Tok We Yumi Mas Talemaot

YUMI MAS ‘FRAET GUD LONG TRU GOD MO FOLEM OL LOA BLONG HEM’

PLANTE yia bifo we Kristin skul i stat, Jehova i tokbaot plan blong hem long man blong wok blong hem, Ebraham. Hem i talem se bambae hem i mekem we “ol man blong ol narafala kantri” oli kasem blesing. (Jen. 22:18) Mo tu, Jehova i putum long tingting blong Solomon blong i raetemdaon stamba samting we olgeta man oli mas mekem: ‘Yufala i mas fraet gud long tru God mo yufala i mas folem ol loa blong hem, from we hemia nao olgeta wok we man i mas mekem.’ (Pri. 12:13, NW) Be ol man we oli laef long ol defren kantri blong wol, ?bambae oli harem ol tok ya olsem wanem?

Long olgeta yia we oli pas, oltaem i gat sam man long wol we oli bilif long tok blong God. Be Baebol i talem se long “dei blong Masta” nomo, bigfala wok ya blong prij bambae i kasem olgeta kantri. Dei ya i stat long yia 1914. (Rev. 1:10) Revelesen 14:6, 7 i talem se long taem ya, ol enjel bambae oli lidim wok ya blong talemaot ol tok we i save sevem laef blong man. Tok ya i go “long olgeta man long wol, long olgeta blong evri kala, mo kantri, mo laen, mo lanwis.” Tok ya i talem long ol man se oli ‘mas ona gud long God, mo oli mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo oli mas bodaon long fes blong hem blong mekem wosip long hem.’ God nao i wantem se tok ya i mas goaot long olgeta man. Yu yu gat nambawan janis blong joen long wok ya.

‘Tru God.’ Taem Jehova i talem se: “Yufala i witnes blong mi,” hem i talemaot tok ya long wan taem we i gat raorao se hu nao i tru God. (Aes. 43:10) Tok ya we ol witnes blong God oli mas talemaot, i no blong mekem nomo se ol man oli gat wan jos, no blong oli bilif long wan god, nogat. Ol man oli mas gat janis blong lanem se God ya we i mekem heven mo wol, hem nomo i tru God. (Aes. 45:5, 18, 21, 22; Jon 17:3) Tru God nomo i save talemaot stret samting we bambae i kamtru long fiuja. Yu yu gat janis blong talemaot se long taem bifo, ol tok blong Jehova i kamtru stret olsem we hem i bin talem. Hemia i pruvum gud se ol blesing we Jehova i promes blong givim long fiuja, yumi save trastem se bambae oli kamtru.—Jos. 23:14; Aes. 55:10, 11.

Plante man we yu toktok long olgeta, oli stap mekem wosip long ol narafala god. Mo samfala oli talem se oli no wosipim wan god nating. Sipos yu wantem se oli lesin long yu, yu mas storian long wan samting we olgeta tu oli glad blong tokbaot. Eksampol we i stap long Ol Wok 17:22-31 i save givhan long yu. Aposol Pol i toktok long kaen fasin, be hem i talemaot klia se God bambae i jajem olgeta man, from we Hem nao i mekem heven mo wol.

Talemaot Nem Blong God. Yumi mas talemaot nem blong tru God. Jehova i laekem tumas nem blong hem. (Eks. 3:15, NW; Aes. 42:8, NW) Hem i wantem se ol man oli save long nem ya. Hem i mekem se tabu nem ya i stap bitim 7,000 taem long Baebol. Taswe, wok blong yumi i blong talemaot nem ya long ol man.—Dut. 4:35, NW.

Olgeta man long wol oli mas save long Jehova mo oli mas singaot long hem wetem bilif. Laef blong olgeta i dipen long samting ya. (Joel 2:32; Mal. 3:16, NW; 2 Tes. 1:8) Plante man oli talem se oli wosipim God ya we Baebol i tokbaot. Be bighaf blong olgeta oli no save Jehova. Tede, ol man oli tekemaot prapa nem blong God long plante Baebol. Taswe plante man oli gat wan Baebol mo oli ridim, be oli no save nem ya Jehova. Sam man oli harem nem blong Jehova nomo taem ol lida blong jos oli talem long olgeta blong oli no yusum nem ya.

