Japta Wan

Joengud Long Wosip Tede—?Hem i Minim Wanem?

1, 2. (a) ?Wanem bigfala samting we i stap hapen tede? (b) ?Ol man we oli laekem God oli putum tingting blong olgeta i stap strong long wanem gudfala fiuja?

RAON long wol, wan bigfala samting i stap hapen. Hemia se plante milian man blong olgeta nesen, laen mo lanwis oli stap joengud tugeta blong wosip. Evri yia i gat plante moa man we oli stap joen long wosip ya. Baebol i tokbaot olgeta man ya se oli ol “witnes” blong Jeova mo i talem se oli wan ‘bigfala hip blong man.’ Olgeta ya oli stap mekem ‘wosip long God long dei mo long naet.’ (Aesea 43:10-12; Revelesen 7:9-15) ?From wanem oli mekem olsem? From we oli kasem save long Jeova se hem wan nomo i trufala God. Samting ya i pusum olgeta blong jenisim laef blong olgeta mo mekem i laenap wetem ol rul blong Hem we oli stretgud. Mo tu, ol man ya oli lanem se yumi laef naoia long ol “lasdei” blong rabis wol ya. I no longtaem, bambae God i mas spolem rabis wol ya mo wokem wan niufala wol we paradaes i stap long hem.—2 Timoti 3:1-5, 13; 2 Pita 3:10-13.

² Tok Blong God i promes se: “Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:10, 11) “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

3. ?Wanem i mekem se ol man oli save joengud tugeta blong wosip?

³ Ol man ya we oli stap joen naoia long trufala wosip, bambae oli ol faswan man blong laef long niufala wol. Oli lanem finis wanem samting we God i wantem olgeta blong mekem, mo oli traem bes blong olgeta blong mekem ol samting ya i wok long laef blong olgeta. Jisas i soem se i impoten blong mekem olsem, taem hem i se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” ( Jon 17:3) Aposol Jon i raetem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:17.

?Hemia i Soemaot Wanem?

4. (a) ?Fasin ya we plante moa man long taem blong yumi oli stap hivap wanples blong wosip tugeta, hem i soemaot wanem? (b) ?Olsem wanem Baebol i tokbaot taem ya we ol man oli hivap wanples long trufala wosip?

⁴ ?Fasin ya we plante man long taem blong yumi oli stap hivap wanples blong wosip tugeta, hem i soemaot wanem? Hem i wan klia pruf se yumi stap klosap tumas long taem ya we bambae rabis wol i lus, mo niufala wol blong God bambae i stat stret afta long samting ya. Ol profet tok blong Baebol oli tokbaot taem ya we plante man bambae oli hivap wanples long trufala wosip mo yumi save luk stret long ae blong yumi se ol profet tok ya oli stap kamtru. Wan long ol profet tok ya i talem se: “Mo long laswan haf blong ol dei [ol las dei ya], bambae bigfala hil blong haos blong Jeova [trufala wosip blong hem] i stanap strong mo i hae moa long ol bigfala hil [ol giaman wosip], . . . mo ol pipol oli mas kam wanples long hem, we oli fulap. Tru ya, bambae plante nesen oli go mo oli talem se: ‘Yufala i kam. Yumi go antap long hil blong Jeova, long haos blong God blong Jekob. Mo hem bambae i tijim yumi long ol wei blong hem, mo bambae yumi wokbaot long ol rod blong hem.’ ”—Maeka 4:1, 2, NW; Ol Sam 37:34.

5, 6. (a) ?From wanem yumi save talem se ol nesen oli stap kam long Jeova? (b) ?Wanem ol kwestin we yumi mas askem long yumi wan?

⁵ I tru se i no gat sam nesen fulwan we oli kam insaed long haos wosip blong Jeova long saed blong spirit. Be plante milian man we oli kamaot long ol nesen ya, oli stap mekem olsem. Taem ol man ya oli kasem save se God i gat wan stamba tingting long saed blong fiuja mo oli lanem ol nambawan fasin blong Jeova God, oli stat lavem Hem. From we oli gat tingting daon, oli wantem save wanem samting we God i wantem blong oli mekem. Prea blong olgeta i sem mak long hemia we man blong raetem Sam i mekem se: “Yu yu God blong mi, plis yu tijim mi blong mi mekem ol samting we yu yu wantem.”—Ol Sam 143:10.

⁶ ?Yu yu stap long medel blong bigfala hip man ya we Jeova i stap karem olgeta i kam naoia blong joengud long wosip? ?Yu yu luksave se Jeova i Stamba blong tijing we yu stap kasem long Baebol? ?Yu yu stap soemaot long laef blong yu, we yu rili gat tangkiu from tijing ya? ?Bambae yu yu traehad fulwan blong “wokbaot long rod blong hem”?

