HAF 5
Holemtaet Pis Wetem Ol Famle Blong Yutufala
‘Yufala i mas mekem i gud long olgeta man. Tingting blong yufala i mas stap daon, mo yufala i mas kwaet man, mo tingting blong yufala i mas longfala.’—Kolosi 3:12
Taem man wetem woman tufala i mared, wan niufala famle i stat. I tru se yu lavem mo respektem papa mo mama blong yu. Be taem yu mared, man no woman blong yu nao i impoten moa. Maet i had blong ol famle blong yu oli agri long tingting ya. Be ol advaes blong Baebol oli save givhan long yu, blong yu holemtaet pis wetem olgeta. Long semtaem, yutufala i wok had blong joen gud olsem wan niufala famle.
1 YU MAS GAT STRET TINGTING LONG OL FAMLE
?BAEBOL I TALEM WANEM? ‘Yu mas ona long papa mo mama blong yu.’ (Efesas 6:2) Nating se yu bigman finis, oltaem yu mas ona long tufala. Be yu mas luksave se man no woman blong yu tu i mas mekem sem mak long papa mo mama blong hem. Baebol i talem se: ‘Man we i stap lavem man, hem i no save jalus.’ Taswe, sipos man no woman blong yu i fren gud wetem papa mo mama blong hem, yu no mas kros.—1 Korin 13:4; Galesia 5:26.
?YU SAVE MEKEM WANEM?
Yu no mas talem ol tok olsem: “Oltaem ol famle blong yu oli daonem mi,” no “Mama blong yu i neva laekem samting we mi mi mekem”
Yu mas luk ol famle blong man no woman blong yu olsem we oli stret famle blong yu
2 YUTUFALA I MAS TALEM STRET
?BAEBOL I TALEM WANEM? “Man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.” (Jenesis 2:24) Nating se yutufala i mared finis, be maet papa mo mama blong yutufala oli harem yet se i wok blong olgeta blong lukaot long yutufala. Samtaem oli save pusum nus blong olgeta long bisnes blong yutufala.
Yutufala nomo i mas agri long samting we oli save mekem blong givhan long yutufala, mo samting we oli no mas mekem. Biaen, yutufala i talem stret long olgeta. Yutufala i toktok kaen long olgeta blong talemaot tingting blong yutufala. (Ol Proveb 15:1) Tingting blong yutufala i mas stap daon, mo yutufala i mas kwaet man, mo tingting blong yutufala i mas longfala. Olsem nao, bambae yutufala i save fren gud wetem ol famle blong yutufala, mo bambae yufala evriwan i save “lavlavem yufala.”—Efesas 4:2.
?YU SAVE MEKEM WANEM?
Sipos yu no glad we papa mo mama blong yutufala oli pusum nus long bisnes blong yutufala, yutufala i save tokbaot tugeta, long taem we i stret
Yutufala i mas agri long wan tingting nomo blong stretem bisnes ya