?Yu save mekem wanem blong ol man oli save long nem blong God? Yu mas openem Baebol mo soem nem ya long olgeta. I gud yu traem yusum prapa Baebol blong olgeta. I no gat wan narafala rod we i gud moa. Long sam Baebol, nem ya blong God i kamaot plante taosen taem. Long ol narafala Baebol, maet nem ya i stap nomo long Ol Sam 83:18, mo long Eksodas 6:3-6, no long futnot blong Eksodas 3:14, 15, mo Eksodas 6:3. Long plante Baebol, ol man oli tekemaot nem ya Jehova we i stap long ol olfala hanraet, mo oli putum “Masta” mo “God” long ples blong hem. Oli raetem tufala tok ya long raeting we i defren. Maet yu mas yusum wan olfala Baebol blong soem nem blong God long ol man, blong pruvum long olgeta se samfala we oli wokem ol Baebol tede oli tekemaot nem blong God. Long sam ples, nem blong God i stap long buk blong singsing blong ol jos, mo long toktok we oli raetem long ol bigfala haos we ol man oli save go visitim.

Sipos yu toktok long ol man we oli stap mekem wosip long ol narafala god, yu save yusum ol vas long Jeremaea 10:10-13, long Baebol ya New World Translation. Ol vas ya oli talem prapa nem blong God, mo oli eksplenem klia tu se hem i hu.

Yu no mas haedem nem blong Jehova mo yusum “God” mo “Masta” olsem ol man blong Krisendom oli mekem. Hemia i no min se evri taem we yu stat blong storian yu mas yusum nem ya Jehova. Sipos yu yusum evri taem, sam man we oli gat nogud tingting long yumi finis oli save stopem storian blong yu wantaem nomo. Be sipos yu tokbaot wan poen we i pulum tingting blong man blong haos, nao yu gohed longtaem lelebet blong storian wetem hem, yu no mas sem blong yusum nem blong Jehova.

Prapa nem blong God i stap plante taem moa long Baebol i bitim tufala tok ya “Masta” mo “God.” Nating se i olsem, ol man we oli raetem Baebol bifo oli no yusum nem ya long evri toktok we oli raetemdaon. Oli yusum nem ya long fasin we i stret nomo, mo wetem respek, olsem oli yusum taem oli stap storian. Oli no fraet blong yusum. Hemia i wan gudfala eksampol we yumi save folem.

God We i Karem Nem Ya. Trutok ya se God i gat wan prapa nem blong hem i fas impoten samting we man i lanem, be i gat plante moa samting bakegen we hem i mas lanem.

Ol man oli mas save se Jehova i wanem kaen God. Olsem nao, oli save lavem hem mo singaot long hem wetem bilif. Taem Jehova i talem nem blong hem long Moses long Hil blong Sinae, hem i no talem nem ya “Jehova” nomo. Hem i pulum tingting blong Moses tu i go long sam nambawan fasin blong Hem. (Eks. 34:6, 7, NW) Hemia i wan eksampol we yu yu save folem.

Taem yu tokbaot ol blesing blong Kingdom long wok blong prij no long ol tok we yu givim long kongregesen, i gud yu tokbaot ol fasin blong God we ol blesing ya oli soemaot. Mo taem yu tokbaot ol loa blong God, yu mas tokbaot waes mo lav blong hem we oli kamaot klia long ol loa ya. Yu mas talem klia se ol samting we God i askem long yumi, oli no blong mekem i strong long yumi, be oli blong mekem i gud long yumi. (Aes. 48:17, 18; Maeka 6:8) I gud yu tokbaot fasin blong Jehova, ol stret rul blong hem, mo stamba tingting blong hem, we oli kamaot klia taem hem i yusum paoa blong hem blong mekem wan samting. Yu mekem man i tingbaot se Jehova i stap skelem gud ol fasin blong hem, i no soemaot wan fasin bitim mak nao i fogetem narafala fasin. Sipos yu lavem Jehova mo yu gat bigfala respek long hem, toktok blong yu i mas soemaot samting ya. Taem narafala i luk we yu yu lavem Jehova tumas, samting ya i save givhan long hem blong hem tu i lavem Jehova.

I impoten tumas we naoia ol man oli fraet gud long God. Ol tok blong yumi i mas givhan long olgeta blong oli gat fraet ya. Hemia i wan gudfala fraet, we i mekem se yumi ona long Jehova mo respektem hem. (Sam 89:7) Taem yumi fraet gud long God, yumi kasem save se hem nao i bigfala Jaj blong yumi. Mo yumi save se sipos yumi wantem laef long fiuja, yumi mas mekem Hem i glad. (Luk 12:5; Rom 14:12) Taswe, gudfala fraet ya i joen wetem bigfala lav we yumi gat long Jehova, mo i pusum yumi blong wantem mekem hem i glad. (Dut. 10:12, 13) Taem yumi fraet gud long God, yumi no laekem nating ol samting we oli nogud, yumi obei long ol loa blong God, mo yumi mekem wosip long hem wetem fulhat blong yumi. (Dut. 5:29, NW; 1 Kron. 28:9; Prov. 8:13) Fasin ya i mekem se yumi no laekem tumas ol samting blong wol, long semtaem we yumi stap traem blong mekem wok blong God.—1 Jon 2:15-17.

