Soem Respek Long Ol Narafala

1. ?From wanem yumi glad taem man i respektem yumi? (Ol Proveb 22:1)

?YU YU glad taem man i respektem yu? I sua se yes. Yumi evriwan i nidim respek. Mo taem man respektem yumi, yumi harem gud. Taswe Baebol i talem se: “I moa gud man i respektem yu, i bitim we yu stap kasem silva mo gol.”—Ridim Ol Proveb 22:1.

2-3. ?From wanem samtaem i no isi blong soem respek long ol narafala? ?Bambae yumi tokbaot wanem long stadi ya?

² Samtaem i no isi blong soem respek long ol narafala. Hemia from we yumi save luk ol slak fasin blong olgeta. Mo tu, yumi laef long wan taem we plante man oli no moa gat respek. Be yumi mas defren. ?From wanem? From we Jehova i wantem se yumi ona, o soem respek, long “ol defren kaen man.”—1 Pita 2:17.

³ Long stadi ya, bambae yumi tokbaot se i minim wanem blong respektem ol narafala, mo olsem wanem blong soem respek long (1) ol memba blong famle, (2) ol brata mo sista, mo (3) olgeta aotsaed long kongregesen. Mo tu, bambae yumi luk olsem wanem yumi save soem respek long ol taem we i no isi.

?I MINIM WANEM BLONG RESPEKTEM OL NARAFALA?

4. ?I minim wanem blong respektem ol narafala?

⁴ ?Respek i minim wanem? Long sam lanwis, tok ya “respek” mo “ona” i joen. ?From wanem yumi talem olsem? “Respek” i go moa long tingting we yumi gat long wan man. Taem yumi respektem narafala, yumi tinghae long olgeta from ol gudfala fasin blong olgeta, ol samting we oli mekem, o posisen blong olgeta. Be “ona” i go moa long fasin we yumi mekem long wan man. Taem yumi ona long narafala, yumi tritim olgeta long fasin we i mekem oli haremsave se yumi tinghae long olgeta, yumi glad long olgeta, mo yumi respektem olgeta. I tru, blong soemaot se yumi rili ona long narafala, hemia i mas kamaot long hat blong yumi.—Mat. 15:8.

5. ?Wanem i save pulum yumi blong soem respek long ol narafala?

⁵ Jehova i wantem se yumi soem respek long ol narafala. Wan eksampol, hemia “ol haeman we oli stap rul.” (Rom 13:​1, 7) Be maet samfala oli talem se: “Mi glad blong soem respek long man sipos hem i mekem wan samting we i gud.” ?Be tingting ya i stret? Yumi ol man blong Jehova, yumi luksave se yumi mas respektem narafala, i no from samting we oli mekem nomo, be from we yumi lavem Jehova mo yumi wantem mekem hem i glad.—Jos. 4:14; 1 Pita 3:15.

6. ?Yumi naf blong soem respek long wan man we i no respektem yumi? Yu eksplenem. (Mo tu, yu luk pija.)

⁶ Maet samfala oli stap tingting se: ‘?Yumi naf blong soem respek long wan man we i no respektem yumi?’ Yes. Traem tingbaot ol eksampol ya. King Sol i tok nogud long boe blong hem Jonatan long fored blong ol narafala. (1 Saml. 20:​30-34) Be yet, Jonatan i respektem hem mo i sapotem hem long faet go kasem we Sol i ded. (Eks. 20:12; 2 Saml. 1:23) Hae Pris Ilae i tok strong long Hana se hem i drong. (1 Saml. 1:​12-14) Be Hana i soem respek taem hem i toktok long Ilae, nating se ol man Isrel oli save se Ilae i no mekem gud wok blong hem olsem wan papa mo wan hae pris, blong stretem tufala boe blong hem. (1 Saml. 1:​15-18; 2:​22-24) Mo ol man long Atens oli stap tokbaot nogud aposol Pol se hem i “stap pikimap ol tok olbaot nomo.” (Wok 17:18) Nating se i olsem, Pol i soem respek taem hem i toktok long olgeta. (Wok 17:22) Ol eksampol ya oli soemaot se sipos yumi lavem Jehova mo yumi fraet blong mekem hem i harem nogud, bambae yumi soem respek long ol narafala, i no long ol isi taem nomo, be long ol hadtaem tu. Naoia bambae yumi tokbaot se yumi mas respektem hu mo from wanem.