?Olsem Wanem Fasin Joengud i Kamtru?

7. (a) ?Fasin blong joengud tugeta long wosip bambae i mas kasem wanem mak? (b) ?From wanem yumi mas hareap blong kam wan man blong wosipim Jeova naoia, mo olsem wanem yumi save halpem ol narafala man tu blong mekem sem mak?

⁷ Jeova i wantem se evri laef samting we oli gat waes, oli mas joen tugeta long trufala wosip. !Yumi wantem tumas blong stap long taem ya we bambae olgeta man long wol ya oli wosipim trufala God nomo! (Ol Sam 103:19-22) Be bifo we samting ya i save kamtru, Jeova i mas spolem olgeta man we oli no wantem mekem ol samting we hem i wantem. From we Jeova i gat sore, hem i givim woning fastaem, nao ol man long evri ples oli gat janis blong jenisim fasin blong laef we oli stap folem. (Aesea 55:6, 7) Taswe, long taem blong yumi, ol man blong “evri kala, mo kantri, mo laen, mo lanwis,” oli stap harem impoten mesej ya se: “Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.” (Revelesen 14:6, 7) ?Yu yu lesin long mesej ya? Sipos yes, yu gat janis naoia blong singaot sam narafala man bakegen blong olgeta tu oli kasem save long trufala God mo mekem wosip long hem.

8. ?Afta we yumi lanem ol stamba tijing blong Baebol, yumi mas wantem gohed olsem wanem?

⁸ Plante man oli talem se oli bilif long God be oli gohed nomo blong ronem ol samting we olgeta nomo i wantem. Jeova i no wantem se ol man oli wosipim hem olsem. Hem i wantem we ol man oli kasem “stret save blong hem,” mo folem save ya long laef blong olgeta. (Kolosi 1:9, 10, NW ) Taswe, ol man we oli gat tangkiu from ol stamba tijing blong Baebol we oli lanem, oli wantem gohed nomo blong kam Kristin bigman. Oli wantem frengud moa wetem Jeova. Oli wantem mekem save blong olgeta long Tok Blong God i kam bigfala moa, mo i kam dip moa. Oli wantem mekem save ya i wok fulwan long laef blong olgeta. Long fasin blong olgeta mo long tingting blong olgeta, oli traehad blong mekem olsem Papa blong olgeta long heven. Samting ya i pusum olgeta blong faenem olkaen wei blong joen long wok ya blong sevem laef, we God i stap yusum ol man blong mekem long wol tede. ?Hemia nao samting we yu yu wantem mekem?—Mak 13:10; Hibrus 5:12–6:3.

9. ?Long wanem rod yumi save gat trufala fasin joengud naoia?

⁹ Baebol i soem se olgeta we oli mekem wok blong Jeova oli mas ol man we oli joengud wanples. (Efesas 4:1-3) Fasin ya blong joengud i stat finis naoia, nating se yumi stap long wan wol we ol man blong hem oli seraot mo nating se yumi wanwan i mas faet yet agensem ol slak fasin blong yumi. Jisas i prea from ol disaepol blong hem blong oli kam wan nomo, mo oli harem gud long trufala fasin joen. ?Hemia i minim wanem? Fastaem, hemia i min se ol disaepol ya bambae oli gat wan gudfala fasin fren wetem Jeova mo Pikinini blong hem. Mo seken samting se, ol disaepol ya bambae oli joengud tugeta. ( Jon 17:20, 21) Blong kasem tufala mak ya, Jeova i yusum Kristin kongregesen blong tijim ol man blong hem.

Sam Stamba Poen We Oli Leftemap Fasin Joengud

10. (a) ?Taem yumi yusum Baebol blong tingting gud mo faenem ansa long ol kwestin blong yumi, wanem samting we yumi gru moa long hem? (b) Ansa long ol kwestin ya mo tingting gud long ol poen we oli leftemap Kristin fasin joengud.

¹⁰ I gat seven stamba poen we oli leftemap fasin joengud long wosip. Ol poen ya oli stap daon. Taem yu ansa long ol kwestin we oli stap daon, yu mas tingbaot olsem wanem ol wanwan poen ya oli laenap wetem fasin blong yu blong frengud wetem Jeova mo ol Kristin brata sista blong yu. Yu mas tingting gud long ol poen ya mo jekemap ol vas we oli no raetem toktok blong olgeta long buk ya. Samting ya i save givhan long yu blong gru long waes blong God, fasin blong yusum tingting, mo fasin luksave—hemia ol fasin we yumi evriwan i nidim. (Ol Proveb 5:1, 2; Filipae 1:9-11) Tingbaot evri poen ya wanwan.