Nem Blong God—“Wan Strong Haos.” Ol man we oli save gud Jehova, oli harem gud from we God i lukaot long olgeta. Hemia i no from we oli yusum nem blong Hem nomo, no from we oli save sam long ol nambawan fasin blong hem, nogat. Hemia from we oli trastem Jehova. OI Proveb 18:10 (NW) i talem se: “Nem blong Jehova i olsem wan strong haos. Ol stret man oli resis blong go haed long hem, nao hem i lukaot long olgeta.”

Yu mas yusum gud ol janis we yu yu gat, blong pulum ol narafala blong oli trastem Jehova. (Sam 37:3; Prov. 3:5, 6) Sipos oli mekem olsem, oli soemaot se oli bilif long Jehova mo long ol promes blong hem. (Hib. 11:6) Baebol i mekem yumi save gud se, Jehova bambae i sevem ol man we ‘oli singaot long nem blong hem.’ Oli singaot long hem from we oli save se hem i hae King blong heven mo wol, oli laekem tumas ol rod blong hem, mo oli bilif se hem nomo i save sevem ol man. (Rom 10:13, 14) Taem yu stap tijim ol narafala, i gud yu givhan long olgeta blong oli holem bilif ya long evri samting we oli mekem long laef blong olgeta.

Fulap man oli fesem ol bigbigfala trabol. Ating oli no luk wan rod blong stretem ol trabol ya. Yu mas pulum olgeta blong oli kasem save long ol rod blong Jehova, oli trastem Hem, mo oli mekem ol samting we oli lanem i wok long laef blong olgeta. (Sam 25:5) Yu mas talem long olgeta blong oli prea strong oltaem blong God i givhan long olgeta, mo blong oli talem tangkiu long hem from ol blesing we hem i givim. (Fil. 4:6, 7) Bambae oli save gud Jehova, i no from we oli ridim nomo ol tok blong Baebol, be oli luksave tu se Jehova i mekem ol promes blong hem oli kamtru long prapa laef blong olgeta. Long taem olsem, bambae oli kasem save long mining blong nem blong Jehova, mo hemia bambae i mekem se oli stap sef gud.—Sam 34:8; Jer. 17:7, 8.

Yu mas yusum gud evri janis we yu yu gat blong givhan long ol man, blong oli kasem save se i waes blong fraet gud long tru God, Jehova, mo blong folem ol loa blong hem.

“WITNES LONG SAED BLONG JISAS”

TAEM Jisas Kraes i laef bakegen mo i rere blong go long heven, hem i talem long ol disaepol blong hem se: “Bambae yufala i mas go talemaot mi long . . . olgeta ples long wol.” (Wok 1:8) Baebol i tokbaot ol man blong wok blong God long taem blong yumi, se oli “gat wok ya blong witnes long saed blong Jisas.” (Rev. 12:17, NW) ?Olsem wanem? ?Yu yu wok strong blong talemaot Jisas?

Plante man we oli talem se oli bilif long Jisas, oli no save nating se hem i laef long heven bifo we i kamdaon long wol. Oli no save se taem Jisas i stap long wol, hem i wan man olsem yumi. Oli no kasem save se i minim wanem we hem i Pikinini blong God. Oli no save olgeta wok blong hem blong mekem stamba tingting blong God i kamtru. Oli no save se Jisas i stap mekem wanem naoia, mo oli no kasem save se samting we hem i mekem long fiuja, bambae i gat paoa long laef blong olgeta. Maet oli gat rong tingting ya tu se ol Witnes blong Jehova oli no bilif long Jisas. Hemia janis blong yumi blong traehad blong mekem ol man ya oli save trutok long saed ya.

I gat sam narafala man we oli no bilif se Jisas we Baebol i tokbaot, i laef long wol ya. Samfala oli ting se Jisas i wan haeman nomo. Plante oli sakemaot tingting ya se hem i Pikinini blong God. Sipos yu wantem “witnes long saed blong Jisas” long ol man olsem, yu mas traehad, yu mas gat longfala tingting, mo yu mas toktok kaen long olgeta.