SOEM RESPEK LONG OL MEMBA BLONG FAMLE

7. ?From wanem samtaem i had blong respektem ol memba blong famle?

⁷ Samting we i had. Yumi spenem plante taem wetem ol famle blong yumi. Taswe, yumi save ol gudfala fasin blong olgeta mo ol slak fasin blong olgeta. Maet samfala oli gat wan sik we i mekem se i had blong yumi lukaot long olgeta, o maet oli kasem sik ya we oli stap wari tumas. Maet ol narafala oli talem o mekem sam samting we yumi harem nogud from. Yumi wantem se i gat pis insaed long famle, be maet sam memba blong famle oli no gat respek long ol narafala, mo hemia i mekem se i no gat pis mo oli no save wok gud tugeta. Hemia i olsem sik blong ol joen blong bodi we i mekem se sam haf blong bodi oli no wok gud. Taem wan man i gat sik ya, hem i no save kam gud fulwan. Be wan famle we i no gat pis i save joen gud bakegen, sipos evriwan i lanem blong respektem narafala.

8. ?From wanem i impoten we yumi soem respek long ol memba blong famle? (1 Timoti 5:​4, 8)

⁸ ?From wanem yumi mas soem respek? (Ridim 1 Timoti 5:​4, 8.) Long faswan leta we Pol i raetem i go long Timoti, hem i tokbaot samting we ol memba blong famle oli mas mekem blong lukaot gud long olgeta. Hem i eksplenem se yumi ona long ol memba blong famle, i no from we hem i wan samting we yumi mas mekem nomo, be i blong soemaot se yumi “fasgud long God.” Yumi mekem olsem from we yumi lavem Jehova mo i wan haf blong wosip. Jehova nao i stanemap plan ya blong famle. (Efes. 3:​14, 15) Taswe taem yumi ona long wan memba blong famle, yumi stap ona long Jehova. !Yes, i impoten tumas we yumi soem respek long ol memba blong famle!

9. ?Olsem wanem wan hasban mo waef i save soem respek long tufala? (Mo tu, yu luk ol pija.)

⁹ ?Olsem wanem blong soem respek? Wan hasban we i ona long waef blong hem, i soemaot se hem i tinghae long waef blong hem taem tufala nomo i stap, mo taem tufala i stap wetem ol narafala. (Prov. 31:28; 1 Pita 3:7) Hem i neva kilim waef blong hem, mekem hem i sem, o mekem hem i harem se hem i nating nomo. Ariel,a we i laef long Ajentina, i talem se: “From we waef blong mi i sik, samtaem hem i talem ol samting we i mekem mi harem nogud. Be long taem olsem, mi tingbaot se hem i no rili minim blong talem ol tok ya. Mo tu, mi tingbaot 1 Korin 13:​5, we i pulum mi blong respektem hem mo toktok kaen long hem, i bitim we mi kros long hem.” (Prov. 19:11) Wan waef we i ona long hasban blong hem, i talem ol gudfala samting long saed blong hem long ol narafala. (Efes. 5:33) Hem i no talem ol tok we i daonem hasban blong hem, i jikim hem, o i spolem hem, from we hem i save se ol tok olsem i olsem rosta we i save spolem wan mared. (Prov. 14:1) Wan sista long Itali we hasban blong hem i kasem sik ya we i stap wari tumas, i se: “Samtaem, mi harem se hasban blong mi i wari tumas from ol smosmol samting nomo. Bifo, taem samting ya i hapen, ol toktok mo aksen blong mi i soemaot se mi no respektem hem. Be mi faenemaot se taem mi spenem moa taem wetem ol man we oli gat respek, hemia i pulum mi blong soemaot respek long hasban blong mi.”

10. ?Olsem wanem ol yangfala oli save soemaot se oli respektem ol perens blong olgeta?