(1) Yumi agri se Jeova i gat raet blong stanemap ol rul se wanem fasin i gud mo wanem fasin i nogud. “Yu mas trastem Jeova long ful hat blong yu. Yu no mas stanap long prapa waes blong yu nomo. Long olgeta samting we yu yu mekem, lesin long hem, mo hem bambae i mekem ol rod blong yu oli stret.”—Ol Proveb 3:5, 6, NW.

?Taem yumi mekem ol disisen, from wanem yumi mas lukaot advaes blong Jeova mo letem hem i lidim yumi? (Ol Sam 146:3-5; Aesea 48:17)

(2) Yumi gat Tok Blong God blong lidim yumi. “Taem mifala i tekem tok blong God i kam long yufala, yufala i kasemgud. Yufala i no tekem olsem we i tok blong man nomo, yufala i kasemgud from we hem i tok blong God stret. Mo God i stap wok yet long laef blong yufala ya we i bilif long hem.”—1 Tesalonaeka 2:13.

?Wanem trabol i save kamaot sipos yumi mekem ol samting nomo we yumi “ting ” se i stret? (Ol Proveb 14:12; Jeremaea 10:23, 24; 17:9)

?Sipos yumi no save wanem advaes we Baebol i givim long wan bisnes, yumi mas mekem wanem? (Ol Proveb 2:3-5; 2 Timoti 3:16, 17)

(3) Yumi evriwan i folem sem program blong kakae long saed blong spirit. “Olgeta pikinini blong yu, bambae Jeova i tijim olgeta.” (Aesea 54:13, NW ) “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.”—Hibrus 10:24, 25.

?Olgeta we oli stap tekem evri kakae long saed blong spirit we Jeova i stap givim, oli save kasem wanem blesing? (Aesea 65:13, 14)

(4) Lida blong yumi hemia Jisas Kraes, i no wan man blong wol ya. “Bambae yufala i no letem ol man oli singaot yufala se ‘Tija’, from we yufala i gat wan tija nomo, mo yufala evriwan i brata. Mo bambae yufala i no singaot wan man long wol ya se ‘Papa’, from we yufala i gat wan Papa nomo blong yufala, we hem i stap long heven. Mo bambae yufala i no letem ol man oli singaot yufala se ‘Masta’ [no, “Lida,” NW ], from we yufala i gat wan Masta [“Lida,” NW] nomo blong yufala, we hemia mi ya, mi Mesaea.”—Matiu 23:8-10.

?I stret we wan long yumi i ting se hem i hae moa long narafala? (Rom 3:23, 24; 12:3)

(5) Yumi lukluk i go long Kingdom Blong God olsem rod ya nomo blong sevem ol man. “Yufala i mas prea olsem: ‘Papa blong mifala long heven, nem blong yu i tabu. Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.’ . . . Yufala i mas gohed blong lukaot kingdom mo stret fasin blong hem fastaem.”—Matiu 6:9, 10, 33, NW.

?Olsem wanem fasin blong ‘lukaot kingdom fastaem’ i halpem yumi blong holem fasin joengud oltaem? (Maeka 4:3; 1 Jon 3:10-12)

(6) Tabu spirit i wokem ol gudgudfala fasin long ol man we oli wosipim Jeova. Ol fasin ya oli mekem ol Kristin oli joengud. “Tabu Spirit, hem i stap mekem ol man oli gat narafala fasin. Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. Hem i stap mekem we olgeta oli kwaet man, mo oli save blokem ol samting we olgeta nomo oli wantem.”—Galesia 5:22, 23.

?Wanem samting we yumi mas mekem sipos yumi wantem we tabu spirit blong God i wokem ol gudgudfala fasin long yumi? (Ol Wok 5:32)

?Olsem wanem tabu spirit blong God i givhan long yumi blong frengud wetem ol narafala Kristin brata sista? ( Jon 13:35; 1 Jon 4:8, 20, 21)

(7) Olgeta man we oli wosipim God tru, oli joen long wok blong talemaot gud nius blong Kingdom blong hem. “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.”—Matiu 24:14.

?Wanem samting i mas pusum yumi blong wantem joen fulwan long wok blong prij? (Matiu 22:37-39; Rom 10:10)

11. ?Taem yumi mekem trutok blong Baebol i wok long laef blong yumi, yumi kasem wanem blesing?