Nomata wanem tingting blong ol man we yu prij long olgeta, i impoten we oli mas kasem save long Jisas Kraes. Olsem nao, rod ya we God i rerem blong man i kasem laef we i no save finis, i save givhan long olgeta. (Jon 17:3) God i wantem we olgeta man oli mas “talemaot klia se Jisas Kraes i Masta,” mo oli mas stap aninit long paoa blong hem. (Fil. 2:9-11, NW) Samtaem yu mitim wan man we i gat rong tingting mo hem i strong blong holem tingting ya, no maet hem i agensem trutok nomo. Be yu mas talemaot trutok yet long saed blong Jisas. Long sam man, yu save tokbaot Jisas Kraes plante long fas taem we yu mitim olgeta. Be long sam narafala man yu mas toktok long waes fasin, blong givhan long olgeta blong oli gat stret tingting long Jisas. Mo tu, maet yu mas tingbaot sam narafala rod blong ademap sam moa poen bakegen, long nekis taem we yu go visitim olgeta. Be maet i no gat rod blong tokbaot laef blong Jisas fulwan long ol visit nomo. Ating taem yu statem wan Baebol stadi wetem man, long taem ya nao bambae hem i kasem ol save ya.—1 Tim. 2:3-7.

Bigfala Wok We Jisas i Mekem Long Plan Blong God. Yumi givhan long ol man blong oli kasem save se oli mas bilif long Jisas Kraes. Jisas nao i “rod ya,” mo ‘i no gat man i save kam long Papa blong hem, sipos Jisas i no tekem hem i kam.’ Sipos oli no bilif long Jisas, i no gat rod blong oli save fren gud wetem God. (Jon 14:6) Sipos wan man i no kasem save long bigfala wok ya we Jehova i givim long fasbon Pikinini blong hem, man ya i no save kasem save long Baebol. ?From wanem? From we Jehova i mekem Pikinini blong hem i kam impoten man ya we bambae i mekem olgeta stamba tingting blong Hem oli kamtru. (Kol. 1:17-20) Ol profet tok blong Baebol oli soemaot samting ya. (Rev. 19:10) Jehova bambae i yusum Jisas Kraes blong finisim olgeta trabol we oli kamaot from stronghed fasin blong Setan mo sin blong Adam.—Hib. 2:5-9, 14, 15.

Sipos wan man i wantem kasem save long bigfala wok blong Jisas, hem i mas luksave se ol man nomo oli no naf blong winim ol trabol. Yumi evriwan yumi bon wetem sin. Long ful laef blong yumi, sin ya i gat paoa long yumi long defdefren rod. Biaen, sin ya bambae i mekem se yumi ded. (Rom 3:23; 5:12) Yu mas mekem ol man we yu prij long olgeta, oli tingting gud long trutok ya. Afta, yu save eksplenem se Jehova we i lavem yumi, i yusum sakrefaes blong Jisas Kraes blong mekem rod blong ol man we oli bilif long sakrefaes ya oli kam fri long sin mo ded. (Mak 10:45; Hib. 2:9) Samting ya i openem rod blong oli kasem laef we i stret gud olgeta blong olwe. (Jon 3:16, 36) Oli no save kasem laef ya long wan narafala rod bakegen. (Wok 4:12) Nomata se yu tijim man long haos blong hem no long kongregesen, i no naf blong talemaot nomo ol trutok ya. Yu mas gat kaen fasin mo longfala tingting, nao sloslo, bambae man i wantem mekem sam samting blong talem tangkiu from wok we Jisas i mekem blong pemaot sin blong yumi. Taem man ya i wantem mekem olsem, hemia i save jenisim tingting mo fasin blong hem mo ol samting we hem i stap traehad from.—2 Kor. 5:14, 15.

Jisas i givim laef blong hem olsem wan sakrefaes, wan taem nomo. (Hib. 9:28) Naoia, hem i stap wok olsem Hae Pris. Yu mas givhan long ol narafala blong oli kasem save long wok ya blong Hae Pris. ?Olsem wanem? ?Ol man oli stap wari, oli harem nogud, oli safa, mo ol man raonabaot long olgeta oli mekem i nogud long olgeta? Taem Jisas i laef long wol ya olsem wan man, hem tu i kasem ol trabol ya. Hem i kasem save se yumi harem olsem wanem. Yumi wantem we God i sore long yumi from we yumi sinman. Yumi mas prea long God mo yumi mas askem long hem blong i yusum sakrefaes blong Jisas blong fogivim yumi. Long rod ya, Jisas i kam “man blong givhan long yumi, blong toktok long Papa blong yumi long saed blong yumi.” Jisas i sore long yumi, nao i “toktok long God . . . from yumi.” (1 Jon 2:1, 2; Rom 8:34) From sakrefaes blong Jisas mo wok we hem i mekem olsem Hae Pris, yumi save kam “long fes blong God we hem i stap givhan long yumi long gladhat blong hem,” nao yumi save kasem help long stret taem we yumi nidim. (Hib. 4:15, 16) Nating se yumi sinman, be wok we Jisas i mekem olsem Hae Pris, i save givhan long yumi blong mekem wok blong God wetem wan tingting we i klin.—Hib. 9:13, 14.

