HAF 2

Yutufala i Mas Stap Tru Long Yutufala

“From we God i joenem tufala olsem, man i no mas brekem mared blong tufala.”—Mak 10:9

Jehova i wantem se yumi tinghevi long fasin ya blong stap tru. (Maeka 6:8) Fasin ya i mas stap insaed long mared. Sipos i nogat, bambae yutufala i no trastem yutufala. Blong yutufala i save lavlavem yutufala, yutufala i mas trastem yutufala.

Tede, wan samting we i spolem plante mared, hemia taem wan i no stap tru long narawan. Yu save blokem trabol ya, sipos yu gat strong tingting blong mekem tu samting.

1 YU TINGHAE LONG MARED BLONG YU

?BAEBOL I TALEM WANEM? Yumi mas tingbaot ol samting we oli moa impoten. (Filipae 1:10) Wan long ol samting ya, hemia mared. Yu mas tinghae long mared blong yu.

Jehova i wantem se yu putum tingting blong yu long man no woman blong yu nomo. Yutufala i ‘mekem ol samting we oli save mekem yutufala i glad.’ (Prija 9:9) Hem i talem se yutufala i no mas taed long yutufala, nao yutufala i no moa lukaot gud long yutufala. Be yutufala tugeta i mas lukaot rod blong mekem yutufala i stap glad. (1 Korin 10:24) Man no woman blong yu i mas harem save se yu nidim hem mo yu tinghae long hem.

A husband brings his wife a hot beverage; a husband comes home and finds his wife cooking

?YU SAVE MEKEM WANEM?

Yu mas spenem taem wetem hem, we yu no letem wan narafala samting i pulum tingting blong yu
Yu tingbaot oltaem se i gat yu mo hem, be i no yu nomo

A husband and wife spend time together on a picnic

2 YU LUKAOTGUD LONG TINGTING BLONG YU

?BAEBOL I TALEM WANEM? “Man we i luk wan woman, nao i wantem hem tumas, i olsem we hem i slip wetem woman ya finis.” (Matiu 5:28) Sipos wan man i stap tingbaot wan narafala woman, hem i no moa stap tru long woman blong hem.

Jehova i talem se yu mas lukaotgud long “tingting” blong yu. (Ol Proveb 4:23; Jeremaea 17:9) Hemia i min se yu mas lukaotgud long ol samting we yu stap lukluk. (Matiu 5:29, 30) Yu tingbaot gudfala man ya Job. Hem i promes se, sipos hem i luk wan gel, be neva bambae hem i tingting nogud long gel ya. (Job 31:1) Yu no mas lukluk ol rabis pija. Mo tu, yu mas blokem enikaen samting we i save pulum filing blong yu, blong yu laekem wan narafala.

A husband has a picture of his wife on his desk at work

?YU SAVE MEKEM WANEM?

Yu soemaot long fasin mo toktok blong yu, se bambae yu no save brekem promes blong mared
Sipos yu luk se man no woman blong yu i no glad from we yu fren bitim mak wetem wan narafala, yu mas lego fren ya