¹¹ Taem yumi joengud tugeta long wosip blong Jeova, yumi kam klosap moa long hem mo yumi gat janis tu blong harem gud long kampani blong ol narafala man blong bilif, olsem we yumi harem gud blong dring kolwota. Ol Sam 133:1 i talem se: “!Olgeta! I gud tumas taem ol man blong God oli stap wanples, we oli gat wan tingting nomo. Fasin ya i gud tumas.” !Tru ya, yumi harem gud tumas taem yumi aot long ol man blong wol we oli tingbaot olgeta nomo, oli mekem fasin we i nogud, mo oli raf, nao yumi kampani wetem ol man we oli rili lavem Jeova mo we oli obei long ol loa blong hem!

Sakemaot Ol Fasin We Oli Seraotem Man

12. ?From wanem yumi mas traehad blong blokem tingting ya blong independen?

¹² Sipos yumi no wantem spolem fasin joengud blong yumi long fulwol, yumi mas sakemaot ol samting we oli save seraotem yumi. Wan long ol samting ya hemia tingting blong wantem kam independen, blong no moa letem God mo ol loa blong hem i lidim yumi. Jeova i givhan long yumi blong blokem tingting ya taem hem i soemaot se Setan nao i stamba blong hem. (2 Korin 4:4; Revelesen 12:9) Setan nao i pulum Adam mo Iv blong ting nating long wanem we God i bin talem. Hem nao i pulum tufala blong tekem wan disisen we i agensem samting we God i wantem. From disisen ya, tufala i pulum trabol i kam long tufala mo long yumi evriwan. ( Jenesis 3:1-6, 17-19) Wol ya i fulap gud wetem tingting ya blong stap independen long God mo ol loa blong hem. Taswe yumi mas traehad blong blokem tingting ya blong i no kam spolem yumi.

13. ?Wanem samting bambae i soem se yumi stap wok rere blong laef long niufala wol blong stret fasin?

¹³ Tingbaot nambawan promes blong Jeova se bambae hem i tekemaot rabis wol blong naoia mo putum wan niufala heven mo niufala wol long ples blong hem, we “stret fasin nomo bambae i stap long hem.” (2 Pita 3:13) ?Promes ya i pusum yu blong wantem stat naoia blong rerem laef blong yu blong stap long wol ya we stret fasin bambae i rul? Hemia i min se yumi mas folem advaes ya blong Baebol we i klia nomo se: “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi.” (1 Jon 2:15) Taswe, yumi blokem ol fasin mo tingting we oli lidim wol tede—olsem fasin blong folem prapa tingting blong yumi, fasin blong tingbaot yumi wan nomo, ol rabis fasin mo raf fasin. Yumi lesin long Jeova oltaem mo obei long hem wetem fulhat blong yumi, nating se ol slak fasin blong yumi oli save pulum yumi. Ful laef blong yumi i mas soemaot se God nomo i stap lidim ol tingting mo fasin blong yumi.—Ol Sam 40:8.

14. (a) ?From wanem i impoten blong holem janis naoia blong lanem ol fasin we Jeova i wantem mo folem long laef blong yumi? (b) ?Ol vas long paragraf ya oli soem wanem long yumi wanwan?

¹⁴ Stret taem we Jeova i makemaot blong spolem rabis fasin blong wol mo olgeta we oli laekem ol rabis fasin ya, bambae i kam we i no save let. Bambae hem i no save seftem taem ya i go moa, mo bambae hem i no save jenisim ol rul blong hem from ol man ya we tingting blong olgeta i hafhaf. Ol man olsem oli lanem finis wanem samting we God i wantem, be oli no strong blong mekem ol samting ya from we oli stap fas yet long wol. !Naoia i taem blong wok! (Luk 13:23, 24; 17:32; 21:34-36) Yumi harem gud tumas blong luk se wan bigfala kampani i tekem janis ya, oli wantem tumas we Jeova i tijim olgeta tru long Tok blong hem mo ogenaesesen blong hem. Mo oli joen tugeta blong wokbaot long rod we God i soemaot blong go kasem niufala wol. Moa we yumi save Jeova, moa we bambae yumi lavem hem mo wantem mekem wok blong hem.

Tingtingbak

• ?Wanem bigfala tingting we Jeova i gat long saed blong wosip?

• ?Afta we yumi lanem ol stamba tijing blong Baebol, yumi mas wantem gohed olsem wanem?

• ?Wanem samting we yumi wanwan i save mekem blong bambae yumi joengud wetem ol narafala man we oli wosipim Jeova?

[Tok blong pija long pej 4]

‘Ol man we oli gat tingting daon bambae oli tekem graon ya mo bambae oli harem gud from we oli stap long pis’