Mo tu, God i givim bigfala paoa long Jisas blong hem i wok olsem Hed blong Kristin kongregesen. (Mat. 28:18; Efes. 1:22, 23) Long rod ya, Jisas i lidim yumi blong mekem ol samting we God i wantem. Taem yu tijim ol narafala, yu mas givhan long olgeta blong oli kasem save se Jisas Kraes nao i hed blong kongregesen, be i no wan man. (Mat. 23:10) Long fas taem we yu yu storian wetem wan man we i laekem trutok, i gud yu singaot hem i kam long ol miting blong kongregesen. Long ples ya, yumi stadi Baebol, mo yumi yusum ol buk mo magasin we “slef ya we i stret mo waes” i givim blong halpem yumi. Yu eksplenem long hem, hu ya “slef” ya mo hu ya Masta tu, blong hem i kasem save se Jisas nao i Hed blong kongregesen. (Mat. 24:45-47, NW) Yu tekem hem i go sekhan long ol elda blong hem i save olgeta, mo yu eksplenem ol fasin we Baebol i talem se ol elda oli mas gat blong oli save mekem wok ya. (1 Tim. 3:1-7; Taet. 1:5-9) I gud yu eksplenem long hem se kongregesen i no blong ol elda, be ol elda oli givhan long yumi blong folem Kraes. (Wok 20:28; Efes. 4:16; 1 Pita 5:2, 3) Yu givhan long hem blong i luksave se i gat wan kampani blong ol brata long olgeta ples blong wol, mo kampani ya i wok folem plan aninit long Kraes we i Hed blong kongregesen.

Ol Gospel oli talem se smoltaem bifo we Jisas i ded, hem i kamtru long Jerusalem, nao ol disaepol oli presem hem se hem i ‘King ya we i kam long nem blong Jehova.’ (Luk 19:38) Taem ol man oli stadi dip long Baebol, oli lanem se Jehova i givim paoa finis long Jisas blong i rul, mo rul blong hem i gat paoa long ol man blong olgeta kantri. (Dan. 7:13, 14) Taem yu givim wan tok long kongregesen no yu mekem wan Baebol stadi, yu mas givhan long ol man blong oli tinghae long Jisas mo ol samting we rul blong hem i mekem long ol man.

I gud yu talem klia long olgeta se fasin blong laef blong yumi i soemaot sipos yumi rili bilif we Jisas Kraes i King, mo sipos yumi glad blong stap aninit long rul blong hem. Yu tokbaot wok we Jisas i givim long ol man blong hem blong mekem, taem hem i kam King. (Mat. 24:14; 28:18-20) Yu tokbaot wanem we Jisas, Nambawan Man blong Givim Advaes i talem, taem hem i tokbaot ol samting we oli mas impoten moa long laef blong yumi. (Aes. 9:6, 7, NW; Mat. 6:19-34) I gud yu pulum tingting blong olgeta i go long fasin we Pikinini ya blong King, we Hem i Stamba blong Pis, i talem se ol man blong hem oli mas gat. (Mat. 20:25-27; Jon 13:35) Yu mas lukaot gud blong yu no jajem narafala se i no stap mekem evri samting we hem i mas mekem. I moa gud yu pulum ol man blong oli tingbaot se ol aksen blong olgeta oli soemaot sipos oli stap aninit long rul blong Kraes, no nogat. Mo yu tu yu mas tingbaot samting ya long laef blong yu.

Yu Putum Kraes Olsem Fandesen. Baebol i talem se wok ya blong mekem man i kam disaepol blong Kraes, i sem mak long fasin blong bildim wan haos, we Jisas Kraes nao i olsem fandesen blong hem. (1 Kor. 3:10-15) Sipos yu wantem se bilif blong ol man i stanap strong long fandesen ya, yu mas givhan long olgeta blong oli save Jisas olsem we Baebol i tokbaot hem. Yu mas lukaot gud se oli no lukluk i go long yu nao olsem man we oli mas folem. (1 Kor. 3:4-7) Yu mas pulum tingting blong olgeta i go long Jisas Kraes nomo.