¹⁰ Ol yangfala, i gud yufala i obei long ol rul we ol perens blong yufala oli putumap. (Efes. 6:​1-3) Taem yufala i toktok long olgeta, i gud yufala i soem respek long olgeta. (Eks. 21:17) Taem ol perens blong yufala oli kam olfala, maet bambae oli nidim moa we yufala i givhan long olgeta. Taswe i gud yufala i traehad blong lukaot gud long olgeta. Traem tingbaot eksampol blong María, we papa blong hem i no wan Witnes blong Jehova. Taem papa blong hem i sik, hem i no kaen long Maria, taswe i had blong Maria i lukaot long hem. Maria i talem se: “Taem mi prea, mi no askem nomo long Jehova blong i givhan long mi blong respektem papa blong mi, be blong mi soemaot tu long ol aksen blong mi. Mi luksave se Jehova nao i askem mi blong ona long ol perens blong mi, taswe hem i save givim paoa long mi blong mi naf blong ona long papa blong mi. Sloslo, mi luksave se papa blong mi i no nid blong jenisim ol fasin blong hem, blong mi save soem respek long hem.” Taem yumi ona long ol memba blong famle blong yumi nating se oli gat ol slak fasin, yumi pruvum se yumi respektem plan ya we Jehova i stanemap long saed blong famle.

SOEM RESPEK LONG OL BRATA MO SISTA

11. ?From wanem maet i had blong soem respek long ol brata mo sista?

¹¹ Samting we i had. Ol brata mo sista long kongregesen oli traehad blong folem ol rul blong Baebol. Be samtaem maet oli no kaen, oli gat rong tingting long yumi, o yumi no laekem sam fasin blong olgeta. Sipos wan brata o sista i mekem wan samting we yumi gat “risen blong komplen” from, maet i had blong yumi gohed blong soem respek long hem. (Kol. 3:13) ?Wanem i save givhan long yumi?

12. ?From wanem i impoten we yumi soem respek long ol brata mo sista? (2 Pita 2:​9-12)

¹² ?From wanem yumi mas soem respek? (Ridim 2 Pita 2:​9-12.) Long seken leta we Pita i raetem, hem i talem se sam Kristin long faswan handred yia, oli stap tok nogud long “olgeta we God i givim haenem long olgeta,” hemia ol elda. ?Ol gudfala enjel we oli luk samting ya oli mekem wanem? Nating se oli stret gud olgeta, “oli gat respek long Jehova.” Taswe oli no tok nogud agensem ol man ya we oli flas, be oli lego bisnes ya i stap long han blong Jehova blong i jajem mo panisim olgeta. (Rom 14:​10-12; skelem wetem Jud 9.) Yumi save lanem wan lesen long fasin blong ol enjel ya. Sipos yumi respektem ol man we oli agensem yumi, yumi mas respektem moa ol brata mo sista blong yumi. Antap moa, Baebol i talem se yumi mas “faswan” blong ona long olgeta. (Rom 12:10) Taem yumi mekem olsem, yumi soemaot se yumi respektem Jehova.

13-14. ?Olsem wanem yumi save soem respek long olgeta long kongregesen? Talem sam eksampol. (Mo tu, yu luk ol pija.)

¹³ ?Olsem wanem blong soem respek? Ol elda, taem yufala i tijim ol narafala, i gud yufala i mekem long fasin we i soemaot lav. (Film. 8, 9) Mo sipos yu mas stretem narafala, i gud yu toktok kaen long hem mo long wan taem we yu no kros. Ol sista, yufala i save givhan long olgeta long kongregesen blong respektem ol narafala, taem yufala i no tokbaot ol nogud samting long saed blong ol narafala, o ol samting we i save spolem nem blong olgeta. (Taet. 2:​3-5) Yumi evriwan i save soem respek long ol elda taem yumi wok gud wetem olgeta, mo talem tangkiu from wok we oli mekem blong lidim ol miting mo wok blong prij, mo givhan long olgeta we oli “folem wan rod we i no stret.”—Gal. 6:1; 1 Tim. 5:17.

¹⁴ Wan sista we nem blong hem Rocío i faenem i had blong respektem wan elda we i bin givim advaes long hem. Hem i se: “Mi harem se elda ya i no toktok kaen long mi. Taswe long haos, mi stap tokbaot nogud hem. Blong talem stret, mi harem olsem se hem i no kea long mi mo mi no wantem lesin long advaes blong hem, nating se mi no soemaot filing blong mi.” ?Wanem i givhan long Rocío? Hem i se: “Long Baebol riding blong mi, mi ridim 1 Tesalonaeka 5:​12, 13. Taem mi luksave se mi no soem respek long brata ya, tingting blong mi i stikim mi. Ale, mi prea long Jehova mo mi mekem risej long ol buk blong yumi, blong faenem ol advaes we i save givhan long mi blong jenisim tingting blong mi. Biaen, mi luksave se problem i no brata ya, be mi nao mi flas. Naoia mi luksave se fasin blong respektem narafala i joen wetem tingting daon. Mi save se mi mas kam gud moa yet, be taem mi stap traehad blong soem respek, mi harem se mi gat pis wetem Jehova.”

