yu givim wan tok long fored blong plante man, long taem ya tu yu mas gat respek. Wan man we i gat respek long olgeta we oli lesin long hem, bambae i no talem ol strong tok blong daonem olgeta. Mo bambae hem i no toktok olsem se: “Yufala i naf blong mekem samting ya, be yufala nomo i no wantem.” Sipos yu toktok olsem, yu save mekem tingting blong ol narafala i foldaon. I moa gud yu tingbaot ol man we yu toktok long olgeta olsem wan kampani blong man we oli lavem Jehova, mo we oli wantem mekem wok blong Hem. Sipos yu folem fasin blong Jisas, bambae yu traehad blong kasem save long tingting blong olgeta we oli no strong, olgeta we oli jes kasem save long trutok, mo olgeta we oli slo blong folem advaes blong Baebol.

Brata we i givim tok i mas toktok long fasin we i soemaot se hem tu i mas traehad blong folem Tok blong God. Nao olgeta we oli stap lesin bambae oli haremsave se hem i gat respek long olgeta. Taswe, taem hem i tokbaot wanem we man i mas mekem blong folem ol tok blong Baebol, hem i no mas yusum tok ya “yu” oltaem. Olsem nao, hem i no mas talem se: “?Yu yu stap mekem evri samting we yu yu naf blong mekem?” I moa gud hem i talem se: “I gud yumi wanwan i askem se: ‘?Mi mi stap mekem evri samting we mi mi naf blong mekem?’” Tingting we i stap long tufala kwestin ya i sem mak nomo. Be fas kwestin i givim tingting se man we i givim tok i hae moa long olgeta we oli lesin. Seken kwestin i pulum olgeta evriwan, wetem brata we i givim tok tu, blong oli skelem gud laef blong olgeta mo tingting we i pulum olgeta blong wok.

Yu mas blokem tingting ya blong wantem talem ol fani tok blong mekem ol man oli laf. Hemia i save mekem se ol man oli no moa gat respek long ol tok blong Baebol. I tru, yu mas hapi oltaem long wok blong God. Mo tu, maet long tok we yu givim long miting, yu mas tokbaot wan samting we i save mekem man i laf. Be sipos yu mekem ol impoten save oli kam olsem samting we man i laf long hem, yu no gat respek long ol man we oli lesin long yu, mo yu no gat respek long God tu.

Yu mas tingbaot ol man long fasin we Jehova i tijim yumi finis long hem. Yu soemaot tingting ya long ol samting we yu mekem taem yu go luk ol man, mo long fasin blong yu, mo long ol toktok blong yu.