Sipos yu putum gudfala fandesen ya, olgeta we oli stadi Baebol bambae oli kasem save se Jisas i olsem wan eksampol we oli save “biaen long hem.” (1 Pita 2:21) Sipos yu wantem bildimap bilif blong olgeta antap long fandesen ya, yu mas pulum olgeta blong oli ridim ol Gospel. Olsem nao, bambae oli save ol samting we i bin hapen bifo, mo bambae oli kasem save tu long ol samting we Jisas i mekem olsem eksampol we oli mas folem. I gud yu givhan long olgeta blong oli tingbaot mo folem ol fasin mo tingting blong Jisas. Yu pulum olgeta blong oli makem se Jisas i tingting olsem wanem long Papa blong hem, mo wanem samting we Jisas i mekem blong winim ol trabol mo ol samting we oli traem hem. Mo tu, oli mas makem se hem i stap daon aninit long han blong God, mo hem i mekem ol gudfala fasin long ol man we hem i mitim olgeta long defdefren ples. Yu eksplenem wok we Jisas i mekem olsem nambawan wok long laef blong hem. Biaen, taem man we i stadi i mekem ol desisen long laef blong hem, mo i fesem ol samting we oli traem hem, bambae hem i tingbaot se: ‘?Bambae Jisas i mekem wanem sipos hem i fesem sem samting olsem mi? ?Rod we mi mi folem, bambae i soemaot klia se mi mi wantem talem tangkiu from ol samting we Jisas i mekem long mi?’

Taem yu toktok long fored blong kongregesen, yu no mas ting se from we ol brata mo sista oli bilif finis long Jisas, i no nid blong yu pulum tingting blong olgeta i go long hem. Samting we yu talem bambae i gat moa paoa sipos yu traem bildimap bilif blong olgeta long Jisas. Taem yu tokbaot ol miting, yu mas joenem olgeta wetem wok blong Jisas olsem Hed blong kongregesen. Taem yu tokbaot wok blong prij, i gud yu mekem olgeta oli tingbaot strong tingting we Jisas i gat taem hem i mekem wok blong prij long wol ya. Mo i gud yu tokbaot se wok blong prij nao hem i rod we King ya Jisas Kraes i yusum blong hivimap ol man, blong oli laef long niufala wol.

I klia se ol man oli mas mekem plante moa samting, i bitim we oli gat save long Jisas. Sipos oli wantem kam ol tru Kristin, oli mas bilif long Jisas mo oli mas lavem hem. Sipos oli lavem hem, bambae oli obei long hem. (Jon 14:15, 21) Bambae oli stanap strong long bilif, taem ol narafala oli agensem olgeta. Bambae oli gohed blong wokbaot folem Jisas evri dei long laef blong olgeta. Bambae oli kam bigman long ol Kristin fasin, mo oli stanap strong long fandesen ya Kraes, “olsem we rus blong tri i holemtaet graon.” (Efes. 3:17) Sipos oli gohed olsem, oli save leftemap nem blong Jehova, God ya we i Papa blong Jisas Kraes.

“GUD NIUS YA BLONG KINGDOM”

TAEM Jisas i givim save long saen ya we i soemaot se hem i stap mo rabis wol ya klosap i finis, hem i talem se: “Gud nius ya blong kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.”—Mat. 24:14, NW.

?Wanem nius ya we i mas goaot long olgeta ples blong wol? Hemia nius blong Kingdom blong God we Jisas i tokbaot long prea we hem i tijim yumi long hem, se: “Plis, yu mekem kingdom blong yu i kam.” (Mat. 6:10, NW) Revelesen 11:15 i tokbaot kingdom ya se hem i “paoa [“kingdom,” NW] blong Hae God blong yumi, wetem Mesaea blong hem.” Vas ya i talem olsem from we paoa blong rul i kamaot long Jehova, mo hem i givim paoa ya long Jisas, blong hem i rul olsem King. Gud nius ya we Jisas i tokbaot i bigwan moa long taem blong yumi, i bitim long taem blong ol man blong hem bifo. Long taem bifo, oli talemaot long ol man se: “Kingdom blong God i kam klosap long yufala finis.” (Luk 10:9, NW) Long taem ya, Jisas, we God i jusum hem blong i kam King, i stap wetem olgeta. Be tok we Jisas i talem long Matiu 24:14, i stap tokbaot nius blong wan narafala impoten samting blong mekem stamba tingting blong God i kamtru, mo ol man bambae oli talemaot samting ya long olgeta ples blong wol.