SOEM RESPEK LONG OLGETA AOTSAED LONG KONGREGESEN

15. ?From wanem samtaem i had blong soem respek long olgeta aotsaed long kongregesen?

¹⁵ Samting we i had. Long wok blong prij, plante taem yumi mitim ol man we i luk olsem se oli no intres long Baebol. (Efes. 4:18) Samfala oli jusum blong no lesin long yumi from samting we oli lanem taem oli smol. Maet ol man we yumi wok wetem olgeta o skul wetem olgeta oli no kaen long yumi, o maet bos o tija blong yumi i no glad long yumi o long ol wok blong yumi. Long taem olsem, maet sloslo bambae yumi no moa respektem olgeta o mekem i gud long olgeta.

16. ?From wanem i impoten we yumi soem respek long olgeta we oli no wosipim Jehova yet? (1 Pita 2:12; 3:15)

¹⁶ ?From wanem yumi mas soem respek? Tingbaot se Jehova i stap luk fasin we yumi mekem long ol man aotsaed long kongregesen. Aposol Pita i mekem ol Kristin oli tingbaot se gudfala fasin blong olgeta i save pulum sam man blong oli “presem God.” From samting ya, hem i talem long olgeta blong oli tokbaot bilif blong olgeta “long kwaet fasin mo bigfala respek.” (Ridim 1 Pita 2:12; 3:15.) Taem wan Kristin i stap eksplenem bilif blong hem long kot o long eni narafala man, oltaem hem i mas soem respek. Yumi mas tingbaot se Jehova i stap wajem yumi mo i stap lesin long samting we yumi talem mo fasin blong yumi blong talem. !Yes, hemia i wan impoten risen from wanem yumi mas soem respek long olgeta aotsaed long kongregesen!

17. ?Olsem wanem yumi save soem respek long olgeta aotsaed long kongregesen?

¹⁷ ?Olsem wanem blong soem respek? Taem yumi prij, yumi no wantem mekem ol man oli harem olsem se yumi daonem olgeta from we oli gat smol save nomo, o oli no gat save nating long Baebol. Be yumi wantem mekem oli haremsave se yumi, wetem God, yumi tinghae long olgeta, mo yumi luk olgeta se oli hae moa long yumi. (Hag. 2:7; Fil. 2:3) Sipos wan man i tok nogud long yu from bilif blong yu, i nogud yu talem ol tok we i no kaen blong givimbak. (1 Pita 2:23) Sipos yu talem wan samting we biaen yu rigret from, i gud yu kwik blong talem sore. ?Olsem wanem blong soem respek long ol man long ples blong wok? I gud yu wok had mo yu traehad blong soemaot gudfala fasin long ol man we yu wok wetem olgeta mo long bos blong yu. (Taet. 2:​9, 10) Taem yu tok tru oltaem mo yu wok had, yu save sua se God i glad long yu, nating sipos ol man oli glad long yu o nogat.—Kol. 3:​22, 23.

18. ?From wanem yumi mas gat respek mo soem respek long ol narafala?

¹⁸ !Yumi gat plante gudfala risen blong gat respek mo soem respek long narafala! Yumi bin luk se taem yumi soem respek insaed long famle, yumi stap ona long Jehova we i Hed blong famle. Long sem fasin, taem yumi soem respek long ol brata mo sista long kongregesen, yumi stap ona long Papa blong yumi long heven. Mo taem yumi soem respek long olgeta aotsaed long kongregesen, hemia bambae i pulum olgeta blong givim glori mo ona long God blong yumi. Nating sipos sam man oli no soem respek long yumi, be i impoten we yumi soem respek long olgeta, from we Jehova bambae i blesem yumi. Hem i promes se: “Olgeta we oli ona long mi, bambae mi ona long olgeta.”—1 Saml. 2:30.