Profet Daniel i luk wan vison blong impoten samting ya. Hem i luk “wan man we i olsem man blong wol ya,” hemia Jisas Kraes. “Oli givim paoa blong rul mo haenem mo kingdom long hem, blong olgeta pipol, mo olgeta neson, mo olgeta lanwis, bambae oli mekem wok blong hem.” (Dan. 7:13, 14, NW) Samting ya we i impoten tumas, i hapen long yia 1914. Biaen, oli sakem Setan mo ol rabis enjel blong hem, oli aot long heven oli kamdaon long wol. (Rev. 12:7-10) Long taem ya, ol las dei blong rabis wol ya oli stat. Be bifo we oli finis olgeta, nius ya se Mesaea mo King i stap rul long heven, i mas goaot long olgeta ples blong wol. Olgeta man oli mas kasem woning. Fasin blong olgeta blong lesin no blong no lesin, i soemaot tingting we oli gat long Man ya we i Hae Olgeta, we hem i rul antap long “kingdom blong ol man.”—Dan. 4:32, NW.

!I tru se i gat plante moa samting i mas kamtru yet—plante we plante! Yumi gohed blong prea se, “Plis, yu mekem kingdom blong yu i kam.” Yumi save se Kingdom blong God i stanap finis. Be yumi gohed blong prea olsem from we yumi wantem se Kingdom ya long heven bambae i tekem strong aksen blong mekem profet tok blong Daniel 2:44 mo Revelesen 21:2-4 i kamtru. Bambae Kingdom ya i mekem wol i kam paradaes, we i fulap gud long ol man we oli lavem God mo oli lavem ol Kristin brata mo sista blong olgeta. Taem yumi talemaot “gud nius ya blong kingdom,” yumi stap tokbaot ol promes ya we bambae oli kamtru. Be yumi talemaot klia tu se Jehova i givim paoa finis long Pikinini blong hem blong i rulum wol ya. ?Olsem wanem? Taem yu stap talemaot Kingdom, ?yu yu stap mekem gud nius ya i kamaot klia?

Eksplenem Kingdom. Wok ya blong talemaot Kingdom blong God i wan wok we yumi mas mekem. ?Yumi mekem wok ya olsem wanem? Maet yumi save storian long plante defdefren samting blong pulum tingting blong man, be yumi mas kwik blong mekem i klia se nius we yumi tokbaot, hem i nius blong Kingdom blong God.

Wan impoten haf blong wok ya, hemia blong ridim mo eksplenem ol vas blong Baebol we oli tokbaot Kingdom. Taem yu tokbaot Kingdom, yu mas meksua se ol man we yu toktok long olgeta oli kasem save se Kingdom i olsem wanem. I no naf blong talem nomo se Kingdom blong God i wan gavman. Maet i no isi blong kasem save long wan gavman we yumi no save luk. Yu save yusum defdefren rod blong givhan long ol man we oli no kasem save long samting ya. Yu save tokbaot win. Man i no save luk win be hem i save luk ol lif we oli muvmuv. Yumi no save luk God we i mekem win, be i klia se hem i gat bigfala paoa. Baebol i tokbaot hem se hem i “King we rul blong hem i stap oltaem nomo, gogo i no save finis.” (1 Tim. 1:17) Narafala samting we yu save mekem man i tingbaot, se long ol bigfala kantri, i gat plante man we oli neva go long kapital blong kantri ya, mo oli neva luk man we i stap rul antap long olgeta. Oli save ol samting ya from ol tok long niuspepa mo radio nomo. Long sem fasin, Baebol, we oli raetem finis long bitim 2,200 lanwis, i talemaot Kingdom blong God long yumi, i mekem yumi save hu man ya we i kasem paoa blong rul long ol narafala, mo samting we Kingdom ya i stap mekem. Wok blong Wajtaoa we oli printim long plante moa lanwis evri manis, i blong “Talemaot Kingdom Blong Jehova,” olsem oli raetem i stap long fored blong magasin ya.

Sipos yu wantem givhan long ol man blong oli kasem save long Kingdom, yu save tokbaot sam samting we olgeta oli wantem se gavman i mekem, olsem: givim ol samting blong oli save harem gud long laef, putum pis, finisim fasin blong brekem loa, mekem i sem mak long ol man blong defdefren kantri mo kala, givim edukesen, mo lukaot gud long helt. I gud yu soemaot klia se Kingdom blong God nomo bambae i mekem we ol man oli kasem olgeta samting ya mo ol narafala gudfala samting we oli wantem.—Sam 145:16.

Yu traem pulum olgeta blong oli wantem kam ol man we oli obei long Kingdom ya we Jisas Kraes i King blong hem. Yu save tokbaot ol merikel we Jisas i mekem taem hem i stap long wol, blong soemaot se long fiuja, bambae hem i mekem ol merikel wetem paoa we hem i gat olsem King long heven. Oltaem yu save tokbaot ol gudfala fasin we hem i bin soemaot. (Mat. 8:2, 3; 11:28-30) Yu eksplenem se hem i ded from yumi, mo biaen, God i mekem hem i laef bakegen, i go antap long heven long wan gudfala bodi we i blong laef wetem God. Long ples ya nao, hem i rul olsem King.—Wok 2:29-35.

Yu talemaot klia se Kingdom blong God i stap rul long heven. Be bighaf blong ol man oli no ting se ol trabol we oli luk naoia i soemaot se Kingdom blong God i stap rul. Yu mas kasem save long tingting blong olgeta. Yu askem long olgeta sipos oli save long saen ya we Jisas Kraes i talem se bambae i makemaot taem ya we hem i stap rul. Yu save soem sam vas long Matiu japta 24, Mak japta 13, mo Luk japta 21 we oli tokbaot saen ya. Biaen, yu askem long olgeta from wanem ol trabol ya oli kamaot long wol taem Jisas i kam King long Kingdom blong God long heven. Nao yu pulum tingting blong olgeta i go long Revelesen 12:7-10, 12.

Yu save ridim Matiu 24:14 blong soem long ol man wanem samting we Kingdom blong God i stap mekem. Mo yu tokbaot bigfala wok blong tijim ol man long Baebol we i stap gohed long olgeta ples blong wol. (Aes. 54:13) Yu save tokbaot ol defdefren skul we ol Witnes blong Jehova oli mekem blong trenem olgeta long wok ya. Ol skul ya oli fri, mo Baebol nomo i stamba blong olgeta. Yu save eksplenem tu se, antap long wok blong prij long ol haos wanwan we i stap gohed long bitim 230 kantri, yumi mekem ol fri Baebol stadi wetem ol man mo ol famle long haos blong olgeta. ?Olsem wanem? ?I gat wan gavman blong man we i naf blong wokem wan bigfala program olsem blong tijim ol man, i no ol man blong wan kantri nomo, be olgeta man long wol? Yu singaot olgeta oli kam long Haos Kingdom blong ol Witnes blong Jehova mo long ol asembli, blong oli save luk olsem wanem tijing ya i stap givhan long laef blong ol man.—Aes. 2:2-4; 32:1, 17; Jon 13:35.

?Olsem wanem? ?Man blong haos i kasem save se Kingdom ya i save gat paoa long laef blong hem? Maet yu save talem long kaen fasin se yu yu kam luk hem blong tokbaot janis we olgeta man oli gat blong jusum laef aninit long rul blong Kingdom blong God. ?Oli mas mekem wanem? Oli mas lanem ol samting we God i wantem se oli mekem, mo oli mas folem long laef blong olgeta.—Dut. 30:19, 20; Rev. 22:17.

Yu Givhan Long Narafala Blong i Lukaot Kingdom Fastaem. Taem wan man i bilif long gud nius blong Kingdom, i gat sam desisen we hem i mas mekem. ?Bambae hem i putum Kingdom blong God long fasples long laef blong hem? Jisas i talem long ol disaepol blong hem se oli mas “gohed blong lukaot kingdom mo stret fasin blong hem fastaem.” (Mat. 6:33, NW) ?Yu save givhan olsem wanem long ol Kristin brata mo sista blong oli mekem samting ya? Yu soemaot wan gudfala eksampol, mo yu tokbaot ol janis we yumi gat blong lukaot Kingdom fastaem. Yu givhan long olgeta blong oli tingbaot sam rod blong lukaot Kingdom fastaem, mo yu tokbaot wanem samting we sam narafala oli stap mekem. Yu toktok long fasin we i pulum olgeta blong lavem Jehova moa, taem yu tokbaot ol stori blong Baebol. Yu tokbaot klia ol samting we Kingdom i stap mekem we oli soemaot se hem i rul. Yu mas mekem olgeta oli save se wok blong talemaot gud nius blong Kingdom i impoten tumas. Nambawan samting blong givhan long ol narafala, i blong pulum olgeta blong oli wantem mekem wok, be i no blong talem long olgeta wanem samting we oli mas mekem.

I klia se, impoten nius ya we yumi evriwan i mas talemaot, i tokbaot Jehova, Jisas Kraes, mo Kingdom. Ol samting ya nao oli ol impoten trutok we yumi mas tokbaot long wok blong prij, long kongregesen, mo long laef blong yumi wanwan. Taem yumi mekem olsem, yumi soemaot we Tiokratik Skul i stap givhan gud long yumi.